MUSOLO WO KUJIJA 1
NGOMA 2 Munozwi Jehovha
Ipanyi Jehovha Rukujo
VHESI YEDU YO GORE KUITIRA 2025: “Ipanyi Jehovha kukujwa kakafaneya zina lake.”—Ps. 96:8.
ZVATISAJIJA
Mu cijijo cino, tinozojija kuti tingaitisa kudini kuti tipe rukujo Jehovha waakafaneya.
1. Vakawanda mazuva ano, vanoneseka ngo pamusolo penyi?
NGUVA IMWENI, imwimwi mungawona kuti vandhu vakawanda mazuva ano, vanoneseka ngozvo vanoda basi, kusiripi kuneseka ngo zvinodiwa ngo vamweni. Inga muezaniso, vandhu vakawanda vanovangisira maningi kuti vapeje nguva vari mu interneti kuitira kuzviwonesa pacavo no kuwonesa kubudirira kavari kuita. Ngokudalo, vandhu vashoma basi nyamasi uno ndivona vanopa rukujo Jehovha. Mu cijijo cino, tinozowona kuti zvinobhuyenyi kupa rukujo Jehovha uye tinozowonazve kuti zvicinyi zvingativangisa kuita zvonazvo. Tinozojija kuti tingaitisa kudini kuti tipe rukujo Jehovha waakafaneya uye tinozowona kuti Jehovha unozoitenyi kuti akuje zina lake mberiyo.
ZVINOBHUYENYI KUPA RUKUJO JEHOVHA?
2. Jehovha wakawonesa kudini rukujo wake pa Dundhu lo Sinai? (Wonanyi foto yo.)
2 Icinyi rukujo? Mu Bhaibheri gama lokuti “rukujo” rinobhuya ciri cese cinoitisa kuti mundhu ave anoshamisa. Jehovha wakaita ciro caiwonesa rukujo wake, pasure po kusujunura Vaiziraeri kuvha kuuranda ku Ejipita. Ambolangariranyi Vaiziraeri vakawanda po vakaungana phedo no dundhu lo Sinayi kuti vazwe zvavaida kuvhunjwa ndi Mwari. Gore raisvipa rakafukija dundhu. Ngo civhumbu kakaita mbheni no kulazva, makore akasvipa akafukija dundhu kozika kurira ko mbhayapaya. (Eki. 19:16-18; 24:17; Ps. 68:8) Langariranyi ngo kushamisika kakaita Vaiziraeri, Jehovha paakawonesa simba lake no rukujo.
Pa Dundhu lo Sinai, Jehovha wakawonesa rukujo wake ku Vaiziraeri (Wonanyi ndima 2)
3. Zvinobhuyenyi kupa rukujo Jehovha?
3 Tingati kudini ngo vandhu? Kubhuya kuti tingapa rukujo Jehovha here? Hina. Gwanja rimwe lo kupa rukujo Jehovha, ngo lokubhuya no vamweni ngo pamusolo po simba lake rinoshamisa no mugariro jake jinodakajisa. Cimwenizve, tingapa nderemejo Jehovha ngo kumukuja kuvha ku zviro zvatinoita tesishandisa simba lake. (Isa. 26:12) Dhavhidhi wakapa muezaniso wakanaka ngokuti wakapa rukujo Jehovha. Pa mukumbiro waakaita pamberi po mbungano yo Vaiziraeri, Dhavhidhi wakati kuna Jehovha: ‘Haiwa Jehovha, ukuru wenyu, rukujo, nduma, simba, ruvheneko no utongi zvakafaneya kupuwa imwimwi ngokuti zvese zviri kudenga no mu nyika zvese ngo zvenyu.’ Mambo Dhavhidhi paakapejisa mukumbiro wake, “mbhungano yese yakakuja Mwari.”—1 Mk. 29:11, 20.
