Jesu wakavhunja vateveri vake kuti ‘vasaita divi lo nyika.’ (Johani 15:19) Izvi zvinosanganisira kurega kuva no divi latinotsigira uye kurega kuva no partidhu yatinotsigira muno zvo matongerwe o nyika. Izvi zvinobatanijawo kurega kupindira mu hondo jo nyika. Asi azvito kureruka kurega kuva no divi latinotsigira, nguva imweni tingatoguma pakusekwa ngo vandhu ngo ndava yo kurega kuva no divi latinotsigira. Tingaitenyi kuti tirege kupindira mu shwiro jo nyika no kulamba takagondeka kuna Jehovha?

1. Vakristu vo cokwadi vanowona kudini utongi wo vandhu?

Vakristu vanoreremeja vatongi. Asi tinoita zvakabhuiwa ndi Jesu zvo kuti, ‘ipanyi Khesari zviro zva Khesari’. Izvi zvinoda kubhuya kuti yesu tinozwira mutemo yo nyika, yakadai inga kubhadhala muthero. (Mako 12:17) Bhaibheri rinojijisa kuti utongi wo vandhu uripo ngokuti Jehovha uri kuutendera kuti utonge. (VaRoma 13:1) Ngo kudalo, tinozviziva kuti utongi wo vandhu pano paunogumira, uye tinozvizivazve kuti matongere awo aadariki matongere a Jehovha. Cimwenizve ngo cokuti Mwari unozopeja matambujiko ese ari mu nyika esishandisa Umambo wake.

2. Tingakhombijisa kudini kuti atina divi latinotsigira mu nyika?

Mukutojana na Jesu, yesu atibatanijwi muno zvomatongerwe o nyika. Vandhu povakawona mushamiso wakaizwa ndi Jesu, ivona vakaeja kumuita mambo, asi iyena wakalamba. (Johani 6:15) Ngenyi wakalamba? Zvaakazobhuya zvinotipa mupingulo wo muvhunjo uwu, iyena wakati: ‘Umambo wangu auiti divi lo nyika ino.’ (Johani 18:36) Ngo kuva kedu vateveri va Jesu, tinokhombija kuti atina divi latinotsigira ngo mushowo wakasiyana siyana. Inga muezaniso, yesu atiendi ku hondo. (Verenganyi Mika 4:3.) Ngo kudalo, yesu atizondi uye atitsigiri partidhu ipi hayo yo mundhu hake anozvipira kuva mutongi. (1 Johani 5:21) Yesu tinoreremeja maningi nyika yatinogara, asi atikotamiri bandera kubatanija no zviro zvimweniwo. Tikaita izvi tinonga tesikhombijira kuti takagondeka ku Umambo wa Mwari.

 JIJANYI ZVIZINJI

3. Vakristu vo cokwadi avana divi rovanotsigira

Jesu no vateveri vake vainga vasina divi lovaitsigira, na yesuwo tinodikana kutevejera muezaniso wavo. Verenganyi VaRoma 13:1, 5-7 na 1 Petro 2:13, 14. Mapeja, wonanyi VHIDHIYO mapeja bhuisananyi ngo muvhunjo jinotevera:

• Ngenyi tinodikana kureremeja vatongi vo nyika?

• Zvicinyi zvatinodikana kuita kuti tikhombije kuti tinozwira vatongi vo nyika?

Mu nguva yo hondo, nyika jimweni jinozviti atina divi latinotsigira, asi jinozopejisira jaanomativi ajinotsigira mu hondomo. Asi kurega kuva no divi latinotsigira zvinoda kubhuyenyi kamare? Verenganyi Johani 17:16. Mapeja, wonanyi VHIDHIYO mapeja bhuisananyi ngo muvhunjo unotevera:

• Zvinoda kubhuyenyi kurega kuva no divi latinotsigira?

Kudai utongi wo vandhu ukativhunja kuita zviro zvisikazwirani no mutemo ya Mwari taizoitenyi? Verenganyi Mabasa 5:28, 29. Mapeja, wonanyi VHIDHIYO mapeja bhuisananyi ngo muvhunjo jinotevera:

• Kudai mutemo wo vandhu wesipesana no mutemo wa Mwari, pa mutemo muviri iyi nga upi wotaizozwira?

• Munokwanisa kulangarira mugariro ingaita kuti Vakristu vasazwira mutemo yo utongi wo vandhu here?

 4. Musava no divi lamunotsigira mumulangariro menyu no zvamunoita

Verenganyi 1 Johani 5:21. Mapeja, wonanyi VHIDHIYO mapeja bhuisananyi ngo muvhunjo jinotevera:

• Mu vhidhiyo iyi, ngenyi Ayenge wakakheta kurega kupindira muno zvomatongerwe o nyika no kukotamira bandera?

• Iyemwi munolangarira kuti wakakheta kuita zvakanaka here?

Mugariro ipi ingaeja kurega kedu kuva no divi latinotsigira? Wonanyi VHIDHIYO, mapeja bhuisananyi ngo muvhunjo jinotevera:

• Tingaitenyi kuti tirege kuva no divi latinotsigira, kudai nyika yedu ikarwisana no nyika imweni?

• Tingaitenyi kuti tirege kuva no divi latinotsigira, kudai vatongi vo nyika vakakheta kuita zviro zvinotibatanijawo?

• Zviro zvatinozwa ngo vandhu vamweni, no zvinobhuiwa mu manotisiya, zvingapsasisa kudini kuva kedu tisina divi latinotsigira?

 TAJIJENYI

Tajija kuti Vakristu vanoshanda ngo simba kuti vasava no divi lovanotsigira, mu mulangariro, zvovanobhuya no zvovanoita.

Muvhunjo Jokuhwirijira

• Zvicinyi zvatinodikana kupa utongi wo vandhu?

• Ngenyi tesidikana kuva tisina divi latinotsigira muno zvomatongerwe o nyika?

• Mugariro ipi ingaeja kurega kedu kuva no divi latinotsigira muno zvomatongerwe o nyika?