MUSOLO WO KUJIJA 51
NGOMA 3 Ndimwi Simba redu, Soterero yedu Tinogonda imwimwi
Musoji Yenyu Inokosha Kuna Jehovha
“Kandanyi musoji yangu botiri yenyu. Azvito kunyorwa here mu bhuku renyu?”—Pis. 56:8.
ZVATISAJIJA
Mu cijijo cino tinozojija kuti Jehovha unozwisisa maningi kuwajiwa kedu uye unotipa nyalajo yatinoda.
1-2. Zvicinyi zvingatiita kuti ticeme?
NGUVA imweni, tese hedu tinombocema. Patinoizirwa zvio zvakanaka, nguva imweni tinodondha musoji ngo kudakala. Nguva imweni makacema ngokuti makaizirwa zviro zvinokosha maningi inga muezaniso, pamakabara mwanenyu, pamakaashira shamwari yenyu yo mainga maanomakore musingaiwoni.
2 Kakawanda, kudondha komusoji yedu kunowonesa zvatiri kuzwa ngo comukati mo mweyo wedu. Inga muezaniso, tingacema kudai mundhu umweni akatiitira zviro zvinowaja. Nguva imweni tingacema patinorwisana no ndhendha isingalapiki, kana kuti panonga pafa mundhu watinoda maningi. Pa kadalo tingazwa inga mazwire akaita muprofita Jeremiya apo Jerusarema porakawira mu nyala jo va Bhabhironi. Jeremiya wakati: ‘Mulambo wo kumwa uri kuerera wesivha mu majiso angu . . . Majiso angu anocema asingamboemi.’—Mar. 3:48, 49.
3. Jehovha unozwa kudini paanovona vanamati vake vesitambujika? (Isaya 63:9)
3 Jehovha unoziva musoji yo takabudisa ngo ndava yo mugariro unonesa. Bhaibheri rinotivhunja kuti Jehovha, unowona matambujiko ese ari kusangana no vanamati vake, uye njeve jake jinozwa kucema kavo vesida kubeswa. (Pis. 34:15) Asi Jehovha aatiwoni basi asi iyena unotizwa. Kudai inga aba vano rudo, iyena unowajiwa maningi paanowona vana vake vesicema uye uno cidaka-daka cokuda kubesa.—Verenganyi Isaya 63:9.
4. Tinojijenyi ngo muezaniso imweni yo mu Bhaibheri ino cokuita no kulangarira ka Jehovha?
4 Mu soko lake Bhaibheri, Jehovha unobhuya mazwire aakaita vanamati vake povaisangana no matambujiko. Tingakwanisa kuwona izvi patinolangarira muezaniso wa Ana, Dhavhidhi uye Mambo Ezekiya. Zvicinyi zvakavaita kuti vaceme? Jehovha wakaitenyi povaida kubeswa? Muezaniso wavo, ungativangisa kudini patinobudisa musoji yo kusuruvara, kutengeswa ngo vandhu uye kuneseka mu mweyo?
MUSOJI YO KUSURUVARA
5. Maemere ozviro a Ana akakaita kuti azwe kudini?
5 Ana wakasangana no matambujiko akawanda akamuita kuti abudise musoji yo kusuruvara. Pa zvineso zvaakasangana nazvo, cimweni cainga cokuti wainga akalovohwa ngo mwamuna ano vakaji vaviri, uye mbhwere yake Penina yaimuyeisa. Kunja ka izvi, Ana wainga asina mwana asi Penina wainga no vana vakawanda. (1 Sam. 1:1, 2) Zuva ngo zuva Penina waigara esiseka Ana ngokuti wainga asingabari. Nokainga kuti ndimwi Ana maizozvizwa kudini? Ana wakanyangajwa maningi zvokuti “waicema asingarhyi” uye “wakawajiwa maningi mu mweyo.”—1 Sam. 1:6, 7, 10.
6. Ana wakaitenyi kuti anyarajwe?
6 Ana wakanyarajiswa kudini? Ciro cimweni cakamubesa maningi, ngo cokuti wakaenda kundau yo kunamatira yo cokwadi, ku themberi. Paakagumeyo, iyena wakatanga kuita mukumbiro kuna Jehovha esicema maningi. Wakaita mukumbiro kuna Jehovha esiti: “Wonanyi kutambijika komuranda wenyu uye ndirangarirenyiwo.” (1 Sam. 1:10b, 11) Ana wakadurura mazwire ake kuna Jehovha esiita mukumbiro. Jehovha wakazwa kudini paakawona Ana esicema!
