CIJIJO 31
Cinyi Cinozwi Umambo wa Mwari?
Bhaibheri rinonyanya kubhuya maningi ngo zvo Umambo wa Mwari. Jehovha unozoshandisa Umambo uwu kuti acinje nyika kuti iite paradhiso. Asi icinyi cinozwi Umambo wa Mwari? Tinozvizivisa kudini kuti iwona waakutonga zvinezvi? Zvicinyi zvakaizwa ngo Umambo uwu? Iwona unozoitenyi muno lamangwana? Mucijijo cino no zvijijo zviviri zvinotevera zvinozodavira muvhunjo iji.
1. Icinyi cinozwi Umambo wa Mwari, uye ndiyani Mambo wakhona?
Umambo wa Mwari utongi wakagajwa ndi Jehovha Mwari. Mambo wakhona ndi Jesu Kristu, uye iyena unotonga ari kudenga. (Mateu 4:17; Johani 18:36) Bhaibheri rinoti Jesu ‘Unozova Mambo nokusingaperi.’ (Ruka 1:32, 33) Inga Mambo wo Umambo wa Mwari, Jesu unozotonga vandhu vese pasi pano.
2. Ngo vanaani vanozotonga na Jesu?
Jesu aazotongi ega. Vandhu ‘vomajinja ese, vo ndumi jese, vo nyika jese vanozotonga nyika ino pamwepo na Jesu.’ (Zvakazarurwa 5:9, 10) Vangana vanozotonga na Kristu? Kuvhira pakaviya Jesu pasi pano, mamiliyau no mamiliyau o vandhu vakava Vakristu. Vakristu vese vanozotonga na Jesu here? Haiwa. Asi vandhu vanokwana kuita 144.000 ndivona vanozoenda kootonga na Jesu kudenga. (Verenganyi Zvakazarurwa 14:1-4.) Asi vamweni Vakristu vese vanozogara pasi pano vesitongwa ngo Umambo wa Mwari.—Mapisarema 37:29.
3. Ngenyi Umambo wa Mwari wakanaka maningi kupinda wo vandhu?
Kunyange hazvo vatongi vesieja kuita zvakanaka, asi avana simba rokuita zvese zvovanoda. Kunja ka izvi, inoguma nguva yokuti vatongi ava vavhiswe vofakeiwa ngo vatongi vokuti nguva jimweni avana basa no zvido zvo vandhu. Asi Mambo wo Umambo wa Mwari Jesu Kristu aazombofakeiwi ndi Mambo umweni. Ngokuti Mwari ‘wakagaja umambo usingazombopalajwi.’ (Dhanieri 2:44) Jesu unozotonga nyika yese uye aazowoni vandhu vamweni inga vakanaka kudarika vamweni. Iyena uno rudo, wakanaka mweyo uye ano unyasha. Iyena unozojijisa vandhu kuti vakhombijiranewo rudo, unyasha no ururami.—Verenganyi Isaya 11:9.
JIJANYI ZVIZINJI
Jijanyi kuti ngenyi Umambo wa Mwari wakanaka kupinda Umambo wo vandhu.
4. Umambo wa Mwari unozotonga nyika yese
Simba rina Jesu rokutonga, lakakura maningi kupinda romutongi upi hake akambovapo. Verenganyi Mateu 28:18, mapeja bhuisananyi ngo muvhunjo unotevera:
-
Nga upi musiyano uripo wo simba rokutonga ka Jesu no rokutonga ko vandhu?
Utongi wo vandhu unocinja nguva yese, uye utongi umwe nga umwe unonyika yawo yaunotonga. Asi tingatiwo kudini ngo Umambo wa Mwari? Verenganyi Dhanieri 7:14, mapeja bhuisananyi ngo muvhunjo jinotevera:
-
Ngenyi zvakanaka kuziva kuti Umambo wa Mwari auzombopalajwi?
-
Ngenyi zvakanaka kuziva kuti Umambo wa Mwari unozotonga nyika yese?
5. Utongi wo vandhu unodikana kuvhiswa
Ngenyi Umambo wa Mwari unodikana kuvhisa utongi wo vandhu? Wonanyi VHIDHIYO, mapeja bhuisananyi ngo muvhunjo unotevera:
-
Matambujiko api anoviiswa ngo utongi wo vandhu?
Verenganyi Muparidzi 8:9, mapeja bhuisananyi ngo muvhunjo jinotevera:
-
Munolangarira kuti Umambo wa Mwari unodikana kuvhisa utongi wo vandhu here? Ngenyi madalo?
6. Vatongi vo Umambo wa Mwari vanotizwisisa
Mambo wedu Jesu Kristu wakararama pasi pano inga mundhu, ngo zvinoita kuti akone kutizwisisa. (VaHebheru 4:15) Kunja ka izvi, Jehovha wakakheta vanarume no vanakaji vanokwana kuita 144.000 vakagondeka, vanovha kuma jinja ese, ndumi jese no nyika jese kuti vazotonga pamwepo na Jesu.—Zvakazarurwa 5:9.
-
Munozwa kudini ngo kuziva kuti Jesu no vanozotonga pamwepo naye vanozwisisa matambujiko edu? Ngenyi madalo?
7. Mutemo jo Umambo wa Mwari jakanaka maningi kudarika jese jo umambo wo vandhu
Vatongi vanokanda mutemo kuti vabese vandhu no kuvajivirira. Mukutojanawo, Umambo wa Mwari unomutemowo. Verenganyi 1 VaKorinde 6:9-11, mapeja bhuisananyi ngo muvhunjo jinotevera:
-
Munolangarira kuti nyika yaizova yakadini kudai vandhu vese vakararama vesitevejera mutemo ya Mwari? a
-
Munolangarira kuti Jehovha uno citenderwa cokuti vandhu vazwire mutemo jo Umambo wake here? Ngenyi madalo?
-
Zvicinyi zvinokhombija kuti vandhu vasingazwiri mutemo iyi vangakwanisa kucinja?—Wonanyi vhesi 11.
KUDAI MUKAVHUNJISWA KUTI: “Icinyi cinozwi Umambo wa Mwari?”
-
Maizovadavirisa kudini?
TAJIJENYI
Tajija kuti Umambo wa Mwari utongi wo cokwadi uri kudenga unozotonga nyika yese.
Muvhunjo Jokuhwirijira
-
Ngo vanaani vanozotonga mu Umambo wa Mwari?
-
Ngenyi Umambo wa Mwari wakanaka maningi kupinda wo vandhu?
-
Zvicinyi zvinodiwa ndi Jehovha kuti vandhu vaite, kuti vazotongwa ngo Umambo wake?
JIJANYI ZVIMWENI
Verenganyi muwone kuti Jesu wakajijisa kuti Umambo wa Mwari uri kupi.
Ngenyi Zvapupu zva Jehovha zvinokheta kubesera Umambo wa Mwari pano kubesera utongi wo vandhu?
Wonanyi kuti Bhaibheri rinobhuyenyi ngo vandhu vo 144.000 vanokhethwa ndi Jehovha kuti vazotonga na Jesu.
Zvicinyi zvakaita kuti mwanakaji umweni wainga mujeri ave no cokwadi cokuti Mwari basi ndiyena anokona kupeja matambujiko ari munyika?
“Ndaipsaka Nyika Isina Matambujiko” (Despertai! ya Novembro yo 2011)