MUSOLO WO KUJIJA 48
NGOMA 97 Mundhu Anorarama ngo Soko ra Mwari
Zvatinojija mu Mushamaiso wo Cingwa
‘Ndini cingwa co Upenyu. Anoviya kandiri aazovi no njala.’ —Johani 6:35.
ZVATISAJIJA
Jijanyi ndhorovondho iri pana Johani citsauko 6 inobhuya kuti Jesu wakaitisa kudini kuti hove no zvingwa zviwande uye tozoona kuti tinojijenyi ndizvona.
1. Zvingwa zvaikoshesa kudini munguva jo Bhaibheri?
MU NGUVA jo Bhaibheri cingwa cainga ciro cokurhya cikuru co vandhu. (Gen. 14:18; Ruka 4:4) Cokwadi, cingwa jaikosha maningi zvokuti Bhaibheri nguva yese parinobhuya ngozvo kurhya, rinobhuya “cingwa”. (Mateu 6:11; Mab. 20:7, masoko okujija) Mushamaiso muviri jakaizwa ndi Jesu jinozivika maningi jinobatanija cingwa. (Mateu 16:9, 10) Mushamaiso iji jakanyorwa mu citsauko 6 co vhangeri la Johani. Ngatijije ndhorovondho iyi uye tozowona kuti tinojijenyi ndizvona.
2. Pamugariro upi vandhu vakawanda vaida zvokurhya?
2 Pasure pokunge vajiji va Jesu vavha kooparijira, Jesu wakavatora ngo ngarava oenda navo divi rimweni lo bahari lo Garireya kuti vaende koozorora. (Mako 6:7, 30-32; Ruka 9:10) Ivona vakaenda kundau yavo vega kuthaundi lo Bhetisaidha. Asi vandhu vakawanda vakaviya kuzowona Jesu. Jesu aato kuita inga asingavaoni vandhu ava. Pano kudalo iyena wakava akapfava uye wakapeja nguva esivajijisa ngo pamusoro po Umambo no kulapa vaiwaja. Ngokuti zuva rainga ravira, vajiji vakavhunjisana ngo pamusoro pokuti, vandhu vaizowana kupi zvokurhya. Nguva jimweni vamweni vavo vainga no zvokurhya zvishoma, asi vakawanda vaidikana kuenda kumaridheya kootenga zvokurhya. (Mateu 14:15; Johani 6:4, 5) Jesu wakaitenyi kuti anasirire cineso ici?
MUSHAMAISO WO KUWANDA KO CINGWA
3. Jesu wakavhunja vapostori kuti vaitenyi? (Wonanyi yo pakhavha.)
3 Jesu wakati kuvajiji vake: “Ivona avadiki kupinda, vapenyi zvokurhya varhye.” (Mateu 14:16) Izvi zvaiita inga zvisingakwanisiki ngokuti painga no vanarume vanokwana kuita 5.000. Uye tesiverenga no vanakaji no vana zvingaita kuti vaikwana 15.000 vese ava vaida zvokurhya. (Mateu 14:21) Andhreya wakabhuya kuti: “Pano tino mujaha uno zvingwa zvishanu no hove mbiri. Asi izvi zvingaitenyi kuvandhu vakawanda kudai?” (Johani 6:9) Zvingwa zvo koroni zvainga zviri zvokurhya zvairhyiwa ngo varombo no vandhu vamweni, uye zvingaita kuti hove iji jainga jakarungwa munyu uye jakaoma. Kuwanda ko zvingwa no hove zvainga no mujaha uwu zvainga zvisingakwani kuti vandhu vese ava vagute?
Jesu waibatikana ngo zvinodiwa zvo vandhu zvokunamata no zvokunyama (Wonanyi ndima 3)
