MUSOLO WO KUJIJA 46
NGOMA 49 Kudakajisa Mweyo wa Jehovha
Hama—Yemwi muri kuitawo zviri zvese kuti muitewo mubeseri wo ungano here?
“Kupa kuno mudakalo mukuru kupinda kuashira.”—Mab. 20:35.
ZVATISAJIJA
Mucijijo cino tinozojija kuti ngenyi zvakanaka kuvangisa hama jakabhabhatijwa kuti jishande inga vabeseri voungano.
1. Mupostori Pauro waiwonesa kudini vabeseri voungano?
VABESERI vo ungano vanoita mabasa akakura maningi muungano. Mupostori Pauro waireremeja maningi hama iji jakagondeka. Izvi tinozviwona paakanyorera Vakristu vo kuFiripi, iyena wakacungamija vabeseri pamwepo no vakuru voungano.—VaF. 1:1.
2. Hama imweni inozwi Luis inojizwa kudini ngo kushanda inga mubeseri wo ungano?
2 Hama jakabhabhatijwa jo mazera akasiyana-siyana, jinodakala maningi pajinobesa muungano inga vabeseri voungano. Inga muezaniso, Dhevhani wakagajwa kuva mubeseri wo ungano paainga no makare 18. Hama imweni inodanijwa kuti Luis yakagajwa kuva mubeseri woungano poyainga no makore anodarika 50. Ivona vakati: “Kandiri makomborero makuru kubesa ungano ndesishanda inga mubeseri wo ungano, maningi-ningi pandinoona rudo randinokhombijirwa ngo jihama!” Vabeseri voungano vakawanda vanomazwirowo akadalo.
3. Tinozowonenyi mucijijo cino?
3 Kudai imwimwi makabhabhatijwa uye amusati maamubeseri wo ungano, mungavawo no cinangwa ici here? Zvicinyi zvingamubesera kuti muite izvi? Zvicinyi zvinobhuiwa ngo Bhaibheri zvingamubesa kuti muvewo mubeseri wo ungano? Mucijijo cino munozowona mupingulo jo muvhunjo iji. Tisati tabhuya izvi ngatimbowona kuti mabasa api anoizwa ngo vabeseri voungano.
ZVICINYI ZVINOIZWA NGO VABESERI VO UNGANO?
4. Mabasa api anoizwa ngo vabeseri vo ungano? (Wonanyi foto.)
4 Vabeseri vamweni voungano vanowonerera ngozvo ndau yokooparijira uye mabhuku atinoshandisa mubasa lo kuparijira. Vamweni vanobesa ngozvo kucenesa no kunasirira-nasirira Nyumba jo Kunamatira. Vamweni vanogajwawo kuti vaite vangwaji, no kuwona ngo zvimucini zvo mazwi no mavhidhiyo panonga pesiizwa musangano. Mabasa amweni anoizwa ngo vabeseri vo ungano, ngookunasirira-nasirira. Ngokudalo, hama iji vanarume vakavanga muno zvokunamata, vanoda Jehovha uye vanorarama mukuzwirana no zvinojijiswa ngo Bhaibheri. Ivona vano rudo maningi kuhama no hanzvaji jo muungano. (Mat. 22:37-39) Zvicinyi zvingaizwa ngo hama yakabhabhatijwa kuti izova mubeseri wo ungano?
Vabeseri vo ungano vanotevejera Jesu, uye vanokoshesa zvinoda vamweni (Wonanyi ndima 4)
5. Zvicinyi zvingamubesa kuti imwimwi muzokwanisa kuva mubeseri wo ungano?
5 Bhaibheri rinokhombija kuti zvicinyi zvingaizwa ngo hama kuti izogajwa kuva mubeseri wo ungano. (1 Tim. 3:8-10,12,13) Imwimwi munolangarirawo ngokujija zvinodiwa kuti muzova mubeseri wo ungano uye kuvangisira kuti muzvikwanise here? Izvi zvinozomubesa kuti muzokwanisa kuzova mubeseri wo ungano. Asi, musati maamubeseri wo ungano imwimwi munodikana kulangarijisisa maningi zvinoita kuti imwimwi mude kuita mubeseri wo ungano.
