MUSOLO WO KUJIJA 45
NGOMA 138 Kuseja ko Vano Invhi
Jjianyi magama okueneka kuva kuvanarume vakagodeka Men
“Asipi uzivi unovha kuvasharuka here, kuzwisisa akuwaniki ngo vasharuka here?”—Jobho 12:12.
ZVATISAJIJA
Mucijijo cino, tinozojija kuti patinozwira Jehovha Mwari zvinoita kuti tiwane makomborero zvino uye upenyu usingaperi.
1. Tinojijenyi kuvha kuvasharuka?
TESE hedu tinoda ndhungamiriro mukuita zvikhetwa zvinokosha muupenyu. Tingawana ndhungamiriro jakawanda kuvha ku vakuru vo ungano uye hama jo ciKristu jakakura muno zvokunamata. Kudai ivona vari vasharuka katiri atidikani kulamba zano ravo teiti raarokare. Jehovha unoda kuti tijije kuvha kuvasharuka vedu. Ivona vaano nguva yakareba kudarika yatinayo isusu tesiwana ruzivo, kuzwisisa uye ungwaru.—Jobho 12:12.
2. Tinozojijenyi mucijijo cino?
2 Munguva jo Bhaibheri, Jehovha wakashandisa vakuru vakathembeka kuti akurujire vandhu vake uye no kuvatungamirira. Ambolangariranyi ngo muezaniso wa Mosi, Dhavhidhi uye mupostori Johane. Ivona vairarama, munguva jakasiyana-siyana uye maemere avo ozviro ainga akasiyana maningi. Povainga vaaphedo no kuguma koupenyu wavo, vakapa zano lokungwaja majaha. Umwe nga umwe wo vanarume ava vakathembeka, vakavangisa kukosha kokuti majaha azwire Mwari. Jehovha wakatingwaririra masoko ake ouzivi mbhera zvino. Tingava tiri majaha kana vasharuka tingabeswa ngokujija mazano ake. (VaR. 15:4; 2 Tim. 3:16) Mucijijo cino, tinozowona masoko okuenekana ko vakuru vatatu ava, uye zvatingajija kuvha pano zvovakabhuya.
“YEMWI MUNGAZVIKONA KO NGUVA YAKAREBA”
3. Ibasa ripi rakaizwa ndi Mosi?
3 Mosi waiga akazvipira kamare kuna Jehovha. Wakashanda inga muprofeti, mutongi, mutungamiriri uye mutungamiriri wo masoko. Mosi wainga ano ruzivo wakawanda muupenyu! Wakatungamirira jinja lo vaIziraeri kubuda muuranda mu Ijipita, uye iyena kamare wakapupurira zvishamaiso zvakawanda zva Jehovha. Jehovha wakamushandisa kunyora mabhuku mashanu okutanga oBhaibheri, Mapisarema 90 uye 91. Uye wakazonyorawo bhuku la Jobho.
4. Mosi wakapa ani mazano, uye ngenyi?
4 Nguva doko asati afa, paainga aano makore 120, Mosi wakadanija vaIziraeri vese kuti avalangarije zviro zvavainga vaona, uye no zvovakasangana nazvo paudoko wavo. Vamweni vo vayaeyi vake vakawona no kuzwa zvakaizwa ndi Jehovha, pamwepo no rutongeso wake kuva Ijipita. (Eks. 7:3, 4) Vainga vahamba mukumwa yakaparajana mu jombe lo kupsuka, iyena wakawona masoca aFarao esipalajwa. (Eks. 14:29-31) Muzvipare wakawona ngwariro ya Jehovha no soterero. (Dhe. 8:3, 4) Ponapo jinja lo Iziraeri rainga ranasiririka kuti ripinde munyika yocipikirwa, Mosi wakashandisa mukana uwu wokupejisira kuti avangise vandhu. a
5. Masoko okupejisira Amosi anowanika pana Dheuteronomi 30:19, 20 akapa cigondiso cipi kuva Iziraeri?
5 Mosi wakabhuyenyi? (Verenganyi Dheuteronomi 30:19, 20.) Jinja lo Iziraeri rainga rino soterero yo nguva yo mberi inoshamaisa. VaIziraeri vaizorarama ko nguva yakareba munyika yovainga vakathembeswa ndi Jehovha. Yainga iri nyika yakanaka uye inoivha! Mosi wakavavhunja kuti: “Mathaundi makuru akanaka uye asito kuvakwa, nyumba jakazara ngo zviro zvakanaka zvausito kushandira, mwimbo jausito kuca, munda jomuuvha, uye mumbuti jo muorivhi jausito kusima.”—Dhe. 6:10, 11.