4. Jesu wakaitisa kudini kuti ape rukujo Jehovha?
4 Jesu paainga pasi pano, wakakuja Baba wake ngo kuvhunja vandhu kuti Jehovha ndiyena waimupa simba raaita ndirona mushamiso. (Mako 5:18-20) Jesu wakapa rukujo Jehovha ngo mabhuire aaita ngo pamusolo pa Baba wake no mabatire aaita vamweni. Zuva rimweni, Jesu paainga esijijisa musinagoga, painga no mwanakaji wainga no dhimoni ko makore anokwana kuita 18. Dhimoni iri raimuita kuti ahambe akakotama zvokuti aasaikwanisa kuema. Izvi zvinosuruvarisa maningi. Ngo ndava yo usizi, Jesu wakakwederera mwanakaji wiya, ngo kunaka mweyo omuvhunja kuti: “Mwanakaji, ndhendha yako yapera.” Jesu wakamucanjikira nyala, pa nguva yonayo, “mwanakaji uwu wakaema otanga kukuja Mwari.” Iyena wakabonga maningi Jehovha ngokuti wainga aano utano wakanaka. (Ruka 13:10-13) Mwanakaji wiya wainga no zvikonzero zvakanaka zvokuti akuje Jehovha, isusu tinazvowo.
ICINYI CINOTIITA KUTI TIKUJE JEHOVHA?
5. Zvikonzero zvipi zvatinazvo zvinotiita kuti tireremeje Jehovha?
5 Tinokuja Jehovha ngokuti tinomureremeja maningi. Tino zvikonzero zvakawanda zvokuti timureremeje. Jehovha ngo wo masimba ese, cimwenizve uno simba risina magumo. (Ps. 96:4-7) Uzivi wake wakakura unowoneka kuvhira ku zviro zvaakasika. Iyena wakatipa upenyu na zvese zvatinoda kuti tikwanise kurarama. (Zvak. 4:11) Iyena wakathembeka. (Zvak. 15:4) Zvese zvaanoita zvinobudirira, nguva yese anokwanirisa zvaakathembesa. (Jos. 23:14) Atishamisiki ngo zvakabhuya muprofita Jeremiya, ngo pamusolo pa Jehovha, iyena wakati: “Ngokuti pakati po vazivi vese vo majinja no umambo wavo wese, apana mundhu wakaezana na imwimwi.” (Jer. 10:6, 7) Ngokudalo, tino zvikonzero zvakanaka zvokuti tireremeje Baba wedu vo kudenga. Jehovha unoita zvakawanda kupinda kumureremeja katinomuita, iyena uno mugariro jakanaka jinotiita kuti timude maningi.
6. Ngenyi tinoda Jehovha?
6 Tinokuja Jehovha ngokuti tinomuda maningi. Wonanyi mugariro jakawanda ja Jehovha jinotiita kuti timude. Iyena uno usizi no unyasha. (Ps. 103:13; Isa. 49:15) Jehovha unowajiwa ngo matambujiko atiri kusangana nawo. (Zak. 2:8) Iyena unotibesa kuti timuzive no kuva shamwari jake. (Ps. 25:14; Mabasa 17:27) Iyena unozvidodokesa, “unokotama kuti awone denga no nyika, unomusa anozvidodokesa kuvha pa bukuta uye unomusa mundhu asina mubeseri.” (Mapisarema 113:6, 7) Kuitisa kudini ari wese waizolamba kukuja Mwari wedu mukuru?—Pisarema 86:12.
7. Mukana upi unokosha watinawo?
7 Tinokuja Jehovha ngokuti tinoda kuti vamweni vamuzive. Vakawanda avazivi cokwadi ngo pamusolo pa Jehovha. Ngenyi? Ngokuti Sathana wakavhara mulangariro jo vandhu vasikatendi ngo kundha-ndhanisa manyepo akashatisisa ngo pamusolo pake. (2 VaK. 4:4) Sathana wakaita kuti vandhu vathembe kuti Jehovha ndi Mwari anoutsinye, asingazwisisiki, uye anoitisa matambujiko akawanda mu nyika. Asi tinoziva cokwadi ngo pamusolo pa Mwari wedu. Tinomukana wo kujekesa zviro no kumupa rukujo. (Isa. 43:10) Mapisarema 96 inobhuya maningi ngo kupa rukujo Jehovha. Patinonga tesiwona magama akafemerwa, o bhuku iri la Mapisarema langariranyi ngo maitire amungapa rukujo Jehovha waakafaneya.
