CIJIJO 57
Mungaitenyi Kudai Mukaita Cishaishi Cakakura?
Kunyange mesida maningi Jehovha uye mesiyeja kuita zvese zvamunokona kuti musamuwajisa, nguva imweni pano pamunozoshaisha. Zvishaishi zvimweni zvakakura kupinda zvimweni. (1 VaKorinde 6:9, 10) Kudai mungaita cishaishi cakakura, zivanyi kuti Jehovha usiri kumuda, iyena wakanasiririka kuti amuregerere no kumubesa.
1. Tingaitenyi kuti tiregererwe ndi Jehovha?
Mundhu anoda Jehovha unosuruvara maningi paanowona kuti waita cishaishi cakakura. Asi cigondiso ca Jehovha caakapa vanamati vake cinotinyalaja maningi. Iyena wakati: ‘Kunyange zvishaishi zvenyu zvakapsuka kuti piriviri, zvinozoceneswa inga mbhute.’ (Isaya 1:18) Kudai tinganasa kukhombija ngo mweyo wese kuti tiri kuwajiwa ngo cishaishi cotakaita, Jehovha unozotiregerera. Tingaitenyi kuti tikhombije kuti tiri kuzvidemba ngo zvatakaita? Kudai tikazvidemba ngo mweyo wese, tinozoregera kuita zvakashata uye tokumbira Jehovha kuti atiregerere. Tikadalo tinozoita zvese zvatinokona kuti ticinje mulangariro no mukhuva inotiita kuti tiite zvakashata. Kunja ka izvi tinozorarama mukuzwilana no zvinobhuiwa ndi Jehovha kuti ndizvona zvakanaka.—Verenganyi Isaya 55:6, 7.
2. Jehovha unoshandisa kudini vakuru kuti vatibese paya patinonga tashaisha?
Kudai tikaita cishaishi cakakura, Jehovha unotivhunja kuti ‘tidanije vakuru vo ungano.’ (Verenganyi Jakobho 5:14, 15.) Vakuru vanoda Jehovha uye vanodawo vanamati vake. Ivona vanoshandisa uzivi wavo wo Bhaibheri, kuti vatibese kuti tivezve no ushamwari wakavanga na Jehovha.—VaGaratiya 6:1.
Vakuru vanotibesa kudini kudai tikaita cishaishi cakakura? Vakuru vaviri kana vatatu, vanoshandisa Bhaibheri kuti vatibese kuwona kuti zvotakaitaro zvakashata. Ivona vanotipazve mazano no ndhungamiriro jinotibesa kuti tisashaishazve. Pamweni paya vanotivhunja kuti timboema kuita mabasa amweni mu ungano mbhera ushamwari wedu na Jehovha wanasa kuvanga. Kudai mundhu angaita cishaishi cakakura orega kuzvidemba keni? Pakadai vakuru vanozomujinga kuti arege kucengeja vamweni mu ungano.
JIJANYI ZVIZINJI
Wonanyi kuti Jehovha ungatibesa kudini kudai tikaita cishaishi cakakura.
3. Kupupura kunotibesa kuti tivezve no ushamwari na Jehovha
Pese patinoita cishaishi tinonga tanyangajisa Jehovha, ngo kudalo zvakanaka maningi kuti tipupure zvishaishi zvedu kaari. Verenganyi Mapisarema 32:1-5, mapeja bhuisananyi ngo muvhunjo unotevera:
-
Kunja kokufisha zvishaishi zvedu, ngenyi zvakanaka kuti tizvipupure kuna Jehovha?
Kunja kokupupura zvishaishi zvedu kuna Jehovha basi, tinodikana kuvhunja vakuru kuti vatibese. Wonanyi VHIDHIYO, mapeja bhuisananyi ngo muvhunjo unotevera:
-
Mu vhidhiyo iyi, vakuru vakabesa kudini Kanoni kuti ahwirire kuna Jehovha?
Tinodikana kuva vandhu vakagondeka kuvakuru ngo kuti ivona varipo kuti vatibese. Verenganyi Jakobho 5:16, mapeja bhuisananyi ngo muvhunjo unotevera:
-
Zvakanakirenyi kuti tivhunje vakuru cokwadi cese pavanonga vesida kutibesa?