6. Ngenyi Jehovha wakasiya kuti vomajinja amweni vanyise vaIziraeri?
6 Mosi wakangwajawo vaIziraeri. Kudai ivona vaida kuramba vesirarama munyika iyi yainga yakanaka, uye inoivha yo vakapuwa vaidika kuenderera mberi vesizwira Jehovha. Mosi wakavalangarija kukosha “kokukheta upenyu” no kuyaeya Jehovha uye no “kunamata iyena basi.” VaIziraeri avato kuda kuzwira Jehovha. Ngo ndava yazvo, mukuhamba ko nguva Jehovha wakasiya kuti vaAsiriya no Vabhabhironi vapambe nyika iya uye vatore vaIziraeri inga vasungwa. Ngenyi Jehovha wakasiya kuti nyika jimweni jinyise vaIziraeri?.—2Mad 17:6-8, 13, 14; 2 Mak. 36:15-17, 20.
7. Tinojijienyi ngo masoko a Mosi? (Wonanyi foto.)
7 Tinojijenyiwo? Kuzwira kunoita kuti tiwane upenyu. Mukufanana no vaIziraeri vainga vari mugwanja kuenda kunyika yakagondeswa, zvino taaphedo kupinda munyika yaMwari yakagondeswa ngokukasika nyika inozova Paradhiso. (Isa. 35:1; Ru 23:43) Sathana no madhimoni ake vanozoparajwa. (Re 20:2, 3) Akuzovizve no maceci okunyepa anozocengeja vandhu vaJehovha. (Re 17:16) Hurumende jo vandhu ajizodzvinyiriri vandhu. (Re 19:19, 20) Jehovha aazotenderizve ari wese kuti aviise zvineso. (Pis. 37:10, 11) Vandhu vese vanozozwira mutemo ja Jehovha jakarurama ijo jinotiita kuti tibatane, uye tova no runyararo. Ngokudalo tese tinozothembana uye tinozodanana kuna umwe no umweni. (Isa. 11:9) Isoterero inoshamaisa zvakadini! Kudai tikathemba Jehovha tinozorarama mu Paradhiso pasi pano, haiwa ko nguva doko asi no kusingaperi!—Pis. 37:29; Joh 3:16.
Kudai taizozwira Jehovha, tinozorarama mu Paradhiso pasi pano haiwa komakore mashoma basi asi nokusingaperi (Wonanyi ndima 7)
8. Cingondiso co upenyu usingaperi cakabesesa kudini mumisiyonario umweni? (Judha 20, 21)
8 Kudai zvigondiso zvatakapuwa ndi Jehovha zvakavanga mumulangariro medu, tinozozwira Jehovha pasinenyi no matambujiko angamuka muupenyu wedu. (Verenganyi Judha 20, 21.) Cigondiso ici cinotipa simba ratinoda kuti ticungirire pamatambujiko atingasangana nawo angatirembesa. Hama imweni iri misiyonario ku Afrika, ko makore akawanda yakabhuya kunasirisa koyaidika kuita kurembejeka ko nyama, iyona yakati: “Pondakaziva kuti ndainga ndaapangozi yo kuzotama kupinda mu Paradhiso ngokuregera kuzwira Jehovha, inini ndakakheta kuti ndishande ngo simba kuti ndinyise kurembejeka kangu, uye ndakakumbira Jehovha kuti andibese. Ngo besero lake, ndakakwanisa kunyisa kurembejeka uku.”
