MUSOLO WO KUJIJA 50
NGOMA 135 Cikumbiro co Rudo ca Jehovha: “Itai wakangwara Mwana wangu”
Vabereki Besanyi Vana Venyu Kuti Vavangise Kutenda Kavo
‘Psakanyi kuda ka Mwari kuti muite zvakanaka, zvakakwana uye zvinomudakajisa.’—VaR. 12:2.
ZVATISAJIJA
Mazano angabesa vabereki kuti vave no ushamwari wakanaka no vana vavo uye nokuvabesa kuti vavangise rutendo wavo kuna Mwari no Bhaibheri.
1-2. Vabereki vanodikana kuitenyi kudai mwana akavavhunjisa ngo zviro zvatinotenda mu Bhaibheri?
VAKAWANDA vanotenda kuti kuva mubereki ibasa rakakura. Kudai muri mubereki ano vana vadoko tinomubonga maningi ngo basa ramuri kuita ngo kushanda ngo simba kuti muvangise rutendo wavo. (Dhe. 6:6, 7) Mwana wenyu paanonga esikura, angatanga kumuita muvhunjo ngo pamusoro po zvatinotenda, uye kubatanijawo no mutemo jo Bhaibheri.
2 Pakutanga mungatoneseka ngo muvhunjo jo mwana wenyu. Iyemwi mungatoona muvhunjo iji inga kuti mwana wenyu aato kuvanga muno zvokunamata. Asi cokwadi ngo cokuti, vana vadoko povanonga vesikura vanodikana kuita muvhunjo kuti vavangise kutenda kavo. (1 VaK. 13:11) Ngokudalo, amudikani henyu kutya. Mungatoshandisa muvhunjo jese jinoizwa ngo mwana wenyu kuti mumubese kuti ave mundhu anokwanisa kukhwijirija murangariro jake.
3. Tinozowonenyi mu cijijo cino?
3 Mu cijijo cino, tinozobhuya kuti vabereki vangabesesa kudini vana vavo (1) kuti vave no zvovanotenda pacavo, (2) kuti vakoshese mutemo jiri mu Bhaibheri uye (3) vajivirire zvamutenda. Patinonga tesijija izvi, tinozobhuisanawo zviro zvakanaka ngo pamusoro po muvhunjo jo vana vadoko. Uye no mabasa o pa mbhuri angapa vabereki mukana wokubhuya zvovanotenda.
BESANYI MWANA WENYU KUTI AVE NOKUTENDA KAKE
4. Muvhunjo jipi jingava no mwana mudoko uye ngenyi?
4 Vabereki vo Cikristu vanoziva kuti kutenda kuna Mwari asipi ciro cokuti mwana ungagara utaka. Imwimwi amuto kubarwa mesitenda kuna Jehovha. Ndizvonawo zvinoita mwana wenyu. Ngo kuhamba ko nguva mwana mudoko ungava no muvhunjo jakadai: ‘Ndinozvizivisa kudini kuti Mwari uriyo? Ndingathemba zvinobhuiwa ngo Bhaibheri?’ Cokwadi ngo cokuti, Bhaibheri rinotivangisa kuti tishandise “simba redu ro kulangarira” kuti tive “no cokwadi pa zviro zvese.” (VaR. 12:1; 1 VaT. 5:21) Asi mungabesesa kudini mwana wenyu kuti avangise kutenda kake?