Pupuranyi zvishaishi zvenyu, ivanyi makagondeka kuvakuru uye ashiranyi besero la Jehovha
4. Kujingwa ko mundhu mu ungano ibesero la Jehovha
Kudai mundhu angaita cishaishi cakakura, olamba kuzwira mutemo ya Jehovha, aadikani kulamba ari mu ungano. Mundhu akajingwa, yesu atishamwarijani naye uye atibatani naye pa kuita zviro zvimweni. Verenganyi 1 VaKorinde 5:6, 11 na 2 Johani 9-11, mapeja bhuisananyi ngo muvhunjo unotevera:
-
Inga zvinoita isti inokukumusa tirigu. Kushamwarijana no mundhu asingazvidembi pa zvishaishi zvake kungakanganisa kudini ungano?
Vakawanda vakambojingwa, asi ngo kuhamba ko nguva vakazohwirirazve mu ungano. Izvi zvakaitika ngo kuti kupangirwa kovaiita kunyange kakavawaja asi kakaita kuti vazvidembe. (Mapisarema 141:5) Wonanyi VHIDHIYO, mapeja bhuisananyi ngo muvhunjo unotevera:
-
Mu vhidhiyo iyi, kujingwa kakaita Sonia kakamubesesa kudini?
Ulongwa wo kujinga mushaishi . . .
-
unokujisa kudini zina la Jehovha?
-
unokhombijisa kudini kuti Jehovha wakarurama uye uno rudo?
5. Jehovha unoregerera kudai tingazvidemba
Jesu wakashandisa muezaniso unotibesa kuzwisisa mazwire a Jehovha kudai mundhu akazvidemba. Verenganyi Ruka 15:1-7, mapeja bhuisananyi ngo muvhunjo unotevera:
-
Ma vhesi aya, anotijijisenyi ngo zva Jehovha?
Verenganyi Ezekieri 33:11, mapeja bhuisananyi ngo muvhunjo unotevera:
-
Zvicinyi zvatinodikana kuita kuti tikhombije kuti tazvidemba?
Kudai inga muhavisi, Jehovha unoneseka maningi ngo magundata ake
VAMWENI VANOTI: “Kudai ndikabhuya zvondakaita kuvakuru ivona vanozondijinga.”
-
Maizodavirisa kudini mundhu anolangarira kudai?
TAJIJENYI
Tajija kuti kudai tikaita cishaishi cakakura, Jehovha ungatiregerera, asi kuti adalo tinodikana kuzvidemba ngo mweyo wese uye tokheta kusiya kuita zvakashata.
Muvhunjo Jokuhwirijira
-
Ngenyi zvakanaka kuti tipupure zvishaishi zvedu kuna Jehovha?
-
Tingaitenyi kuti zvishaishi zvedu zviregererwe?
-
Kudai tikaita cishaishi cakakula, ngenyi tinodikana kupsaka kubeswa ngo vakuru?
JIJANYI ZVIMWENI
Wonanyi kuti mwanarume umweni wakazowonesa kudini kuti Jehovha unousizi inga zvinobhuiwa pana Isaya 1:18.
Urongwa wo kujinga mushaishi unobesesa kudini mundhu anongalo ajingwa uye ungano?
‘Ngenyi Kujinga Mushaishi Kukhombija Rudo’ (Nharireyomurindi, 15 ya Abril yo 2015)
Wonanyi kuti mungasanangurisa kudini ku mundhu asiri Capupu ngo zvo urongwa wo kujingwa ko mushaishi.
‘Zvapupu zva Jehovha Zvinovenga Mundhu Wovanonga Vasikasanamatizve Naye Here?’ (Mu saiti jw.org)
Wonanyi kuti Jehovha wakaitenyi kuti mwanarume umweni wainga akasiya cokwadi ahwirire kaari, verenganyi pa divi rinoti “Ndaidazve Kuhwirira Kuna Jehovha.”
‘Bhaibheri Rinocinja Upenyu’ (Nharireyomurindi, 1 ya Abril yo 2012)
