UKUCHASISWA KWAMAVESI ASEBHAYIBHILINI

UMakho 1:15—“Umbuso KaNkulunkulu Ususondele”

KHALISA

“Isikhathi esibekiweyo sesifikile njalo uMbuso kaNkulunkulu ususeduze. Phendukani libe lokholo ezindabeni ezinhle.”—UMakho 1:15, INguqulo Yomhlaba Omutsha.

“Isikhathi sesiphelile, umbuso kaNkulunkulu ususondele; phendukani, likholwe ivangeli.”—UMakho 1:15, The Holy Bible in Ndebele.

Okutshiwo nguMakho 1:15

UJesu Khristu wathi uMbuso kaNkulunkulu a “ususeduze” kumbe “ususondele” ngenxa yokuthi nguye owayezakuba yiNkosi yoMbuso lowo lanxa wayengakabi yiyo ngalesosikhathi.

UJesu wayengatsho ukuthi uMbuso wawusuqalisile ukubusa ngoba ngokuhamba kwesikhathi watshela abafundi bakhe ukuthi uMbuso wawuzabusa ngesikhathi esizayo. (ImiSebenzi 1:6, 7) UMbuso wawuzafika ngesikhathi esifaneleyo ngoba laye wavela ngawo kanye umnyaka iBhayibhili elalithe kwakuzafika ngawo lowo owayezakuba yiNkosi. b Yikho wathi: “Isikhathi esibekiweyo sesifikile,” esitsho isikhathi sokuthi aqalise inkonzo yakhe yokutshumayela izindaba ezinhle ezimayelana loMbuso.—ULukha 4:16-21, 43.

Ukuze abantu bancedwe zindaba ezinhle kwakumele baphenduke okutsho ukuthi kwakumele bazisole ngenhliziyo yonke ngezono ababezenzile besebephila belandela izimiso zikaNkulunkulu. Labo ababephenduka ezonweni zabo babetshengisa ukuthi bayazikholwa izindaba ezinhle ezimayelana loMbuso owawusiza.

Amanye amavesi asinceda sizwisise uMakho 1:15

UJesu wakhuluma amazwi akuMakho 1:15 eseGalile ngesikhathi eqalisa inkonzo yakhe. Ekhuluma ngendaba efananayo uMathewu 4:17 uthi “kusukela ngalesosikhathi kusiya phambili,” uJesu watshumayela ngoMbuso kaNkulunkulu. UMbuso yiwo owawuyisiqokoqela sezindaba ezinhle ayezitshumayela. Kukhulunywa ngawo izikhathi ezedlula 100 emaVangelini womane c futhi izikhathi ezinengi nguJesu owayekhuluma ngawo. IBhayibhili litshengisa ukuthi uJesu wakhuluma kanengi ngoMbuso kaNkulunkulu ukwedlula loba yiphi eyinye indaba.

Bala uMakho isahluko 1 ku-Nguqulo Yomhlaba Omutsha yokutaditsha etholakala ngesiNgisi. IBhayibhili leli libhalwe ngendlela elula, lilemicijo echasisa amavesi, lilamapikitsha, liyakulayela kwamanye amavesi, lilamavidiyo lamamephu njalo ungakhetha ukulalela elirekhodiweyo.

a UMbuso kaNkulunkulu nguhulumende osezulwini obekwe nguNkulunkulu ukuze agcwalise inhloso yakhe ngomhlaba. (UDanyeli 2:44; UMathewu 6:10) Ukuze uthole okunengi, bala isihloko esithi “Uyini UMbuso KaNkulunkulu?”

b UJesu kwakumele abe yinkosi ukuze enze omunye umsebenzi oqakathekileyo owokuba nguMesiya, okutsho ogcotshiweyo kaNkulunkulu. Ukuze ufunde okunengi ngeziphrofetho ezitshengisa ukuthi uJesu nguMesiya, bala isihloko esithi “Iziphrofetho Eziphathelane LoMesiya.”

c AmaVangeli ngamabhuku okuqala amane eMibhalo yamaKhristu yesiGrikhi ejayele ukubizwa langokuthi liThestamenti Elitsha. Amabhuku la akhuluma ngempilo kanye lenkonzo kaJesu.