4. Tinojijenyi pana Johani 6:11-13? (Wonanyi foto.)
4 Jesu wakava mundhu anokova ku vandhu ava vakawanda uye wakavakumbira kuti vagare inga zvikwata. (Mako 6:39, 40; verenganyi Johani 6:11-13.) Ngokudalo, Bhaibheri rinobhuya kuti Jesu wakaita mukumbiro kuna Baba vake ngo pamusoro po zvingwa no hove. Zvainga no musoro kuti abonge Mwari, ngokuti Ndiyena wainga cinyuke co zvokurhya zviya. Zvakaizwa ndi Jesu muezaniso wakanaka katiri, tinodikana kuita mukumbiro tisati tarhya, azvinenyi kuti tiri tega kana kuti tino vandhu vamweni. Paakapeja kuita mukumbiro, Jesu wakapa zvokurhya ku vandhu vakawanda ivona vakarhya uye voguta. Painga pasara zviro zvimweni zvokurhya asi Jesu wainga asikadi kuti zviraswe. Ngokudalo, Jesu wakakumbira vajiji vake kuti vaunganije zvese zvainga zvasara kuti zvizoshandiswazve panguva imweni. Uwu muezanisozve wakanaka katiri, atidikani kurasa zviro. Pano kurasa, tinodikana kushandisa ngo uzivi zviro zvatinazvo. Kudai muri mubereki, azvingaiti here kuti mushandise muezaniso uwu pakujijisa vana venyu ngo kukosha ko kuita mukumbiro musati marhya uye kuva mundhu anokova inga zvakaizwa ndi Jesu.
Zvivhunjisenyi kuti: ‘Ndiri kutevejera muezaniso wa Jesu wokuita mukumbiro musati marhya here?’ (Wonanyi ndima 4)
5. Vandhu vaida kuti Jesu aitenyi uye iyena wakaitenyi?
5 Paciitiko ici, vandhu vakabaiwa mweyo ngo jijiso ja Jesu uye no mushamaiso yaakaita. Kareko, Mosi wainga akabhuya kuti Mwari waizoviisa pakati pavo muprofita mukuru uye vandhu ava vaizviziva. Ngokudalo nguva jimweni ivona vakalangarira kuti: ‘Kubhuya kuti Jesu ndiyena muprofita wakona?’ (Dhe. 18:15-18) Nguva imweni ivona vakalangarira kuti Jesu waizova mutongi wakanaka, eya iyena waizokwanisa kupa majinja akawanda zvokurhya. Vesilangarira izvi, vandhu vakapsaka Jesu “kuti vamuite mambo.” (Johani 6:14, 15) No kainga kuti Jesu wakatenda kuizwa mambo, iyena waizongenera mushwiro jo va judha vaitongwa ngo umambo wo Roma. Asi Jesu, wakaramba kuita divi lo zvomatongerwe onyika. Bhaibheri rinobhuya kuti Jesu wakavhepo ‘oenda kudundhu.’ Kunyange waivangirijwa kuti angenere mu politika, asi Jesu wakaramba. Ici cijijo cinokosha maningi katiri!
6. Tingatevejeresa kudini muezaniso wa Jesu? (Wonanyi foto.)
6 Mazuva ano, apana mundhu angatikumbira kuti tiite mushamaiso wokuti zvingwa zviwande kana kulapa vanowaja. Uye apanazve anozotivangirija kutiita mambo. Asi zvingaitika kuti vandhu vamweni vangativangirija kuti tingene mu politika kana kutsigira mundhu wovanolangarira kuti unozova mutongi wakanaka. Asi, muezaniso wa Jesu wakajeka maningi: Iyena wakaramba kungena mu politika. Nguva imweni wakaguma pakubhuya kuti: “Umambo wangu asi wo nyika ino.” (Johani 17:14; 18:36) Iyesu inga makristu, tinodikana kuita zviro uye kulangarira inga ndi Jesu. Izvi ngo zvinotiita kuti titsigire Umambo wa Mwari, uye Umambo uwu ndiwona watinoitira mukumbiro ngo pamusoro pawo uye kuparijira ngo zvawo. (Mateu 6:10) Asi ngatimbowona kuti zvicinyi zvatingajijazve ngo ndhorovondho ya Jesu yaakaita kuti zvingwa zviwande.