NGENYI IMWIMWI MUNODA KUVA MUBESERI WO UNGANO?
6. Imwimwi zvicinyi zvingamundundira kuti muitewo zviri zvese kuti mubese vamweni? (Mateu 20:28; wonanyi yo pakhavha.)
6 Jesu Kristu muezaniso wedu uye zvese zvaaiita waizviita ngo rudo, rudo kuna Baba vake uye kuno vandhu. Rudo rakaita kuti Jesu avangisire kubesa vamweni kuti vaite mabasa avo no kuzvidodokesa. (Verenganyi Mateu 20:28; Johani 13:5, 14, 15) Kudai zvese zvamunoita mukazviita ngo rudo, Jehovha unozomukomborera uye unozomubesa kuti muzajise cinangwa cenyu cokuva mubeseri wo ungano.—1 VaK. 16:14; 1 Pet. 5:5.
Ngokusuka soka jo vapostori, Jesu wakajijisa kuti, munodikana kuzvidodokesa no kubesa vamweni, pano kupsaka zvamunoda imwimwi (Wonanyi ndima 6)
7. Ngenyi hama inoda kuva mubeseri wo ungano inodikana kujivisa kuzvikuja?
7 Munyika vandhu vakawanda vanoda maningi zvigaro. Vesikwevera zvese kavari asi vandhu va Jehovha avaiti zvonazvo. Hama jinoshandira vamweni ngo rudo inga zvakaita Jesu, atiripi pasi po simba lo utongi atidi kujizwa inga tinokosha kupinda vamweni. Kudai mwanarume unoda zvozvigaro akagajwa kuva mubeseri wo ungano, unozoramba kuita mabasa amweni akaderera anodika kuti abese magundata a Jehovha. Iyena nguva jimweni unolangarira kuti mabasa aya, aangaiti kuti amaite. (Johani 10:12) Jehovha aakomboreri vandhu vanoita zviro ngo kuzvikuja kana vanozviwona inga vanokosha kupinda vamweni.—1 VaK. 10:24, 33; 13:4, 5.
8. Jesu wakapa zano ripi kuvapostori vake 12?
8 Nguva jimweni shamwari ja Jesu jo phedo, jakaeja kuda kuwana makomborero ngo gwanja lakashata. Langariranyi zvakaizwa ngo vapostori vaviri va Jesu, Jakobho na Johani. Vakakumbira Jesu kuti vawane zvigaro zvinokosha mu Umambo. Jesu aato kuvabonga ngokuva no cido ici, cokuva vanokosha maningi kupinda vamweni. Kunja kazvo, Jesu wakavhunja vapostori vake 12 kuti: “Wiya anoda kuva mukuru pakati penyu unodika kuva mushandi wenyu, wiya anoda kuva wokutanga pakati penyu ngaave muranda wo vese.” (Mak 10:35-37, 43, 44) Kudai hama yesieja kuda kuita mubeseri wo ungano no cinangwa cakanaka, co kushandira vamweni iyena unozova makomborero kuungano.—1 VaT. 2:8.
MUNGAITISA KUDINI KUTI MUENGEJERE CIDO CENYU COKUVA MUBESERI WO UNGANO?
9. Mungaengejeresa kudini cido cenyu cokushandira vamweni?
9 Pasina kukana-kana imwimwi munoda Jehovha uye munoda kushandira vamweni. Kunyange zvakadalo, nguva jimweni amutona cido cokushanda inga mubeseri wo ungano ngokuti munoziva kuti zvinobatanija mabasa akawanda. Ngokudalo, mungaengejeresa kudini cido cenyu cokushandira vamweni? Madini kulangarira ngo mudakalo wamunowana pamunobesa hama no hanzvaji jenyu? Jesu wakati: “Kupa kuno mudakalo mukuru kupinda kuashira.” (Mab. 20:35) Upenyu wa Jesu wakava muezaniso wazvo. Jesu wainga no mudakalo wo cokwadi ngokuti waishandira vamweni, uye ndizvona zvinozoitikawo kwamuri.
