CIJIJO 32
Umambo wa Mwari Waakutonga!
Umambo wa Mwari wakatanga kutonga kudenga mu gore la 1914. Ndipona pakatanga mazuva okupejisira o utongi wo vandhu. Tinozvizivisa kudini? Ngatiwone uporofita unganani unobhuiwa mu Bhaibheri ngo pamusoro pazvo no zviro zvirikuitika munyika kuvhira mu gore la 1914.
1. Uporofita uri mu Bhaibheri unoti kudini?
Bhuku la Dhanieri, rinotibesa kuzwisisa kuti Umambo wa Mwari waizotanga kutonga paizopera nguva jinodanijwa kuti ‘nguva nomwe.’ (Dhanieri 4:16, 17) Papera mazana o makore, Jesu wakabhuyawo ngo zvo nguva iyi esiti ‘nguva yo majinja amweni.’ Iyena wakakhombija kuti nguva iyi yainga isati yapera. (Ruka 21:24) Inga zvatisada kuwona, nguva nomwe iji jakapera mugore la 1914.
2. Zvicinyi zviri kuitika munyika kuvhira mu gore la 1914?
Vajiji va Jesu vakamuvhunjisa kuti: “Zviro izvi zvinozoitika riini uye ngacipi cinozova civoniso cokuvepo kenyu no cinokhombija kuti nyika iyi yaakumagumo?” (Mateu 24:3) Jesu wakavadavira esivavhunja zviro zvakawanda zvaizoitika paaizotanga kutonga inga Mambo wo Umambo wa Mwari ari kudenga. Zvimweni zvakhona zvinobatanijawo hondo, njala, uye kudengenyeka ko nyika. (Verenganyi Mateu 24:7.) Bhaibheri lakabhuya kare ngo undhu waizova no vandhu ‘mu mazuva okupejisira,’ ngo ndava yazvo, upenyu ‘waizonesa kurarama.’ (2 Timoti 3:1-5) Kuvhira mu gore la 1914 zviro izvi zviri kulamba zvesishatisisa.
3. Ngenyi zviro zvakatanga kushata maningi pakatanga kutonga Umambo wa Mwari?
Jesu paakandopera kugajwa inga Mambo wo Umambo wa Mwari, iyena wakarwisana na Sathana no madhimoni kudenga. Sathana wakanyiswa pa hondo iyi. Bhaibheri rinoti ‘iyena wakakhandirwa panyika, uye ngirozi jake jakakhandirwawo pasi pano pamwepo naye.’ (Zvakazarurwa 12:9, 10, 12) Sathana wakanyangajwa maningi ngo kuti unozviziva kuti kasara nguva doko kuti apalajwe. Izvi ndizvona zviri kumuita kuti aitise zvakashata no matambujiko munyika yese. Ngo ndava yazvo, azvitishamisi patinowona zviro zvesishatisisa munyika! Asi Umambo wa Mwari unozopeja matambujiko ese aya.
JIJANYI ZVIZINJI
Jijanyi kuti tinozvizivisa kudini kuti Umambo wa Mwari wakatanga kutonga mugore la 1914. Uye jijanyizve kuti izvi zvinotiita kuti tide kuitenyi.
4. Uporofita uri mu Bhaibheri unokhombija kuti Umambo wa Mwari wakatanga kutonga mu gore la 1914.
Mwari wakaita kuti Mambo Nebhukadhinezari woku Bhabhironi lokare arote hope. Muhope iji Jehovha wakamukhombija zvaizoitika muno lamangwana. Dhanieri wakasanangura zvaibhuya hope iji, hope jakona jaishandawo ku utongi wa Nebhukadhinezari no Umambo wa Mwari.—Verenganyi Dhanieri 4:17. a
Verenganyi Dhanieri 4:20-26, mapeja wonanyi bhokiso riri papheji 133 kuti mudavire muvhunjo jinotevera:
-
(A) Nebhukadhinezari wakawonenyi mu hope jaakarota?—Wonanyi mavhesi 20 na 21.
-
(B) Zvicinyi zvaizoitika ku mumbuti? —Wonanyi vhesi 23.
-
(C) Zvicinyi zvaizoitika mukupera ko “nguva nomwe”?—Wonanyi vhesi 26.
Hope ja Nebhukadhinezari Jinobatana papi no Umambo wa Mwari
UPOROFITA WAKHONA (Dhanieri 4:20-36)
Utongi
(A) Zimbuti lakakura
Utongi unomboemeswa
(B) “Wisanyi zimbuti,” mbhera “nguva nomwe jipere”
Utongi unohwijiswa
(C) “Umambo wenyu unozohwirijwa kamuri”
Kuzajika kokutanga ko uporofita uwu . . .
-
(D) Ndiyani waifananijwa no zimbuti? —Wonanyi vhesi 22.
-
(E) Wakaema kutonga rini? —Verenganyi Dhanieri 4:29-33.
-
(F) Zvicinyi zvakaitika kuna Nebhukadhinezari mukupera ko “nguva nomwe”? —Verenganyi Dhanieri 4:34-36.
KUZAJIKA KOKUTANGA
Utongi
(D) Nebhukadhinezari, Mambo wo Bhabhironiya waizoema kutonga.
Utongi unomboemeswa
(E) Pasure po gore la 606 Kristu asati aviya, Nebhukadhinezari wakambopenga woema kutonga komakore manomwe.
Utongi unohwijiswa
(F) Nebhukadhinezari wakaema kupenga ohwirirazve kutonga.
