MUSOLO WO KUJIJA 47
NGOMA 103 Vahavisi Vedu—I Zvipo Zviri Vanarume
Yemwi—Muri Kuvangisira Kuti Muve Mukuru wo Ungano Here??
“Kudai pano mwanarume ari kuvangisira kuti ave mutungamiriri ari kuda basa rakanaka.”—1Ti 3:1.
ZVATISAJIJA
Mucijijo cino tiri kuda kuwona zviro zvinobhuiwa ngo Bhaibheri, zvingaizwa ngo hama kuti ive mukuru wo ungano.
1-2. Zvicinyi zvinobatanijwa pa “basa rakanaka” rinoizwa ngo vakuru vo ungano?
KUDAI iyemwi muri kushanda inga mubeseri wo ungano ko nguva yakareba, yemwi maamungwanja lakanaka lokuti muve mukuru wo ungano. Yemwi maidakarira kuita “basa lakanaka” rinoizwa ngo vakuru vo ungano here?—1 Tim. 3:1.
2 Zvicinyi zvinobatanijwa pa basa rinoizwa ngo vakuru vo ungano? Ivona vanotungamirira basa lo kuparijira uye vanovangisa ungano ngo pamusoro po zvovanobhuya uye zvavanoita. Ndizvona zvinoita kuti Bhaibheri ridanije vakuru vanoshanda ngo simba kuti “zvipo zvo vanarume.”—VaE. 4:8.
3. Zvicinyi zvinodikana kuizwa ngo hama kuti ive mukuru wo ungano? (1 Timoti 3:1-7; Tito 1:5-9)
3 Zvicinyi zvamunodikana kuita kuti muve mukuru wo ungano? Zvinodiwa kuti muve mukuru wo ungano, zvakasiyana no zvinodiwa kuti muwane basa. Kazinji kudai yemwi mesinasa kukona kuita basa, zvokuti patarau ari kupsaka mundhu wakadalo, yemwi mungatowana basa. Ngo divi rimweni kudai yemwi munoda kuva mukuru wo ungano, amudikani basi kuziva kuparijira no kujijisa. Yemwi munodika kukwanisa zvinodika kuti muve mukuru zvinowanika mu Bhaibheri pana 1 Timoti 3:1-7 uye Tito 1:5-9. (Verenganyi.) Mucijijo cino tiri kuda kuwona ngo pamusoro po zviro zvitatu zvinokosha zvinodika kuti muve mukuru: (1) kuva no undhu wakanaka kungava kuungano kana kunja; (2) kuva muezaniso wakanaka kumbhuri yenyu, uye (3) kuva makanasirira kuti mubese ungano.
KUVA NO UNDHU WAKANAKA
4. Zvinoda kubhuyenyi kuva mundhu “asina caanopumbhwa”?
4 Kuti muve mukuru wo ungano, yemwi munodikana “kuva mundhu asina ndava,” izvi zvinobhuya kuti muno undhu wakanaka muungano, ngokuti apana ari wese anomupumbha kuti maita ciri cese cakashata. Cimwenizve, yemwi “munodika kupupurirwa” zviro zvakanaka ngo vandhu vo kunja. Vandhu vamweni vangatomusotera pasi ngokuti iyemwi muri muKristu, asi vesiva no cokwadi cokuti muri mundhu akagondeka uye akanaka. (Dha 6:4, 5) Mungazvivhunjisa kuti: ‘Yeni ndiri mundhu akanaka muungano kana kunja here?’
5. Zvicinyi zvamungaita kuti “mudakarire zvakanaka”?
5 Imwimwi “munodawo zviro zvakanaka,” kana kuti munopsakawo zviro zvakanaka kuvandhu vamweni. Uye munodawo kubonga hama no hanzvaji ngo undhu wakanaka wavanawo. Imwimwi munodika kudakala ngo kuitira vamweni zviro zvakanaka kunyange kuita zvamainga musikasotereri. (1 VaT. 2:8;) Ngenyi undhu uwu unokosha maningi kuvakuru vo ungano? Ngokuti ivona vanopeja nguva yavo yakawanda kuti vawonerere ungano uye nokungwarira mabasa ovakagajwa. (1 Pet. 5:1-3) Ivona vanowana mudakalo wakakura maningi wokushandira vamweni, kupinda cipo ciri cese cavangawana.—Mab 20:35.
