CIJIJO 28
Mungaitenyi Kuti Mukhombije Kuti Munotenda Zvamakaizirwa ndi Jehovha na Jesu?
Munozwa kudini kudai maizopuwa cipo cakanaka ngo shamwari yenyu? Kunasa kubhuya iyemwi maizodakala maningi, dangani maizoita zviri zvese kuti mukhombije kuti madakarira cipo ici. Jehovha na Jesu vakatipa cipo cakakula maningi cisina umweni waizotipa, cipo ici rusunungulo. Mungaitenyi kuti mukhombije kuti munotenda ngo cipo ici?
1. Tingaitenyi kuti tikhombije kuti tinotenda zvotakaizirwa ndi Jehovha na Jesu?
Bhaibheri rinotithembesa kuti ‘mundhu wese anotenda muna Jesu’ anozorarama nokusingaperi. (Johani 3:16) Zvinoda kubhuyenyi kuva no kutenda? Azvipereri pa kuva no rutendo basi muna Jesu, asi tinodikanawo kukhombija kuti tinotenda ngo zvatinokheta kuita mu upenyu wedu. (Jakobho 2:17) Patinokhombija rutendo wedu ngo zvatinoita uye zvatinobhuya, tinovangisa ushamwari wedu kuna Jesu na Baba vake Jahovha.—Verenganyi Johani 14:21.
2. Ciitiko cipi cinokosha cinotibesa kukhombijira zvotakaizirwa ndi Jahovha na Jesu?
Pausiku wokupejisira asati afa, Jesu wakavhunja vateveri vake zvovaidikana kuita kuti vakhombije kuti vanotenda muripo wake. Iyena wakavavhunja kuti vaungane panguva inokosha maningi, inodanijwa kuti “Kurhya Kwashe Komadeko” kunozivikazve inga Cilangarijo co rufu la Jesu. (1 VaKorinde 11:20) Izvi wakazviitira kuti vaapostori vake no vamweni vaizovawo Vakristu vocokwadi valangarire kuti iyena wakapira upenyu wake katiri. Izvi ndizvona zvakaita kuti Jesu abhuye kuti: ‘Lambanyi mesiita izvi mesindilangarira.’ (Ruka 22:19) Pamunoenda ku Cilangarijo co kufa ka Jesu, munonga mesikhombijira kuti munotenda ngo rudo lakakura lotakaizirwa ndi Jehovha na Jesu.
JIJANYI ZVIZINJI
Jijanyi zvimweni zvamungaita zvinokhombija kuti munokoshesa rudo wakakhombijwa ndi Jehovha na Jesu. Uye jijanyizve kuti ngenyi zvesikosha kuti tive pa Cilangarijo co kufa ka Kristu.
3. Tinokhombija kuti tinotenda ngo zvatinoita
Ambolangariranyi basi kuti muri kumbombomera mu kumwa, asi koviya mundhu kuzomubudisa. Kubhuya kuti maizokanganwa ngo zvamunonga maizirwa ngo mundhu uwu here? Kana kuti maizoita zvese zvamunokona kuti mukhombije kuti munotenda zvaakamuitirari?
Soterero yokuzorarama nokusingaperi ngo ndava ya Jehovha. Verenganyi 1 Johani 4:8-10, mapeja bhuisananyi ngo muvhunjo jinotevera:
-
Ngenyi muripo wa Jesu ciri cipo cinokosha maningi?
-
Munozwa kudini ngo zvamakaizirwa ndi Jehovha na Jesu?
Mungakhombijisa kudini kuti munotenda zvomakaizirwa ndi Jehovha na Jesu? Verenganyi 2 VaKorinde 5:15 na 1 Johani 4:11; 5:3. Mapeja kuverenga vhesi imwe nga imwe, bhuisananyi ngo muvhunjo unotevera:
-
Mukuzwirana no zvotaverengari, nga zvipi zvamungaita kuti mukhombije kuti munotenda zvo takaizirwari ndi Jehovha na Jesu?
4. Tevejeranyi Jesu
Zvimweni zvatingaita kuti tikhombijire kuti tinotenda, ngo zvo kutevejera Jesu. Verenganyi 1 Petro 2:21, mapeja bhuisananyi ngo muvhunjo unotevera:
-
Ngazvipi zvamungaita kuti mukhombije kuti murikutevejera zvese zvaiizwa ndi Jesu?
Jesu waida maningi Soko la Mwari, waiparijira masoko akanaka uye waibesa vamweni
5. Pindanyi Cilangarijo co rufu la Jesu
Kuti muwone zvakaitika pa Kurhya Kwashe Komadeko. Verenganyi Ruka 22:14, 19, 20. Mapeja bhuisananyi ngo muvhunjo jinotevera:
-
Zvicinyi zvakaizwa pa Kurhya Kwashe Komadeko?
-
Cingwa no Vhinyu zvinoemererenyi?—Wonanyi mavhesi 19 na 20.
Jesu waida kuti vajiji vake vazoitawo Kurhya Kwashe Komadeko kamwe basi pa gore, pa zuva laakafa. Izvi ndizvona zvinoita kuti Zvapupu zva Jehovha zviungane kamwe basi pa gore, kuti valangarire rufu la Jesu, vesitevejera zvaakavavhunja. Kuti muzive zvakawanda ngo zvo musangano uwu unokosha, wonanyi VHIDHIYO. Mapeja bhuisananyi ngo muvhunjo unotevera:
-
Zvicinyi zvinoizwa pa Cilangarijo co kufa ka Jesu?
Pacilangarijo, cingwa no vhinyu pano zvazvinoemerera: Cingwa cinoemerera muviri wa Jesu usina cishaishi waakapa inga muripo wokutisunungula. Vhinyu inoemerera ngazi yake.
VAMWENI VANOTI: “Cinodiwa basi kuti uponeswe, kutenda kuti Jesu wakatifira.”
-
Mungashandisa kudini Johani 3:16 na Jakobho 2:17 kuti mukhombije kuti azvipereri basi pakutenda kuti Jesu wakatifira?
TAJIJENYI
Tajija kuti tinokhombija kuti tinokoshesa zvotakaizirwa ndi Jesu ngo kuva no rutendo kaari, uye kupinda Cilangarijo co rufu lake.
Muvhunjo Jokuhwirijira
-
Zvinoda kubhuyenyi kuva no rutendo muna Jesu?
-
Maizoda kukhombijisa kudini kuti munotenda zvamakaizirwa ndi Jehovha na Jesu?
-
Ngenyi zvesikosha maningi kuti mupinde Cilangarijo co rufu la Kristu?
JIJANYI ZVIMWENI
Kufirwa kamakaizirwa ndi Jesu kunomuita kuti mude kuitenyi?
Nasanyi kujija kuti tingaitenyi kuti tikhombije kuti tino rutendo.
“Khombijanyi Kuti Munotenda Zvigondiso zva Mwari” (Nharireyomurindi, ya Outubro yo 2016)
Verenganyi shwiro inoti “Ndaakuzvizwawo Kuti Ndiri Mundhu, uye Hana yangu Aisanditongesi,” kuti muwone kuti kujija ngo zvo muripo wa Jesu, kakabesa kudini mwanakaji umweni.
“Bhaibheri Rinocinja Upenyu” (Nharireyomurindi, 1 ya Agosto yo 2011)
Verenganyi muwone kuti, ngenyi vandhu vanorhya cingwa no kumwa vhinyu pa Cilangarijo, vasito kuwanda.
