CIJIJO 01

Bhaibheri Ringamubeseresa Kudini?

PLAY

Tese hedu tinomboneseka ngo ndava yo upenyu, matambujiko, rufu pamwe no ramangwana. Tinonesekavo kuti tingawana kupi zviro zvatinoda zuva ngo zuva, zvakadai inga kutama mare yo kusapota mbhuri nokuti tingaitenyi kuti tive no mbhuri jinomudakalo. Vandhu vazinji varikukwanisa kuvona kuti Bhaibheri rinopingula muvhunjo jinokosha jo upenyu, rinopavo mazano anobesa mazuva ese. Kunasa kubhuya, Bhaibheri ringakwanisa kubesera ani na ani hake!

1. Nga jipi muvhunjo jimweni jinopingurwa ngo Bhaibheri?

Bhaibheri rinopingula muvhunjo iji jinokosha: Upenyu wakatangisa kudini? Takasikirwenyi pasi pano? Ngenyi vandhu vesitambujika? Mundhu afa anoenda kupi? Kudai vandhu vese veida runyalaro, ngenyi kuno hondo zinji? Kunanga kuti nyika ino inozopalajwa? Zvakashata here kujiita muvhunjo iji? Haiwa, Bhaibheri rinotivangisa kuti tipsake mupingulo jo muvhunjo iji. Vandhu vazinji vari kudakala maningi ngo kuvona kuti Bhaibheri ririkupa mupingulo jakajeka jo muvhunjo iji.

2. Bhaibheri ringatibeseresa kudini kuti tidakajwe ngo upenyu hwedu?

Bhaibheri rinotipa mazano anobesera. Inga muezaniso, rinotijijisa zvatingaita kuti tidakare mu mbhuri jedu. Rinotipavo mazano ozvatingaita kudai pfungwa jedu jesineseka, no zvatingaita kuti tidakajwe ngo basa ratinoita. Patinonga tesijija nemwi bhuku rino, munozovona kuti Bhaibheri rinopingula muvhunjo iji no jimwenivo. Ngo kudaro, munozojivonera mega kuti ‘zvinyorwa zvese zviri mu Bhaibheri zvinobesera.’—2 Timoti 3:16.

Bhuku iri asipi Bhaibheri. Irona rinozomubesa kuti muzwisise zvinojijiswa ngo Bhaibheri. Ngo ndava yazvo, tinomuvangisa kuti muverenge mavhesi ese anowanika mu cijijo cimwe nga cimwe co bhuku iri, mesivona kuti anozwirana papi no zvamunonga mesijija.

JIJANYI ZVIZINJI

Vonanyi kuti Bhaibheri lakabeseresa kudini vandhu vamweni, no zvamungaita kuti mudakajwe ngo kuriverenga, vonanyizve kuti ngenyi zvakanaka kuti mupsake mundhu angamubesa kuzwisisa Bhaibheri.

3. Bhaibheri ringatitungamirira mu upenyu

Bhaibheri lakatojana no thoci rinonasa kuvheneka. Bhaibheri rinotibesa kuita zvikhetwa zvakanaka, no kunasa kuziva zvinozoitika muno ramangwana.

Verenganyi Mapisarema 119:105, mapeja bhuisananyi ngo muvhunjo jinotevera:

Munyori wo pisarema iri waivona Bhaibheri inga cinyi?
Imwimwivo munovona Bhaibheri inga cinyi?

4. Bhaibheri rinopingula muvhunjo jedu

Vonanyi kuti Bhaibheri lakabeseresa kudini mwanakaji umweni, kuwana mupingulo jo muvhunjo jaimunesa ko makore akawanda. Vonanyi VHIDHIYO, mapeja bhuisananyi ngo muvhunjo jinotevera:

VHIDHIYO: Musaruza Ramangwana! (1:48)

Muvhidhiyo iyi, mwanakaji uwu wainga no muvhunjo jipi?
Wakabesereka kudini ngo kujija Bhaibheri?

Bhaibheri rinotivangisa kuti tiite muvhunjo. Verenganyi Mateu 7:7, mapeja bhuisananyi ngo muvhunjo unotevera:

Ngajipi muvhunjo jamunajo jamunoda kuti Bhaibheri rimupingure?

5. Mungadakajwa ngo kuverenga Bhaibheri

Vandhu vazinji vari kudakajwa ngo kuverenga Bhaibheri, irona riri kuvabesa maningi. Vonanyi VHIDHIYO, mapeja bhuisananyi ngo muvhunjo jinotevera:

VHIDHIYO: Kuverenga Bhaibheri (2:05)

Muvhidhiyo iyi, ngenyi majaha no vasikane ava vainga vasikadakariri kuverenga?
Ngenyi zvino vaakudakajwa ngo kuverenga Bhaibheri?

Masoko ari mu Bhaibheri angatinyalaja, no kutipa tarisiro. Verenganyi VaRoma 15:4, mapeja bhuisananyi ngo muvhunjo unotevera:

Munoda kuziva zvizinji ngo zvo tarisiro inobhuiwa mu Bhaibheri, nokunyalaja karingatiita here?

6. Tingabeswa ngo vamweni kuzwisisa Bhaibheri

Zvakanaka maningi kuverenga Bhaibheri tiri tega, asi vazinji vakavona kuti zvirinane maningi kubeserwa ngo vamweni kuti varizwisise. Verenganyi Mabasa 8:26-31, mapeja bhuisananyi ngo muvhunjo unotevera:

Nga zvipi zvatingaita kuti tizwisise Bhaibheri?—Vonanyi mavhesi 30 na 31.

Mwanarume umweni wo ku Etiyopiya wakapsaka besero kuti azwisise Bhaibheri. Mazuva ano, vandhu vakawanda vakavona kuti zvirinane maningi kubeserwa ngo vamweni kuti vazwisise Bhaibheri

VAMWENI VANOTI: “Kujija Bhaibheri kutamba no nguva.”

Imwimwivo munoti kudini? Ngenyi madalo?

TAJIJENYI?

Tajija kuti Bhaibheri, rinotipa mazano angatibesa zuva ngo zuva, tavonazve kuti rinopingura muvhunjo jinokosha jo upenyu, no kutipa tarisiro yo ramangwana lakanaka.