6. Injira ipi yamungaashira ndiyona “vapfumba zvakanaka”? (VaHebheru 13:2, 16; Wonanyi mufoto.)
6 Munokhombija kuti “munoashira vapfumba” zvakanaka ngo kuvaitira zviro zvakanaka, kubatanijawo vaya vasiripi shamwari jenyu jo phedo. (1 Pet. 4:9) Bhuku rimweni lakabhuya ngo zvo mwanarume umweni unoashira zvakanaka vapfumba resiti: “Musuvo wo nyumba yake no mweyo wake zvinodika kugara zvakavhurika kuitira vandhu vaasikazivi.” Ngokudalo mungazvivhunjisa kuti: ‘Kubhuya kuti inini ndiri mundhu anozivika ngo kuashira zvakanaka vandhu vanovhakacira ungano yangu here?’ (Verenganyi VaHebheru 13:2, 16.) Mwanarume unoashira zvakanaka vapfumba unokhombija kunaka mweyo uye unopawo zvaanazvo kuvavhakaci, izvi zvinobatanija na vaya vokuti avatona no padoko pokuzotipawo, kubatanijawo no vaiti vo hurukuro vanotivhakacira na vaya vanoshanda ngo simba kuti vakurujire hama no hanzvaji vakadai inga vawonereri vo ndharaundha.—Ge 18:2-8; Zvi. 3:27; Ru 14:13, 14; Mab 16:15; VaR. 12:13.
Varovorani vari kuashira muwonereri wo ndharaundha no mukaji wake (Wonanyi ndima 6)
7. Mukuru ungakhombijisa kudini “kuti aadisisi mare”?
7 “Musada maningi mare.” Izvi zvinobhuya kuti amudikani kubatikana maningi ngo zviro zvokunyama. Azvinenyi kuti muri muganyi kana mulombo, yemwi mungakanda Umambo wa Mwari pakutanga pari pese muupenyu wenyu. (Mt 6:33) Imwimwi munoshandisa nguva yenyu no simba renyu zvese zvamunazvo uye kuti munamate Jehovha mungwarire mbhuri yenyu no kushandira ungano. (Mt 6:24; 1 Joh. 2:15-17) Ngokudalo zvivhunjisenyi kuti: ‘Ndinowonesa kudini mare? Kubhuya kuti ndinogutsikana ngo zviro zvandinazvo here? Kana ndiri kuneseka kuti ndiwane mare yakawanda no zviro zvawanda zvokunyama?’—1 Tim. 6:6, 17-19.
8. Maitiro api amungakhombija ndiwona kuti makaezanana “muzviito no kuzvibata”?
8 Kudai “munotsika jakanaka no kuzvibata”, izvi zvinobhuya kuti imwimwi makaezanana pa zvese muupenyu wenyu. Kana kuti munokona kukanda mugano pa zviro zvakadai inga izvi: Kuha, kumwa kuzvinasirira-nasirira no kusimira uye no pamutambo. Imwimwi amudikani kuteveja upenyu wo vandhu vasikanamati Jehovha. (Ruka 21:34; Jak. 4:4) Yemwi mungakwanisa kuenderera mberi makanyarara kunyange vandhu vamweni vakamuambira kana kumubata zvisina kunaka. Imwimwi “amudikani kuita cidhakwa” uye amudikani kuzivika ngo kumwa maningi dolo. Mungazvivhunjisa kuti: ‘Mararamire andinoita anokhombija kuti ndakaezanana pa zviito no kuzvibata here?’
9. Zvicinyi zvinobatanijwa pakuva “anozwisisa” uye “akarongeka”?
9 Kuti muve “anozwisisa”, imwmwi munodikana kubhuisana ngo shwiro imwe nga imwe mesishandisa Bhaibheri. Imwimwi munganasa kulangarira murairo yo muBhaibheri kuti mungaishandisisa kudini pamugariro umwe nga umwe. Uye munodikana kunasa kuzwisisa monasa kuita zvikhetwa zvakanaka. Iyemwi amuzoiti ciri cese musati manasa kupsakisisa ngo pamusoro po shwiroyo. (Zvi. 18:13) Mukaita izvi imwimwi munozova mundhu akadzikama uye anoita zvikhetwa esiteveja zvinoda Jehovha. Kuti muve “akarongeka,” munodikana kuva mundhu akanasirira kubata nguva. Imwimwi munozozivika inga mundhu akathembeka uye anozwira ndhungamiriro. Kuva no hundhu uwu zvinozomubesa kuti muve no zina lakanaka. Zvino ngatiwone kuti mungakwanisisa kudini zvinobhuiwa ngo Bhaibheri uye no kupa muezaniso wakanaka inga musolo wo mbhuri.
