MUSOLO WO KUJIJA 2
NGOMA 132 Wari Itusu Taaumwe
Majimwamuna Reremejanyi Vakaji Venyu
‘Imwimwi majimwamuna, . . . reremejanyi vakaji venyu.’—1 Ped. 3:7.
ZVATISAJIJA
Mwamuna ungakhombijisa kudini kuti unoreremeja mukaji wake ngo zvaanobhuya uye zvaanoita.
1. Cikonzero cipi cakaita kuti Jehovha aumbe mucadho?
JEHOHVA “ndi Mwari akadakala,” uye unoda kuti tidakarewo. (1 Tim. 1:11) Jehovha unotipa zvipo zvakawanda zvinotibesa kuti tidakajwe ngo upenyu. (Jak. 1:17) Cimwe co zvipo izvi mucadho. Mwanarume no mwanaji povanocadha, ivona vanothembesana kuti tinozodanana, kureremejana uye kucengetana. Mwamuna no mukaji vakalamba vesidisana, vanowana mudakalo mu upenyu wavo.—Zvi. 5:18.
2. Icinyi ciri kuitika mu mucadho jakawanda mazuva ano?
2 Ngo kudalo, varovorani vakawanda mazuva ano, vanokanganwa zvovakathembesana pa zuva lo mucadho wavo. Inga muviyo, varovorani vakawanda avasina mudakalo. Masoko mapsa akavha ku Mubatanijwa wo Nyika Yese wo zvo Utano akati, vanarume vakawanda, vanotaka, vanotuka nokubhuya masoko anowajisa pfungwa vakaji vavo. Mwamuna anoita izvi, unoreremeja mukaji wake panonga pano vandhu vamweni, asi pavanonga vaavega unomutambuja. Mucadho yakawanda, inovazve no zvineso kudai mwamuna esiita basa ro kuwona zvo umitu-mitu.
3. Icinyi cinoita kuti majimwamuna abate vakaji zvisito kunaka?
3 Zvicinyi zvingaita kuti vanarume vamweni, varege kureremeja vakaji vavo? Vamweni vangadalo ngokuti vakarerwa ngo vabereki vainga no hasha, ngo kudalo vanolangarira kuti kuita izvi akuto kushata. Vamweni vanomoshwa ngo tsika, jinovaita kuti vave no mulangariro wakashata, wokuti “mwanarume wocokwadi” unodikana kushandisa cisimba kuitira kukhombijira mukaji wake kuti ndiyani musolo wo mbhuri pano. Vanarume vamweni avato kujijiswa kuzvibata povanonga vakanyangajwa, kubatanijawo no hasha. Vanarume vamweni vakava nomawonero akashata ngo pamusoro po vanakaji uye noshwiro jo zvo bonde, ngondava yo kuita basa rokuwona zvo umitu-umitu. Uye kuitira kuengejera kushatisisa ko mugariro wo zviro izvi, masoko amweni anokhombija kuti mukati mo COVID-19 vanarume vakawanda vakatanga kubata vakaji vavo ngo njira isito kunaka. Asi cokwadi nga ici, apana mwanarume anodikana kubata mukaji wake zvisito kunaka ngo ndava yo cikonzero ciri cese haco.
4. Zvicinyi zvinodika kungwarirwa ngo majimwamuna ocikritu uye ngenyi?
4 Mwamuna wo Cikristu unodikana kungwarira kuti asawona ngo njira isito kunaka mukaji wake. a Ngenyi? Ngokuti mulangariro jo mundhu jinomundundira kuti aiite ciro. Mu postori Pauro wakabhuya kuti Vakristu Vakazojwa vo Roma “vaidikana kungwarira kuti vasumbwa ngo nyika ino.” (VaR. 12:1, 2) Mu postori Pauro paakanyora masoko aya ku ungano yo Roma, ungano iyi yainga yaayo ko makore akawanda. Kunyange zvakadalo, masoko a Pauro anokhombija kuti vamweni vainga mu ungano iyi, vainga vesitendera kucengejwa ngo tsika no mulangariro yo nyika. Ngo iyo ndava, Pauro wakavapa zano lokuti, vacinje mulangariro no maitire avo. Zano iri rinoshandawo kumajimwamuna o Cikristu mazuva ano. Zvinosuruvarisa ngo zvokuti, majimwamuna amweni arikutendera kucengejwa ngo mulangariro wo nyika ino, izvi zviri kuita kuti vabate vakaji vavo zvisito kunaka. b Jehovha unada kuti mwamuna aitenyi ku mukaji wake? Mupingulo wakona munouwana pa vhesi inotungamirira cijijo cino.
5. Maererano na 1 Pedhru 3:7 mwamuna ungabatisa kudini mukaji wake?
5 Verenganyi 1 Pedhru 3:7. Jehovha unovhunja mwamuna kuti akuje mukaji wake. Kukuja kunobatanija mabatire atinoita mundhu watinoreremeja. Mwamuna anokuja mukaji wake, unomubata ngo rudo uye ngo nyasha. Mu cijijo cino, tinozowona kuti mwamuna ungakhombijisa kudini kuti unokuja mukaji wake. Asi pakutanga, ngatiwone kuti maitiro api anokhombija kuti mwanarume uwu aareremeji mukaji wake.
