CIJIJO 16
Jesu Wakaitenyi Paainga ari Pasi Pano?
Vandhu vakawanda pavanolangarira ngo zva Jesu, mumulangariro mavo vanomuwona paainga asiri mwana mudoko, muporofita akangwara kana kuti paainga esiulaiwa. Asi tinokona kujija zvakawanda ngo zvake kana tikaongorora zvaakaita paainga ari panyika. Mucijijo cino tinozojija zviro zvinokosha zvakaizwa ndi Jesu uye kuti zvingatibesesa kudini.
1. Ngaripi basa laikosha maningi laiizwa ndi Jesu?
Basa laikosha maningi laiizwa ndi Jesu ngo lo ‘kuparijira masoko akanaka o Umambo wa Mwari.’ (Verenganyi Ruka 4:43.) Jesu wakaparijria masoko akanaka ngo pamusoro po Umambo, kana kuti hurumende ya Mwari inozopeja matambujiko ese o vandhu. a Jesu wakashanda maningi ngo simba pa basa iri lo kuparijira masoko akanaka ko makore matatu no hafu.—Mateu 9:35.
2. Jesu waiita mushamiso no cinangwa cenyi?
Bhaibheri rinobhuya ngo zvo ‘mabasa o simba no zvishamiso uye zviwoniso zvakaizwa ndi Mwari esishandisa Jesu Kristu.’ (Mabasa 2:22) Esishandisa simba la Mwari, Jesu wakaemesa dutu, wakapa zvokurhya vandhu vakawanda, wakarapa vaiwaja no kumusa vakafa. (Mateu 8:23-27; 14:15-21; Mako 6:56; Ruka 7:11-17) Mushamiso yakaizwa ndi Jesu inonasa kukhombija kuti wakatumwa ndi Mwari. Zvakakhombijawo kuti Jehovha unosimba lokupeja matambujiko edu ese.
3. Zvicinyi zvatingajija pamararamiro aiita Jesu?
Jesu waizwira Jehovha nguva yese. (Verenganyi Johani 8:29.) Pasinenyi nokutevererwa, Jesu wakaramba akagondeka, esiita zvaaivhunjwa ndi Baba vake mbhera pakufa kake. Wakakhombija kuti vandhu vanokona kushandira Mwari kunyange pavanosangana no zvineso. Ngokudalo, Jesu wakatisiira muezaniso ‘kuti tihambe tesitevera maakacika ndimona.’—1 Petro 2:21.
JIJANYI ZVIZINJI
Jijanyi kuti Jesu waiparijirisa kudini masoko akanaka, uye mushamiso yaakaita.
4. Jesu waiparijira masoko akanaka
Jesu wakahamba mumango yakawanda, mumakwanja ainga no bukuta esiparijira masoko akanaka kuvandhu vese vaaikona kubhuya navo. Verenganyi Ruka 8:1, mapeja bhuisananyi ngo muvhunjo jinotevera:
-
Kubhuya kuti Jesu waiparijira basi masoko akanaka kuvandhu vaiviya kaari here?
-
Jesu waishanda zvakadini kuti awane vandhu vokuparijira?
Mwari wakabhuya kuti Mesiya waizoparijira masoko akanaka. Verenganyi Isaya 61:1, 2, mapeja bhuisananyi ngo muvhunjo jinotevera:
-
Jesu wakazajisa kudini uporofita uwu?
-
Munolangarira kuti mazuva ano, vandhu vangadawo kuzwa masoko akanaka here?
5. Jesu wakajijisa cokwadi cinokosha
Jesu aato kuparijira masoko akanaka o Umambo wa Mwari basi, asi wakapavo vandhu mazano anoshanda mu upenyu. Wonanyi zviro zvimweni zvaakajijisa pa mbharijo yake inozwi Mbharijo yo Padundhu. Verenganyi Mateu 6:14, 34 na 7:12, mapeja bhuisananyi ngo muvhunjo jinotevera:
-
Mazano api anoshanda akapa Jesu pamavhesi aya?
-
Munolangarira kuti zvaakajijisa zvisirikushanda here?
