YEMWI munoeja kungwarira jijo yenyu yo Bhaibheri inodakaja here nguva yese? Zvesida nguva jimweni tese tinomboitawo kudaloko. Asi ambolangariranyi basi ngo zviro zvatinoita nguva yese, zvakadai inga kugeza. Kugeza kunoda nguva no kuvangisira, asi pokupejisira tinozwa tarerukirwa! Jijo yo Bhaibheri ingavawo yakatojana no “kugeza ngo kumwa inotondhorera yo Soko la Mwari.” (VaE. 5:26) Langariranyi mazano amweni angamubesa:

• Itanyi ulongwa. Jijo yo Bhaibheri yo mundhu ega, iri “pakati po zviro zvinokosha maningi” zvokuti muKristu aadikani kuzvirejareja. (VaFiripi 1:10) Kuitira kumubesa kutevejera ulongwa wenyu, madini kukanda pa ndau iri nyore kuwoneka, pakadai inga pa biravira kana pamusuwo wo firiji? Kana kuti imwimwi mungawona zvesibesa kuseta aramu mu cimucini ciri cese co magetsi kuti irire nguva yenyu yo kujija isati yakwana.

• Cinjanyi zvinoenderana no zvamunoda. Zvakareruka here kuti mukande mulangariro wenyu ko nguva doko kana ko nguva yakareba? Yemwi munonasa kuziva mugariro wenyu. Cinjanyi ulongwa wenyu wo kujija kuti uenderane no mugariro wenyu. Kudai mesizwa musikadi kujija nguva yakwana yokuti mujije, madini kukheta kujija ngo 10 minuto? Pamunonga mesijija nguva doko iyi munonga maita zviro zvakawanda kupinda zvamaizoita ngo njira imweni. Pamunonga matotanga, yemwi mungatovangisira kuti muenderere mberi.—VaF. 2:13.

• Khetanyi shwiro jo kujija pasiri no nguva. Kana maakuda kujija, iri iyona nguva yamunogala pasi mozvivhunjisa kuti ndingajijenyi, amuripi “kushandisa nguva yenyu zvakanaka.” (VaE. 5:16) Madini kungwarira munda-nda-nda no musoro jamungada kujija? Pese panoviya muvhunjo mumulangariro wenyu unyorerenyi. Panoperera cijijo cimwe nga cimwe, yemwi mungaengejera shwiro yamungada kuzojija.

• Ivanyi anokasika. Ejanyi kubatanija kucinja kuri kese mukati mo munda-nda-nda wenyu, zvakadai inga nguva yamunopeja mesijija kana kuti zvijijo zvamunokheta. Cinokosha asipi kuti tinojija rini ko nguva yakarebesa kudini, kana kuti zvamunojija, asi kuti tinojija nguva jese zvakadini.

Tinobeswa maningi kudai tikalamba tesijija nguva yese. Patinoita izvi tinokwedera phedo na Jehovha, tinojija kuita zviro ngo uzivi uye tinozorojwa.—Jos. 1:8.