CIJIJO 13
Maceci Okunyepa Anoita Kuti Vandhu Vasiye Kunamata Mwari
Kudai Mwari ari rudo, ngenyi zviro zvakashata zvesiizwa mu maceci anozviti anonamata Mwari? Zvinoita ngo zvokuti, maceci aya ngo okunyepa, iwona anojijisa zvokunyepa ngo zva Mwari. Maceci okunyepa anoitenyi kuti vandhu vasiye kunamata Mwari? Mwari unozwa kudini? Zvicinyi zvaanozoita?
1. Zvicinyi zvinojijiswa ngo maceci okunyepa zvinoita kuti vandhu vasiye kunamata Mwari?
Maceci okunyepa ‘akacinja cokwadi ca Mwari ngo manyepo.’ (VaRoma 1:25) Inga muezaniso, maceci akawanda aajijisi zina la Mwari. Bhaibheri rinobhuya kuti zvakanaka maningi kushandisa zina la Mwari. (VaRoma 10:13, 14) Zviro zvakashata pazvinoitika, vafundisi vomaceci vakawanda vanobhuya kuti zvaitika ngo kuda ka Mwari. Ici asi cokwadi. Mwari asi yena unoitisa matambujiko. (Verenganyi Jakobho 1:13.) Zvinowaja ngo zvo kuti, manyepo aya ari kuita kuti vandhu vasiye kunamata Mwari.
2. Maitiro o maceci okunyepa, anoitisa kudini kuti Mwari awoneke inga wakashata?
Maceci okunyepa aabati vandhu inga mabatirwe o vanoizwa ndi Jehovha. Bhaibheri rinobhuya kuti ‘zvishaishi zvo maceci okunyepa, zvatutirana mbhera kudenga.’ (Zvakazarurwa 18:5) Komakore akawanda, vomaceci okunyepa vari kunghwinira muno zvo matongerwe o nyika, uye pamweni pakhona vari kutendera kuuraiwa ko vandhu vakawanda. Vafundisi vomaceci amweni vakaganya, ivona vakaganya ngo ndava yo mare inovhiswa ngo vanamati vamweni vavo. Maitire avo, anokhombija kuti ivona avazivi Mwari.—Verenganyi 1 Johani 4:8.
3. Mwari unozwa kudini ngo zvinoizwa ngo maceci okunyepa?
Kudai vandhu vesinyangajwa ngo zvinoizwa ngo maceci okunyepa, munolangarira kuti Jehovha unozwa kudini? Zvinoizwa ngo vafundisi ava, zvinoita kuti vandhu vasada kunamata Mwari. Jehovha unoda vandhu, asi unonyangajwa ngo vafundisi vanobata vandhu zvisito kunaka, iyena unothembesa kuti unozopalaja maceci ese okunyepa uye ‘aazombowanikizve’. (Zvakazarurwa 18:21) Mbaimbai pano, iyena anozopalaja maceci ese okunyepa.—Zvakazarurwa 18:8.
JIJANYI ZVIZINJI
Jijanyi zvimweni zvinokhombija kuti Mwari unolangarirenyi ngo maceci okunyepa. Wonanyiwo zvimweni zvakaizwa ngo maceci aya, uye ngenyi zvisingadikani kumukangaijira kuti muzive Jehovha.
4. Mwari unodakarira maceci ese here?
Vandhu vakawanda vanolangarira kuti maceci akatojana no makwanja akasiyana-siyana anoenda kuna Mwari. Kubhuya kuti icokwadi here? Verenganyi Mateu 7:13, 14, mapeja bhuisananyi ngo muvhunjo unotevera:
-
Bhaibheri rinobhuyenyi ngo zvo gwanja rinoendesa kuupenyu?
Wonanyi VHIDHIYO, mapeja bhuisananyi ngo muvhunjo unotevera:
-
Bhaibheri rinobhuya kuti maceci ese anodakaja Mwari here?
5. Maceci okunyepa aakhombiji rudo wa Mwari
Kuno zviro zvakawanda zvinoizwa ngo maceci okunyepa, zvinoita kuti vandhu vasiye kunamata Mwari. Cimweni cavanoita, ngo co kunghwinira muno zvo hondo. Ngatiwone muezaniso wazvo. Wonanyi VHIDHIYO. Mapeja bhuisananyi ngo muvhunjo jinotevera:
-
Zvicinyi zvakaizwa ngo maceci okunyepa mu hondo yocipiri yo nyika yese?