KUPA MUEZANISO WAKANAKA INGA MUSOLO WO MBHURI
10. Mwanarume “ungatungamirisa kudini mbhuri yake zvakanaka”?
10 Kudai makarovora apa mesida kushanda inga mukuru wo ungano, mbhuri yenyu inodikana kuzivikanwa ngo kuita zviro zvakanaka. Ngokudalo munodikana kutungamirira “zvakanaka mbhuri” yenyu uye munodikana kuzivika inga musolo wo mbhuri ano rudo uye anomutoro wakakula. Izvi zvinobatanijawo kutungamirira mbhuri yenyu kumativi ese ozvokunakamata. Ngenyi izvi zvesikosha maningi? Mupostori Pauro wakazvilangarira ngo gwanja iri paakati: “Kudai mwanarume asikakoni kutungamirira mbhuri yake, ungazotungamiririsa kudini ungano ya Mwari?”—1 Tim. 3:5.
11-12. Ngenyi kuzivika ngo kuita zviro zvakanaka ko vana, kunokosha maningi kuhama inoda kushanda inga mukuru muungano? (Wonanyi mufoto.)
11 Kudai muri mubereki munodikana kuva no “vana vanoreremeja zviro zvinokosha.” Imwimwi munodikana kuvajijisa ngo rudo. Zvakajeka kuti imwimwi munoda kuti vana venyu vadakare uye vadakajwe ngo upenyu inga zvinoita vana vamweni. Asi kujijisa kamunovaita kunozovabesera kuti vave vanoyaeya, vave vano reremeja vamweni uye vave vakapangwa. Kuengejera pamusoro pazvo, imwimwi munodikana kuita zvese zvamunokona kuti mubese vana venyu kuti vavangise ushamwari wavo na Jehovha uye vayaeye murairo wo Bhaibheri mbhera kubhabhatijwa.
12 “Kuva no vana vanotenda soko la Mwari vasina cavanopumbwha cakashata no kutama kuzvibata kana kupandukira.” Kudai mwana wo Capupu ca Jehovha akaita cishaishi cakakula, zvingapsasisa kudini abake? Kudai baba vakatama kujijisa no kupanga maererano no zvaidiwa, pakadalo avasakodzeri kuti vaenderere mberi vesishanda inga mukuru wo ungano.
Aba vokristu vanodikana kujijisa vana vavo kuti vaitire Jehovha zviro zvakana uye ungano (Wonanyi ndima 11)
KUSHANDIRA UNGANO
13. Mungakhombijisa kudini kuti muri mundhu “asingaomesi mulangariro”?
13 Hama jino undhu wakanaka wo Cikristu jinokosha maningi muungano. Mwanarume “anozwisisa” anovangisira kuti pave no runyalaro. Kudai mesida kuzivikanwa inga mundhu anozwisisa, yaeyanyi zvinobhuya vamweni uye ivanyi makasununguka pa mulangariro jakasiyana-siyana. Pamusangano jo vakuru, yemwi mungada here kutsigira zvavanokheta zvesienderana no mutemo uye murairo wo Bhaibheri? Imwimwi “amudikani kuva mundhu akaoma musolo” mesiti zvenyu ngo zvinoshanda. Munodikana kukoshesa maonero ovamweni uye mulangariro jo vamweni. (Ge 13:8, 9; Zvi. 15:22) Amudikani kuva mundhu anoda “zvokupopotejana” kana “kukasika kunyangajwa.” Pano kuva mundhu wakaoma musolo kana kutama kupindirana no vamweni, ivanyi mundhu wakanaka mweyo mesingwarira zvamunovereketa, ngokuva kenyu mundhu anorunyararo munozogara mesipsaka runyararo kunyange pamugariro unonesa. (Jak. 3:17, 18) Mungazviita ngokugara mesivereketa makapfava no vandhu vese kubatanijawo no vasiripi hama jedu uye mungavabesawo kuti vave vakadzikama uye kupungura hasha javo.—Vat. 8:1-3; Zvi. 20:3; 25:15; Mt 5:23, 24.
14. Zvinobhuyenyi “kuva mutendeuki mupsa” uye “kuva akagondeka”?
14 Kuti hama ive mukuru wo ungano aidikani kuva hama “isiri kuvha kubhabhatijwa.” Azvibhui hazvo kuti hama iyi inodikana kuita makore akawandisisa, asi inodikana kupeja nguva inodikana kuti ive muKristu akaivha munozvokunamata. Musati mashanda inga mukuru munodikana kukhombija undhu wakafanana no wainga na Jesu wokuzvidodokesa uye kusengerera pamunonga mesiemera nguva yakakodzera kuti Jehovha amupe mabasa amweni muungano. (Mt 20:23; VaF. 2:5-8) Imwimwi mungakhombija kuti “makagondeka” ngokunamata Jehovha mesiteveja mutemo yake no murairo mesizwira ndhumgamiriro jinoviiswa ngo sangano lake.—1 Tim. 4:15.