“YEMWI MUNGABUDIRIRA”
9. Dhavhidhi wakasongana no matambujiko api muupenyu?
9 Dhavhidhi wainga ari mambo wakagondeka kuna Jehovha. Iyena wainga muembi, mudetembi, murwi wo hondo uye muprofita. Iyena wakasangana no muejo jakawanda. Inga muezaniso, ngo ndava yo godo la mambo Sauro, iyena wakararamira mundau jo kutizira. Paainga ava mambo Dhavhidhi wakambotizazve kuti aponese upenyu wake, ngokuti mwanake Absaromu wakaeja kutora umambo wake. Kunyange akasangana no matambujiko no kurembejeka, Dhavhidhi wakaramba akagondeka kuna Jehovha koupenyu wake wese. Jehovha wakabhuyawo ngo zvake kuti “mwanarume anodakaja mweyo wangu.” Ngokudalo zvakanaka maningi kuti tiyaeye zano roungwaru ratakapuwa ndi Dhavhidhi!—Mab. 13:22; 1Mad 15:5.
10. Ngenyi Dhavhidhi wakapa mazano mwana wake Soromoni asati aamambo?
10 Langariranyi ngozvo muezaniso uwu: Zano ra Dhavhidhi raakapa mwanake Soromoni, waizogajwa kuva mambo wo Iziraeri. Jehovha wakakheta mujaha uwu Soromoni, kuti azovaka themberi kuti vandhu vanamatiremo. (1 Mak. 22:5) Soromoni wainga no basa lakakura maningi pamberi pake, uye waida kubeswa ndi Jehovha kuti atungamirire vandhu. Dhavhidhi wakabhuyenyi kaari? Ngatiwone.
11. Maererano na 1Mad 2:2, 3, Dhavhidhi wakapa zano ripi Soromoni, uye zviro zvipi zvakanaka zvakaitika Soromoni paaizwira Jehovha? (Wonanyi foto.)
11 Dhavhidhi wakati kudini? (Verenganyi 1 Madzimambo 2:2, 3.) Dhavhidhi wakati kumwanake: Ukazwira Jehovha unozokomborerwa nguva jese. Ngokudalo ko makore akawanda wakapa Soromoni zviro zvakawanda zvakanaka. (1 Mak. 29:23-25) Uye wakamubesa ngo maitire akasiyana-siyana, Soromoni wakavaka themberi yakanaka maningi, uye mu Bhaibheri makanyorwa masoko ake mumavhesi akasiyana-siyana. Kuganya kake uye uzivi wake zvakaita kuti aite nduma. (1Mad 4:34) Wonanyi zvakasanangurwa ndi Dhavhidhi, Soromoni waizobudirira muupenyu kudai akazwira Jehovha. Zvakazoshata Soromoni paainga akura ngokuti wakazonamata zvimwari zvimweni. Ngo ndava yazvo Jehovha wakaregera kukomborera Soromoni, uye iyena aato kuzokwanisa kutungamirira vandhu ngokururama no uzivi.—1Mad 11:9, 10; 12:4.
Masoko okupejisira a Dhavhidhi aakavhunja mwanake Soromoni, anotibesa kuti tizwisise kuti tikazwira Jehovha, iyena unozotipa uzivi watinoda kuti tiite zvikhetwa zvakanaka (Wonanyi ndima 11-12) b
12. Tajijenyi kuvha kuma zano a Dhavhidhi?
12 Zvicinyi zvatinojijawo? Kuzwira kunoviisa makomborero. (Pis. 1:1-3) Zvakajeka kuti mazuva ano, Jehovha aatigondesi kuti tinozoganya uye kuita inga zvakaita Soromoni. Asi kudai tikazwira Mwari wedu, iyena unozoramba esitipa uzivi watinoda kuti tiite zvikhetwa zvakanaka. (Zvi. 2:6, 7; Jos. 1:5) Mazano a Jehovha angatibesa kukheta zvakanaka, zvakadai inga basa, jijo, mare uye zvinotivalaija. Tikashandisa uzivi wa Jehovha muupenyu wedu, unozotingwarira mumatambujiko. (Zvi. 2:10, 11) Mukuengejera, tinowana shamwari jakagondeka uye tinozoziva kuti tingaitenyi kuti tive no mbhuri yakadakala.
