MUSOLO WO KUJIJA 3
NGOMA 35 “Khetanyi Zviro Zvakanaka”
Itanyi Zvikhetwa Zvinodakaja Jehovha
“Kuziva Jehovha, zvinobhuya kutanga kuwana uzivi uye Kuziva Mwari Wakacena, zvinobhuya kuzwisisa.”—Zvi. 9:10.
ZVATISAJIJA
Mu cijijo cino, tinozowona kuti tingashandisisa kudini uzivi wedu kuti tiite zvikhetwa zvakanaka.
1. Ciro cipi cinonesa catinodikana kuita?
ZUVA NGO ZUVA tinoda kuita zvikhetwa zvedu. Zvikhetwa zvimweni zvakareruka kuzviita, zvinobatanija kuziva zvatinoda kurhya co mangwanani kana tisati taenda koovata. Asi kuno zvikhetwa zvimweni zvinonesa maningi kuda kuzviita. Zvimweni zvingapsasa utano wedu, mudakalo wedu, ukama wedu no kunamata kedu. Tinoda kuti zvikhetwa zvedu zvitibese no kubesawo mbhuri yedu. Kunja ka zvese izvi, tinoda kuti zvatinokheta zvidakaje Jehovha.—VaR. 12:1, 2.
2. Ngazvipi zvinozomubesa kuti muite zvikhetwa zvakanaka?
2 Mungaita zvikhetwa ngo ungwaru kudai imwimwi mukalangarira izvi: Co kutanga, mukaziva zvese zvinobatanijwepo, co cipiri, mukalangarira mawonero anoita Jehovha ngo pamusolo po shwiroyo uye co citatu, mukalangarira ngo kungwarira kese ngo pamusolo po shwiroyo. Cijijo cino, cinozobhuya ngo mafundo aya uye iwona anozotibesa kuti tijijise simba redu lo kuzwisisa.—Zvi. 2:11.
ZIVANYI ZVINOBATANIJWEPO
3. Ipanyi muezaniso unowonesa kuti ngenyi munodikana kuzwisisa zvese zvinobatanijwa musati maita zvikhetwa?
3 Ciro co kutanga cinozomubesa kuti muite zvikhetwa zvakanaka, ngo co kuziva zvese zvinobatanijwepo. Ngenyi izvi zvinokosha? Ambolangariranyi kuti mundhu umweni uri kuwaja oenda koovhunja medhiko ngo pamusolo po ndhendha yake inonesa maningi. Kubhuya kuti medhiko waizoita cikhetwa co kurapa mundhu ari kuwajaro asati atanga apsakisisa kuti ari kuzwenyi kana kuti ngazvipi zvaari kuzwa? Zvakajeka kuti haiwa. Imwimwi munozoita zvikhetwa zvakanaka, kudai mukatanga malangarira ngo kungwarira kese ngo pamusolo po zviro zvinobatanijwa pa shwiroyo. Mungazviitisa kudini izvi?
4. Kuenderana na Zvirevo 18:13 mungaitisa kudini kuti muve no cokwadi cokuti munoziva zvese zvinobatanijwepo? (Wonanyi foto.)
4 Kakawanda yemwi mungazwisisa zvese zvinobatanijwa pa shwiroyo ngo kuzviita muvhunjo. Ngatiti makokwa ku festa. Kubhuya kuti yemwi maizoendeyo? Kudai yemwi musikazivani no mutungamiriri wo festa iyi kana nasiriro yaithwa kuitira festeyo, maizozvivhunjisa muvhunjo jakadai inga iji: “Festa iyi inozoizirwa kupi uye ndirini? Vandhu vangana vanozoviya? Ndiyani anozotungamirira? Ndivanaani vanozoveyo? Ngazvipi zvakalongwa kuti zvizoizwa pa festeyo? Kunozova no doro kuitira vandhu vanongalo vakokwa here?” Mupingulo jo muvhunjo iji jinozomubesa kuti muite zvikhetwa ngo ungwaru.—Verenganyi Zvirevo 18:13.