5. Vabereki vangaitenyi kuti vabese mwanavo kuti atende zvinobhuiwa ngo Bhaibheri? (VaRoma 12:2)
5 Besanyi mwana wenyu kuti atende cokwadi. (Verenganyi VaRoma 12:2.) Kudai mwanenyu akamuita muvhunjo, shandisanyi mukana uwu, ngo kumukhombija munowanikirwa mupinguro wakona, mesishandisa mathurusi akadai inga, Indíce das Publicaçoes da Tore de Vigia uye Bhuku Lokupsakisisa lo Zvapupu zva Jehovha. Mungashandisazve mabhuku anobudiswa ngo sangano kuti mujekesere mwanenyu kuti Bhaibheri asipi bhuku ro mundhu asi ngo la Mwari. (1 VaT. 2:13) Inga muezaniso, iyena ungapsakisisa ngo pamusoro po Asiriya no thaundi rokare ro Ninivhi. Mu nguva yokare vandhu vamweni vaishora Bhaibheri vaiti akuna thaundi ro Ninivhi. Asi mu gore la 1850, mathere othaundi iri akafukunurwa, izvi zvinokhombija kuti Bhaibheri rinobhuya cokwadi. (Zef. 2:13-15) Kuti awane masoko okuti kupalajwa ko Ninivhi, kakazajikisa kudini uporofita wo Bhaibheri, ungawona shwiro inoti: “Maizviziva here?” Mu Mungwaji wa Novembro wo 2021. Paanoezanisa zvaanojija mumabhuku edu, no zvaanojija mumabhuku amweniwo anoreremejwa, mwanenyu unozokwanisa kuvangisa rutendo pazviro zvinobhuiwa ngo Bhaibheri.
6. Vabereki vangaitenyi kuti vabese vana vavo kuti valangarire zvavanotenda? Ipanyi muezaniso. (Wonanyi mufoto.)
6 Besanyi mwana wenyu kuti anase kulangarira. Vabereki vano mukana jakasiyana-siyana jokutangisa mabhuyo anobesa vana vavo ngo pamusoro po Bhaibheri uye nokutenda kuna Mwari. Mukana iji vangajiwana povanoenda koovhakacira nyumba inokandwa zviro zvokare, no ndau jimweni jakaseja uye Ku Cine ro pasi pese ro Zvapupu zva Jehovha. Inga muezaniso, pamunonga mesivhakacira kunyumba inowanikirwa zviro zvokare, mungaita kuti mwana wenyu awone zviro zvakaitika kare. Izvi zvingamubesa kuti avangise gonda rake rokuti Bhaibheri ngo rokadi. Mwana wenyu unozviziva here kuti zina la Jehovha rinowanika pabuwe rinozivikanwa inga Dundhu ro Mowabhi rinomakore 3.000? Buwe iri, rinowanika ku Paris ku Fransa mu Nyumba inokandwa zviro zvo kare. Uye khopi yaro, iri ku cine ro pasi pese ro Zvapupu zva Jehovha. Estadhu Unidhu. Buwe ro Mowabhi iri rinobhuya kuti Mambo Mesha wo Mowabhi wakapandukira Vaiziraeri. Izvi zvinozwirana no zvinobhuiwa ngo Bhaibheri. (2 Maj. 3:4, 5) Mwana wenyu paanowona ngo majiso ake ucapupu wo mu Bhaibheri no kururama kwawo, kutenda kake kunoengejeka uye kunovanga.—Ezanisanyi na 2 Makoronike 9:6.
Mungavangisa kutenda ko mwana wenyu ngo kubhuya zviro zvamakawana ku muzeu? (Wonanyi ndima 6)
7-8. (a) Tinojijenyi patinowona zvakasikwa zviri munyika? Ipanyi muezaniso. (Wonanyi mufoto.) (b) Muvhunjo jipi jingabesa mwana wenyu kuti atende Musiki?
7 Vangisanyi mwana venyu kuti alangarire zviro zvakasikwa. Pamunonga mesihamba mu ndau yakaseja uye ino maruva itanyi kuti mwana wenyu awone zviro zvakanaka zvakasikwa. Ngenyi? Aya maitiro anopa ucapupu no ungwaru. Inga muezaniso, masikirwe akaizwa zviro zvimweni asirikujijwa ngo Siyensiya ko makore akawanda. Nicola Fameli unosanangura kuti, patinojija ngo pamusoro po zviro zvakasikwa, tinokwanisa kuzvizwisisa. Izvona zvinoumba zviro zvinozwi munda-nda-nda wo Fibonacci. Masikirwe no marongerwe azvo, tingamawona pa zviro zvakadai inga magalasiya, deme ro hozwe, masakane o mumbuti uye maringa bhera. a
8 Paanonga esijija ngo zviro zvakasikwa kucikora, iyena unozonasa kuzwisisa zviro zvinoita kuti zviro zvihambe zvakanaka. Inga muezaniso, zvimapuwe zvinoumbwa ngo cando, cinoumbwa maererano no jeometrika anozivika inga fractais. Fractais iji, jinowanika mu zviro zvakasikwa. Asi ndiyani wakaita zviro no maitire azvo akanaka? Ndiyani ari sure ko kuronga uye kunasirira zvatinowona pa zviro zvakasikwa? Mwana wenyu, paanolangarijisisa ngo pamusoro po muvhunjo jakadai, iyena unozotenda kuti Mwari ndiyena wakasika zviro zvese. (VaH. 3:4) Nguva jimweni muvhunjisenyi kuti: “Zvesiwoneka kuti takasikwa ndi Mwari, azvingaiti here kuti iyena atipe mutemo inotibesa kuti tidakare?” Mapeja, mungamubesa kuti aweno kuti mutemo iyi inowanika mu Bhaibheri.