7. Ana wakazwa kudini paakadurura mweyo wake kuna Jehovha?
7 Ana wakazwa kudini pasure pokuvhunja Jehovha zvaimuwaja uye paakaashira besero kuvha ku Mupristi Mukuru Eri? Ndorovondho yakona inoti: “Ana wakaenda koorhya uye mumeso make mainga musito kuita inga mundhu uri kuneseka.” (1 Sam. 1:17, 18) Kunyange hazvo zviro zvaimunesa zvainga zvisati zvapera, Ana wakazwa akasununguka. Iyena wakaendesa mutoro waimuremera kuna Jehovha. Iyena wakazwa kucema kake, uye wakamukomborera akamutendera kuti ave no mimba.—1 Sam. 1:19, 20; 2:21.
8-9. Maererano na VaHebheru 10:24, 25, ngenyi tinodikana kuita zvese zvatinokona kuti tipinde musangano jo ciKristu? (Wonanyi mufoto.)
8 Zvatinojija. Muri kusangana no zviro zvinonesa, zviri kumuita kuti mubudise musoji here? Nguva imweni muri kucema ngo kufirwa ngo hama kana kuti shamwari yenyu. Pamugariro wakadai, ngozvo cibarirwe kuda kugara tega. Asi, kudaiwo inga ndi Ana, wakanyalajwa ngo kuenda ku themberi. Mungawanawo nyalajo ngo kuenda kumusangano jo Cikristu, kunyange muri pamugariro unonesa. (Verenganyi VaHebheru 10:24, 25.) Patinozwa mavhesi o Bhaibheri anonyalaja pa musangano, Jehovha ungatibesa kuvhisa mulangariro jakashata tokanda mulangariro jakanaka. Izvi zvingatibesa kuti tijizwe ushoni, kunyange mugariro wo zviro usati wacinja.
9 Pa musangano yedu, tinova pamwepo no hama jedu, jino rudo novamweni, uye izvi zvinotinyalaja maningi. (1 VaT. 5:11, 14) Wonanyi muezaniso wo hama imweni, inoshanda inga phiyona espesiyari, yakafirwa ngo mukaji wayo. Iyona yakati: “Ndisiri kubuda musoji. Nguva jimweni, ndinogara pangu ndega ndesicema. Asi musangono yedu inondivangisa maningi. Mabhuyo andinoita no hama no hanzvaji jangu, anondinyalaja kamare. Azvinenyi nokusuruvara kandinoita ndisati ndaguma kumusangano, asi ndagumeyo ndinojizwa ushoni.” Patinonga tiri pamusangano jedu, Jehovha ungashandisa hama no hanzvaji kuti jitibese.
Tingawana nyalajo kuvha kuno vatinonamata navo (Wonanyi ndima 8-9)
10. Tingatevejeresa kudini muezaniso wa Ana patinonga tesiwajiwa mu mulangariro?
10 Ana wakawanawo nyalajo ngo kuita mukumbiro esivhunja Jehovha zviro zvaimunesa. Yemwi mungavhunjawo Jehovha zviro zviri kumunesa,” uye “mothemba kuti iyena urikumuzwa. (1 Pet. 5:7) Hanzvaji imweni yakauraihwa mwamuna wayo ngo magandanga, wakati: “Ndakazwa inga kuti mweyo wangu, wainga wapwanyika kuita madimbu-dimbu. Asi ndakawana nyalajo ngokuita mukumbiro kuna Jehovha, Mwari ano rudo. Nguva imweni, ndainga ndisina masoko okumuvhunja asi iyena waindizwa. Asi Jehovha waindizwisisa. Pondaineseka maningi, ndaaita mukumbiro.” Izvi zvaindinyalaja, uye zvaindipa simba kuti ndienderere mberi. Kudai mukavhunja Jehovha zviri kumunesa, iyena unozwisisa kuwajiwa kenyu, uye unoita zvese kuti amunyalaje. Kunyange zvineso zvenyu zvikalamba kupera, Jehovha unozomubesa kuti muve no runyararo. (Pis. 94:19; VaF. 4:6, 7) Iyena unozomukomborera ngo kukulamba makagondeka.—VaH. 11:6.