Zwisisanyi zvese zvinobatanijwepo ngo kuita muvhunjo (Wonanyi ndima 4) a
5. Munodikana kuitenyi pamunopeja kuzwisisa zvese zvinobatanijwepo?
5 Mapeja kuziva zvese zvinobatanijwepo, langariranyi ngo kungwarira ngo pamusolo po shwiroyo. Inga muezaniso, kudai mukaziva kuti vandhu vanozova ku festa iyi vandhu vasikazwiri Jehovha, cimwenizve mozivazve kuti kunozova no doro asi akuna mundhu anozotungamirira kuitira kuti vandhu vasamwa maningi. Ngazvipi zvamaizoita? Munolangarira kuti pano mukana wokuzoita kuti mabungaijo aya atame kuva akashata? (1 Ped. 4:3) Ngo divi rimweni, ngazvipi zvaizoitika kudai nguva yo kuenda ku festa iyi ndiyona imweyo no yo kuendawo kumusangano jo ungano kana kuenda mubasa lo kuparijira? Kudai imwimwi mukazwisisa zvese zvinobatanijwepo munozokwanisa kuita zvikhetwa zvakanaka. Asi kuno ciro cimweni camunodikana kuita, yemwi munoziva mazwire enyu ngo pamusolo po shwiroyo asi Jehovha anoiwonesa kudini?—Zvi. 2:6.
PSAKANYI KUZIVA MULANGARIRO WA JEHOVHA
6. Kuenderana na Jakobe 1:5, ngenyi tinodikana kuita mukumbiro tesida kubeswa ndi Jehovha?
6 Kumbiranyi Jehovha kuti amubese kuzwisisa mulangariro wake ngo pamusolo po shwiroyo. Jehovha unogondesa kuti unozotipa uzivi kuitira kutibesa kuzwisisa uye kuziva kuti ngazvipi zvaanolangarira ngo pamusolo po shwiroyo. “Iyena unozomupa uzivi wakawanda ngo mweyo wese asingamuvereketeri.”—Verenganyi Jakobe 1:5.
7. Mungaitisa kudini kuti muzive zviri kulangarirwa ndi Jehovha ngo pamusolo po shwiroyo? Ezanisanyi.
7 Pasure po kuita mukumbiro mesikumbira ndhungamiriro ya Jehovha, yemwi munodikana kunasa kuzwisisa mupingulo waanozomupa. Inga muezaniso, kudai yemwi mukarasika pamunonga mesiita rwendo, yemwi munokumbira besero ku mundhu anogara mu mutundhu monamo. Kubhuya kuti imwimwi maizopinda mundhuwo asati amudavira here? Zvakajeka kuti haiwa. Imwimwi maizonasa kumuyaeya no kungwarira kese zvaaizomuvhunjaro. Mu kutojonawo, pasure po kukumbira Jehovha kuti amupe uzivi, ejanyi kuzwisisa mupingulo wake ngo kupsakisisa mutemo no ndhungamiriro jo mu Bhaibheri jingashanda pa mugariro wenyu. Inga muezaniso, pamunonga mesiita zvikhetwa kuti munozoenda ku festa yabhuiwaya pakutanga, imwimwi mungawona kuti Bhaibheri rinobhuyenyi ngo pamusolo po mafesta asito kunaka, shamwari jakashata, no kuwona kukosha ko kukanda Umambo wa Mwari pa kutanga kusiripi zvinodiwa zvenyu.—Mateu 6:33; VaR. 13:13; 1 VaK. 15:33.
8. Mungaitenyi kudai mesida kubeswa kuti muwane mazano ngo pamusolo po zvamuri kupsaka? (Wonanyi foto.)
8 Kunyange zvakadalo, kakawanda imwimwi mungada kubeswa kuti muwane zvamunongaro mesipsakisisa. Imwimwi mungaashira mazano ecivha ku hama kana hanzvaji inoruzivo. Ngokudalo, munozobeserekavo ngo kupsakisisa kenyu kamunonga mesiita. Kuno mabhuku anowanika mu mathurusi edu o kujijisa akadai inga Bhuku lo Kupsakisisa lo Zvapupu zva Jehovha no bhuku rakazwi Ndhungamiriro kuitira upenyu wo Cikristu. Langariranyi kuti cinangwa cikuru ngo cokuda kudakajisa mweyo wa Jehovha.