13. Zvicinyi zvakabesa Karmeni kuti aite cikhetwa cakanaka?
13 Karmeni, uwo wakagara Mosambiki wailangarira kuti, kuita jijo yo pamusoro zvaizoita kuti upenyu wake uve wakareruka. Iyena wakanyoresa pa univhersidhadhe kurso yozvokuvaka. “Karmeni wakati: Inini ndaidisisa zvandaijijalo”. “Asi ndainga ndisina simba no nguva yokuita zviro zvimweni. Ndaitanga kuma 7:30 mbhera 18:00 hora. Zvaindinesa kuenda kumusangano uye ushamwari wangu na Jehovha wakatanga kuremba. Mumweyo mangu ndakazolangarira kuti ndainga ndooshandira vana Ishe vaviri.” (Mat. 6:24) Iyena wakaita mukumbiro kuna Jehovha, esimuvhunja zvainga zvesiitika, uye wakapsakisisa mumabhuku edu. Karmeni wakati: “Pandakapuwa mazano ngo vakuru uye naamangu, inini ndakakheta kusiya univhersidhadhe ndoshandira Jehovha ndiri mubasa lo nguva yakazala. Yeni anditambujiki ngozvo ndakakheta muupenyu wangu, inini ndiri kudakala maningi.”
14. Mafundo api makuru atakasiirwa ndi Mosi na Dhavhidhi?
14 Mosi na Dhavhidhi vaida maningi Jehovha, vaiziva kukosha kokuzwira. Mumasoko avo okupejisira, ivona vakavangisa vamweni kuti vatevejere muezaniso wavo. Mosi na Dhavhidhi vakajekesa kuti vaya vanosiya Jehovha avazowani makomborero no mubairo. Mazano ovakapa anokoshawo maningi katiri mazuva ano. Mazana omakore akazotevera, umweni munamati wakagondeka wa Jehovha wakabhuyawo kukosha kokulamba takagondeka kuna Mwari wedu, ngatimbozviwona padoko.
“ANDINA MUDAKALO MUKURU KUPINDA UWU”
15. Zvicinyi zvakawoniwa ndi mupostori Johani muupenyu wake?
15 Johani wainga mujiji waJesu waaida maningi. (Mat. 10:2; Joh 19:26) Iyena wakahamba na Jesu muushumiri wake wese wo panyika, wakawona mushamaiso, uye wakagara naye munguva yokutambujika kake. Wakawona kuuraiwa ka Jesu uye wakamuwonazve paainga amuswa. Uye Johani wakawonawo kuengejeka ko Vakristu mukuhamba ko nguva, iyena wakapona ko nguva yakareba kuti awone kuparijirwa kaizoizwa masoko akanaka, “kuzvisikwa zvese zviri pasi podenga.”—VaK. 1:23.
16. Ngovanaani vanovangiswa ngo tsamba ja Johani?
16 Johani paainga aamusharuka wakawana makomborero okunyora bhuku la Zvakazarurwa rinodakaja. Rinojekesa ngo “zva Jesu Kristu.” (Re 1:1) Johani wakanyorazve bhuku lo vhangeri rinodanijwa ngo zina lake. Uye no tsamba ndhatu jakafemerwa. Tsamba yake yo citatu wakanyorerawo muKristu umweni wainga akagondeka waizwi Gayo, uwo waiida maningi inga mwanake. (3 Joh. 1) Zvinokhombija kuti, Johani wainga aano vana vakawanda vokunamata vaaida maningi. Izvo zvakanyorwa ngo mwanarume uwu wakagondeka, zvakavangisa vateveri vese va Jesu uye nyamasi uno zvisiri kushanda.
17. Maererano na 3 Johani 4, zvicinyi zvinotipa mudakalo?
17 Zvicinyi zvakanyorwa ndi Johani? (Verenganyi 3 Johani 4.) Johani wakanyora kuti kuzwira Jehovha kunoviisa mudakalo mukuru. Munguva yaakanyora tsamba yake yo citatu, vandhu vamweni vainga vesindhandhanisa masoko okunyepa, akazoviisa zvineso muungano. Zvinodakaja ngo zvokuti, vamweni vakaramba “vesihamba mucokwadi.” Ivona vakalamba vesizwira Jehovha uye vakalamba “vesihamba mumutemo yake.” (2 Joh. 4, 6) Vanarume ava vakagondeka vakaita zvinodakajisa maningi, haiwa basi mweyo wa Johani asi vakadakajisawo Jehovha.—Zvi. 27:11.