TINGAITENYI KUTI TIPE JEHOVHA RUKUJO WAAKAFANEYA?
8. I gwanja ripi latingakuja ndirona Jehovha? (Mapisarema 96:1-3)
8 Verenganyi Pisarema 96:1-3. Tinokuja Jehovha ngo zvatinobhuya ngo pamusolo pake. Pamavhesi aya, vandhu va Jehovha vanokokwa kuti ‘vaembere Jehovha,’ ‘vasimbe zina lake,’ ‘vazivise masoko akanaka o ruponeso wake’ no ‘kuzivisa rukujo wake pakati po majinja.’ Zvese izvi, tingazvishandisa kuti tikuje Baba wedu vo kudenga. Vanamati va Jehovha vo mu nguva yo kare, vainga no cidaka-daka co kuvhunja vamweni ngo pamusolo po mugariro ja Jehovha no zviro zvese zvakanaka zvavakaizirwa ndiyena. (Dha. 3:16-18; Mabasa 4:29) Tingaitisa kudini kuti tiitewo zvonazvo?
9-10. Majijenyi kuvha ku muezaniso wa hanzvaji Anjerina? (Wonanyi foto.)
9 Wonanyi zvakaitika no hanzvaji imweni inodanijwa Anjerina, a inogara ku Estadhu Unidhu. Iyona yainga yakacunga, cimwenizve, yaibhuya ngo pamusolo pa Jehovha ku vadoni vo kubasa kwayo. Zvesiwoneka kuti iyona yainga yesitanga kushanda pa baselo, iyona yakakokwa no vandhu vamweni vaingawo vapsa pa baselo. Pamusangano uwu, vese vakava no mukana wo kuvhunja vamweni ngo pamusolo po upenyu wavo. Hanzvaji Anjerina vakanasirira foto kuti vakwanise kukhombija no kuwonesa mudakalo wavainga nawo ngo kuva Capupu ca Jehovha. Pasara nguva shoma kuti vavereketewo, mudoni wavo wo kubasa wakabhuya kuti iyena wakarerwa ngo Zvapupu zva Jehovha. Iyena wakatanga kushora zvatinotenda. Hanzvaji Anjerina vakati: “Mweyo wangu waitaka ngo simba. Inini andisaida kuti vandhu vatende manyepo aibhuiwari ngo pamusolo pa Jehovha. Ndakazvivhunjisa kuti: ‘Ndotendera kuti ari wese anyepe ngo pamusolo pa Jehovha here? Kana kuti ndopupura cokwadi ngo pamusolo pake?’”
10 Mudoni wavo paakapeja kubhuya, hambzaji Anjerina vakaita mukumbiro ngo cinyararire. Ngo kukasika, ivona vakatanga kubhuya ngo gwanja lakanaka vesiti: “Mugariro wako wakatojana no wangu, yeni ndakarerwa inga Capupu ca Jehovha nokwenderera mberi ndakadalo mbhera zvino.” Kunyange mugarirowo waivanyangajisa, hanzvaji Anjerina vakaenderera mberi vakagajana ivona vakakhombija vadoni vavo vo ku basa foto javo javakavhiswa no shamwari javo vakadakala vesishandira Jehovha. Cimwenizve, vakavasanangurira zvavaitenda ngo gwanja lo nderemejo. (1 Ped. 3:15) Ngaupi wakava muviyo? Hanzvaji Anjerina pavakapeja kubhuya, mwanarume wiya wakava akagajana. Iyena wakabhuyawo ngo zviro zvakanaka zvaakajijiswa ngo Zvapupu zva Jehovha. Hanzvaji Anjerina vakati: “Zvatinotenda ngo pamusolo pa Jehovha zvinodikana kujivirirwa. Cidakajiso cikuru kujivirira zina lake.” Isusu tino makomborero o kusimba no kukuja Jehovha kunyange vamweni vasikazviiti.