Wonanyi malangarire a Jehovha (Wonanyi ndima 8) b
9. Tingaitisa kudini kuti tive no cokwadi cokuti zvotakheta zvinodakajisa mweyo wa Jehovha? (VaEfeso 5:17)
9 Tingaitisa kudini kuti tive no cokwadi cokuti zvikhetwa zvedu zvinodakajisa mweyo wa Jehovha? Tisati taita cikhetwa tinodikana kuziva zvese zvinobatanijwepo. Bhaibheri rinoti: “Kuziva Mwari Wakacena, zvinobhuya kuzwisisa.” (Zvi. 9:10) Eya, kunasa kuzwisisa kuziva mugariro ja Jehovha, cinangwa cake, no kuziva zvaanoda no zvaasikadi. Zvivhunjisenyi kudai: ‘Ndesiziva zvinoda Jehovha, zvikhetwa zvipi zvandinodikana kuita zvinozomudakaja?’—Verenganyi VaEfeso 5:17.
10. Ngenyi ndhungamiro jo Bhaibheri jinokosha maningi kupinda zvakajaerwa ngo mbhuri kana zvo mu mutundhu mamunogalalo?
10 Kuti tikwanise kudakajisa Jehovha, nguva jimweni tingaita ciro cinganyangajisa vamweni. Inga muezaniso, vabereki vokuti vatori no mugariro jakanaka nguva jimweni vangatovangirija mwana wavo kuti alovorwe ngo hama yavanowona kuti ino mare yakawanda maningi, ngokuti inozovhisa mare yakawanda yokulowora azvinenyi nokuti aivangisiri pa kunamata Jehovha. Ngozvo cokwadi kuti ivona vanoda kuti mwana wavo abatwe zvakanaka kudivi lo zvokunyama asi ndiyani anozomubesa kuti akure muno zvokunamata? Jehovha anowonesa kudini shwiro iyi? Tinowana mupingulo pana Mateu 6:33. Pa vhesi iyi, Vakristu vanovangiswa kuti ‘vaenderere mberi vesitanga kupsaka Umambo.’ Azvinenyi kuti tinodikana kukuja vabereki vedu no kureremeja vandhu vanogara mu mutundhu medu, cinokosha maningi ngo cokuita kuti Jehovha adakare.
KULANGARIRA NO KUNGWARIRA NGO PAMUSOLO PO SHWIROYO
11. Mugariro upi unowanika pana VaFiripi 1:9, 10 unozomubesa kunasa kulangarira ngo pamusolo po shwiroyo?
11 Pasure po kusotesesa ndhungamiriro jo mu Bhaibheri jingashandiswa pa shwiro yenyu, imwimwi munodikana kunasa kulangarira no kungwarira ngo pamusolo po shwiroyo. (Verenganyi VaFiripi 1:9, 10.) Nguva imweni zvingava zvakareruka kuita zvikhetwa, asi asipi zvikhetwa zvese zvakanaka. Kuzwisisa kunozomubesa kuita zvikhetwa zvakanaka azvinenyi no mugariro wenyu.
12-13. Kuzwisisa kunozomubesesa kudini kuti muite zvikhetwa zvakanaka ngo pamusolo po basa?
12 Ambowonanyi muezaniso uwu basi. Ngatiti imwimwi muri kupsaka basa kuitira kusapota mbhuri yenyu, mozwa kuti kuno ndau mbiri jinoda vashandi. Imwimwi munopsaka kuzwisisa zvese zvinobatanijwepo, mukhaindi wo basero, maizirwe aro, nguva yamunopeja mesifamba kuti mooguma konayo no zvimweni zvakadalo. Mowona kuti mabasa ese onawo anotenderwa kuti Vakristu vamaite. Nguva jimweni imwimwi mungakheta basa lamunowona kuti ngo lakanaka kamuri, cimwenizve rinomupa mare yakawanda. Asi, kunja kaizvi kuno zviro zvimweni zvamunodikana kusotesesa musati maita zvikhetwa.
13 Inga muezaniso, kubhuya kuti basa lamunodaro kuita rinozoita kuti mutame kupinda musangano jo ungano here? Kubhuya kuti basa lamurikudaro rinozomupa nguva yamunoda kuti mubese mbhuri yenyu kuti izvizwe yakangwaririka, yakadakara no kukhwedera phedo na Jehovha? Kuzviita muvhunjo iji kunozomubesa kuti mukande pakutanga “zviro zvinokosha,” kunamata kenyu Jehovha no zvinodiwa zvo mbhuri yenyu kusiripi zviro zvokunyama. Ngokudalo, imwimwi munozoita zvikhetwa zvinozoita kuti Jehovha amukomborere.