10. Icinyi cinokhombija kuti Jesu waidakarira kushandira vamweni? (Mako 6:31-34)
10 Wonanyi muezaniso wa Jesu wokuti waidakala paaibesa vamweni. (Verenganyi Mako 6:31-34.) Zuva rimweni, Jesu no vapostori vainga varemba maningi. Vainga vesiyenda kundau yakanyarara kuti vambozorora. Asi, vandhu vakawanda vakatanga kugumeyo, voemera Jesu asati aguma. Ivona vaida kuzwa zvaijijisa Jesu asi iyena angadai akaramba. Zvesiwoneka kuti iyena no vapostori “vainga vasina nguva yokuzorora kunyange yokurhya .” Kana kuti Jesu angadai akajijisa cokwadi cimwe kana zviviri basi. Apeja oita kuti vapinde asi Jesu waida vandhu ngo ndava yazvo iyena “wakatanga kuvajijisa zviro zvakawanda.” Uye iyena wakaenderera mberi esivajijisa “mbhera aamadeko.” (Mak 6:35) Jesu aato kuita izvi ngo kuvangirijwa, asi ngokuti “waizwira unyasha vandhu.” Iyena waida kuvajijisa ngokuti waivada. Uye kuita kudalo kaisiya Jesu akadakala.
11. Jesu wakabeseresa kudini vayaeyi vake ngo njira kwayo? (Wonanyi foto.)
11 Kunja kokuvajijisa zviro zvakawanda, Jesu wakabesawo vandhu vaya ngo njira imweni. Iyena wakapawo vandhu vaya zvavaida zvokunyama. Panguva yonayo Jesu wakaita kuti pau no hove zviwande ngo njira inoshamaisa. (Mak 6:41) Uye wakashandisa vajiji vake kuti vape zvokurhya izvi kuvandhu. Ngokudalo Jesu wakajijisa mabasa anoshanda akadai inga aya anoizwa ngo vabeseri vo ungano vanokosha. Ambolangariranyi ngo mudakalo wakava no vapostori povakabesa Jesu kupa zvokurhya mbhera “vese varhye no kuguta”! (Mak 6:42) Apa andipopi pega paakakanda zvido zvovamweni pokutanga, iyena wakaita zvonazvo koupenyu wake wese pasi pano. Kujijisa vamweni no kuita zviro zvakaterera pakuvabesa. (Mat. 4:23; 8:16) Zvaipa mudakalo mukuru kuna Jesu, imwimwi munozozwawo kudalo pamunokanda pakutanga zvinodiwa zvovamweni. Uye kuvangisira kuti muzova mubeseri wo ungano.
Kuda Jehovha uye no cido cokuda kumunamata, zvinozoita kuti muite zvese zvamunokona kuti mubese vamweni vari muungano (Wonanyi ndima 11) a
12. Ngenyi pasina mundhu anocikonzero cokubhuya kuti amubesi muungano?
12 Vandhu vamweni vanolangarira kuti apana cavanokwanisawo kuita kuti vashandiswe muungano. Kudai mesijizwa kudalo, musaneseka mumweyo cokwadi imwimwi muno undhu ungatobesa maningi jihama. Madini kuverenga masoko a Pauro anowanika pana 1 Vakorinde 12:12-30 uye moita mukumbiro ngo pamusoro pazvo. Pama vhesi aya Pauro unojekesa kuti, munamati wese wa Jehovha unokosha maningi kubatanijawo nemwi, uye unodiwa muungano. Kudai amusati makwanirisa zvinodiwa kuti mushande inga mubeseri wo ungano, musaremba. Kunja ka izvi, madini kuita zvese zvamukona kuti mushandire Jehovha no kubesa hama? Mungava no cokwadi cokuti vakuru vanozomulangarira uye vanozomugaja mabasa amunozokwanisa kuita.—VaR. 12:4-8.
