Pauro: Yesu tainga takadakala maningi! Novembro 1985, rainga rwendo redu rokutanga lo kugajwa inga mamisionario—kuLiberia, kumavirira ko Africa. Ndeki yedu yakayema ku Senegal. Anne wakati: “Nguva imwe basi tinonga taguma Liberia!” Ponapo pakaguma ciziviso cokuti: “Vandhu vari mundeki ino vari kuenda Liberia vanodikana kudzvuka. Ngondava yo kupandukirana kuriyo ndeki aizokwanisi kumata ku Liberia.” Ko gumi ro mazuva, takagara no mamisionario o Senegal, masoko otaizwa aibuda ku Liberia aibhuya ngo marori akazala ngo mutumbi jo vandhu uye vaya vainga vasikazwiri vaiuraiwa.

Anne: Yesu tiri vandhu vanothya. Kubhuya cokwadi kuvhira ndisiri mwana mudoko, ndaizivikanwa inga Anninha aineseka. Ndinothya kunyange kudarika gwanja! Asi tainga takacunga kuyenda kotakagajwa.

Pauro: Yesu tiri vaviri taivha ku mavirira ko Engratera, takakurira mu ndhalaundha imweyo. Inini na Anne takakurira mu ndhalaundha imweyo takatanga kushanda inga maphiyona potakapeja cikola co sekundaria, inini naye takawana kurujiro no kubeswa inga ndini ndakakurujirwa ngovabereki vangu uye Anne wakakurujirwa ndimai wake. Cido cedu cainga cokupinda mubasa longuva yakazara uye vabereki vedu vakatitsigira. Ndino makore 19, ndakawana makomborero okuti ndooshanda ku Bheteri, uye anne wakaviyawo pa Bheteri potainga taroorana mugore la 1982.

Anne: Yesu taidakarira maningi ku Bheteri, asi tainga tinocido cokushanda kaidiwa vapariji. Patainga tiri pa Bheteri, takawana mukana wokushanda no hama jainga mamisionario. Izvi zvakaita kuti cido cedu ciengejeke, taiita mukumbiro mazuva ese ngo pamusoro pazvo uye takazviita ko makore matatu, uye takava no mudakalo wakakura maningi mugore la 1985 potakadanijwa kuti toopinda kalasi yo 79 ku Giliadhi! Takazogajwa kuti tooshanda ku Liberia, ku mavirira ko Africa.

Pauro: Takakwira ndeki yokutanga kutenderwa kuenda ku Liberia. Kuzwa basi musindo wo karu kwaita kuti vandhu vakaruke. Kuti titame kuthya taiverenga mavhesi o bhuku la mapisarema usuku wese. Isusu taidavo maningi basa redu iri rotakagajwa. Anne wakashanda inga mumisionario mubasa lo kuparijira  uye inini ndakashanda pa bheteri na hama Johani Charuk. a Zvakaitikari kovari pamwepo no kuzwisisa kavo mugariro wo zviro kuhama jedu, zvakandipa cijijo cakakura maningi.

Anne: Ngenyi takadakarira Liberia ko nguva doko? Ngo pamusoro po hama no hanzvaji jedu. Ivona vainga no rudo, no ushamwari uye vainga vakagondeka. Yesu takavadakarirawo; Voita inga mbhuri yedu. Mbhangiro javo jakativangisa muno zvokunamata. Basa lo kuparijira ndirona lataida maningi. Vandhu votaiparijira vainyangajwa maningi potaikasika kupinda, mungazvithemba izvi! Vandhu vaigara vasitobhuya ngo shwiro jo Bhaibheri mumakwanja. Imwimwi maitodikana basi kutoguma motobatana mumabhuyo. Tainga tino zvijijo zvakawanda zvo Bhaibheri uye zvaitonesa kujija navo vese. Ici ndicona cineso cotakasangana naco!

Pauro: Pasure po makore malongomuna tiri murunyararo mugore la 1989 zviro zvakacinja ngo kukasika, kupandukirana—kovagari vemo. Masoja akapandukiraya akatanga kutonga ndhalaundha yainga yakatendereja Bheteri mu dhia 2 ya julho wo 1990. Ko mweji mutatu takaruza nambafoni jo vandhu vokunja, kubatanijavo jo hama no hanzvaji jedu uye no jo Dare Rinotungamirira ro pasi pese. Kaiizwa zvomasimba, kugomoka ko zvokurhya uye vaijipwa. Matambujiko aya akaramba esiitika ko makore gumi na malongomuna uye akapsasa nyika yese.