Tingakuja Jehovha paya patinojivirira cokwadi (Wonanyi ndima 9-10) b
11. Vanamati vo cokwadi vangatevejeresa kudini ndhungamiriro inowanika pana Pisarema 96:8?
11 Verenganyi Mapisarema 96:8. Tingakuja Jehovha ngo zviro zvatinazvo zvinokosha. Vanamati vo cokwadi vo mu nguva yokare, nguva yese vaikujawo Jehovha ngo gwanja iri. (Zvi. 3:9) Inga muezaniso, Vaiziraeri vaipira mare no zviro zvimweni zvaikosha kuitira kubesa kuvakiswa ko themberi no kuinasirira-nasirira. (2 Maj. 12:4, 5; 1 Mk. 29:3-9) Vajiji va Jesu vakabesa Jesu kubatanijavo no vapostori vake ngo “upfumi wavo.” (Ruka 8:1-3) Makristu o muzana lo kutanga lo makore, akaitawo mupiro jo kubesa hama no hanzvaji javo ngo zvokurhya. (Mabasa 11:27-29) Nyamasi unowo, tingakuja Jehovha ngo kuita mupiro jo kuzvipira.
12. Mupiro jedu jingaitisa kudini kuti jikuje Jehovha? (Wonanyi foto.)
12 Ngatimbowona muezaniso umwe unokhombija kuti, mupiro jedu jinokuja Jehovha. Mu gore la 2020 ku Zimbabwe kakaita nguva yakareba kusikanai nvhura. Vandhu vakawanda vakasangana no njara kubatanijawo hanzvaji imweni inozwi Priska. Kunyange kainga kusikanai nvhura, hanzvaji Priska vakenderera mberi no ulongwa wavo wo kuparijira ngo citatu no cishanu kunyange nguva yo kurima. Vocigarisano cavo vaivashora ngo kuenda kavo koparijira kusiripi kushanda. Ivona vaivavhunja kuti: “Unondofa gore rino ngo njara.” Hanzvaji Priska no kuthemba kese vaidavira kuti: “Jehovha narini aazosiyi vanamati vake.” Pasati papera mazuva akawanda zvaazvaitika, ivona vakabeswa ngo zvokurhya zvavakapuwa ngo sangano. Zvokurhya izvi zvavakapuwari zvakakwanisika ngo ndava yo mupiro jedu. Vocigarisano ca hanzvaji Priska vakashamisika no kuvavhunja kuti: “Jehovha aato kusiya kukubesa uye tinodawo kujija ngo pamusolo pake.” Vandhu vaikwana kuita 7 vo pacigarisano cavo, vakatanga kuenda kumusangano jo ungano.
Tinokuja Jehovha ngo zviro zvedu zvinokosha (Wonanyi ndima 12) c
13. Muhambiro wedu ungakujisa kudini Jehovha? (Pisarema 96:9)
13 Verenganyi Mapisarema 96:9. Tingakuja Jehovha ngo muhambiro wedu. Vapiri vaishandira mu themberi ya Jehovha, vaidikana kugara vakacena. (Ekisodho 40:30-32) Isusuwo tinodikana kuva takacena haiwa basi mu muviri asi tinodikana kungwarira kuti titame kuita zviri zvese zvinonyenywa ndi Jehovha. (Ps. 24:3, 4; 1 Ped. 1:15, 16) Tinodikana kuvangisira maningi kuti “tivhise undhu wo kare” no zviito zvisito kucena, “tosimira undhu upsa” no kulangarira ngo gwanja rinowonesa mugariro ja Jehovha jinoshamisa. (VaK. 3:9, 10) Ngo besero la Jehovha, kunyange vandhu vaya vanoita zvo uhure no ugandanga vangacinja mugariro javo vosimira undhu upsa.