13. Icinyi cinodika kuizwa maningi nga wiya anoda kuva mubeseri wo ungano?
13 Wonanyi zvamungaita kuti muvangisire kuti muve mubeseri wo ungano: Zviro zvizinji zvamunodikana kuita ngazviya zvokuti Vakristu vese vanodikana kuzviitawo. Inga muezaniso, Makristu ese anodikana kuvangisa ushamwari wavo na Jehovha, nokuva vakasujunuka kuti, vashandire vamweni ngo mudakalo wese kuita muezaniso wakanaka no mufambiro. Ngokudalo maano mugariro jese jinodiwa kuti muve mubeseri wo ungano, asi kuvangisira kupi kunodika kuti hama igajwe kuva mubeseri wo ungano?
ZVICINYI ZVAMUNGAITA KUTI MUVE MUBESERI WO UNGANO
14. Zvinobhuyenyi kuva “akareremera”? (1 Timoti 3:8-10, 12)
14 Ngatibhuisane ngozvinodika kuizwa ngo vabeseri vo ungano zvinobhuiwa mu bhaibheri pana 1 Timoti 3:8-10, 12. (Verenganyi.) Vabeseri vo ungano vanodikana “kuva vakareremera.” Masoko aya angasandujwa kuti kuva “akakodzera kukujwa,” “akareremera,” kana kuti “anorumbijwa.” Izvi azvibhuyi kuti amudikani kuseka kana kutobungaijawo. (Mup. 3:1, 4) Izvi zvinoda kubhuya kuti, imwimwi munodika kukoshesa mutoro wenyu. Kudai muno zina lakanaka lo kushanda ngo simba muungano, uye makagondeka munozoreremejwa ngo vandhu vese muungano.
15. Zvinobhuyenyi kuva “mundhu ano soko rimwe” uye “kurega kuwana zviro ngo njira isito kururama”?
15 “Ivanyi mundhu anobhuya soko rimwe” zvinobhuya kuva akareremera, akagondeka uye anobhuya cokwadi nguva yese. Imwimwi ivanyi mundhu anongwarira zvaanobhuya, uye musacengeja vamweni. (Zvi. 3:32) “Amudikani kuwana ciro ngo njira isito kugondeka” izvi zvinobhuya kuti makagondeka pabasa renyu, no mashandisire amunoita mare. Imwimwi amusaizoshandisa shamwari jiri muungano kuitira kuwana mare yavo.
16. (a) Zvinobhuyenyi “kutama kumwa maningi doro? (b) Zvinobhuyenyi kuva no “hana yakacena”?
16 “Amudikani kumwa maningi doro” izvi zvinobhuya kuti amudarikiji mugano uye amuzivikanwi kuti munomwisisa maningi doro. “Ivanyi no hana yakacena” izvi zvinoda kubhuya kuti: Munorarama mukuzwirana no zvinoda Jehovha. Icokwadi kuti imwimwi muri mundhu ano cishaishi, asi muno ushamwari wakanaka na Jehovha uye munojizwa muno runyararo.
17. Hama ingakhombijisa kudini pacayo kuti yakagondeka “painoongororwa kuti yakakodzera here”? (1 Timoti 3:10; wonanyi foto.)
17 “Ongororanyi zvamunokona kuita” izvi zvinobhuya kuti vakuru vaona kuti munokwanisa kuita mabasa avanomugaja uye vanomuthemba. Ngokudalo, kudai vakuru vakamukumbira kuti muite basa riri rese, tevejeranyi mazano avanomupa uye no mazano anowanika mumabhuku atinopuwa ngo sangano. Psakanyi kuzwisisa kuti ngazvipi zvinobatanijwa pabasero uye inguvanyi yarinopera. Kudai imwimwi mukaita zvakanaka mabasa amunogajwa muungano, vese muungano vanozoona kuti muno mutoro uye vanozowona kubudirira kenyu. Vakuru, musaregera kujijisa mabasa hama jakabhabhatijwa. (Verenganyi 1 Timoti 3:10.) Muungano yenyu, muno majaha ano makore 13 no 14 kana pasi here? Ivona vanoita jijo yo mundhu ega uye vanonasirira zvakanaka musangano here? Ivona vanopa mupingulo pamusangano uye vanoenda kooparijira nguva jese here? Kudai mupingulo wo muvhunjo iji ukava hina, vapenyi mabasa avanokwanisa anoenderana no zera ravo. Ngokuita kudalo, majaha aya anonga esiongorohwa kuti “anozvikwaniriso here.” Ngokudalo, pavononga vaanomakore anokwana kuita 17 kana 18, vangazokwanisa kugajwa kuti vave vabeseri vo ungano.
