CIJIJO 17

Jesu Wainga no Undhu Wakadini?

PLAY

Tikanasa kujija zviro zvaibhuiwa uye zvaiizwa ndi Jesu paainga ari pasi pano, tinowona undhu wake, izvi zvingatibesa kuti tive no ushamwari wakavanga naye uye na Baba vake, Jehovha. Ngaupi undhu uwu? Tingaitenyi kuti titevejere Jesu mu upenyu wedu?

1. Jesu wakatojana papi na Baba vake?

Jesu wakararama na Baba vake vano rudo komakore no makore ari kudenga. Iyena wakajija zvakawanda kovari, ngo ndava yazvo, Jesu anozwira vandhu ulombo uye anoita zvese inga ndi Jehovha. (Verenganyi Johani 5:19.) Kunasa kubhuya, Jesu anotevejera undhu wa Baba vake, izvi ndizvona zvakamuita kuti abhuye kuti: ‘Mundhu wese anondiwona watowonawo Baba.’ (Johani 14:9) Patinojija zvakawanda ngo zvo undhu wa Jesu, tinonga tesitojijawo zvakawanda ngo zva Jehovha. Inga muezaniso, kuwona mabatire aiita Jesu vandhu zvinokhombija kuti Jehovha unozwawo kudini ndimwi.

2. Jesu wakakhombijisa kudini kuti unoda Jehovha?

Jesu wakati: ‘Kuti nyika izive kuti ndinoda Baba, ndiri kuita zvondakavhunjwa kuti ndiite.’ (Johani 14:31) Paainga ari pasi pano, Jesu wakakhombija kuti waida Baba vake ngo kuita zvese zvaakavhunjwa kunyange pozvaimunesa. Asi zvona zvega, Jesu waidawo kubhuya ngo zva Baba vake nokubeserawo vamweni kuti vavewo no ushamwari na Mwari.—Johani 14:23.

3. Jesu wakakhombijisa kudini kuti waida vandhu?

Bhaibheri rinobhuya kuti Jesu ‘waida maningi vandhu.’ Jesu wainga no rudo no vandhu vese, uye waibata vandhu vese zvakanaka. (Zvirevo 8:31, wonanyi masoko opasi) Iyena wakakhombija rudo uwu ngo kuvangisa vandhu no kuvabesa. Mushamiso yaakaita yaikhombija kuti ano simba uye kuti anozwira vandhu ulombo. (Mako 1:40-42) Iyena waibata vandhu zvakanaka uye wainga asingakheti. Magama ake ainyalaja uye aipa soterero kuno vaya vaida cokwadi. Jesu wakazvipira kutambujika no kufa ngokuti unoda vandhu. Asi iyena unoda maningi vaya vanozwira zvaanojijisa.—Verenganyi Johani 15:13, 14.

JIJANYI ZVIZINJI

Jijanyi zvakawanda ngo zvo undhu wa Jesu. Wonanyiwo kuti mungakhombijisa kudini rudo no kukova inga zvaiita Jesu.

4. Jesu unoda Baba vake

Zvakaizwa ndi Jesu zvinotijijisa makhombijiro atingaita kuti tinoda Mwari. Verenganyi Ruka 6:12 na Johani 15:10; 17:26. Verenganyi vhesi imwe, mapeja bhuisananyi ngo muvhunjo unotevera musati maverenga imweni:

Tingatevejeresa kudini Jesu, no kukhombija kuti tinoda Jehovha?

Jesu waida baba vake vokudenga uye waibhuya navo ngo mukumbiro

5. Jesu unozwira ulombo vandhu vanoda kubeswa

Jesu waitanga alangarira zvakanakira vamweni asati alangarira ngo zvake. Kunyage paainga akaremba, iyena waishandisa nguva yake no simba kuti abese vandhu. Verenganyi Mako 6:30-44, mapeja bhuisananyi ngo muvhunjo jinotevera:

Jesu wakakhombijisa kudini kuti waida vandhu? —Wonanyi mavhesi 31, 34, 41 na 42.
Icinyi cakaita kuti Jesu ade kubesa vandhu? —Wonanyi vhesi 34.
Tawona kuti Jesu waitevejera undhu wa Baba vake. Zvaakaitari zvinotijijisenyi ngo zva Jehovha?
Tingatevejeresa kudini Jesu pakuzwira vandhu ulombo?

6. Jesu unokova

Jesu wainga asina zviro zvakawanda, asi waipa vamweni zvaainga nazvo. Iyena unotivhunja kuti tipewo vamweni zvatinazvo. Verenganyi Mabasa 20:35, mapeja bhuisananyi ngo muvhunjo unotevera:

Jesu wakati tinodikana kuitenyi kuti tidakare?

Wonanyi VHIDHIYO, mapeja bhuisananyi ngo muvhunjo unotevera:

VHIDHIYO: “Kupa Kunomudakalo kupinda Kuashira”—Yokufupika (4:00)

Kunyange tisina zviro zvakawanda, tingakhombijisa kudini kuti tinokova?

Maizviziva here?

Bhaibheri rinotijijisa kuti tiite mukumbiro kuna Jehovha ngo zina la Jesu. (Verenganyi Johani 16:23, 24.) Patinoita mukumbiro ngo zina la Jesu, tinonga tesikhombija kuti tinoreremeja zvaakatiitira kuti tive no ushamwari na Jehovha.

VAMWENI VANOTI: “Mwari aawajiwi ngo kutambujika ko vandhu.”

Tinozviziva kuti Jesu waitevejera undhu wa Baba vake, zvaakaitari zvinokhombijisa kudini kuti Jehovha unowajiwa patinotambujika?

TAJIJENYI

Tajija kuti Jesu unoda Baba vake no vandhu. Zvesiwoneka kuti Jesu unonasa kutevejera undhu wa Baba vake. Pamunonasa kuziva ngo zvake, munozonasa kuzivawo ngo zva Jehovha.