14. Kuzwisisa no kukhombija rudo zvinozotibesesa kudini kuti tingwarire kukhugunya vamweni?
14 Kuzwisisa kunotivangisawo kuti tiwone kuti zvikhetwa zvedu zvinopsasawo kudini vamweni uye zvinotibesa kuti titame kukhugunya vamweni. (VaF. 1:10) Izvi zvinokosha maningi paya patinoita zvikhetwa zvedu pa cedu zvakadai inga masimirire no manasirire atinozviita. Inga muezaniso, tingakheta mukhaindi wo nguwo jatinoda no maitire okuzvisejesa. Asi ngazvipi zvamaizoita kudai vandhu vokunja kana kuti vo mu ungano vakakhugunyika ngo masimirire enyu? Kunasa kulangarira kunozotibesa kuti tireremeje mazwiro avo. Rudo unozotindunda kuti tipsake “zvinobesa” vamweni no kuzvidodokesa. (1 VaK. 10:23, 24, 32; 1 Tim. 2:9, 10) Kudai tikava vandhu vanozwisisa, zvikhetwa zvedu zvinozowonesa kuti tino rudo uye tinoreremeja vamweni.
15. Ngazvipi zvamunodikana kulangarira musati maita zvikhetwa zvinokosha?
15 Kudai imwimwi muri kuda kuita cikhetwa cinokosha, langariranyi ngo zvamunozodika kuita kuti muzozviita zvinoenderana no zvomakheta. Jesu wakatijijisa kuti ‘titange tawona zvinodiwa tisati taita ciroco.’ (Ruka 14:28) Ngokudalo, sotesesanyi nguva yamunozopeja, mabasa amunozoita no kuvangisira kamunozodikana, kuita kuti mukwanirise zvikhetwa zvenyu. Pamugariro jimweni, yemwi mungavhunjisa mbhuri yenyu kuti muzive kuti zvicinyi zvingaitwa ngo mundhu umwe nga umwe kuti abese zvikhetwa zvomaitaro. Ngenyi kuita izvi kunokosha? Kuita kudalo zvinokosha ngokuti zvinozomubesa kuzwisisa kuti munodikana kuita cinjo pa zvikhetwa zvamaitaro kana kuzvinasirira. Pamunovhunja mbhuri yenyu ngo pamusolo po zvikhetwa zvenyu no kuzwa mazano avo, ivona vanozoshanda ngo simba kuti zvikhetwezvo zvibudirire.—Zvi. 15:22.
ITANYI ZVIKHETWA ZVINOBUDIRIRA
16. Ngazvipi zvinozomubesa kuti muite zvikhetwa zvinozobudirira? (Wonanyi bhokiso rino musolo unoti: “ Mungaitisa Kudini Kuti Muite Zvikhetwa Zvakanaka?”)
16 Kudai yemwi mukatevejera mazano abhuiwari, munozova makanasirira kuti muite zvikhetwa zvakanaka. Kudai yemwi mukazwisisa zvese zvinobatanijwepo no kusotesesa ndhungamiriro jo mu Bhaibheri, zvinozomubesa kuti muite zvikhetwa zvinodakajisa mweyo wa Jehovha. Ngokudalo, kuvhira zvino mungakumbira Jehovha kuti amubese kuita zvikhetwa zvakanaka.
17. Zvicinyi zvingamubesa kuti muite zvikhetwa zvakanaka?
17 Kunyange makamboita zvikhetwa zvakabudirira kareko, langariranyi kuti cinozomubesa kuti muite zvikhetwa zvakanaka, kuthemba uzivi wa Jehovha haiwa uzivi wenyu. Ndi Jehovha basi angamupa zivo yo cokwadi, kuzwisisa no ungwaru, ngokuti zviro izvi zvinokosha maningi. (Zvi. 2:1-5) Jehovha anozomubesa kuti muite zvikhetwa zvinozomudakaja.—Ps. 23:2, 3.
NGOMA 28 Kuwana Ushamwari hwa Jehovha