-
Munowonawo kudini ngo zvo vakaitari?
Verenganyi Johani 13:34, 35 na 17:16. Mapeja bhuisananyi ngo muvhunyo jinotevera:
-
Munolangarira kuti Jehovha unozwa kudini maceci paanopindira zvo hondo?
-
Maceci okunyepa anoita kuti pave no zviro zvakawanda zvakashata. Zvicinyi zvamakambowonawo, zvinokhombija kuti maceci aakhombiji rudo wa Mwari?
Maceci okunyepa aakhombiji rudo wa Mwari
6. Mwari unoda kubesa vandhu kuti vabude mu maceci okunyepa
Verenganyi Zvakazarurwa 18:4, a mapeja bhuisananyi ngo muvhunjo unotevera:
-
Maceci okunyepa anocengeja vandhu. Munozwa kudini ngo cido cina Mwari cokubesa vandhu kuti vabude mu maceci okunyepa?
7. Lambanyi mesijija ngo zva Mwari wo cokwadi
Kubhuya kuti zviro zvakashata zvinoizwa ngo maceci okunyepa, zvingaita kuti musiye kunamata Mwari here? Ambolangariranyi ngo mwana wakakura esipangirwa ndi baba vake asi ozopanduka, mwana uwu anovha pamuzi otanga kurarama upenyu wakashata, baba vake avadakari ngo zvaanonga esiita. Ngenyi zvisito kunaka kupa baba ava ndava ngo kupanduka kunonga kaita mwana uwu?
-
Zvakanaka here kuti mupe Jehovha ndava ngo zvinoizwa ngo maceci okunyepa, motoguma pakuema kujija ngo zvake?
VAMWENI VANOTI: “Andidakariri Mwari ngokuti maceci ndiwona anoitisa matambujiko akawanda.”
-
Iyemwiwo munoti kudini?
-
Ngenyi zvinoizwa ngo maceci okunyepa azvidikani kumuita kuti musiye kunamata Jehovha?
TAJIJENYI
Tajija kuti zvinojijiswa no zvinoizwa ngo maceci okunyepa zvinoita kuti vandhu vasiye kunamata Mwari. Mwari unozopalaja maceci ese okunyepa.
Muvhunjo Jokuhwirijira
-
Munowonawo kudini ngo zvinoizwa no zvinojijiswa ngo maceci okunyepa?
-
Jehovha unozwa kudini ngo zvinoizwa ngo maceci okunyepa?
-
Mwari unozoitenyi ku maceci okunyepa?
JIJANYI ZVIMWENI
Jijanyi zviro zvimweni zvinokhombija kuti maceci okunyepa aaiti kuda ka Mwari.
“Icokwadi Here Kuti Maceci ese Anotenderwa ndi Mwari?” (Mu saiti jw.org)
Ngenyi Jehovha esida kuti timunamate tiripamwepo no vamweni?
“Zvino Basa Here Kuti Mundhu ave Noceci Yaanonamata?” (Mu saiti jw.org)
Mutungamiriri wo ceci imweni waineseka ngo zviro zvaiizwa ngo vandhu muceci yaainamata. Asi izvi azvizivi kuita kuti asiye kujija cokwadi kaaita.
“Cakaita Kuti Padhiri Asiye Ceci Yake” (Mukai! wa Fevereiro wo 2015)
Maceci aanomakore akawanda esijijisa zviro zvinoita kuti vandhu valangarire kuti Mwari unoutsinye, uye azviiti kuti tiite ushamwari naye. Verenganyi muwone zviro zvitatu zvisiripi zvo cokwadi zvavanojijisa ngo zva Mwari.
“Manyepo Anoita Kuti Vandhu Vasiye Kunamata Mwari” (Nharireyomurindi, 1 ya Novembro ya 2013)
a Bhaibheri rinoezanisa maceci okunyepa no mwanakaji unozwi Bhabhiloni Guru, wonanyi pakazwi Nasanyi Kuzwisisa 1.
