Hama no Hanzvaji Jinodiwa:

Kuda katinoita Mwari no vandhu kunotiita kuti ‘tiende kojijisa vandhu vo majinja ese kuti vave vateveri va Jesu uye no kuvabesa kuti vabhabhatijwe’. (Mateu 28:19, 20; Mako 12:28-31) Rudo lo cokwadi rino simba. Irona rino simba lo kubaya mweyo yo vandhu vano “cido cakanaka co upenyu usingaperi.”—Mabasa 13:48.

Kare taibatikana maningi pa kueja kukanda mu musoro mabhuire atingaita no vandhu tapeja tosiya mabhuku. Zvino tinoda kushanda ngo simba kuti tireruse mabhuire edu no vandhu. Tinoda kukhombija rudo ku vandhu ngo kubhuya shwiro yavanodakarira. Izvi zvinobhuya kuti tinodikana kuva vandhu vasikanesi kucinja uye vanonasa kusotesesa kuti tiwone zviri kunesa vandhu no zvovanodakarira. Bhurushura iri rinozotibeseresa kudini kuti tiite izvi?

Bhurushura iri rino zvijijo zvinokwana kuita 12 zvinowonesa maitire anodikana kusakurirwa nga umwe na umwe wedu kuti tive vandhu vanokhombija rudo no vanokona kubesa vamweni kuti vaite vajiji va Jesu. Cijijo cimwe nga cimwe cinozobhuya ngo ciitiko co mu Bhaibheri cinowonesa maitire akakhombijwa ndi Jesu kubatanijawo no makristu amweni o muzana lo kutanga pavainga vesiparijira. Cinangwa co bhurushura rino asipi cokubata ngo mumusoro masoko atinoparijira, asi ngo co kupsaka maitire okukhombija rudo ku vandhu. Tinozowona kuti ngenyi mugariro jimweni jinodiwa maningi patinonga tesitangisa mabhuyo, kuita hwiririro no kuita jijo jo Bhaibheri.

Pamunonga mesijija cijijo cimwe nga cimwe, nasanyi kuwona mabhuire amunonga mesiita pamunonga mesibhuya no vandhu ku ndau yamunogararo. Ejanyi kuvangisa rudo rwenyu kuna Jehovha no ku vandhu. Rudo iri, rinozomubesa maningi kuti mukone kubesa vandhu kuti vaite vajiji va Jesu.

Yesu tinodakala maningi ngo kuva no makomborero aya o kushanda pamwepo na yemwi takabatana. (Zaf. 3:9) Jehovha ngaamukomborere ngo kuenderera kenyu mberi mesida vandhu uye no kuvabesa kuti vaite vajiji va Jesu!