Vakuru vanopa mabasa hama jakabhabhatijwa, uye vanoongorora “kukodzera kojakaita” (Wonanyi ndima 17)
18. Zvinobhuyenyi kuva mudhu “asina caanopumbwa”?
18 “Ivanyi mundhu asingapumbwi ciri cese” izvi zvinobhuya kuti muve mundhu asina caanopunbwa cakashata. Icokwadi kuti, vandhu vamweni vangamunyepera no kumupumbha kuti maita ciri cese cakashata. Izvi zvakaitikawo kuna Jesu, uye wakatobhuyawo kuti vajiji vake vaizoizirwawo izvi. (Johani 15:20) Kudai imwimwi mukakhombija mugariro wakacena inga ndi Jesu, imwimwi munozova vakareremera pamberi po hama.—Mat. 11:19.
19. Zvinoda kubhuyenyi “mwamuna ano mukaji umwe basi”?
19 “Ivanyi mwamuna ano mukaji umwe.” Imwimwi munodikana kuva no mawonero a Jehovha ngo pamusoro pomucadho —kana kuti no mubatanijwa wo mwanarume umwe no mwanakaji umwe. (Mat. 19:3-9) Mukristu aadikani kuita uhure. (VaH. 13:4) Kunja ka izvi, munodikana kuva akagondeka kumukaji wenyu, uye amudikani kukhombija kuda vanakaji vamweni.—Jobho 31:1.
20. Mwanarume unotungamirisa kudini mbhuri yake ngo “njira yakanaka”?
20 “Ivanyi mudhu anotungamirira zvakanaka vana venyu uye no mbhuri yenyu.” Kudai imwimwi muri musoro wo mbhuri, munodikana kukwanirisa zvakanaka mutoro. Garanyi mesiita kunamata ko mbhuri. Itanyi zvese zvamunokwanisa kuti muparijire no mukaji wenyu uye no vana venyu. Besanyi vana venyu kuti vave no ushamwari wakavanga na Jehovha. (VaE. 6:4) Mwanarume unokwanisa kutungamirira zvakanaka mbhuri yake, unokwanisawo kutungamirira ungano.—Ezanisanyi na 1 Timoti 3:5.
21. Zvicinyi zvamungaita kudai imwimwi amusati maamubeseri wo ungano?
21 Kudai musati maamubeseri wo ungano, tapota nasanyi kujija musolo uno ngokungwarira kese uye itanyi mukumbiro ngo pamusoro pazvo. Jijanyiwo zvinodiwa ngo Bhaibheri, kuti muve mubeseri woungano uye ejanyi kuita zvinodiwaro. Langarijisisanyi kuti munoda Jehovha zvakadini uye no hama no hanzvaji jenyu muungano. Izvi zvinozoengejera cido cenyu cokuda kuvashandira. (1 Pet. 4:8, 10) Kudai mukazova mubeseri wo ungano munozowana mudakalo unoshamisa unovha pakubesa hama no hanzvaji jiri muungano. Uye mungava no cokwadi cokuti Jehovha unozomukomborera ngo kuvangisira kenyu kuva mubeseri wo ungano!—VaF. 2:13.
NGOMA 17 “Ndinoda”
a KUTSANANGURWA KO MUFOTO: Muhoko boshwe, Jesu uri kubesa vajiji vake ngo njira yo kuzvidodokesa; muhoko muho, mubeseri wo ungano uri kubesa hama yaamusharuka.