Kuzajika kocipiri ko uporofita uwu . . .
-
(G) Zimbuti raiemererenyi? —Verenganyi 1 Makoronike 29:23.
-
(H) Ivona vakaema kutonga rini? Tinozvizivisa kudini kuti Jesu paainga ari pasi pano majimambo aya ainga asakaemeswa? —Verenganyi Ruka 21:24.
-
(I) Utongi uwu wakazohwirijwa rini uye kupi?
KUZAJIKA KOCIPIRI
Utongi
(G) Majimambo o Vaisrael vaiemerera utongi wa Mwari.
Utongi unomboemeswa
(H) Jerusarema rakapalajwa, izvi zvakaemesa kutonga ko majimambo o Vaisraeri ko makore 2.520.
Utongi unohwijiswa
(I) Jesu wakatanga kutonga kudenga inga Mambo wo Umambo wa Mwari
Nguva nomwe jinoemerera makore mangana?
Mativi amweni ari mu Bhaibheri anotibesa kuzwisisa mativi amweni. Inga muezaniso, bhuku la Zvakazarurwa rino bhuya kuti nguva ndhatu no hafu ndizvona zvimwezvo no kubhuya kuti mazuva 1.260. (Zvakazarurwa 12:6, 14) Ndiyo ndava, nguva nomwe jikabatanijwa jinoita mazuva 2.520. Nguva jimweni Bhaibheri rinoshandisa zuva rimwe resibhuira gore. (Ezekiel 4:6) Ngo kudalo, nguva nomwe jinobhuiwa mu bhuku la Dhanieri jinoemerera makore anokwana kuita 2.520.
5. Zviro zvakacinja maningi munyika kuvhira mu gore la 1914
Jesu wakabhuya zviro zvaizoitika munyika paaizogajwa inga Mambo. Verenganyi Ruka 21:9-11, mapeja bhuisananyi ngo muvhunjo unotevera:
-
Inga zvabhuiwa mu mavhesi aya, ngazvipi zvamuri kuwona zvesiitika?
Mupostori Pauro wakabhuya ngo zvo undhu waizova no vandhu mu mazuva okupejisira o utongi wo vandhu. Verenganyi 2 Timoti 3:1-5, mapeja bhuisananyi ngo muvhunjo unotevera:
-
Inga zvabhuiwa mu mavhesi aya, nga zvipi zvamuri kuwonawo zvesiizwa ngo vandhu mazuva ano?
6. Tinodikana kutsigira Umambo wa Mwari
Verenganyi Mateu 24:3, 14, mapeja bhuisananyi ngo muvhunjo jinotevera:
-
Ibasa ripi rinokosha rinokhombija kuti Umambo wa Mwari urikutonga?
-
Mungaitenyi kuti mubatanewo no vamweni pakuita basa iri?
Umambo wa Mwari waakutonga uye zuva lokuti utonge nyika yese laaphedo. Verenganyi VaHebheru 10:24, 25, mapeja bhuisananyi ngo muvhunjo unotevera:
-
Umwe nga umwe wedu anodikana kuitenyi patinonga tesiwona “zuva reikhwedera kudai”?
Kudai mukajija ciro cokuti mungabesa nokuponesa vamweni, maizoitenyi?
VAMWENI VANOTI: “Ngenyi Zvapupu zva Jehovha zvinogara zvesibhuya ngo zvo gore la 1914?”
-
Maizovadavirisa kudini?
TAJIJENYI
Tajija kuti uporofita uri mu Bhaibheri, uye zviro zviri kuitika munyika mazuva ano, zvinokhombija kuti Umambo wa Mwari waakutonga. Tajijazve kuti tingakhombija kuti tinozvitenda izvi ngo kugala tesiparijira uye kupinda musangano.
Muvhunjo Jokuhwirijira
-
Zvicinyi zvakaitika pakupera ko nguva nomwe jinobhuiwa mu Bhaibheri mu bhuku la Dhanieri?
-
Icinyi cinomuita kuti muve no cokwadi cokuti Umambo wa Mwari wakatanga kutonga mu gore la 1914?
-
Mungakhombijisa kudini kuti Umambo wa Mwari waakutonga?
JIJANYI ZVIMWENI
Verenganyi muwone kuti vanyori vo zvakaitika kare no vamweniwo vanoti kudini ngo kucinja kakaitika zviro munyika kuvhira mu gore la 1914.
“Pakatanga Muhambiro Wakashata” (Mukai! wa Abril wo 2007)
Verenganyi muwone kuti uporofita uri pana Mateu 24:14 wakacinjisa kudini upenyu wo mwanarume umweni.
“Apana Cimweni Candaida Kudarika Baseball!” (Nharireyomurindi N.° 3 yo 2017)
Tinozvizivisa kudini kuti uporofita uri pana Dhanier Citsauko 4 unobhuya ngo zvo Umambo wa Mwari?
“Umambo wa Mwari Wakatanga Kutonga Rini? (Divi 1)” (Nharireyomurindi N.° 1 ya Outubro yo 2014)
Icinyi cinokhombija kuti nguva nomwe jinobhuiwa mu bhuku la Dhanieri citsauko 4 jakapera mu gore la 1914?
“Umambo wa Mwari Wakatanga Kutonga Rini? (Divi 2)” (Nharireyomurindi, 1 ya Novembro yo 2014)
a Wonanyi zvijijo zviviri zvokupejisira zviri pa divi rinozwi “Jijanyi Zvimweni” mucijijo cino.
