CIJIJO 44
Itanyi Mafesta ese Anodakaja Mwari?
Jehovha unoda kuti vandhu vadakajwe ngo upenyu, uye kuvawo no nguva yo kumbozorora. Asi mafesta ese anodakaja Mwari here? Tingakhombijisa kudini kuti tinoda Jehovha pashwiro iyi?
1. Ngenyi mafesta akawanda aadakaji Jehovha?
Zvingatishamisa kuziva kuti mafesta akawanda aadakaji Jehovha kana kuti akatangira mucihedheni. Mafesta akadaro akabatana no kunamata kokunyepa uye akabatanazve no zvoudhimoni kana kuti mulangariro wo kuti mweya wo mundhu aufi. Mafesta amweni akavha pakutenda maninji. (Isaya 65:11) Jehovha unovhunja vanamati vake kuti: ‘Budanyi pakati pavo . . . musabata zviro zvisito kucena.’—2 VaKorinde 6:17. a
2. Jehovha unozwa kudini ngo pamusoro po mafesta anokuja vandhu?
Jehovha unotivhunja kuti tingwarire ‘kuthemba mundhuwo hake.’ (Verenganyi Jeremiya 17:5.) Mafesta amweni akaizirwa kukuja majimambo no masoca. Mafesta amweni ngo okulangarira nyika no zuva lovakatanga kutonga. (1 Johani 5:21) Amweni ngo okukuja zvomatongerwe o nyika kana masangano anojivirira zvitenderwa zvo vandhu. Iyemwi munolangarira kuti Jehovha unozwa kudini patinoenda kumafesta anokuja vandhu uye asingazwirani no cinangwa cake?
3. Zvicinyi zvinoizwa pamafesta amweni zvisikadakaji Mwari?
Bhaibheri rinolambija ‘kudhakwa, kuita mabuso akanyanyisa, no kumwa maningi doro.’ (1 Petro 4:3) Pa mafesta amweni, vandhu vanoita zviro vasikazvibati no kuita zvo uhure. Asi kuti tive shamwari ja Jehovha tinodikana kutiza mushowo uwu wo muhambiro wakashata.
JIJANYI ZVIZINJI
Wonanyi kuti mungaitenyi kuti mudakaje Jehovha ngo kukheta zviro zvakanaka ngo pamusoro pokuita mafesta kana kuregera kumaita.
4. Lambanyi mafesta asikadakaji Jehovha
Verenganyi VaEfeso 5:10, mapeja bhuisananyi ngo muvhunjo jinotevera:
-
Tisati taenda kufesta, zvicinyi zvatinodikana kutanga taziva?
-
Mafesta api anonyanya kuzivika kamunogarari?
-
Munolangarira kuti mafestewo anodakaja Jehovha here?
Makambozvivhunjisa here kuti Mwari anoti kudini ngo kupemberera zuva lokubarwa? Mu Bhaibheri apana mundhu wainamata Jehovha unobhuiwa kuti waipemberera zuva lokubarwa, asi rinobhuya ngo zvo vandhu vaviri vainga vasikanamati Jehovha vakapemberera mazuva avo okubarwa. Verenganyi Genesisi 40:20-22 na Mateu 14:6-10. Mapeja bhuisananyi ngo muvhunjo jinotevera:
-
Pa mafesta maviri aya okubarwa, zvicinyi zvakaitika?
-
Kuvhira mushwiro iji jotaverengari mu Bhaibheri, munowona kuti Jehovha unozwa kudini ngo zvokupemberera zuva lokubarwa?
Asi nguva imweni mungalamba muno muvhunjo wokuti: ‘Jehovha uno basa nazvo here kudai ndikapemberera hangu zuva langu lokubarwa no mafesta amweni asikazwani no zviri mu Bhaibheri?’ Verenganyi Eksodho 32:1-8. Mapeja, wonanyi VHIDHIYO, mapeja bhuisananyi ngo muvhunjo jinotevera:
-
Ngenyi tinodikana kugara no cokwadi co zviro zvinodakaja Jehovha?
-
Tingazviitisa kudini?
Tingazivisa kudini mafesta asikadakaji Mwari
-
Kubhuya kuti iyona yakatangira pa jijiso jisikavhi mu Bhaibheri here? Kuti muwane mupingulo psakanyi kuziva matangire oyakaita.
