Mupostori Pauro wakanyorerawo shamwari yake Timoti, uwo waingawo ari mukuru wo ungano kuti: “Ndinokupangira ngo simba pamberi pa Mwari no pa Jesu Kristu uye no pamberi po ngirosi jakakhethwa kuti utevejere mupango usikatyi uye usina kowakapeyamira.”—1 Tim. 5:21.

Kutanga ngatimbobhuya kuti ngirosi iji ngovanaani. Zviri pambhene kuti asipi vo 144. 000. Pauro paakanyorera Timoti, kumuswa kovaKristu vakazojwa kuti vaende kudenga kainga kusati katanga. Vapostori no vamweni vakazojwa vainga vasati vaazvisikwa zvokumujimu, ngokudaro vainga vasati “vazwi ngirosi jakakhethwa”.—1 VaK. 15:50-54; 1 VaT. 4:13-17; 1 Johani 3:2.

Uye “ngirosi jakakhethwa” ajingaiti ngirosi jakapanduka panguva yo ndambi. Ngirosi iji jakatsigira sathana jova madhimoni uye vavengi vaJesu. (Gen. 6:2; Ruka 8:30, 31; 2 Pet. 2:4) Muno lamangwana vanozokandwa mugomba lakajika maningi ko makore 1. 000 uye ponapo vanozoparajwa pamwepo na sathana.—Judha 6; Zva. 20:1-3, 10.

Ngokudalo “ngirosi jakakhethwa” jakabhuiwa ndi Puro jaidikana kuva ngirosi jinoshanda pamwepo na “Jehovha na Jesu Kristu”, ijona jinobhuiwa mucitsauko cimweco.

Kuno ngirosi jakawanda jakagondeka. (VaH. 12:22, 23) Zviri pambhene kuti atidikani kulangarira kuti Jehovha unojipa mabasa amwewo pa nguva yakafanana. (Zvak. 14:17, 18) Inga muezaniso, nguva imweni Jehovha wakagaja ngorosi imwe basi, kuti iparaje masoja 185. 000 o va Asiriya. (2 Mad. 19:35) Ngirosi jimweni zvingaita kuti jingazopuwa mabasa “okuunganija pakati poUmambo wa Jesu zviro zvese zvinozoita kuti titambujike uye na vaya vanoita zvokutama kuyaeya mutemo.” (Mat. 13:39-41) Ngirosi jimweni jingava jiya jinozounganija vakakhethwa kuupenyu wokudenga. (Mat. 24:31) Uye jimweni jakagajwa kuti jitijivirire mumakwanja edu ese.’—Pis. 91:11; Mat. 18:10; ezanisanyi Mateu 4:11; Ruka 22:43.

“Ngirosi jakakhethwa jinobhuiwa pana 1 Timoti 5:21 jingadai jiri ngirosi jakagajwa kuti jitibese kusoterera ungano. Mukuzwirana no masoko omundima iyi, Pauro wakapa zano ngo pamusoro pokuti vakuru vanodikana kungwaririsa kudini ungano uye kuti ungano inodikana kuvabata ngo nderemejo. Vakuru divi ravo vanodikana kuita mabasa avo “vasingaiti mukheto” uye avadikani kuita zvikhethwa ngo kukasika. Cikonzero cakanaka cokuti vakuru vatevejere zano rakafemerwa raPauro ngo cokuti, vari kuzviita “pamberi paMwari Jesu Kristu uye ngirosi jakakhethwa.” Ngokudalo zviri pambhene kuti nguva jimweni ngirosi jinogajwa kuti jisoterere ungano, pakati po zviro zvimweni zvinojivirira vanamati vaMwari no kuwonerera basa rokuparijira mu nyika yese.—Mat. 18:10; Zva. 14:6.