Makambofirwa ngo mundhu wamunoda here? Kudai muri pa mugariro wakadai, nguva yimweni mungazvivhunjisa kuti: ‘Icinyi cinoitika patinofa? Kubhuya kuti mundhu wafari ndinozomuwonazve here?’ Mu cijijo ici no cinotevera, tinozowona mupingulo inonyalaja iri mu Bhaibheri yo muvhunjo iyi.

1. Icinyi cinoitika patinofa?

Jesu wakaezanisa kufa no kuvata. Mundhu anonga ari muhope kamare anonga asikazvizivi zvinonga zvesiitika. Kufa kakaezana papi no kuvata? Mundhu paanonga afa, apana caanoziva. Iyena aasawajiwi nee kutambujika. Bhaibheri rinoti: ‘Vakafa apana covanoziva.’—Verenganyi Muparidzi 9:5.

2. Ngenyi kuziva cokwadi ngo ndava yo rufu kunotibesa?

Vandhu vakawanda vanothya kufa, uye vanothyawo vandhu vakafa! Asi zvinobhuiwa ngo Bhaibheri ngo ndava yo rufu zvingamunyalaja. Jesu wakati: ‘Cokwadi cinozomusunungula.’ (Johani 8:32) Maceci amweni anojijisa kuti mundhu paanofa, mweya wake unosala wesirarama. Asi Bhaibheri arijijisi kuti mundhu uno mweya unosala wesirarama paanonga afa. Ngo kudalo, apana mundhu unotambujika paanonga afa. Kunja ka izvi, vakafa avakwanisi kutitambuja, ngokuti apana covanonga vesiziva pa zviro zvese zvinonga zvesiitika. Ngo kudalo, apana catinodikana kuvaitira, cakadai inga kuita mbhambha, mudiro kana kuti kuvaphasha.

Vandhu vamweni vanotenda kuti zvinoita kubhuya no vakafa. Asi izvi azvimboitiki. Inga zvotajija, vandhu “vakafa apana covanoziva.” Vaya vanolangarira kuti vakambobhuya no hama kana shamwari javo jakafa, kubhuya cokwadi, ivona vainga vesibhuya no madhimoni, anonyepejera kuita vandhu vakafa. Ngo kudalo, kuziva cokwadi ngo ndava yo vandhu vakafa kunotijivirira kumadhimoni. Jehovha unotivhunja kuti, atidikani kueja kubhuya no vandhu vakafa, ngokuti unozviziva kuti madhimoni akashata.—Verenganyi Dheuteronomi 18:10-12.

3. Jijanyi cokwadi ngo zvo vakafa

Munyika yese vandhu vanotenda zviro zvakasiyana-siyana ngo zvinoitika patinofa. Icokwadi kuti asipi zvese zvinobhuiwa ngo vandhu ngo zvo cokwadi.

• Mundharaundha menyu muno, vandhu vanoti kudini ngo zvinoitika ku mundhu wafa?

 4. Kuziva cokwadi ngo zvo rufu kunotibesa maningi

Kuziva cokwadi ngo pamusoro po vandhu vakafa kunotibesa kuti tisavathya. Verenganyi Muparidzi 9:10, mapeja bhuisananyi ngo muvhunjo unotevera:

• Vakafa vangatitambuja here?

Cokwadi ciri mu Bhaibheri cinotisunungula kumanyepo okuti tinodikana kuita mudiro kana kuti kuphasha vandhu vakafa kuti vasatikhuvaza. Verenganyi Isaya 8:19 na Zvakazarurwa 4:11, mapeja bhuisananyi ngo muvhunjo unotevera:

• Munolangarira kuti Jehovha unozwa kudini paanowona vandhu vesiita mudiro kana kupsaka besero ku vandhu vakafa?

5. Kuziva cokwadi ngo pamusoro po rufu kunotinyalaja

Vandhu vakawanda vakajijiswa kuti, kudai vakafa vanozotambujwa ngo ndava yo zvishaishi zvavakaita. Asi zvinonyalaja maningi kuziva kuti apana mundhu anotambujwa kudai akafa kunyange vaya vakaita zviro zvakashatisisa. Verenganyi VaRoma 6:7, mapeja bhuisananyi ngo muvhunjo unotevera:

• Bhaibheri rinojijisa kuti kudai mundhu akafa zvishaishi zvake zvinoregererwa, kuna Mwari zvishaishi zvake zvabhadharwa. Ngo kudalo, munolangarira kuti mundhu akafa unotambhujwa ngo ndava yo zvishaishi zvaakaita here?

Patinolamba tesijija ngo zva Jehovha, tinoengejera kuzwisisa kuti iyena aatambuji vandhu vakafa. Verenganyi Dheuteronomi 32:4 na 1 Johani 4:8, mapeja bhuisananyi ngo muvhunjo jinotevera:

• Mwari uno undhu unobhuiwa mu mavhesi aya, ungapisa vandhu vakafa here?

• Kuziva komaitari cokwadi ngo zvo rufu kamunyalajawo here? Ngenyi madalo?

 TAJIJENYI

Tajija kuti mundhu paanofa upenyu wake unonga wapera. Tajijazve kuti vandhu vakafa avatambujiki, uye apana covanokona kutiita.

Muvhunjo Jokuhwirijira

• Icinyi cinoitika patinofa?

• Ngenyi kuziva cokwadi ngo ndava yo rufu kunotibesa?

• Ngenyi kuziva cokwadi ngo ndava yo rufu kunotinyalaja?