NASA, ESA, and the Hubble Heritage (STScl/AURA)-ESA/Hubble Collaboration
Patinosota zviro zvakasikwa kuseja kupi katinoona? (Wonanyi ndima 7-8)
REREMEJANYI MUTEMO JO BHAIBHERI
9. Icinyi cingaita kuti mwana asava no cokwadi cinokosha ngo pamusoro po ndhungamiriro jo Bhaibheri?
9 Kudai mwana wenyu uno muvhunjo ngo pamusoro po mutemo jiri mu Bhaibheri, ejanyi kuzwisisa zvirikuita kuti aite muvhunjo iyi. Zvivhunjisenyi kuti: Kubhuya kuti iyena aatenderani no mutemo jo Bhaibheri here? Kana kuti iyena aakwanisi kujivirira zvaanotenda? Ngokudalo, mungakwanisa kubesa mwana wenyu kuti azwisise mutemo jiri mu Bhaibheri ngo kujija naye Bhuku rinozwi Raramanyi Nokusingaperi Mesidakala. b
10. Mungabesesa kudini mwana wenyu kuti alangarire ngozvo ukama wake na Jehovha?
10 Besanyi mwanenyu kuti avangise ushamwari wake na Jehovha. Pamunonga mesijija Bhaibheri no mwanenyu, ejanyi kubudisa ngo kushandisa muvhunjo jinowanika mu Bhuku Raramanyi Nokusingaperi Mesidakara. (Zvi. 20:5) Inga muezaniso, mucijijo 8 cinoezanisa Jehovha no shamwari inotilangarija zvinotijivirira uye zvinotibesa. Pasure pokubhuisana ngo masoko ari pana 1 Johani 5:3, mungamuvhunjisa kuti: “Zvesiwoneka kuti Jehovha ishamwari yakanaka, tinodikana kuwona kudini zvaanotivhunja kuti tiite?” Uwu unoita inga muvhunjo wakareruka, asi iwona ungabesa mwanenyu kuti alangarire mutemo ya Mwari no ucapupu wo rudo wake.—Isa. 48:17, 18.
11. Mungaitenyi kuti mubese mwanenyu kuti akoshese zvinobhuiwa ngo Bhaibheri? (Zvirevo 2:10, 11)
11 Bhuisananyi kuti kushandisa zvinobhuiwa ngo Bhaibheri zvingatibesesa kudini. Pamunoverenga Bhaibheri kana rugwaro ro zuva ngo zuva, muri pamwepo, bhuisananyi kuti ndhungamiriro jo Bhaibheri, jiri kubesesa kudini mbhuri yenyu. Inga muezaniso, mwanenyu uri kuwona kukosha kokuva mundhu wakatendeka here? (VaH. 13:18) Mungagogomejera kuti tingashandisisa kudini ndhungamiriro jiri mu Bhaibheri kuti jitijivirire mumuviri no mumulangariro. (Zvi. 14:29, 30) Kubhuisana ngo ndhungamiriro jakadai zvinozobesa mwanenyu kuti adakarire mazano ari Bhaibheri.—Verenganyi Zvirevo 2:10, 11.