Anne: Majinja no majinja airwisana no kuulayana. Masoja ainga no mapfuti makuwane aisimira macira anothyisa, aihamba mumakwanja ese esiba zvese zvaaiwona mberi kavo. Kuvamweni kuuraya akusaithyisa, vaiita inga vari “kuulaya huku,” inga zvavaibhuya ivona. Paitovoneka mututhu jo vandhu vakafa pandau jokungwaririra vandhu yainga phedo no filial. Vanamati va Jehovha vakagondeka vakafawo, kubatanija no mamisionario maviri.

Vesikanda upenyu wavo pangozi, jihama jakafisha majinja ainga esitevererwa uye esitakwa. Mamisionario uye no maBehterita akaitavo zvakafanana. Pa Bheteri, hama jakatiza jaivata munyumba jo pasi uye vamweni taigara navo munyumba jo mudenga. Takagara pamwepo mumba medu no mbhuri yainga no vandhu 7.

Pauro: Mazuva ese, masoja aiyeja kungena pa Bheteri kuti awone kuti tainga tafisha vandhu here. Takaita ulongwa wokuti tingwaririke wo vandhu varongomuna: vaviri vaiwonerera ngo pamusuwo uye vaviri vaiwonerera ngo pamajhanela. Kudai vaviri vaiwonereraya ngo pamusuwo vakakanda muhoko javo  mberi zvaibhuya kuti kainga kakanaka. Asi kudai vakakanda muhoko javo sure zvaibhuya kuti masoja aiita zvo hasha uye vaiviya, vainga vakasota pa majhanela vaidikana kugogoma kuenda kooviga hama jedu.

Anne: Padarika mavhiki akawanda, cikwata co masoja aingaya akanyangajwa maningi cakakwanisa kupinda muBheteri. Yeni no hanzvaji imweni takazvikonyera mu kazadhebhanyo mainga no cindau cidoko cokuvanda. Hanzvajiyo yaidikana kuzvipeta kuti ikwane mukatimo. Masoja ainga no pfuti, akanditevera mbhera munyumba yo mudenga. Ivona vakatanga kugogoja musuwo. Pauro waideketera esiti, “Mukaji wangu ari kushandisa kazadhebhanyo.” Kuti tiite biravira rokunyepejera taidikana kucinja masherefu pa ndau pawo, zvaizoita musindo uye zvaizotora nguva zvokuti vaizofungijira, inini ndakatanga kutetemera kuvhira kusoka mbhera kumusoro. Hino ndaizokwanisisa kudini kuvhura musuwo? Yeni ndakaita mukumbiro kuna Jehovha, ndesideketera kuti andibesere. Kuvhira ponapo ndakavhura musuwo uye ngo njira inoshamaisa ndainga ndakathiva. Umweni wavo, wakandindundira kumutivi, ovhura sherefu wakapsaka mumujiyo jese. Iyena aato kuzvithemba kuti wainga asito kuwona ciro. Iyena no cikwata cake vakatangazve kupsaka mu nyumba jimweni. Asi avato kuwanazve ciro.

Pauro: Takagara tisina zvokurhya, ko mweji jawanda. Asi zvokurhya zvo uMwari ndizvona zvainga tambo yo upenyu wedu. “Kunamata ko mangwanani” ko paBheteri ndikona kainga kurhya kedu uye ndizvona zvaitibesa.

Yesu taizviziva kuti, kudai taizogala tisina zvokurhya, kumwa taizopejisira ngo kubuda pa Firiyari. Hama jainga jakavanda jaizoitisa kudini? Dangani jaizoulawa. Asi zvinoita inga kuti Jehovha waizoita mushamaiso wo kutipa zvotaida kamare. Jehovha wakatipa zvaidiwa nokutibesa kuti tirwisane no zvineso zvedu.

Nyika poyainyanya kuthyisa, cokwadi cainasa kujeka. Nguva no nguva, hama jedu jaidikana kutiza kuti jiponese upenyu wajo, asi ivona vakalamba vakagondeka uye vakagajana. Vamweni vaibhuya kuti zvovaisangana nazvo cokwadi zvaizova “cijijo kuitira dambujiko guru.” Vakuru voungano no majaha vakaita zvese zvovaikwanisa kuti vabese hama no hanzvaji javo. Pavaidikana kubuda mu ndhalaundha yavo, hama no hanzvaji jaidikana kulamba jakabatana no kuparijira mu ndau ipsa nokuita musangano, uye vakavaka mucaca pakati po gwasha kuti vapindirepo musangano. Musangano yainga iri paradhiso yo kutivangisa, nokuparijira kakabesa hama no hanzvaji kuti jirwisane no zvineso zvavaisangana nazvo. Potaibesa, takadakara maningi potaiwona hama no hanzvaji jesikumbira mapasta o okooparijira navo pano kukumbira zvokusimira! Vandhu vainga vasalangarira no kuthya zvavakawona mu hondo vakatanga kuzwa Masoko Akanaka. Vandhu vaishamaia maningi povaiwona zvapupu zvakadakala; Zvapupu zvaijeka  mu nyika ino cidima! (Mateu 5:14-16) Kuvangisira ko hama iji kakaita kuti masoja amweni agume pakuda kujija cokwadi.

