CIJIJO 35

Tingaitenyi Kuti Tikhete Kuita Zviro Zvakanaka

PLAY

Tese hedu tinodikana kukheta zvokuita mu upenyu. Zvimweni zvakona zvingatibesa, zvimweni zvingatiita kuti titambujike uye zvingapsasawo ushamwari wedu na Jehovha. Inga muezaniso, nguva jimweni tingadiwa kukheta kuti tinoda koogarepi, zvatingaita kuti tiwane zvokurarama ndizvona, no kukheta kuti tinoda kurovora kana kuti haiwa. Kudai tikakheta kuita zviro zvakanaka tinova no upenyu wakanaka uye tinodakajisawo Jehovha.

1. Bhaibheri ringamubesesa kudini kuti mukhete kuita zviro zvakanaka?

Musati makheta kuita zviro zviri zvese, itanyi mukumbiro kuna Jehovha mesikumbira kuti amubese, uye wonanyi kuti Bhaibheri rinoti kudini ngo zvazvo. (Verenganyi Zvirevo 2:3-6.) Nguva jimweni Jehovha unopa mutemo jakajeka. Pakadai zvatingakheta kuita, kuzwira mutemo uwu.

Asi kudai mu Bhaibheri musina mutemo wakajeka unotivhunja zvatingaita keni? Kunyange zvakadalo, Jehovha ‘unomutungamirira mugwanja ramunodikana kuhamba ndirona.’ (Isaya 48:17) Unozviitisa kudini? Bhaibheri rino ndhungamiriro jingamubesa. Ndhungamiriro jonajo jo Bhaibheri, jinomubesa kuwona malangaririre a Jehovha no mazwire ake. Nguva jimweni tinowona malangaririre a Jehovha patinoverenga ndhorowondho jiri mu Bhaibheri. Uye patinozwisisa mazwire a Jehovha tinozoita zviro zvinomudakaja.

2. Tinodikana kulangarirenyi tisati takheta zvokuita?

Bhaibheri rinoti: ‘Mundhu akangwara unalangarijisisa asati akheta kuita ciro.’ (Zvirevo 14:15) Izvi zvinoda kubhuya kuti tisati takheta kuita ciro tinodikana kunasa kulangarira zvese zvinobatanijwepo. Zvivhunjisenyi kudai: ‘Nga ipi ndhungamiriro yo Bhaibheri yandingashandisa apa? Zvandakhetari zvinozondipa runyararo mumulangariro here? Zvinopsvasisawo kudini vamweni? Cikuru pa zvese, zvisaita kuti Jehovha adakare here?’—Dheuteronomi 32:29.

Ndi Jehovha basi unodikana kutivhunja kuti nga zvipi zvakanaka uye nga zvipi zvakashata. Kudai tikanasa kuziva mutemo no ndhungamiriro ja Jehovha uye tokheta kuizwira, tinonga tesinasa kujijisa hana yedu. Hana yedu cipo catinaco cinotibesa kusiyanisa cakanaka no cakashata. (VaRoma 2:14, 15) Hana ikanasa kujijiswa, inotibesa kuti tiite zviro zvakanaka.

JIJANYI ZVIZINJI

Wonanyi kuti ndhungamiriro jo Bhaibheri no hana yedu, zvingatibesesa kudini kuti tikhete kuita zviro zvakanaka.

3. Tenderanyi kutungamirirwa ngo Bhaibheri

Bhaibheri ringatitungamirisa kudini patinonga tesida kukheta zvokuita? Wonanyi VHIDHIYO, mapeja bhuisananyi ngo muvhunjo jinotevera:

VHIDHIYO: Itanyi Kuti Bhaibheri Rimutungamirire mu Upenyu Wenyu (5:54)

Icinyi cinozwi rusununguko wo kuzvikhetera?
Ngenyi Jehovha wakatipa rusununguko wo kuzvikhetera?
Jehovha wakatipenyi cinotibesa kuti tikhete kuita zviro zvakanaka?

Kuti muwone muezaniso umwe wo ndhungamiriro yo Bhaibheri, verenganyi VaEfeso 5:15, 16. Mapeja bhuisananyi ngo zvamungaita kuti ‘mushandise nguva yenyu zvakanaka’ kuti . . .

muverenge Bhaibheri nguva yese.
muve mwamuna, mukaji, mubereki kana kuti mwana wakanaka.
mupinde musangano no ungano.