MUSOJI YO KUTENGESWA
11. Mugariro unonesa wakasangana na Dhavhidhi wakaita kuti azwe kudini?
11 Mu upenyu wake, Dhavhidhi waidikana kucungirira zviro zvaaimuita kuti aceme. Vandhu vakawanda vakamuitira utsinye, uye vandhu vamweni vaithemba vakamutengesa. (1 Sam. 19:10, 11; 2 Sam. 15:10-14, 30) Wakaguma pakunyora kuti: “Ndaremba ngo kugomera kangu, usiku wese ndinobija mubhedhu wangu ngo musoji, ndinozaja sofa yangu ngo musoji.” Ngenyi Dhavhidhi wakajizwa kudalo? Wakasanangura kuti, “ngo ndava ya vaya vari kunditambuja”. (Pis. 6:6, 7) Zviito zvinokhuvaza zvaiizwa ngo vamweni, zvakaita kuti Dhavhidhi aceme.
12. Inga zvinobhuiwa pana MaPisarema 56:8, Dhavhidhi wakagutsikana ngenyi?
12 Pasinenyi no matambujiko aisangana na Dhavhidhi, iyena wainga no cokwadi cokuti Jehovha waimuda. Yena wakanyora kuti: “Jehovha unozozwa kucema kangu.” (Ps. 6:8) Pa nguva imweni, Dhavhidhi wakabhuya masoko anodakaja atinowana pana Pisarema 56:8. (Verenganyi.) Masoko aya anokhombija kuti Jehovha unotingwarira. Dhavhidhi waizwa inga kuti Jehovha waiunganija musoji jake mubotiri, kana kuti kujinyora mu bhuku. Dhavhidhi wainga no cokwadi cokuti Jehovha wakawona uye wailangarira kawajiwa kake. Dhavhidhi wainga no cokwadi cokuti waizwa kuwajiwa kake. Iyena waingazve no cokwadi cokuti baba wake vokudenga vano rudo, vaizviwona kuti izvi zvaimuwaja maningi.
13. Vamweni pavanotiwajisa mu mweyo icinyi cingatinyalaja? (Wonanyi foto.)
13 Zvatinojija. Muri kusangana no matambujiko mu mulangariro ngo ndava yo kuwajiwa mu mweyo kana kuti ngo kutengeswa ngo mundhu wamaithemba here? Nguva imweni, murikuwajiwa ngokuti makarambana no mudiwa wenyu, kana kuti mundhu umweni wamunoda maningi wasiya kunamata Jehovha. Hama imweni ino mukaji wakaita uhure uye oisiya, yakayi: “Pondakazvizwa ndakakaruka uye andito kuzvitenda. Ndakajizwa ndisikashandi, ndapererwa uye ndakanyangajwa maningi.” Kudai muri kusangana no zvineso zvakafana no zvabhuiwari, zivanyi kuti Jehovha aazomusiyi. Hama iyi yakati: “Ndakaguma pakuwona kuti, mucato ungapera asi Jehovha ibuwe redu. Azvinenyi hazvo kuti icinyi cinoitika unolamba aripo. Aazosiyi vandhu vakagondeka.” (Pis. 37:28) Langariranyiwo kuti rudo la Jehovha rinopinda lo ari wese hake. Icokwadi kuti kuitirwa zvakashata ngo mundhu watinoda kunowaja maningi, asi izvi azvinyisi madirwa atinoizwa ndi Jehovha. (VaR. 8:38, 39) Cijijo nga ici: Azvinenyi kuti mundhu wamushaishira zvakadini, asi baba venyu vokudenga vanomuda.
Bhuku raPisarema rinotigondesa kuti Jehovha uri phedo na vaya vano mweyo unoneseka (Wonanyi ndima 13)
14. MaPisarema 34:18 inotithembesenyi?
14 Patinosangana no zvineso zvakadai inga zva Dhavhidhi, tinganyalajwawo ngo masoko ari pana Pisarema 34:18. (Verenganyi.) Bhuku rimweni rinobhuya kuti: “Vaya vakapwanyika mu mweya” zvinobhuya vaya “vasina ciro cakanaka cokusoterera.” Jehovha unoitenyi kuna vaya varikuwajiwa ngo zvineso zvakadai? Kudai inga mubereki ano rudo uye unonyalaja mwanake ari kutambujika, Jehovha “uri phedo nesu tese.” Uno nyasha uye wakanasiririka kutibesa paya patinowajiwa ngo kutengeswa kana kufirwa ngo mundhu watinoda.—Isa. 65:17.