12. Aba vamweni vakabesesa kudini mwanavo kuti areremeje ndhungamiriro jo Bhabheri?
12 Steve aba vamweni vanogara Fransa, vakabhuya mabeserere avari kuita mwana wavo arikukura, Ethan, rudo uri sure komutemo ya Jehovha. “Tinomuvhunjisa muvhunjo jakadai inga iji: ‘Ngenyi Jehovha unoda kuti tizwire ndhungamiriro jake jaanotipa? Izvi zvinokhombijisa kudini kuti unotida? Zvicinyi zvinoitika kudai ukatama kuzwira ndhungamiriro iji?’” Mabhuyo akadai inga aya, arikubesa Ethan kuti aite zvinoda Jehovha. Steve unoengejera esiti: “Cinangwa cedu ngo cokubesa Ethan kuti awone kuti Bhaibheri rino uzivi wakakura maningi kudarika uzivi wo vandhu.”
13. Vabereki vangaitenyi kuti vajijise vana vevo kuti vashandise mutemo jo Bhaibheri? Ipanyi muezaniso.
13 Jijisanyi mwanenyu kuti ashandise ndhungamiriro jo Bhaibheri. Mukana umweni wokuita izvi, nga paya pokuti mwanenyu wagajwa kuti averenge bhuku riri rese pacikora co musangano wo pakati po vhiki. Bhuku lakona ringaita inga ririkupa mulangariro wokuti, vandhu vanoita zvakashata vanodikana kutevejerwa. Mungabesa mwanenyu kuti alangarire zvinobhuya Bhaibheri ngo pamusoro po zviito zvo vandhu ava. (Zvi. 22:24, 25; 1 VaK. 15:33; VaF. 4:8) Izvi zvinoita kuti ave akanasirira kuti abhuisane na tica wake no shamwari jake panguva yo kubhuisana no vamweni vake.
BESANYI MWANENYU KUTI AJIVIRIRE ZVITENDHWA ZVAKE
14. Ishwiro jipi jingaita kuti, majaha wo cikristu atye kujivirira zvaanotenda, uye ngenyi?
14 Nguva jimweni, majaha o ciKristu angatama kuva no cokwadi cokuti ajivirire zvaanotenda. Ivona vangajizwa vesithyisijirwa payana pavanonga vesijijiswa zvo kuphinduka-phinduka kucikora. Ngenyi? Ngokuti matica avo, angajijisa kuti kuphinduka-phinduka zviro zvakaitika. Kudai muri mubereki, mungabesesa kudini mwanenyu kuti ave akavanga mukutenda?
15. Icinyi cingabesa mujaha wo cikristu kuti athembe zvaanotenda?
15 Besanyi mwanenyu kuti athembe maningi zvaanotenda. Mwanenyu aadikani kupseruka ngokuti unoziva cokwadi cozvakasikwa. (2 Tim. 1:8) Ngenyi? Cokwadi ngo cokuti masiyetista akawanda anozwisisawo kuti upenyu auto kuitika wega. Ivona vanoona kunasirirwa kakajeka ko upenyu. Mukupejisira ivona avaashiri sanangujo jozvo kuphinduka-phinduka inokurujirwa muzvikora zvo nyika ino yese. Mwanenyu ungavangisa zvaanotenda ngo kulangarira zvakaita kuti hama no hanzvaji jidavire kuti upenyu wakaita ngo kusikwa. c
16. Vabereki vangabesesa kudini mwanavo kuti ajivirire zvaanotenda ku Musiki? (1 Petro 3:15) (Wonanyi mufoto.)
16 Besenyi mwanenyu kuti ajivirire zvaanotenda ku Musiki. (Verenganyi 1 Petro 3:15.) Mungajija mese shwiro iyi iri mu saiti jw.org mu munda-nda-nda unoti: “Majaha Anovhunjisa Kuti Zvakaita ngo kusikwa here kana kuti zvakaita ngo kuphinduka-phinduka?” Mapeja bhuisananyi no mwanenyu ngo zvaangada kushandisa kuti abese vamweni, kuti vazive Musiki wo cokwadi. Mulangarire kuti aadikani kuita hasha no vaanojija navo. Muvhunjenyi kuti aadikani kuphikisana no vaanojija navo kucikola. Mubesenyi kuti ashandise mulangariro wake kuti abese vaya vanoda kuziva zvakawanda. Inga muezaniso shamwari yo kucikora ingabhuya kuti: “Ndinotenda zvandinowona basi asi andisati ndambowona Mwari.” Mukristu wo cidoko ungadavira kuti: “Ambolangarirai kuti yewe uri kuhamba mugwasha musina no vandhu, asi wowana mwimbo. Waizoti kudini? Kudai kuvapo ko mwimbo kesipa ucapupu wokuti wakaciwa ngo mundhu, tingati kudini ngo denga no nyika!”