Jesu wakagaja muezaniso wakanaka kuvajiji vake, aato kubatanijwa muno zvomatongerwe onyika kuJudha no ku Roma (Wonanyi ndima 6)
“ZVINOBHUYENYI KUTI ZVINGWA”
7. Zvicinyi zvakaizwa ndi Jesu uye vajiji vake vakaitenyi? (Johani 6:16-20)
7 Pasure pokunge Jesu apa zvokurhya vandhu vaiwanda, iyena wakavhunja vapostori vake kuti vahwirire kuKapernaume ngo ngarava. Asi Jesu aato kuhwirira ngo ngarava iyena wakaenda kumatundhu. Ngokudalo wakakwanisa kutiza vaya vaida kumuita mambo. (Verenganyi Johani 6:16-20.) Vapostori povainga vesiambuka jombe, kakatanga kuita dutu rino simba uye kakaita makupata makuru. Ngokudalo Jesu wakaenda kuvapostori vake esihamba pamusoro po kumwa. Uye wakavhunja Pedhro kuti aitewo zvakafanana. (Mateu 14:22-31) Jesu paakapinda mu ngarava dutu rakaema. Vajiji vakashamaiswa maningi zvokuti vakabhuya kuti: “Cokwadi yemwi muri mwana wa Mwari.” a (Mateu 14:33) Ngo njira inodakajisa vajiji vakabhuya izvi pasure pokunge Jesu ahamba pamusoro pokumwa, haiwa paainga aita mushamaiso wo cingwa. Ambolangariranyi ukoshi unodakajisa wakanyorwa ndi Mako mu ndhorovondho yake: ‘Vapostori vakashamisika maningi ngokuti vainga vasito kuzwisisa zvinobhuya zvingwa uye mweyo javo jakaramba jakavharika kuti jisazwisisa.’ (Mako 6:50-52) Vajiji vainga vasati vazwisisa kukura ko simba rakapuwa Jesu ndi Jehovha rokuita mushamaiso. Asi ngokukasika pasure pazvo, Jesu wakahwirijirazve kubhuya ngo pamusoro po zvingwa uye zvaakabhuya zvinotipa cijijo cimweni cinokosha maningi.
8-9. Ngenyi vandhu vaya vakaenda ku Kapernaume koopsaka Jesu? (Johani 6:26, 27)
8 Mangwana wakhona, vandhu vaya vakaendazve kundau iya yovaingaya vakapuirwa zvokurhya ndi Jesu, izvi zvaikhombija kuti vaibatikana ngo kuda kugutisa zvido zvavo zvokunyama. Asi Jesu no vapostori vake vainga vasiko. Ngokudalo, vandhu vakangena mu ngarava vesivha kuTibheriasi vesienda kuKapernaume vesipsaka Jesu. (Johani 6:22-24) Kubhuya kuti ivona vakaita izvi ngokuti vaida kujija zvakawanda ngo pamusoro po Umambo wa Mwari? Haiwa. Kubhuya cokwadi, vaida basi kuti Jesu avape zvingwa zvakawanda kuti vakwanirise zvinodiwa zvavo zvokunyama. Tinozvizivisa kudini izvi?
9 Ambowonanyi zvakaitika no cikwata ciya, povakasangana na Jesu phedo no Kapernaume. Jesu wakajekesera vandhu vaya kuti vainga vaviya kaari ngokuti vaida kurhya zvingwa zvakawanda. Jesu wakati: “Makarhya zvingwa uye moguta”. Asi nguva yakatevera Jesu wakabhuya ngo pamusoro po zvingwa izvi inga “zvokurhya zvinopera. Nokudalo iyena wakavavangisa kuti vashandire “zvokurhya zvinopa upenyu usingaperi” (Veranganyi Johani 6:26, 27.) Jesu wakabhuya kuti zvokurhya izvi, vaizozvipuwa ndi Baba vake. Ambolangariranyi kuti vajiji vakashamisika zvakadini ngo kurhya zvokurhya zvinovapa upenyu usingaperi! Izvi zvainga zvokurhya zvomukhaindinyi uye vaidikana kuitenyi kuti vazviwane?
10. Zvicinyi ‘zvaidikana kuizwa’ ngo vandhu ava kuti vawane upenyu usingaperi?
10 Izvi zvinoita inga kuti, Vajudha ava vaizwisisa kuti vaidikana kuita zviri zvese kuti vawane zvokurhya izvi. Zvingaita kuti ivona vailangarijira kuti vaidikana kuita “mabasa” aibhuiwa ngo mutemo wa Mosi. Asi Jesu wakati kavari, basa la Mwari “nga iri: Kuti tendanyi wiya waakatuma.” (Johani 6:28, 29) Zvakanaka maningi kuti tikhombije rutendo wedu muna Jesu muemereri wa Mwari kuti ‘tiwane upenyu usingapri’. Kubhuya cokwadi, wakambobhuya ngo pamusoro pazvo. (Johani 3:16-18, 36) Uye nguva imweni Jesu wakabhuyazve ngo pamusoro pozvavaidika kuita kuti vawane upenyu usingaperi.—Johani 17:3.
