CIJIJO 40
Tingaitisa Kudini Kuti Tive Vandhu Vakacena Kuna Mwari?
Ambolangariranyi amai vesinasirira mwana wavo kuti aende kucikora. Ivona vanoda kuva no cokwadi cokuti mwana wavo wageza uye zvokusimira zvake zvakacena no kurongeka. Izvi zvakanaka ngokuti unova no utano wakanaka, uye vamweni vanozowona kuti vabereki vake vanomungwarira zvakanaka. Inga vabereki vanoda kuti vana vavo vave vakacena, Baba vedu vano rudo Jehovha vanodawo kuti tive vandhu vakacena mumulangariro, mumavereketero no mutsika. Kuva vandhu vakacena kunobesa yesu pacedu uye kunoita kuti Jehovha akujwe.
1. Tingaitenyi kuti tive vandhu vano utsanana?
Jehovha unotivhunja kuti: ‘Tinodika kuva vapsene.’ (1 Petro 1:16) Kuti tive vandhu vapsene tinodika kuva vakacena uye vano utsanana. Tinoita izvi ngo kugeza nguva jese, kuwaca zvokusimira zvedu, kucenesa muzi jedu uye kusuka zvifambiso zvedu kuti zvive zvakacena no kuita kuti zviro zvedu zvive zvakarongeka. Tingabeseravo pakucenesa Nyumba yedu yo kunamatira. Patinova vandhu vakacena kumativi ese tinoita kuti Jehovha akujwe.—2 VaKorinde 6:3, 4.
2. Maitire api atinodikana kusiya kuti tive vandhu vakacena?
Bhaibheri rinotivhunja kuti ‘tizvicenese pa zviro zvese zvinosvipisa nyama no mweya.’ (2 VaKorinde 7:1) Izvi zvinoda kubhuya kuti tinodikana kusiya zviro zvese zvinokhuvaza muviri wedu no mulangariro yedu. Tinoeja zvese zvatinokona kuti tisalangarira zviro zvakashata ngokuti tinoda kuti zvatinolangarira zvidakaje Jehovha. (Mapisarema 104:34) Pamabhuyo edu tinoeja kubhuya masoko akanaka.—Verenganyi VaKorose 3:8.
Ngazvipi zviro zvimweni zvingasvipisa muviri wedu no tsika? Zviro zvimweni zvingasvipisa muviri wedu kubhema forhya no kushandisa mutombo imweni inodhakwisa. Ngo kudalo, yesu atiiti zviro zvakadalo. Izvi zvinotiita kuti tive no utano wakanaka, uye tinonga tesikhombija kuti tinoreremeja upenyu. Tingaitenyi kuti tive no mulangariro yakacena? Tinodikana kuvangisira kuti tisiye tsika jakashata, jakadai inga kuita cinyamundundu no kuwona vhidhiyo jinokhombija zvo umitu umitu. (Mapisarema 119:37; na VaEfeso 5:5) Azvito kureruka kuti tisiye tsika iji, asi Jehovha ungatibesa kuti tijisiye.—Verenganyi Isaya 1:13.
JIJANYI ZVIZINJI
Wonanyi kuti kuva vandhu vano utsanana kunokujisa kudini Jehovha. Wonanyizve kuti tingaitenyi kuti tisiye tsika jisito kucena kana kuti jakashata.
3. Kuva no utsanana kunokuja Jehovha
Patinoverenga mutemo wa Jehovha waakapa Vaisraeri, tinowona kuti zvakanaka maningi kuti vandhu vake vave vano utsanana. Verenganyi Eksodho 19:10 na 30:17-19, mapeja bhuisananyi ngo muvhunjo jinotevera:
-
Mavhesi aya anokhombijisa kudini mawonere a Jehovha, ngo pamusoro po kuva vandhu vano utsanana?
-
Zvicinyi zvingatibesa kuti tive vandhu vano utsanana?
Ibasa maningi kuti tigare no zviro zvedu zvese zvakacena. Asi tinokona kuzviita, pasinenyi nokuti tinogara kupi, tiri valombo kana kuti tiri vapfumi. Wonanyi VHIDHIYO, mapeja bhuisananyi ngo muvhunjo unotevera:
-
Tikagala no zviro zvedu zvakacena, zvinobesa kudini kuti vandhu vareremeje basa redu lokuparijira?
4. Siyanyi tsika jisito kucena
Jehovha ungamubesa kuti musiye tsika jese jakashata
Kudai mesibhema kana kushandisa mutombo inodhakwisa, munonasa kuzviziva kuti zvinonesa maningi kuzvisiya. Asi icinyi cingamubesa? Langariranyi kuti munokhuvazika kudini ngo tsika iji. Verenganyi Mateu 22:37-39, mapeja bhuisananyi kuti kubhema forhya no mutombo imweni inodhakwisa kungakhuvazisa kudini . . .
-
ushamwari wenyu na Jehovha.
-
mbhuri yenyu no shamwari jenyu.