Pauro: Nguva jimweni taidikana kusiya nyika yedu, katatu pa nguva doko uye kaviri pa gore rese. Hanzvaji imweni iri misionario yakafupisa mazwiro edu zvakanaka yesiti: “Ku Giliadhe, takajijira kukanda mulangariro wedu mu basa lotakagajwa uye izvi ndizvona zvotakaita. Saka kusiya hama no hanzvaji jedu jiri mu mugariro wakadai zvakatiwaja maningi!” Takadakala maningi, kunyange tiri munyika jiri phedo no phedo taizokwanisa kubesa hama no hanzvaji jedu jiri ku Libheria.

Anne: Muna Maio wo gore la 1996, takabuda tiri valongomuna mu karu yainga yakazala ngo madhokumento anokosha o Firiyari. Cinangwa cedu cainga cokuti tihambe ko 16 omakiroometro tesienda ku ndau yakangwaririka kudivi rimweni ro thaundi. Panguva yonayo kamare ndau yatainga yakatanga kurwiswa. Masoja ainga akanyangajwa akatanga kurijira pfuti mudenga, votiemesa vobudisa vatatu vedu mu karu, vakaenda na Pauro ari mukatimo. Takaramba takaema tesithya. Takawona, Pauro esiviya kotiri esibuda ngazi pa huma pake. Pakutanga tailangarira kuti wainga afuhwa ngo pfuti, asi takazolangarira kuti kudai afuhwa aasaizokwanisa kuhamba! Musoja umweni wainga amutaka omundundira kunja ko karu. Zvinodakajisa, ngozvokuti cainga cilonda cidoko.

Ngo phedopo painga no karu inotwara masoja yainga yakazala ngo vandhu vaithya. Yesu takakwiravo panyezulu po karu asi painga pasina masimbi okuti tibate. Dhiraivha wakagogomesa maningi, zvokuti takada kutowa. Takadanijira kuti ayeme asi Iyena ngo kuthya aato kuda kuzvizwa. Takazokwanisa kubatirira, asi takaguma taremba maningi no mujira jedu jaitetemera ngo kubatirira kotaiita ngo simba.

Pauro: Takazala bukuta no macira akamweka-mweka, takaningirana ngo cedu toti, zvaitikisa kudini kuti tidai takapona. Takavata pambhene pa mutivi po ndeki yainga yakaboorwa-boorwa ngo pfuti, yataida kuenda nayo mangwana wakona ku Sierra Leowa. Takabonga ngokuti takapona asi takaneseka maningi ngo hama no hanzvaji jedu jo ciKristu.

Anne: Potakaguma ku Bheteri lo thaundi lo Freetown, Sierra Leowa, takajizwa takangwaririka uye no kubatwa zvakanaka. Asi panguva yakazotevera mumusoro mangu ndaitolangarira zviro zvondakawonaya zvakashata zvesiitika. Kakayeja ndeithya, no kukorera kulangarira zvakanaka zvaiita inga kuti zvese azvisainga zviri zvo cokwadi. Ndaikaruka cousuku, ndomuka ndeizwa mbhepo uye ndeitetemera ndailangarira kuti pano zvakashata zvaizoitika. Ndaineseka no kufema. Pauro wakandikumbatira oita mukumbiro na yeni. Yesu takaemba ngoma jo umambo mbhera kutetemera kangu kapera. Ndakalangarira kuti ndainga ndoopenga zvokuti andisaikonazve kushanda inga misionario.

Andizombofi ndakakanganwa zvakaitika. Mu vhiki lonaro takaashira ma revhista maviri. Imwe yainga Mukai! wa 8 ya Junho wo 1996. Iwona wainga no musoro unoti “Tingaitenyi Kuti Tirwisane no Ndhendha yo Kuthya.” Kutangira ponapo ndakatanga kuzwisisa zvainga zvesiitika kandiri. Revhista yo cipiri wainga Mungwaji wa 15 ya Maio wo 1996, uno musoro unoti “Mungariwanisa Kudini Simba Heri?” Mungwaji uwu wainga no foto yo berepeswa lakakhuvazwa. Musoro wo mungwaji uwu wakasanangura kuti berepeswa, rinokwanisa kuenderera mberi resirhya resimburuka kunyange kuti mapapiro aro akakhuvazika, yesu tingaramba tesiashira mweya mupsene wa Jehovha kudai tikalamba tesibesa vamweni kunyange patinonga tesineseka mumulangariro. Musoro iji jakandipa simba uye jakava zvokurhya zvakavha kuna Jehovha zvaiviya pa nguva kwayo. (Mateu 24:45) Ciro cimweni cakandibesa, kupsakisisa zvimusoro zvakadai inga izvi no kulamba ndinazvo nguva yese. Ngo kuhamba ko nguva, mazwiro angu okuneseka akatanga kupunguka.