11. Icinyi cakajekesa kuti Vajudha vaibatikana ngo zvinodiwa zvavo zvokunyama? (Mapisarema 78:24, 25)
11 Vandhu ava vaidikana kuitenyi kuti vawane upenyu usingaperi? Vajudha vonavo vainga vasina kutenda vaidikana kukhombija rutendo muna Jesu. Zvokuti vakavhunjisa Jesu kuti: “Munozoitenyi kuti tiwone no kutenda kamuri?” (Johani 6:30) Vakabhuya kuti mumazuva a Mosi VaIziraeri vainga vakapuwa manaa ngo njira inoshamaisa, manaa aya ainga akafanana no zvingwa, ndizvona zvainga zvokurhya zvavo zvikuru. (Nee. 9:15; verenganyi Mapisarema 78:24, 25.) Zvakajeka kuti vaibatikana basi kuti vawane zvokurhya. Ngokukasika, Jesu wakazobhuya navo ngo pamusoro po “zvingwa zvo cokwadi zvinovha kudenga” zvaizovapa upenyu usingaperi, asi avato kunyange kuvhunjisa kuti zvonazvo zvinobhuyenyi. (Johani 6:32) Ivona vaibatikana basi go zvinodiwa zvavo zvokunyama, zvokuti vaitama kuzwisisa cokwadi cinokosha caijijiswa ndi Jesu. Zvicinyi zvatingajija apa?
ZVICINYI ZVINODIKANA KUVA ZVINOKOSHA KATIRI
12. Maererano no zvakajijiswa ndi Jesu, icinyi cinodikana kunyanya kukosha mu upenyu wedu?
12 Cijijo cinokosha maningi catinojija mucitsauko 6 ca Johani, ngo cokuti zvinodiwa zvedu zvokunamata zvinodikana kuva zvinokosha maningi mu upenyu wedu. Jesu wakajijisa izvi paainga avha kuejwa ndi sathana. Iyena wakakhombija kuti kuzwira Jehovha kaikosha maningi kudarika zvokurhya. (Mateu 4:3, 4) Kunja ka izvi, pahurukuro yake yo padundhu, Jesu wakajijisa kukosha kunoita kukanda zvinodiwa zvedu zvokunamata pakutanga. (Mateu 5:3) Ngokudalo, tinodikana kuzvivhunjisa kuti: ‘Zvandinoita mu upenyu wangu, zvinokhombija here kuti ushamwari wangu na Jehovha unokosha kupinda zvido zvangu?’
13. (a) Ngenyi zvisito kushata kudakajwa ngo zvo kurhya? (b) Pauro wakatipa ngwajo ipi? (1 VaKorinde 10:6, 7, 11)
13 Azvito kushata kuita mukumbiro ngo pamusoro pozvinodiwa zvedu zvo zuva ngo zuva, kana kuti kudakajwa ngo zviro zvatinazvo. (Ruka 11:3) Bhaibheri rinoti, zvakanaka kuti mundhu ‘arhye, amwe uye adakajwe ngo basa raanoita ngo simba’. Rinobhuyazve kuti ‘rinovha munyara ja Mwari wo cokwadi.’ (Mup. 2:24; 8:15; Jak. 1:17) Asi tinodikana kungwarira kuti tisaita kuti zvinodiwa zvedu zvokunyama zvive zvinokosha maningi mu upenyu wedu. Tingajija zvakanyorwa ngo mupostori Pauro ku vakristu vo Korinte. Iyena wakabhuya ngo pamusoro po zviro zvakaitika kujinja lo vaIziraeri, kubatanijawo no zvavakaita phedo no Dundhu lo Sinai. Iyena wakatingwaja kuti ‘atidikani kuda zviro zvinokhuvaza inga zvakaita vaIziraeri.’ (Verenganyi 1 VaKorinde 10:6, 7, 11.) Jehovha wainga aita mushamaiso wokupa vaIziraeri zvokurhya, asi cido cavo cokuda zvokurhya cainga cakakura maningi zvokuti zvakava ‘zvinokhuvaza kavari.’ (Num. 11:4-6, 31-34) Uye povainamata cimudhori co mwombe co goridhe, vakakhombija kuti vainga vesikoshesa maningi kurhya, kumwa uye kudakajwa ngo upenyu kudarika kuzwira Jehovha. (Eks. 32:4-6) Pauro wakashandisa muezaniso wavo inga ngwajo ku vakristu vo mu nguva yonayo, vainga phedo no kuparajwa ko Jerusarema no themberi muna 70 Krisu aviya. Isusuwo tiri kurarama phedo maningi no mugumo wo nyika ino yakashata, ngokudalo tinodikana kuzwira zano la Pauro ro kungwarira kuwira mu cishaishi cakafanana no co vaIziraeri.