14. Ngazvipi zvatajija ngo muezaniso wa Jeki? (Wonanyi foto.)
14 Inga muezaniso, Jeki wainga mwanarume wakashata maningi, waiita zvo ugandanga iyena wakatoguma pakudanijwa kuti dhimoni. Ngo ndava yo zvakashata zvaainga esiita, Jeki wakatongerwa kufa. Ngo kudalo, paainga esiemera kuti atongwe, iyena wakatendera kujija Bhaibheri no hama yakavhakacira mujere maaingaro akavharirwa. Kunyange no mugariro wake, Jeki wakacinja undhu wake wo kare, pakuhamba ko nguva wakazokwanirisa kuti abhabhatijwe. Jeki wakacinja maningi zvokuti pa zuva raaida kuuraiwa vangwariri vo jere vakacema maningi pavaienekana naye. Umwe wo mushandi wo pajere wakati: “Jeki wakava musungwi wakashata maningi, asi zvino iyena wa mundhu wakanaka maningi.” Pa vhiki rakatevera, Jeki paainga apera kuuraiwa, hama pajakaviyazve kuzoitisa musangano mu jere umu, musungwi umweni wakatanga kuwona musangano pa kutanga. Zvicinyi zvakamuitisa kuti akhete kuwona musangano uwu? Iyena wakashamisika maningi ngo kucinja kakaita Jeki. Cimwenizve, waida kuziva kuti ngazvipi zvaangaita kuti anamate Jehovha. Zvakajeka kuti muhambiro wedu ungakuja Baba wedu vo kudenga.—1 Ped. 2:12.
Tingakuja Jehovha ngo muhambiro wedu (Wonanyi ndima 14) d
JEHOVHA UNOZOITENYI KUTI AKUJE ZINA LAKE MBERIYO?
15. Jehovha unozokujisa kudini zina lake mukuperera mberiyo? (Pisarema 96:10-13)
15 Verenganyi Mapisarema 96:10-13. Mavhesi o kupejisira a Pisarema 96 anobhuya kuti Jehovha Mutongi na Mambo wakarurama. Jehovha unozoitisa kudini kuti akuje zina lake mberiyo? Ngo matongere ake. Ngokukasika iyena anozopalaja Bhabhironi Guru ngokuti maceci okunyepa akaita zviro zvakashata no kujijisa manyepo akashata ngo pamusolo pake. (Zvak. 17:5, 16; 19:1, 2) Vamweni vanozowona kuparajwa ko Bhabhironi Guru nguva imweni vangazoda kubatana nesu pa kunamata kocokwadi. Pakupejisira pa Armagedhoni, Jehovha unozopalaja zviro zvese zvakashata zvakaizwa ndi Sathana no kupalaja vese vanoteverera zina lake no kurishora. Asi unozoponesa vaya vanomuda no kumuzwira no vanodakala ngo kumukuja. (Mako 8:38; 2 VaT. 1:6-10) Kumbhiri ko Kutonga ko Ciuru co Makore, Jehovha unozocenesa zina lake zvakaperera. (Zvak. 20:7-10) Pa nguva yonayo, “nyika inozozala ngo kuziva nduma ya Jehovha, inga kumwa inofukija jombe.”—Abha. 2:14.
16. Makheta kuitenyi? (Wonanyi foto.)
16 Zvinozodakajisa maningi, vandhu vese vanopona pavanozokuja Jehovha inga zvaanofaneya. Mbhera rigume zuva iri, tingaita zvese zvatinokwanisa kuti tikuje Jehovha pamukana jese jatinowana. Kuitira kunasa kujekesa shwiro iyi inokoshari, Dare Rinotungamirira rakheta Mapisarema 96:8 inga vhesi yedu yo gore la 2025: “Ipanyi Jehovha kukujwa kakafaneya zina lake.”
Mberiyo vandhu vese vanozopa Jehovha rukujo waakafaneya! (Wonanyi ndima 16)
NGOMA 12 Mwari Mukuru, Jehovha
a Mazina amweni akacinjwa.