Pauro: Zviro pozvakatanga kutitendera kuti tihwirire ku Libheria, takadakala maningi. Mukupera ko gore la 2004 takakwanisa 20 o makore tiri mu basa rotakagajwa. Hondo yainga yapera. Painga paano ulongwa wo kuvaka Bheteri rimweni. Ngocivhumbu takakokwa kuti tiende kooshanda pa basa rimweni ibza.

 Uwu vakava muejo wakakula maningi. Tainga takabatana maningi no mbhuri yedu yokunamata, hino taizoitisa kudini kuti tirwisane no cineso ici? Ngokudalo takalangarira kuti patakaenda ku Giliadhe, isusu takadika kusiya hama jedu asi takaashira makomborero akakula maningi a Jehovha, ngokudalo takatendera mukoka uwu. Basa ibza rotakagajwa kuti tooshanda, rainga riri phedo no nyika yo Gana.

Anne: Ndakacema maningi potakasiya Libheria. Takashamisika maningi hama Frank, avo vainga hama yocisharuka uye vanouzivi, po vakati: “Tikanganwenyi henyu!” Ivona vakasanangura kuti: “Icokwadi kuti imwiwmi amuzombofi makatikanganwa, asi imwimwi munodikana kuzvipira ngo mweyo wese pa basa lomagajwa iri. Basa iri lomagajwari ngola Jehovha ngokudaro langariranyi ngozvo hama jenyu jiri konayo.” Izvi zvakativangisa kuti tirwisane no cineso co kutanga ngo papsa kuumba ushamwari no vandhu vatainga tisikazivi uye zvese zvainga zvipsa.

Pauro: Asi, azvito kutora nguva yakareba kuti hama jo ku Gana jive mbhuri yedu ipsa yo kunamata. Kainga kuno zvapupu zvaJehovha zvakawanda! Takajijira zvakawanda ku hama jiya jainga jakaivha uye jakavanga muno zvokunamata. Pasure po makore 13, tesishanda munyika yo Gana takaashira zviro zvotainga tisikasotereri. Takakokwa kooshanda pa Bheteri rokumavirira ko Africa ku Khenya. Kunyange kuti tainga tino cisuwo no hama jo nyika yotakamboshandira kare, ngo kukasika takazvizwa takabatana no hama iji jakagondeka jo ku Khenya. Uye tisiri kuzwa tesikosha ngo kubesa vamweni ndima huru jinoda besero lakakula.

Anne: Mumakore ese aya, ndainga ndesisangana no mugariro jinonesa maningi kucungirira uye ndaigara ndesithya. Yesu atijivirirwi ngo njira inoshamisa. Inini pandinozwa kurijwa ko pfuti mundani mangu munowaja uye muhoko jangu jinopera simba. Asi inini ndakajija kuthemba Jehovha ngo besero laakatipa kubatanijawo no hama jedu. Asi yeni ndakakwanisa kuzviwonera ndega kuti kudai tikalamba takawomerera pakunamata Jehovha, iyena unokwanisa kutibesa kuti tilambe tiri mubasa latakagajwa.

Pauro: Imwimwi, munodakarira basa lomakagajwa here? Nyika ingava yakanaka asi isito kugajana uye ino ngozi. Ngo kudalo, cicinyi candingada maningi kupinda nyika? Jihama jakasiana-siana imbhuri yedu. Kunyange kuti tinovha mu ndau jakasiana-siana no tsika jakasiana-siana asi tinolangarira zvakafanana. Tailangarira kuti, takatumwa kuti toovangisa no koobesa hama no hanzvaji jedu asi kubhuya cokwadi zvakaitikari zvakasiyana no zvotailangarira.

Pese patinocinjwa mabasa edu, tinowona zvishamiso zvakasiana-siana ku hama jedu. Asi kudai tikalamba tiri mu divi lo ungano ya Jehovha tinozova mbhuri imwe yakabatana. Tino cokwadi cokuti kudai tikalamba tesithemba simba la Jehovha, iyena unozotipa simba latinoda.—VaFiripi 4:13.