4. Jijisanyi hana yenyu kuti mukhete kuita zviro zvakanaka

Bhaibheri parinopa mutemo yakajeka ngo pamusoro po shwiro yakona, azvitinesi kukheta kuita zviro zvakanaka. Asi kudai Bhaibheri risingabhuyi zvakajeka ngo shwiro yakona keni? Wonanyi VHIDHIYO, mapeja bhuisananyi ngo muvhunjo jinotevera:

VHIDHIYO: ‘Ivanyi no Hana Yakanaka’ (5:13)

Mu vhidhiyo iyi, hanzvaji iyi yakaitenyi kuti ijijise hana yayo kuti izokheta kuita zviro zvinodakaja Jehovha?

Ngenyi tisingadikani kuvhunjisa vamweni kuti toitenyi pa shwiro yatinodikana kuzvikhetera tega? Verenganyi VaHebheru 5:14, mapeja bhuisananyi ngo muvhujo jinotevera:

Kukumbira vamweni kuti vatikhetere zvokuita zvinoita inga zvakareruka. Asi umwe nga umwe wedu ngazvipi zvaanodikana kuziva kusiyanisa?
Zvicinyi zvingamubesa kuti mujijise hana yenyu kuti imubese pa kuita zvakanaka?

Hana yedu yakatojana no mapa, inotibesa kukheta gwanja lakanaka mu upenyu

5. Reremejanyi hana jo vamweni

Vandhu vakasiyana siyana, ngo zvinovaita kuti vakhetewo zviro zvakasiyana siyana. Tingakhombijisa kudini kuti tinoreremeja hana jovamweni? Wonanyi muezanaiso muviri iji:

Muezaniso wokutanga: Hanzvaji imweni inodakarira zvo makiyaje inocinja ungano yoenda ku ungano imweni ino hanzvaji jisingadakariri zvo makiyaje.

Verenganyi VaRoma 15:1 na 1 VaKorinde 10:23, 24, mapeja bhuisananyi ngo muvhunjo jinotevera:

Mukuzwirana no mavhesi aya, hanzvaji iyi ingakheta kuitenyi? Mungaitenyi pamunonga muno mundhu uno hana inomurambija kuita ciro cokuti hana yenyu inomutendera?

Muezaniso wocipiri: Hama imweni inoziva kuti Bhaibheri arirambiji kumwa doro zvino mudida, asi inokheta kutama kurimwa. Iyona inokokwa kwenda kolarira kumuzi ko hama imweni, asi iri konayo inowona hama iya yesimwa doro.

Verenganyi Muparidzi 7:16 na VaRoma 14:1, 10, mapeja bhuisananyi ngo muvhunjo jinotevera:

Mukuzwirana no mavhesi aya, hama iyi ingakheta kuitenyi? Mungaitenyi pamunonga muno mudhu uno hana inomutendera kuita ciro cokuti hana yenyu inomurambija?

Mungaitenyi kuti mukhete kuita zviro zvakanaka?

1. Kumbiranyi Jehovha kuti amubese kukheta kuita zvakanaka.—Jakobho 1:5.

2. Psakisisanyi mu Bhaibheri no mu mabhuku anosanangura Bhaibheri, kuti muzive kuti Mwari unolangarirenyi ndizvona. Psakanyiwo besero ku Mukristu ano uzivi mu zvokunamata.

3. Langariranyiwo kuti kudai mukakheta kuita ciri cese musasara mesizvizwa kudini uye hana jovamweni jinosara jesizwawo kudini.

VAMWENI VANOTI: “Ndinoita zvandinoda no upenyu wangu, andina basa no zvinolangarirwa ngo vamweni.”

Ngenyi tesidikana kulangarira kuti Mwari no vandhu vamweni vanozwa kudini ngo zvatinokheta kuita?

TAJIJENYI

Tajija kuti, kudai tesida kukhete kuita zviro zvakanaka, tinodikana kutanga taziva kuti Jehovha unoti kudini ndizvona. Tajijazve kuti tinodikana kulangarira hana jo vamweni tisati takheta kuita ciro.