15. Kubhuya kuti mundhu ave mukuru unodikana kuva mukurukuri akanakisisa here?
15 Bhaibheri rinobhuya pambhene kuti vakuru vanodikana “kuva vakakodzera kuti vajijise.” Izvi zvinobhuya kuti vakuru vanodikana kuva vandhu vanoita hurukuro zvakanaka here? Haiwa. Avasi vakuru vese vanoita hurukuro zvakanaka. Asi pavanoenda kooparijira uye pavanohambira jihama, ivona vanodikana kushandisa zvakanaka Bhaibheri kuti vavangise hama no hanzvaji. (Wonanyi 1 Tim. 3:2; 1 VaK. 12:28, 29 na VaE 4:11.) Kunyage musikadiki kuva mukurukuri wakasiyana no vamweni asi munodikana kuitisa nane kujijisa kenyu. Mungazviitisa kudini izvi?
16. Mungaitenyi kuti muve mujijisi wakanaka? (Wonanyi mufoto.)
16 “Batisisanyi soko lakagondeka la Mwari.” Kuti muve mujijisi wakanaka, nguva jese shandisanyi Bhaibheri pakujijisa uye pakupa mazano. Ivanyi mujiji wakanaka wo Bhaibheri uye no mabhuku edu akacijikira mu Bhaibheri. (Zvi. 15:28; 16:23;) Pamunonga mesijija, nasanyi kusotesesa kuti muri kunasa kusanangula uye kuti muri kushandisa ndima jo Bhaibheri ngo njira yakanaka. Uye pamunonga mesijijisa itanyi zvese zvamunokona kuti mubaye mweyo ya vaya vanonga vesimuyaeya. Imwimwi mungaitisa nane kujijisa kenyu ngo kukumbira mazano uye kushandisa zvamunovhunjwa ngo vakuru vamweni vaanoruzivo. (1 Tim. 5:17) Vakuru vanodikana kukwanisa “kuvangisa” hama no hanzvaji javo, ivona nguva jimweni vanodikana kutopa mazano uye “kutotsiura”. Pamugariro jimweni ivona vanodikana kuva vakapfava. Kudai mukava no unyasha no rudo uye kushandisa soko la Mwari pakujijisa, imwimwi munozova mujijisi wakanaka ngokuti munonga mesitevejera mujijisi mukuru Jesu.—Mt 11:28-30; 2 Tim. 2:24.
Mubeseri wo ungano unoshandisa mukana wo kujijira apo mukuru ano ruzivo unoshandisa Bhaibheri pakujijisa. Mubeseri wo ungano uri kujijira hurukuro yake pamberi po buko (Wonanyi ndima 16)
ENDERERANYI MBERI MESIITA ZVESE ZVAMUNOKONA
17. (a) Zvicinyi zvingabesa mubeseri wo ungano kuti aenderere mberi esivangisira? (b) Zvicinyi zvinodikana kulangarirwa ngo vakuru pavanonga vesiongorora hama kuti vaigaje? (Wonanyi bhokiso rinoti: “ Musaemera Kuti Vamweni Vave Vakakwana.”)
17 Pasure pokulangarijisisa zviro zvese zvotaperari kubhuya, vabeseri vamweni vo ungano vangalangarira kuti avazvikwanisi kushanda inga vakuru vo ungano ngokuti pano zviro zvakawanda zvinodikana kuti vakwanirise. Asi langariranyi kuti Jehovha kana sangano rake avaemeri kuti hama jive jakakwana pakukhombija mugariro iji. (1 Pet. 2:21) Mweya mupsene wa Jehovha unozomubesa kuti muve no mugariro iji. (VaF. 2:13) Kubhuya kuti panomugariro wamunodikana kuitisa nane here? Itanyi mukumbiro kuna Jehovha ngo pamusolo pazvo. Psakisisanyi ngo pamusolo pazvo uye kumbiranyi mazano kuvakuru kuti vamubese ngo pamusolo pazvo.
18. Zvicinyi zvinodikana kuizwa ngo vabeseri vese vo ungano?
18 Tese hedu kubatanijawo na vaya vaavakuru, tinodikana kulamba tesivangirira kuti tive no mugariro jabhuiwa pacijijo cino. (VaF. 3:16) Yemwi maamubeseri wo ungano here? Musaemera pakuva basi mubeseri wo ungano! Kumbiranyi Jehovha kuti amujijise kuti mulambe mesibesa muungano. (Isa. 64:8) Ngozvo cokwadi kuti Jehovha unozokomborera kuvangisira kamuri kuita kuti muve mukuro wo ungano.
NGOMA 101 Kushanda Pamwe Takabatana
