CIJIJO 34

Tingaitenyi Kuti Tikombije Kuti Tinoda Jehovha?

PLAY

Murikuzvizwa muno ushamwari wakavanga na Mwari zvino, kudarika pomakatanga kujija Bhaibheri here? Maidakarira kulamba mesivangisa ushamwari wenyu naye here? Kudai zvakadalo, ejuriranyi kuti Jehovha paanowona rudo wenyu kaari resiengejeka, iyena unozomuda maningi uye unozomusapota. Tingaitenyi kuti tikhombije kuti tinoda Jehovha?

1. Tingaitenyi kuti tikhombije kuti tinoda Jehovha?

Tinokhombija kuti tinoda Jehovha ngo kumuzwira. (Verenganyi 1 Johani 5:3.) Iyena aavangiriji mundhu kuti amuzwire. Jehovha unopa mukana umwe nga umwe wedu kuti akhete kumuzwira kana kuti haiwa. Ngenyi esidalo? Ngokuti Jehovha unoda kuti ‘timuzwire ngo mweyo wese.’ (VaRoma 6:17) Ngo magama amweni, Jehovha unoda kuti mumuzwire ngo mweyo wese, haiwa ngo kuita zvokuvangirijwa. Divi lo 3 no lo 4 lo bhuku rino, tinozowona zviro zvamungaita kuti mukhombije kuti munoda Jehovha, ngo kuita zviro zvaanoda haiwa zvaasingadi.

2. Ngenyi nguva jimweni zvesinesa kuti tikhombije kuti tinoda Jehovha?

Bhaibheri rinoti: ‘Vakarurama vano matambujiko mazinji.’ (Mapisarema 34:19) Tese tinorwisana no muviri wedu uno cishaishi. Nguva imweni tinosangana no matambujiko akadai inga ulombo, kutama kubathwa zvakanaka uye no matambujiko amweniwo. Patinosangana no matambujiko, nguva imweni zvingatinesa kuti tiite zvinoda Jehovha. Izvi zvinoitika ngokuti kuita zvakashata zvingaita inga zvisinganesi. Asi kudai mukaita zvese zvinoda Jehovha kunyange zvesinesa, munonga mesikhombija kuti munomuda maningi kudarika zviro zvese. Uye munonga mesikhombijazve kuti makagondeka kaari. Ngokudalo, Jehovha unovawo akagondeka kamuri. Iyena aazomusii mbhera na rini.—Verenganyi Mapisarema 4:3.

JIJANYI ZVIZINJI

Wonanyi kuti ngenyi Jehovha esireremeja maningi kumuzwira kamunomuita, wonanyizve zvingamubesa kuti mulambe makagondeka kaari.

3. Shwiro inobatanijawo yemwi

Mu Bhaibheri mu bhuku la Jobho, tinoverenga kuti Sathana pano zvaakanyepera Jobho, kubatanijawo no vandhu vese vanonamata Jehovha. Verenganyi Jobho 1:1, 6–2:10, mapeja bhuisananyi ngo muvhunjo jinotevera:

Mukuzwirana no zvakabhuiwa ndi Sathana, Jobho wainamata Jehovha ngo ndava yenyi?—Verenganyi Jobho 1:9-11.
Sathana wakabhuyenyi ngo pamusoro po vandhu vese, kubatanijawo na yemwi?—Verenganyi Jobho 2:4.

Verenganyi Jobho 27:5b, mapeja bhuisananyi ngo muvhunjo unotevera:

Jobho wakakhombijisa kudini kuti waida maningi Jehovha?

Jobho wakakhombija kuti waida Jehovha ngo kulamba akagondeka kaari

Yesu tingakhombijawo kuti tinoda Jehovha ngo kulamba takagondeka kaari

4. Dakajisanyi mweyo wa Jehovha

Verenganyi Zvirevo 27:11, mapeja bhuisananyi ngo muvhunjo jinotevera:

Jehovha unozwa kudini pamunoita zviro zvakanaka no kumuzwira? Ngenyi madalo?

5. Yemwi mungava mundhu wakagondeka kuna Jehovha

Kuda katinoita Jehovha kunotiita kuti tivhunjewo vamweni ngo zvake. Kuda katinoita Jehovha kunotiita kuti timuzwire kunyange pazvinonga zvesinesa kuti tizviite. Wonanyi VHIDHIYO, mapeja bhuisananyi ngo muvhunjo jinotevera:

VHIDHIYO: Jiviriranyi Rutendo Wenyu Kunyange Pamunoshorwa (5:09)

Munolangarira kuti zvinonesa kubhuya no vamweni ngo zva Jehovha here?
Mu vhidhiyo iyi, zvicinyi zvakabesa Grayson kuti asathya?

Zvakareruka maningi kuti tive takagondeka kuna Jehovha, kudai tikada zvaanoda no kunyenya zvaanonyenya. Verenganyi Mapisarema 97:10, mapeja bhuisananyi ngo muvhunjo jinotevera:

Iyemwi majija zviro zvakawanda maningi. Hino ngazvipi zviro zvinoda Jehovha? Ngazvipi zvinonyenyiwa ndi Jehovha?
Mungaitenyi kuti mujije kuda zvakanaka no kunyenya zvakashata?

6. Kuzwira Jehovha nguva yese kunotibesa maningi

Kuzwira Jehovha ciro cakanaka maningi catingaita. Verenganyi Isaya 48:17, 18, mapeja bhuisananyi ngo muvhunjo jinotevera:

Munolangarira kuti Jehovha unoziva zvakatinakira nguva yese here? Ngenyi madalo?
Kuvhira pomakatanga kujija Bhaibheri mbhera zvino. Ngazvipi zvomakajija ngo zva Jehovha zvakamubesa?

VAMWENI VANOTI: “Mwari aawajiwi ngo zviro zvakashata zvandinoita, ngokuti aana basa nazvo.”