CIJIJO 50
Mungaitenyi Kuti Muve no Mbhuri Yakadakala?—Divi 2
Vana cipo cinovha kuna Jehovha. Iyena unoda kuti vabereki varere zvakanaka cipo ici. Jehovha unopa vabereki mazano akanaka kuti vakone kurera zvakanaka vana vavo. Mazano a Mwari anobesa vana kuti vaite divi lavo kuti mbhuri ive no mudakalo.
1. Jehovha unopa mazano api kuvabereki?
Jehovha unoda kuti vabereki vade vana vavo uye kuti vapeje nguva yakawanda navo. Iyena unodazve kuti vabereki varere vana vavo, no kushandisa mazano o Bhaibheri pakuvajijisa. (Zvirevo 1:8) Jehovha unoti kuvabereki: ‘Lambanyi mesivapangira uye mesivajijisa mukuzwirana no zvinodiwa ndi Jehovha.’ (Verenganyi VaEfeso 6:4.) Jehovha unodakala maningi paanowona vabereki vesizwira mazano aya. Iyena unodakalazve maningi paanowona vabereki vesiita basa lavo lokurera vana vavo, voregera kuripa vandhu vamweni.
2. Jehovha unopa mazano api kuvana?
Jehovha unobhuya kudai kuno vana: ‘Yaeyanyi vabereki venyu.’ (Verenganyi VaKorose 3:20.) Kudai vana vakayaeya vabereki vavo no kuvareremeja ivona vanozodakaja Jehovha pamwepo no vabereki vavo. (Zvirevo 23:22-25) Izvi ndizvona zvakaizwawo ndi Jesu paainga asiri mwana mudoko. Iyena wainga ari mundhu wainga asina cishaishi asi kunyange zvakadalo iyena waizwira no kureremeja vabereki vake vainga no cishaishi.—Ruka 2:51, 52.
3. Mungaitenyi kuti mbhuri yenyu ive no ushamwari wakavanga na Mwari?
Kudai muri aba kana kuti amai, ngo zvo cokwadi kuti munoda kuti vana venyu vade Jehovha inga zvamunoita. Mungazviitisa kudini izvi? Ngo kuita zvinobhuiwa ngo Bhaibheri kuti: ‘Unodikana kulamba wesiphinda no kuphinda masoko a Jehovha kuno mwana wako wesivereketa ngo zvawo paunonga uri pamuzi pako no paunohamba mugwanja.’ (Dheuteronomi 6:7) Apa pakashandiswa soko lokuti ‘kuphinda’ nguva imweni munozviziva kuti mwana avige zviro mumusoro munodikana kuzviphinda kakawanda. Ngo kudalo, vhesi iyi inoda kubhuya kuti munodikana kupsaka mukana wokubhuya no vana venyu ngo pamusoro pa Jehovha nguva yese. Zvakanaka maningi kuti mupsake nguva pa vhiki kuti munamate Jehovha sembhuri. Kudai musina vana, zvakanaka maningi kuti muve no nguva yo kujija Bhaibheri pa mavhiki ese.
JIJANYI ZVIZINJI
Wonanyi mazano amweni angabesa mundhu wese ari pambhuri kuti azwe akadakala uye akangwaririka.
4. Jijisanyi vana venyu ngo rudo
Kujijisa vana akuto kureruka. Bhaibheri ringamubesesa kudini? Verenganyi Jakobho 1:19, 20, mapeja bhuisananyi ngo muvhunjo jinotevera:
-
Vabereki vangakhombijisa kudini rudo pavanonga vesibhuya no vana vavo?
-
Ngenyi aba na amai avadikani kupangira vana vavo pavanonga vakanyangajwa? a
5. Ngwariranyi vana venyu
Kuti mungwarire vana venyu, zvinokosha maningi kuti mubhuye navo ngo pamusoro po zvo vatano, kunyange zvesipseruja kuti muzvibhuye. Wonanyi VHIDHIYO, mapeja bhuisananyi ngo muvhunjo jinotevera:
-
Ngenyi azvito kureruka kuno vabereki vamweni kubhuisana no vana vavo ngo pamusoro po zvo vatano?
-
Vabereki vangaitenyi kuti vabhuisane no vana vavo ngo pamusoro po zvo vatano?
Inga zvakabhuya Bhaibheri, nyika ya Sathana iri kuenderera mberi yesishata. Verenganyi 2 Timoti 3:1, 13. Mapeja bhuisananyi ngo muvhunjo unotevera:
-
Vandhu vamweni vanobhuiwa pa vhesi 13 vanojipa vana vadoko. Ngo kudalo, ngenyi zvinokosha kuti vabereki vabhuye no vana vavo ngo pamuro po zvo vatano uye kuvajijisa kuti vazvingwarire kuvandhu vakashata?