MUSOJI YOKUTAMA KUZIVA ZVOKUITA
15. Icinyi cakasangana na Ezekiya cakamuita kuti aceme?
15 Paainga no makore 39 Mambo Ezekiya vo ku Judha, vakaziva kuti vano ndhendha isikaperi. Mu profita Isaya, wakavhunja Ezekiya zvainga zvabhuiwa ndi Jehovha zvokuti, iyena waizofa ngo ndhendha iyi. (2 Maj. 20:1) Zvakaita inga kuti apana soterero kuna Ezekiya. Paakazwa masoko aya Ezekiya wakacema maningi. Wakaita mukumbiro kuna Jehovha ngo mweyo wese.—2 Maj. 20:2, 3.
16. Jehovha wakaitenyi kuna Ezekiya?
16 Jehovha wakazwa mukumbiro wo kudeketera wa Ezekiya, ngokudalo wakati kaari: “Ndazwa mukumbiro wako. Ndaona musoji yako. Ninokuporesa.” Esishandisa Isaya Jehovha ngo maitire ounyasha wakapikira kumuengejera upenyu wake uye no kuponesa Jerusarema mukuda kuhwiswa ngova Asiriya.—2 Maj. 20:4-6.
17. Jehovha unotsigirisa kudini patinonga tesisangana no matambujiko makuru outano? (Pisarema 41:3) (Wonanyi foto.)
17 Zvatinojija. Muri kusotana no utano unokhombija kuva usina soterero here? Itanyi mukumbiro kuna Jehovha kunyange mesicema. Bhaibheri rinotithembesa kuti: “Baba vo nyasha huru uye Mwari wo kunyalaja” kese unozotinyalaja pamuejo yedu yese. (2 VaK. 1:3, 4) Zvino Jehovha aangavhisi zvineso zvedu zvese asi tingamuthema kuti unozotitsigira. (Verenganyi Pisarema 41:3.) Ngo ndava yo mweya mupsene wake Jehovha unotipa ungwaru, simba uye runyararo ro cokwadi kuti tirwisane no zvineso. (Zvi. 18:14; VaF. 4:13) Iyena anotivangisa ngo kutipa soterero inovha mu Bhaibheri, yokuti mberiyo akuzovi no mundhu anozowaja.—Isa. 33:24.
Jehovha unodavira mukumbiro jedu nokutipasimba, ungwaru, uye runyararo wo mukati (Wonanyi ndima 17)
18. Ivhesi ipi yakamunyaraja pamakasanga no mugariro wainesa maningi? (Wonayi bhokiso rakazwi “ Kubhuya kunonyalaja Kunoomesa Musoji Yenyu.”)
18 Ezekiya wakanyarajwa ngo masoko a Jehovha. Ngo maitiro akafanana tingawana nyarajo musoko la Mwari Bhaibheri. Jehovha wakangwarira masoko anonyalaja uye angatibesa paya patinosanga no mugariro wo zviro unotitambuja. (VaR. 15:4) Hanzvaji imweni yo ku Afrika Ocidental, poyakabathwa ngo ndhenda yo khaseri, yailamba yesicema. Iyona yakati: “Vhesi imwe yandinoona yesindinyalaja ndi Isaya 26:3. Kunyange hazvo tisikanasi kukona kuzvibata pa muejo yatinosangana nayo, ndima iyi ino ndithembesa kuti Jehovha unokona kutipa mukhaindi wese wo runyararo womukati unotibesa kuti tizvibate patinosangana no zvineso.” Pano vhesi yo makawona yesimunyalaja maningi pamakasangana no mugariro inokhombija kuva inonesa maningi kunyange mesizvizwa musina soterero here?
19. Takaemerenyi muno Lamangwana?
19 Tiri kurarama mu mazuva okupejisira uye tinosoterera kuti zvinoita kuti ticeme zvisaramba zvisiengejeka. Inga zvatawona mu muezaniso wa Ana, Dhavhidhi uye na Mambo Ezekiya Jehovha unowona musoji yatinobudisa uye unowajiwa maningi. Musoji yedu inokosha zvo cokwadi kaari. Patinosangana no mugariro inotambuja cokwadi tinoda kudurura mweyo wedu kuna Jehovha ngo kuita mukumbiro. Tisambozviparajanisa no hama no hanzvaji jedu jo mu ungano. Uye ngatirambe tesinyarajwa ngo masoko akanyorwa mu Bhaibheri. Tingava no cokwadi cokuti kudai tikaramba tesicungirira takagondeka, Jehovha unozotipa mubairo. Izvi zvinobatanija zvigondiso zvinoshamaisa zvokuti unozopukuta musoji jese mumeso medu kusuruvara kutengeswa uye kuneseka mu mweyo. (Zvak. 21:4) Ponapo tinozobudisa musoji jo mudakalo.
NGOMA 4 “Jehovha Muri Muhavisi wangu”