Shandisanyi mulangariro pakubhuya no vamweni vamunojija navo (Wonanyi ndima 16-17) d
17. Vabereki vangakurujirisa kudini vana vavo kuti vapsake mukana wo kuvhunja vamweni cokwadi co Bhaibheri? Ezanisanyi.
17 Kurujiranyi mwanenyu kuti apsake mukana wo kuvhunja vamweni cokwadi co Bhaibheri. (VaR. 10:10) Mungaezanisa kutenda kake, na wiya anojijira kurija magitari. Pakutanga mujiji unojijira ngoma jakareruka. Ngo kuhamba ko nguva kurija ngoma kunozova kakareruka. Mukufanana, mujaha wo cikristu pakutanga ungashandisa zviro zvakareruka kuti avhunje vamweni zvaanotenda. Inga muezaniso, ungavhunjisa waanojija naye kuti: “Waizviziva here kuti maenjinyero anotevejera zviro zvakasikwa kuti anasirire zviro zvavo? Emai ndikukhombije vhidhiyo inodakaja.” Posure pokukhombijana vhidhiyo kuvha kumunda-nda-nda unoti: Zvakaitika zvega here? Iyena ungati: “Kudai musietista angapuwa mbiri ngokunasirira ciro cakasikwa, ndiyani anodikana kupuwa mbiri pakutanga?” Maitire akareruka kudai, angavangisa mwana mudoko kuti ave no cidaka-daka co kujija zvakawanda.
LAMBANYI MESIBESA MWANENYU KUTI AVANGISE KUTENDA KAKE
18. Vabereki vangaitisa kudini kuti varambe vesivangisa kutenda ko mwanavo muna Mwari?
18 Tiri kurarama munyika iri kutongwa ngo vandhu vasikatendi Jehovha. (2 Pet. 3:3) Ngo kudalo, vabereki pamunojija Bhaibheri no mwanenyu, mukurujirenyi kuti aongorore musoro jinoita kuti areremeje Soko la Mwari uye kuti ave no tsika jakanaka. Mubesenyi kuti ave no cidaka daka co kulangarira zviro zvakasikwa ndi Jehovha. Mubesenyi kuti awone uprofita wo Bhaibheri wakazajika kare. Kupinda zvese itanyi mukumbiro no mwanenyu uye kubatanijawo naye pa mukumbirowo. Pamunoita izvi, ivanyi no cokwadi cokuti Jehovha unozobesa mwanenyu kuti avangise kutenda kake.—2 Mk. 15:7.
NGOMA 133 Kunamata Jehovha Ticiri Vadoko
a Kuti muwane zviro zvimweni wonanyi vhidhiyo mu saiti jw.org inoti: Zviro zvakasikwa uye zvinoshamaisa zvinokhombija simba la Mwari.
b Kudai mwanenyu akapeja kujija bhuku ra Raramanyi Nokusingaperi Mesidakala! Mungahwirijirazve zvijijo 3 no 4 izvona zvinokurujira ndhungamiriro jo Bhaibheri.
c Wonanyi shwiro inoti: “Existe um Criador?” iri mu Mukai! wa Setembro wo 2006 uye bhurushura A Origem da Vida Cinco perguntas que merecem resposta. Kuti muwone muezaniso jimweni sotanyi mu saiti jw.org mu munda-nda-nda wo mavhidhiyo unoti: Mawonero ngo Pamusoro po kutanga ko Upenyu.
d KUSANANGURWA KO FOTO: Capupu co cidoko cinokhombija umweni waanojija naye uwo anodakarira munda-nda-nda yo mavhidhiyo kuvha pakazwi: “Zvakaitika zvega here”?