Maizviziva here?
Zvapupu zva Jehovha zvabudisa mabhuku no mavhidhiyo akawanda anobesa vabereki kuti vabhuye no vana vavo ngo pamusoro pozvo vatano no kuvajijisa kuti vazvingwarire ku vandhu vakashata. Zvimweni zvakona nga izvi:
-
Ngwariranyi Vana Venyu (vhidhiyo)
-
“Kujijisa Mwana Wenyu ngo Shwiro jo zvo Vatano” (Mukai! No. 5 wo 2016)
6. Reremejanyi vabereki venyu
Vana vangareremeja vabereki vavo ngo mabhuire ovanoita navo. Wonanyi VHIDHIYO, mapeja bhuisananyi ngo muvhunjo jinotevera:
-
Ngenyi zvinokosha kuti mwana abhuye no vabereki vake ngo nderemejo?
-
Mwana ungakhombijisa kudini kuti urikubhuya no vabereki vake ngo nderemejo?
Verenganyi Zvirevo 1:8, mapeja bhuisananyi ngo muvhunjo unotevera:
-
Mwana anodika kupingurisa kudini vabereki vake pavanomupangira?
7. Namatanyi Jehovha sembhuri
Mbhuri jo Zvapupu zva Jehovha jinopsaka nguva pa vhiki yokujija Bhaibheri vari pamwepo, izvi zvinodanwa kuti kunamata ko mbhuri. Asi kujija uku kunoiziswa kudini? Wonanyi VHIDHIYO, mapeja bhuisananyi ngo muvhunjo jinotevera:
-
Mbhuri ingaitisa kudini kuti ilambe ino urongwa wo kunamata ko mbhuri?
-
Mubereki ungaitenyi kuti kunamata ko mbhuri kuve kunodakaja uye kunobesa vana vake? —Wonanyi pikica yokutanga yo cijijo cino.
-
Pamugariro wenyu, zvicinyi zvinganesa pakuita cijijo co mbhuri?
Mu Iziraeri yokare, Jehovha waida kuti mbhuri jigare jesibhuisana ngo pamusoro po zvinyorwa. Verenganyi Dheuteronomi 6:6, 7, mapeja bhuisananyi ngo muvhunjo unotevera:
-
Zviri mumavhesi aya, mungazvishandisisa kudini?
Zvamungaita pa kunamata ko mbhuri:
-
Munganasirira musangano wo ungano.
-
Verenganyi uye bhuisananyi ngo shwiro jiri mu Bhaibheri jinodakaja mbhuri yenyu.
-
Kudai muno vana vadoko shandisanyi mazano amweni ari pakazwi “mabasa okuita” pa jw.org.
-
Kudai muno mwana ari kuaruka bhuyanyi naye ngo shwiro jiri pakazwi vaaruki mu jw.org.
-
Itanyi mutambo yo shwiro jiri mu Bhaibheri no vana venyu.
-
Wonanyi ma vhidhiyo ari pa jw.org mapeja bhuisananyi ngo zvo mawona.
VAMWENI VANOTI: “Bhaibheri arito kureruka ku vana vadoko kuti varizwisise.”
-
Munotiwo kudini?
TAJIJENYI
Tajija kuti Jehovha unoda kuti vabereki vade vana vavo, vavajijise no kuvasapota. Iyena unodazve kuti vana vazwire no kureremeja vabereki vavo uye kuti mbhuri inamate yakabatana.
Muvhunjo Jokuhwirijira
-
Vabereki vangaitenyi kuti vajijise vana vavo no kuvasapota?
-
Vana vangakhombijisa kudini kuti vanoreremeja vabereki?
-
Ngenyi zvakanaka kuti muve no nguva yamunotoziva kuti ngo yokunamata ko mbhuri mavhiki ese?
JIJANYI ZVIMWENI
Zvijijo zvipi zvingazobesa mwana wenyu angazokura?
‘Zvijijo 6 Zvinodikana Kujijiswa Vana’ (Mukai! No. 2 wo 2019)
Wonanyi mazano anovha mu Bhaibheri ngo pamusoro pavaya vari kusapota vabereki vaavasharuka.
‘Bhaibheri Rinoti Kudini ngo Pamusoro Pokusapota Vabereki Vaavasharuka?’ (Mu saiti jw.org)
Wonanyi kuti mwanarume umweni wainga asikazivi kurerwa kunoizwa vana wakazoitisa kudini aba vakanaka.
Wonanyi kuti vabereki vangaitisa kudini kuti vavangise ushamwari wavo no vana vavo.
a Mu Bhaibheri, soko lokuti “kupanga” rinobatanija kupangira, kutungamirira uye kunasirisa pashaishwa. Izvi azvibhui kubata mwana zvakashata kana kumutambuja. —Zvirevo 4:1.
