“Phela akulanto uNkulunkulu ayitshoyo engamehlula ukuyenza.”—ULukha 1:37, INguqulo Yomhlaba Omutsha.

 “Ngoba kuNkulunkulu kakulalutho olwahlulayo.”—ULukha 1:37, The Holy Bible in Ndebele.

 UNkulunkulu uSomandla angenza loba yini engakhanya angani ngeke yenzakale ngokubona kwabantu. Ngeke ehluleke ukwenza into ayikhulumileyo kumbe ayithembisileyo.

 Amanye amaBhayibhili ahumutsha uLukha 1:37 ngokuthi: “Zonke izithembiso zikaNkulunkulu ziyagcwaliseka loba sekutheni,” langokuthi: “Ngoba kuNkulunkulu kakulalutho oluzakwehlula.” Lokhu kungenxa yokuthi konke uJehova a uNkulunkulu akukhulumayo kuyenzakala. Indlela amaBhayibhili la akubeke ngayo ivumelana lalokho okwakumunyethwe yimibhalo yakuqala yesiGrikhi ukuthi loba yini uNkulunkulu ayikhulumayo kumbe ayithembisayo iyagcwaliseka ngoba akulalutho olungamehlula.—U-Isaya 55:10, 11.

 Manengi amanye amavesi alomutsho ohambelana lalowo okuLukha 1:37 akhuluma ngezithembiso zikaNkulunkulu. Ngokwesibonelo, uJehova wakhuluma esebenzisa ingilosi ukuthi umka-Abrahama uSara wayezazithwala esegugile. Wathi: “Kukhona yini okungehlula uJehova?” (UGenesisi 18:13, 14) UJobe wathi esecabangisise ngezinto ezadalwa nguNkulunkulu wathi: “Akulalutho olucabangayo ongehluleka ukulwenza.” (UJobe 42:2) Kanti njalo ngesikhathi abalandeli bakaJesu bebona angani abasoze benelise ukwenza izinto ezifunwa nguNkulunkulu ukuze bafanele ukusindiswa, uJesu wabakhumbuza ukuthi “kuNkulunkulu zonke izinto ziyenzeka.”—UMathewu 19:25, 26. b

 Ingilosi uGabriyeli yatshela intombi egcweleyo engumJuda okuthiwa nguMariya amazwi akuLukha 1:37. UGabriyeli wayesanda kutshela uMariya ukuthi wayezabeletha ‘iNdodana yoPhezukonke’ futhi kwakumele ayinike “ibizo elithi Jesu.” INdodana leyo yayizakuba yiNkosi yoMbuso kaNkulunkulu, ibuse kuze kube nini lanini.—ULukha 1:26-33; ISambulo 11:15.

 UMariya wabuza ingilosi leyo ukuthi kwakuzakwenzakala njani lokhu njengoba wayengatshadanga futhi ‘engakaze alale lendoda.’ (ULukha 1:34, 35) UGabriyeli waphendula wathi uNkulunkulu uzasebenzisa umoya wakhe ongcwele kumbe amandla akhe. Ngalesosikhathi uJesu wayesezulwini eyingilosi elamandla. Ngakho uJehova wasebenzisa umoya wakhe ongcwele ukuze enze ukuthi uJesu azalwe lapha emhlabeni yintombi egcweleyo enguMariya. (UJohane 1:14; KwabaseFiliphi 2:5-7) Yikho uMariya wazithwala ngesimanga. Ukuze ingilosi incede uMariya abe lokholo lokuthi uNkulunkulu uyenelisa ukukwenza lokhu yamtshela lokuthi isihlobo sakhe u-Elizabethi uzithwele umntwana ongumfana “lanxa esegugile.” U-Elizabethi lomkakhe uZakhariya babengelamntwana ngoba u-Elizabethi wayeyinyumba. (ULukha 1:36) Indodana yabo yaba nguJohane uMbhabhathizi futhi uJehova wayesevele ekhulumile ngenkonzo eyayizakwenziwa nguJohane.—ULukha 1:10-16; 3:1-6.

 Engxenye ingilosi uGabriyeli yatsho amazwi akuLukha 1:37 icabanga ngoMariya lo-Elizabethi. Amazwi la aqinisekisa labo abakhonza uJehova ukuthi uzaqhubeka ezigcwalisa izithembiso zakhe. Esinye salezo zithembiso ngesithi uzakhipha bonke ohulumende afake owakhe obuswa yiNdodana yakhe uJesu Khristu ozabusa ngokulunga.—UDanyeli 2:44; 7:13, 14.

 Bukela ividiyo le emfitshane ukuze ubone okumunyethwe libhuku likaLukha.