Ivanyi no ulongwa wokuti mungaitenyi kuti musiye tsika jakashata. a Wonanyi VHIDHIYO.
Verenganyi VaFiripi 4:13, mapeja bhuisananyi ngo muvhunjo unotevera:
-
Kuva no ulongwa wo kuita mukumbiro, kujija Bhaibheri uye kupinda musangano, kungabesa kudini mundhu kuti asiye tsika jisito kucena?
5. Rwisananyi no mulangariro, uye no tsika jakashata
Verenganyi VaKorose 3:5, mapeja bhuisananyi ngo muvhunjo jinotevera:
-
Tinozvizivisa kudini kuti, kuwona zviro zvo umitu mitu, kuita cinyamundundu no kutumira mamesajhi anopseruja, azvito kucena kuna Jehovha?
-
Munolangarira kuti zvinoita here kuva no tsika jakanaka inga zvinodiwa ndi Jehovha? Ngenyi madalo?
Wonanyi kuti mungaitenyi kuti murwisane no mulangariro jisito kucena. Wonanyi VHIDHIYO.
Jesu wakashandisa muezaniso waikhombija kuti tinodikana kuvangisira kuti tive no tsika jakanaka. Verenganyi Mateu 5:29, 30, mapeja bhuisananyi ngo muvhunjo unotevera:
-
Kunyange Jesu wainga esibhuya kuti atidikani kuzvikhuvaza, asi iyena wakakhombija zviro zvatinodika kuita. Zvicinyi zvingaizwa ngo mundhu kuti asalangarira zvisito kucena? b
Kudai murikurwisana no mulangariro jisito kucena, Jehovha unodakala maningi ngo zvamuri kueja kuita. Verenganyi Mapisarema 103:13, 14, mapeja bhuisananyi ngo muvhunjo unotevera:
-
Kudai muri kurwisana no mulangariro jisito kucena, vhesi iji jingamubesesa kudini kuti mulambe mesirwa?
Musaremba!
Kudai mundhu akaita cishaishi, zvakareruka maningi kuti alangarire kuti: ‘Inini ndiri mundhu asingakoshi zvitori nane hazvo kuti ndigare ndakadai.’ Asi ambolangariranyi izvi basi: Kudai mugogomi akawa azvibhuyi kuti watoruza mutambo, azvibhuizve kuti unodika kuenda kootangisa nga papsa. Mukufananawo, mukaphinda kuita ciro cakashata comakasiya kuita kare, azvibhuyi kuti amusakoni kusiya tsika jakashata, azvibhuizve kuti amusakoni kuita zviro zvakanaka. Izvi zvinoitika ku mundhu wese, uye zvinokhombija kuti muri kutorwisa. Musahwirira sure! Jehovha unozomubesa kuti murwisane no tsika jakashata.
VAMWENI VANOTI: “Inini ndajaeya kuita izvi. Andisakoni kuzvisiya.”
-
Ivhesi ipi iri mu Bhaibheri yo maizoshandisa kuti mukhombije mundhu uwu, kuti ungakona kusiya tsika jakashata esibeswa ndi Jehovha?
Tajijenyi
Tajija kuti kudai tikagara muviri yedu yakacena, mulangariro yedu yakacena uye tsika yedu jakacenawo tinodakaja Jehovha.
Muvhunjo Jokuhwirijira
-
Ngenyi zvesikosha kuti tigare takacena?
-
Mungaitenyi kuti muve mundhu ano utsanana?
-
Mungaitenyi kuti pfungwa jenyu pamwe no tsika zvigare zvakacena?
JIJANYI ZVIMWENI
Zviro zvipi zvisinganesi zvamungaita kuti muve mundhu ano utsanana, kunyange muri mulombo?
Wonanyi zviro zvimweni zvingamubesa kuti muregere kubhema.
‘Zvamungaita Kuti Muregere Kubhema’ (Mukai! wa Maio wo 2010)
Jijanyi kuti kuwona zvo umitu umitu kungakhuvazisa kudini.
“Kuwona zvo Umitu Umitu—Kunokhuvaza Here?” (Nharireyomurindi, 1 ya Agosto yo 2013)
Wonanyi kuti mwanarume umweni wakaitenyi kuti asiye kuwona zvo umitu umitu.
‘Ndakaeja Kakawanda, Asi Ndazozvikona’ (Nharireyomurindi No. 4 yo 2016)
a Kuti musiye tsika isito kunaka, verenganyi divi lakazwi “JIJANYI ZVIMWENI” shwiro inoti: “Zvamungaita Kuti Muregere Kubhema”.
b Kuti mubeswe kusiya tsika yo kuita cinyamundundu wonanyi shwiro inoti: “Ndingaitenyi Kuti Ndisiye Tsika Yo Kuita Cinyamundundu?” mu bhuku rinozwi Mibvunzo Inobvunza Vechiduku—Mhinduro Dzinoshanda, Bhuku 1, citsauko 25.