18. Ngazvipi zvatinojija kuvha kuma soko a Johani?
18 Tinojijenyiwo? Kugondeka kunoviisa mudakalo. (1 Joh. 5:3) Inga muezaniso, isusu tinodakala maningi patinoziva kuti tadakajisa mweyo wa Jehovha. Jehovha unodakala maningi paanotiwona tesinyisa muejo jinoviiswa ngo nyika ino tozwira mutemo yake. (Zvi. 23:15) Patinoita izvi ngirosi jiri kudenga jinodakarawo maningi. (Ru 15:10) Isusu tinodakalawo patinowona hama jedu, jesilamba jakagondeka kuna Jehovha paya pajinosangana no kutevererwa, uye no muejo. (2 VaT. 1:4) Nyika ya sathana painonga yapalajwa yesu tinozova no mudakalo wokuziva kuti takona kulamba takagondeka kuna Jehovha mbhera kumugumo.
19. Hanzvaji imweni inozwi Rachel yakati kudini ngozvo kujijisa vandhu vamweni cokwadi? (Wonanyi foto.)
19 Cimweni cinotipa mudakalo ngo cokubhuya no vamweni ngo zva Jehovha. Rachel, uwo anogara ku República Dhominikani, wakati: Rukujo rakakura maningi rokubhuya ngo zva Mwari wedu unoshamaisa maningi kuvandhu vamweni. Esilangarira ngozvo vandhu vese vaakabesa kujija ngo zva Jehovha iyena wakati: “Zvinonesa maningi kunyora mudakalo wandinawo ngo kuwona vaya vandakabesa kujija ngozva Jehovha, vesiita cinjo muupenyu wavo uye volamba vakagondeka kaari. Mudakalo uwu unoita kuti ndisalangarira zvineso zvandaisangana nazvo pandaizvipira kuvajijisa cokwadi.”
Tinowana mudakaro ngokujijisa vamweni kuti vade uye vazwire Jehovha (Wonanyi ndima 19)
JIJA KUVHA KUMASOKO OKUPEJISIRA OVANAMATI VA JEHOVHA VAKAGONDEKA
20. Ngapapi patakaezana na Mosi, Dhavhidhi uye Johani?
20 Mosi, Dhavhidhi uye Johani vakararama nguva jakasiyana maningi no yatiri kurarama isusu mazuva ano. Kunyange zvakadalo tino zvakawanda zvakatojana. Ivona vainamata Mwari wo cokwadi Jehovha uye nesuwo ndiyena watinonamatawo, mukutojanawo na ivona tinoitawo mukumbiro kuna Jehovha tinogonda iyena uye tinorarama tesipsaka kutungamirirwa ndiyena. Uyezve mukutojanawo no vanarume ava vakagondeka, tino cokwadi cokuti Jehovha unokomborera maningi vese vano muzwira.
21. Makomborero api angaemerwa nga vaya vano tevejera mazano a Mosi, Dhavhidhi uye Johani?
21 Cokwadi, na isusu tinoda kushandisa maningi mazano aya ovanarume ava vaavasharuka ngo kuzwira Jehovha. Ngo gwanja iri, na isusuwo tinozokomborerwa maningi ndi Mwari wedu. Uyezve tinomukana wo kurarama ko “nguva yakareba,” cokwadi mbhera narini! (Dhe. 30:20) Tisikabhuyi kuti tino mudakalo mukuru wokudakajisa Baba wedu vano rudo, zvinozotipa makomborero atisingambolangariri.—VaE. 3:20.
NGOMA 129 Tocungirira
a Vandhu vakawanda vo vaIziraeri vakaona mushamaiso jakaizwa ndi Jehovha pa jombe lo kupsuka, avato kuzorarama mbhera kuzowona nyika yakagondeswa. (Nu 14:22, 23) Jehovha wakabhuya kuti vandhu vese vano makore anodarika 20 vanozofira muzvipare. (Nu 14:29) Asi, Joshua na Kharebhi no vamweni vakawanda vainga vari majaha kubatanijawo no jinja lo Varevhi vakararama vozoambuka mukova wo Jodhani uye vakangena munyika yakagondeswa yo Khenani.—Dhe. 1:24-40.
b KUTSANANGUHWA KO MUFOTO WO: Kumuhoko boshwe: Dhavhdhi ari kueneka mwana wake Soromoni, ngo masoko ouzivi. Kumuhoko murhwo: Hama no hanzvaji jiri kubesereka ngocikora comaphiyona. Hanzvaji imweni iri kumusa muhoko kuti idavire.