-
Kubhuya kuti iyona inopa rukujo vandhu, masangano no nyika here? Tinodikana kuziva kuti ndi Jehovha basi unodikana kukujwa pa zviro zvese, uye ndiyena watinodikana kuthemba basi kuti unozopeja matambujiko ese ari munyika.
-
Kubhuya kuti mafesta aya anozwirana no zvinobhuiwa ngo Bhaibheri kuti zvakanaka here? Tinodikana kulamba tino undhu wakanaka.
5. Besanyi vamweni kuti vareremeje zvamunotenda
Zvinonesa kulamba, kudai vamweni vesimuvangirija kuti muendewo kumafesta asikadakaji Jehovha. Vavhunjenyi zvamunotenda ngo mweyo wese mesingwarira kuvanyangajisa. Kuti muwone kuti mungazviitisa kudini, wonanyi VHIDHIYO.
Verenganyi Mateu 7:12, mapeja bhuisananyi ngo muvhunjo jinotevera:
-
Tesishandisa masoko ari muvhesi iyi, iyemwi mungalambija hama jenyu jinoda kuita mafesta here?
-
Mungaitenyi kuti mukhombije mbhuri yenyu kuti kunyange hazvo musikaiti navo mafesta, iyemwi munovada uye vanokosha kamuri?
6. Jehovha unoda kuti tidakare
Jehovha unoda kuti tive no nguva yokumbodakara no hama no shamwari jedu. Verenganyi Muparidzi 8:15, mapeja bhuisananyi ngo muvhunjo unotevera:
-
Masoko ari muvhesi iyi, anokhombijisa kudini kuti Jehovha unoda kuti tidakare?
Jehovha unoda kuti vandhu vanomunamata vambodakara vari pamwepo. Wonanyi VHIDHIYO kuti muwone kuti izvi zvinoiziswa kudini pamagungano edu o nyika yese.
Verenganyi VaGaratiya 6:10, mapeja bhuisananyi ngo muvhunjo jinotevera:
-
Kubhuya kuti tinodikana kuwanika pa mafesta kuti ‘tiitire vamweni zvakanaka’ here?
-
Nga kupi kupa kunomuita kuti mudakare: Kuvangirijwa kupa ngo ndava yokuti kuno mafesta here? Kana kuti kupa ngokuti munoda kupa?
-
Zvapupu zva Jehovha zvinotengerawo vana vazvo zvipo vasikaemeri mazuva o festa. Kudai muno vana, ngazvipi zvamungavaitira kuti vadakare?
VAMWENI VANOTI: “Kuziva kuti festa iyi yakavha kupi azvina basa. Asi cinokosha kuvalaija basi no hama no shamwari.”
-
Iyemwi maizodavirisa kudini?
TAJIJENYI
Tajija kuti Jehovha unoda kuti tiwane nguva yokumbodakara no hama no shamwari jedu. Asi unodawo kuti tisiye mafesta asikamudakaji.
Muvhunjo Jokuhwirijira
-
Muvhunjo ipi yamungazviita kuti muzive kuti festa iyi inodakaja Jehovha here kana kuti haiwa?
-
Tingabesa kudini hama no shamwari jedu kuti jizwisise kuti ngenyi tisikaiti mafesta?
-
Tinozvizivisa kudini kuti Jehovha unoda kuti tivalaije no kumbodakara?
JIJANYI ZVIMWENI
Verenganyi muzwe ngo zvo mafesta asingaizwi ngo Vakristu.
“Ngenyi Zvapupu zva Jehovha Zvisingaiti Mafesta Amweni?” (Mu saiti jw.org)
Wonanyi zviro 4 zvinokhombija kuti kupemberera zuva lokubarwa akudakaji Jehovha.
“Ngenyi Zvapupu zva Jehovha Zvisingapembereri Mazuva Okubarwa?” (Mu saiti jw.org)
Wonanyi kuti vana vanoda Jehovha vangaitenyi kuti vamudakajise pa zuva lo feriyadho.
Mamiliyau o Vakristu akakheta kuregera kuita festa yo khisimusi. Iyemwi munolangarirenyiwo ngo zvo vakakhetari?
“Vakawana Ciro Cimweni Ciri Nane Kupinda Khisimusi” (Nharireyomurindi, 1 ya Dezembro yo 2012)
a Wonanyi Masoko Okupejisira 5 kuti muwone zvamungaita pamunonga mesilangarira ngo zvo mafesta.
