CIJIJO 11

Zvicinyi Zvamungaita Kuti Mubeswe Pamunonga Mesiverenga Bhaibheri

PLAY

Makambopuwa basa lakakura maningi motama pokuritangira here? Kuti rimurerukire, mungakwanisa kulonga basero mesitanga ngo zvakareruka. Mungaitawo zvakafanana pa kuverenga Bhaibheri. Nguva imweni mungazvivhunjisa kuti: ‘Ndotangira papi?’ Mu cijijo cino, munozowona zviro zvakareruka zvamungaita kuti mude kujija Bhaibheri, zvoita kuti kuverenga kamusaita kumudakaje.

1. Zvakanakirenyi kuverenga Bhaibheri mazuva ese?

Mundhu anoverenga Bhaibheri kana kuti, ‘mutemo ya Jehovha,’ anodakala pano zvese zvaanoita mu upenyu wake. (Verenganyi Mapisarema 1:1-3.) Mungatanga ngo kuverenga Bhaibheri, ko maminutu mashoma pazuva. Pamunonasa kuziva Soko la Mwari, munozoda maningi kuriverenga.

2. Mungaitenyi kuti mubeswe ngo kuverenga Bhaibheri?

Kuti tibeswe ngo kuverenga Bhaibheri, tinodikana kumboema, tolangarira zvatiri kuverengaro. Izvi zvinoda kubhuya kuti, tinodikana kuriverenga ‘tolangarijisisa zviri mariri.’ (Joshua 1:8, masoko opasi) Pamunonga mesiverenga Bhaibheri, zvivhunjisenyi kuti: ‘Zvandiri kuverengari zvinondijijisenyi ngo zva Jehovha? Ndingashandisa kudini mavhesi aya mu upenyu wangu? Ndingashandisa kudini mavhesi aya kuti ndibesewo vamweni?’

3. Mungaitenyi kuti muwane nguva yo kuverenga Bhaibheri?

Zvirikumunesa kuti muwane nguva yokuverenga Bhaibheri here? Kudai zvakadaloko asipi iyemwi mega. Ejanyi ‘kushandisa nguva yenyu zvakanaka.’ (VaEfeso 5:16) Mungakheta nguva pa zuva rimwe nga rimwe, kuti muverenge Bhaibheri. Vamweni vanokheta kuverenga Bhaibheri comangwanani. Vamweni vanokheta kuverenga comasikati. Vamweni vanokheta kuverenga Bhaibheri comadeko vasati vavata. Iyemwiwo, nga ipi nguva yakamunakira?

JIJANYI ZVIZINJI

Jijanyi mazano angamubesa kuti mudakajwe ngo kuverenga Bhaibheri. Wonanyizve kuti mungaitenyi kuti mubeswe ngo kujija Bhaibheri.

Kutanga kuverenga Bhaibheri kakatojana no kutanga kuha zvokuha zvamusati mamboha, asi zvinozopejisira zvoomunakira

4. Mungajija kudakarira kuverenga Bhaibheri

Zvingakwanisa kumunesa kutanga kuverenga Bhaibheri, asi mungajijira kuva no “cido cakavanga” cokuita izvi, kana kuti cokuverenga Bhaibheri. Izvi ndizvona zvinoitikawo pamunotanga kujijira kuha zvokuha zvamusati mamboha. Verenganyi 1 Petro 2:2, mapeja bhuisananyi ngo muvhunjo unotevera:

Munolangarira kuti mukatanga kuverenga Bhaibheri mazuva ese, zvinozomubesa kuti mude kulamba mesiriverenga here?

Wonanyi VHIDHIYO inokhombija kuti vandhu vamweni, vakatangisa kudini kudakajwa ngo kuverenga Bhaibheri. Mapeja bhuisananyi ngo muvhunjo jinotevera:

VHIDHIYO: Majaha ari Kujijira Kuda Soko la Mwari (5:33)

Mu vhidhiyo iyi, zvicinyi zvaikoreresa majaha aya kuti averenge Bhaibheri?
Zvicinyi zvakavabesa kuti valambe vesida kuverenga Bhaibheri mazuva ese?
Vakaitenyi kuti vanase kudakajwa ngo kuverenga Bhaibheri?

Matangire amungaita:

Khetanyi Bhaibheri lakanasa kusandujwa uye risinganesi kuzwisisa. Amboejanyi kuverenga Shanduro yeNyika Itsva inowanika mu ndumi jakawanda.
Tanganyi ngo kuverenga mabhuku anoshwiro jinonyanya kumudakaja. Mungakwanisa kushandisa bhokiso lakazwi “Kutanga Kuverenga Bhaibheri.”
Nyoreranyi zvitsauko zvamunonga maverenga. Shandisanyi bhokiso lakazwi “Urongwa wo Kuverenga Bhaibheri” nyolanyi zvitsauko zvamunonga maverenga.
Shandisanyi Aprikativho JW Library^®. Aprikativho iyi ingamubesa kuverenga Bhaibheri kana kuita ngo kuririja mu foni, mu thableti no mu komputadhori.
Shandisanyi apendise iri kunoperera Bhaibheri Shanduro yeNyika Itsva. Imona munonga muno mapa, matabhera no ma glossário, izvi zvinoita kuti kuverenga kamunonga mesiita Bhaibheri kuve kesidakaja.

5. Nasiriranyi kuitira jijo yenyu yo Bhaibheri

Verenganyi Mapisarema 119:34, mapeja bhuisananyi ngo muvhunjo unotevera:

Ngenyi zvakanaka kuita mukumbiro musati maverenga Bhaibheri, kana kuti musati matanga kunasirira jijo yenyu yo Bhaibheri?

Mungaitenyi kuti mubeswe ngo cijijo cimwe nga cimwe? Pamunonga mesinasirira zvijijo zvenyu ejanyi kuita izvi:

Verenganyi ndima jokutanga jo cijijoco.
Verenganyi mavhesi ari mu Bhaibheri, mesiwona kuti anobatana papi no zvamuri kujijaro.
Makanyi mupingulo yo muvhunjo iri mundima imwe nga imwe; izvi zvinozomubesa pamunonga moojija no mujijisi wenyu.

Maizviziva here?

Zvapupu zva Jehovha zvakashandisa ma Bhaibheri akasiyana-siyana. Asi tinonyanya kushandisa Bhaibheri lakazwi Shanduro yeNyika Itsva yo Magwaro Matsvene ngokuti ngo lo cokwadi, ririnyore kuzwisisa, uye rinoshandisa zina la Mwari.—Wonanyi masoko ari mu saiti “Zvapupu zva Jehovha Zvino Bhaibheri Lazvo Here?”

VAMWENI VANOTI: “Kujija Bhaibheri ibasa guru. Andiwani nguva yo kujija, kazinji kakhona ndinonga ndakaremba.”

Iyemwi munotiwo kudini?

TAJIJENYI

Tajija kuti, munodikana kuita urongwa wo kuverenga Bhaibheri, kuti munase kubeswa ngo zvarinojijisa. Itanyiwo mukumbiro kuti muzwisise zvamunonga mesida kujija, nasiriranyi ndima imwe nga imwe yo cijijo camunonga mesida kujija.