6. Jesu wakaita mushamiso
Jehovha wakapa Jesu simba lokuti aite mushamiso yakawanda. Kuti muwone mushamiso umweni waakaita, verenganyi Mako 5:25-34 kana kuti Wonanyi VHIDHIYO. Mapeja bhuisananyi ngo muvhunjo jinotevera:
-
Mu vhidhiyo iyi, tawona kuti mwanakaji uwu waiwaja maningi, asi kunyange zvakadalo iyena wainga no cokwadi cenyi?
-
Manyanya kudakarira cinyi pa mushamiso uwu?
Verenganyi Johani 5:36, mapeja bhuisananyi ngo muvhunjo unotevera:
-
Mushamiso yakaizwa ndi Jesu, yaipa ucapupu wenyi, kana kuti yaijijisenyi ngo zvake?
Maizviziva here?
Zviro zvakawanda zvatinoziva ngo zva Jesu, zvakanyorwa mu Bhaibheri mu mabhuku anozwi Mateu, Mako, Ruka, na Johani. Mabhuku aya anodanijwa kuti mabhuku o Vhangeri. Umwe nga umwe wo vanyori vo mabhuku aya, uno zvaakanyora ngo zvo upenyu wa Jesu zvisito kunyorwa ngo vamweni. Patinobatanija zvese zvakanyorwa mu mabhuku aya, tinoguma pakunasa kuzwisisa upenyu wa Jesu.
-
MATEU
Ndiyena wakatanga kunyora bhuku rokutanga ro Vhangeri. Rinobhuya ngo shwiro yokujijisa kaiita Jesu, kunyanya zvaaijijisa ngo zvo Umambo wa Mwari.
-
MAKO
Ndiyena wakanyora bhuku ro Vhangeri doko pa ese. Lakazara ngo shwiro jo mushamiso yaiizwa ndi Jesu.
-
RUKA
Wakanyanya kubhuya ngo zvo kuti mukumbiro waikosha maningi kuna Jesu, no mabatiro aiita vanakaji.
-
JOHANI
Wakanyora masoko aibhuiwa ndi Jesu paaibhuisana no shamwari jake no vandhu vamweni. Izvi zvinotibesa kuwona kuti Jesu uno undhu wakanaka.
VAMWENI VANOTI: “Jesu wainga asiripi Mwana wa Mwari, asi wainga ari mundhu wakanaka basi.”
-
Iyemwiwo munoti kudini?
TAJIJENYI
Tajija kuti Jesu wakaparija ngo zvo Umambo wa Mwari, wakaita mushamiso uye wakazwira Jehovha pa zviro zvese.
Muvhunjo Jokuhwirijira
-
Ngaripi basa raikosha maningi la Jesu paainga panyika?
-
Mushamiso yakaizwa ndi Jesu, unokhombijenyi ngo zvake?
-
Jesu wakajijisa mazano api anoshanda muupenyu?
JIJANYI ZVIMWENI
Jesu waidakarira kubhuya ngo zvenyi?
“Umambo wa Mwari Unokosha Maningi Kuna Jesu” (Nharireyomurindi, 1 ya outubro yo 2014)
Wonanyi kuti ngenyi tingagonda kuti zvishamiso zva Jesu zvakaitika kamare.
“Mungajijenyi ngo Mushamiso ya Jesu?” (Nharireyomurindi, 15 ya Julho yo 2004)
Verenganyi ngo zvo ndhorowondho yo mwanarume umweni wakacinja upenyu wake paakapera kujija kuti Jesu waibata zvakanaka vandhu.
“Inini Ndailangarira ngo Zvangu Basi” (Nharireyomurindi, 1 ya Outubro yo 2014)
Wonanyi zviro zvikuru zvo basa lokuparijira la Jesu zvakarongeka mukuwirirana no nguva.
“Upenyu wa Jesu Paainga pa Nyika” (Bhaibheri—Shanduro yeNyika Itsva, Masoko Okuengejera A7)
a Muzvijijo 31-33 tinozojija zvakawanda ngo zvo Umambo wa Mwari.