14. Bhaibheri rinobhuyenyi ngo pamusoro po zvokurhya zvatinozova nazvo munyika ipsa?
14 Jesu paakatijijisa kuita mukumbiro ngo pamusoro po ‘zvingwa zvedu zvo zuva ngo zuva,’ wakabhuyawo kuti tinodikana kuita mukumbiro ngo zvokuti kuda ka Mwari kuitike pasi pano inga kudenga. (Mateu 6:9-11) Munokwanisa kuwona here kuti nyika inozova yakadini mukumbiro uwu paunozodavirwa? Bhaibheri rinobhuya kuti kuda ka Mwari ngo ndava yo nyika ino kunobatanija zvokurhya zvakawanda. Isaya 25:6-8, inokhombija kuti vandhu vanozova no ‘zvokurhya zvakanaka’. Pisarema 72:16 panoti: ‘Pa nyika panozova no zvirimwa zvakawanda, zvinozofashukira pamusoro po matundhu.’ Munokwanisa kuwona here mesishandisa zvirimwa izvi kuti mubike zviro zvamunoda kana kujijira mabikire amweni? Uye musakanganwa kuti imwimwi munozodikana ‘kusima zvirimwa mu munda wenyu uye munozorhya mucero jinozobarwemo’. (Isa. 65:21, 22) Ngo kudalo, vandhu vese vanozobusa upenyu unoshamaisa.
15. Zvicinyi zvinozojija vanozomuswa? (Johani 6:35)
15 Verenganyi Johani 6:35. Ambolangariranyi nga vaya vakarhya zvingwa no hove izvo Jesu wakaita mushamaiso kuti zviwande, munguva iyi avato kukhombija kutenda muna Jesu. Kunyange zvakadaro, kudai vangazomuswa pamweni mungazovaziva vamweni vakona. (Johani 5:28, 29) Vandhu ava vanozodikana kujija zvakabhuiwa ndi Jesu kuti: “Ndini cingwa co upenyu anoviya kandiri aazovi no njara.” Ivona vanozodikana kutanga vatenda cibairo ca Jesu uye vanozodikanazve kukhombija rutendo muna Jesu kuti wakapira upenyu wake kuitira vandhu vese. Uye panguva yonayo panozova no ulongwa wo murairo wozvokunamata kuitira vaya vanozomuswa navaya vese vanozobarirwa munyika ipsa. Unozova mudakalo wakadini kubesa vandhu ava kujija zviro zvinoshamaisa ngo pamusoro po cinangwa ca Jehovha! Kuita izvi, kunozodakaja maningi kupinda zvokurhya zvokunyama. Kubhuya cokwadi, zviro zvokunamata zvinozova zvinokosha maningi mu upenyu wedu.
16. Tinozobhuisana ngo pamusoro penyi mu cijijo cinotevera?
16 Mucijijo cino, taona zvatingajija mundhorovodho iri mubhuku la Johani citsauko 6. Asi Jesu wainga no zviro zvakawanda zvokutijijisa ngo pamusoro po “upenyu usingaperi.” Vajudha vaidikana kuzwira Jesu uye ndizvona zvatinodikana kuitawo. Ngokudalo, mucijijo cinotevera tinozoenderera mberi tesibhuisana ngo pamusoro po masoko amweni ari mucitsauko 6 ca Johani.
NGOMA 20 Makapa Mwana Wenyu Anosisira
a Kuti muwane zvakawanda ngo pamusoso po shwiri iyi, wonanyi bhuku rinozwi Jesu Nzira Nechokwadi Neupenyu pheji. 131 uye Tevedzera Kutenda Kwavo pheji. 185.
