CIJIJO 09

Mukumbiro Ungavangisa Ushamwari Wenyu na Mwari

PLAY

Munolangarira kuti munodawo mundhu umweni angamutungamirira mu upenyu here? Munomuvhunjo inokosha yamuri kupsaka mupingulo yakhona here? Munoda kunyalajwa no kuvangiswa here? Munoda kujizwa muri phedo na Jehovha here? Kuita mukumbiro kunozomubesa kuti muwane zvese izvi. Asi Mwari anoda kuti tiitise kudini mukumbiro? Kubhuya kuti Mwari anozwa mukumbiro yese here? Mungaitenyi kuti muthembe kuti Mwari arikuzwa mukumbiro yenyu? Ngatende tiwone.

1. Tinodikana kuita mukumbiro kuna ani, uye ngo zvenyi?

Jesu wakatijijisa kuti tinodikana kukumbira kuna Baba vedu vo kudenga basi. Izvi ndizvona zvaiizwawo ndi Jesu. Iyena wakati: “Munodikana kukumbira kudai: ‘Baba vedu vari kudenga . . .’” (Mateu 6:9) Patinoita mukumbiro kuna Jehovha, tinovangisa ushamwari wedu naye.

Tingaita mukumbiro pa zvese zvatinoda. Asi kuti Mwari adavire mukumbiro yedu, inodikana kuenderana no zvaanoda. ‘Tikakumbira ciri cese cinoenderana no zvaanoda Mwari, iyena unotipa.’ (1 Johani 5:14) Jesu wakapa muezaniso wo zviro zvakanaka zvatingabatanija pa mukumbiro yedu. (Verenganyi Mateu 6:9-13.) Patinoita mukumbiro, atidikani kukumbirira matambujiko edu basi, asi tinodikanawo kutenda Mwari ngo zviro zvakanaka zvaanotiitira no kukumbira kuti abesewo vamweni.

2. Tingaitisa kudini mukumbiro?

Bhaibheri rinotivhunja kuti ‘tidurure mweyo wedu pamberi’ pa Mwari. (Mapisarema 62:8) Tingaita mukumbiro wedu zvinozika kana kuti cinyalarire. Asi zvinokosha pa zvese, unodikana kuvha pasi po mweyo wedu. Ngazvipi zvatingaita muviri wedu patinoita mukumbiro? Azvinenyi kuti takagwadama, takaema kana kuti takagala, asi cinokosha ngo cokukhombija kuti tirikureremeja. Azvinenyi no kuti taita mukumbiro pa nguva ipi, kana kuti pandau ipi.

3. Mwari anopingulisa kudini mukumbiro yedu?

Iyena anozviita ngo maitire akasiyana-siyana. Inga muezaniso, Bhaibheri rinotipa mupingulo yo muvhunjo jinotinesa. Kuverenga Soko la Mwari ‘kunongwaja asina zivo.’ (Pisarema 19:7; verenganyi Jakobho 1:5.) Mwari unotinyalaja patinosangana no matambujiko. Iyena unoshandisa vanamati vake kuti vatibese paya patinoda kubeswa.

JIJANYI ZVIZINJI

Wonanyi zvamungaita kuti mukumbiro wenyu upingurwe ndi Mwari. Wonanyizve kuti mungabeseswa kudini ngo mukumbiro.

4. Zvicinyi zvatingaita kuti Mwari azwe mukumbiro yedu

Zvicinyi zvinoita kuti Mwari azwe mukumbiro yedu? Zvicinyi zvinoita kuti Mwari asazwa mukumbiro yedu? Wonanyi VHIDHIYO.

VHIDHIYO: Mwari Unozwa Mukumbiro Yese Here?—Yokufupika (2:42)

Jehovha unoda kuti tiite mukumbiro kaari. Verenganyi Mapisarema 65:2, mapeja bhuisananyi ngo muvhunjo jinotevera:

Munolangarira kuti ‘Muzwi wo mukumbiro’ unoda kuti muite mukumbiro kaari here? Ngenyi madalo?

Kuti Mwari azwe mukumbiro yedu tinodikana kurarama mukuzwirana no zvaanoda. Verenganyi Mika 3:4 na 1 Petro 3:12, mapeja bhuisananyi ngo muvhunjo unotevera:

Zvicinyi zvingatithembesa kuti Jehovha unozozwa mukumbiro yedu?

Panonga pesiizwa hondo, mativi ese o maviri vanoita mukumbiro kuti vawine. Munolangarira kuti Mwari angadavira mukumbiro yavo here?

5. Mukumbiro yedu inodika kuvha pa mweyo

Vandhu vakawanda vakajijiswa kugara no mukumbiro mumusoro, vesizouphinda no kuphinda. Kubhuya kuti Mwari ngo zvaanoda here? Verenganyi Mateu 6:7, mapeja bhuisananyi ngo muvhunjo unotevera:

Ngazvipi zvamunodikana kuita kuti “mutame kuphinda-phinda magama” pamunonga mesiita mukumbiro wenyu?

Zvakadini kuti zuva rimwe nga rimwe, mulangarire zvamaizirwa ndi Jehovha, momutenda ndi zvona kuti amuitirezve. Zviitenyi mazuva ese pa vhiki, panopera vhiki munonga makumbira zviro 7 zvakasiyana-siyana musito kuphinda magama.

Baba vanodakala maningi, mwana wavo paanobhuya navo zvesivha pa mweyo. Na Jehovhavo unodakala patinoita mukumbiro kaari zvesivha pa mweyo

6. Mukumbiro cipo cinovha kuna Mwari

Mukumbiro ungatibesesa kudini patinonga tesisangana no zvineso? Wonanyi VHIDHIYO.

VHIDHIYO: Mukumbiro Unotibesa Kucungirira Zvineso (1:32)

Bhaibheri rinotithembesa kuti patinoita mukumbiro, tinozwa mulangariro no mweyo yedu zvakagajana. Verenganyi VaFiripi 4:6, 7, mapeja bhuisananyi ngo muvhunjo jinotevera:

Icokwadi kuti mukumbiro aupeji matambujiko edu ese, asi ngenyi tingati iwona ungatibesa?
Ngazvipi zvamaida kuitira mukumbiro?

MAIZVIZIVA HERE?

Soko lo kuti “ameni” rinoda kubhuya kuti “ndinotenderana nazvo” kana kuti “ngo zvo cokwadi.” Kuvhira pakanyorwa Bhaibheri, soko lo kuti “ameni” laishandiswa paipera mukumbiro.—1 Makoronike 16:36.

7. Psakanyi nguva yo kuita mukumbiro

Tingatokanganwa kuita mukumbiro nguva imweni, ngo kuwandirwa ngo zvokuita. Kubhuya kuti kuita mukumbiro kaikosha kuna Jesu here? Verenganyi Mateu 14:23 na Mako 1:35, mapeja bhuisananyi ngo muvhunjo jinotevera:

Zvicinyi zvaiizwa ndi Jesu kuti awane nguva yo kuita mukumbiro?
Ngazvipi zvamungaita kuti muwane nguva yo kuita mukumbiro?

VAMWENI VANOTI: “Kuita mukumbiro kulasa nguva, ngokuti apana anouzwa.”

Iyemwi munotiwo kudini?

TAJIJENYI

Tajija kuti kuita mukumbiro inovha pasi po mweyo, inotiita kuti tive no ushamwari wo phedo na Mwari, inotiitazve kuti mulangariro no mweyo wedu zvigajane, no kutipa simba latinoda kuti tikwanise kudakaja Jehovha.