MUSAITA CIRO CINODHANISA MUKAJI WENYU
6. Maonero api anoita Jehovha kudai mwamuna akabata mukaji Wake zvisito kunaka? (VaKorose 3:19)
6 Kutaka mukaji. Jehovha unonyenya vaya vanodakarira zvo kutakana. (Ps. 11:5) Bhaibheri rinoshora risikakhoni-khoni majimwamuna anobata vakaji zvisito kunaka. (Mabasa 2:16; verenganyi VaKorose 3:19.) Maererano no vhesi inotungamirira cijijo cino, 1 Pedhru 3:7, kudai mwamuna asingabati mukaji wake zvakanaka, ushamwari wake na Jehovha unopera. Jehovha ungatokheta kutama kuzwa mukumbiro yake.
7. Maererano na VaEfeso 4:31, 32 majimwamuna anodikana kungwarira mavereketero api? (Wonanyi “masoko akasangurwa.”)
7 Kubhuya magama anotuka. Majimwamuna amweni anopopotera vakaji no kuvatuka. Asi Jehovha unonyenya “hasha, kupopota uye magama anotuka.” c (Verenganyi VaEfeso 4:31, 32.) Jehovha unozwa zvese. Mabhuyire anoita mwamuna no mukaji wake, kunyange povanonga vari vega anokosha maningi kuna Jehovha. Mwamuna unobhuya zvisito kunaka kumukaji wake aakhuvazi basi mucadho yavo, asi ushamwari wake na Jehovha.—Jak. 1:26.
8. Jehovha unolangarirenyi ngo kuwona zvo umitu-mitu uye ngenyi?
8 Kuwona zvo umitu-mitu. Jehovha unorangarirenyi ngo zvo umitu-mitu? Iyena unozvinyenya. Mwamuna anoita basa rokuwona foto jo umitu-umitu unokhuvaza ushamwari wake na Jehovha, uye aareremeji mukaji wake. d Jehovha unoda kuti mwamuna alambe akagondeka kumukaji wake, haiwa ngo zviito basi asi zvaanorangarira. Jesu wakabhuya kuti mwanarume anoita basa lo kusota mwanakaji mbhera kuguma pakumuemura, watoita upombwe ngo “mu mweyo make.” e—Mateu 5:28, 29.
9. Ngenyi Jehovha unonyenya mwamuna unovangirija mukaji wake zvaasingadi povanonga vesiita zvo pa bonde?
9 Kuita vatano inopseruja. Majimwamuna amweni, anovangirija vakaji vavo kuita vatano inopseruja uye inoita kuti vazvizwe vasito kucena kana kuti vasingadiwi. Jehovha unonyenya maitire akadaro wokuita zviro. Jehovha unoda kuti mwamuna ade mukaji wake uye areremeje mazwire ake. (VaE. 5:28, 29) Kudai muri mwamuna wo Cikristu, muri kutambuja no kutama kureremeja mukaji wenyu uye no kuwona zvo umitu-mitu here? Mungaitenyi kuti mucinje zviito no mulangariro wenyu?
ZVAMUNGAITA KUTI MUNYISE MUHAMBIRO WAKASHATA
10. Mwamuna ungabeseswa kudini ngo muezaniso wa Jesu?
10 Zvicinyi zvingabesa mwamuna kuti asatuka no kupseruja mukaji wake? Iyena ungavangisira kuti atevejere Jesu. Zvakajeka kuti Jesu aato kumborowora, asi mabatire aakaita vajiji vake muezaniso wakanaka unodikana kumutevejerwa ngo mwamuna pakubata mukaji wake. (VaE. 5:25) Inga muezaniso, wonanyi kuti majimwamuna angatevejeresa kudini Jesu pa mabatire aiita vapostori vake uye mabhuire aiita navo.
11. Jesu waibatisa kudini vapostori vake?
11 Jesu nguva yese, waibata vapostori zvakanaka uye ngo nderemejo. Iyena wainga asingavanesi. Kunyange hazvo kuti iyena wainga Mambo wavo, asi Jesu aato kushandisa cisimba-simba kuti vapostori vawone kuti wainga mukuru pakati pavo. (Johani 13:12-17) Pano kudalo, iyena wakaita basa rakaderera maningi kuvapostori vake. Iyena wakabhuya kuti: ‘Jijanyi kandiri ngokuti ndiri mundhu wakapfava, uye ndino mweyo unozvidodokesa uye munozowana zororo.’ (Mateu 11:28-30) Wonanyi kuti Jesu wainga mundhu wakapfava. Kuva mundhu akapfava azvibhui kuti mundhu wakaremba. Asi uno simba lo kukwanisa kuzvibata kunyange akanyangajwa. Mundhu akapfava kunyange paanonyangajiswa, unolamba akapfava uye unobata mazwire ake.
12. Jesu waivereketesa kudini no vandhu?
12 Jesu wakashandisa masoko ake kuti anyalaje vamweni. Iyena wanga asingavatuki no kuvapopotera. (Ruka 8:47, 48) Nguva imweni vavengi vake vaimunyangajisa uye vakaeja kumucamwisa, asi aato “kudavira nee kuvatuka.” (1 Ped. 2:21-23) Pa nguva imweni, Jesu wakalamba akanyarara pano kuita zviro zvisito kunaka. (Mateu 27:12-14) Uwu muezaniso wakanaka kuvanarume Vocikristu!
13. Inga zvinobhuiwa pana Mateu 19:4-6, mwamuna ungabatisa kudini “mukaji wake”? (Wonanyi foto.)
13 Jesu wakati majimwamuna vanodikana kulamba vakagondeka kuvakaji vavo. Iyena wakashandisa masoko ababa wake okuti mwamuna unodikana “kubatana no mukaji wake.” (Verenganyi Mateu 19:4-6.) Soko lo Cigiriki rakashandiswa mu vhesi iyi rokuti “kubatana”, rinobhuya kugara “vese pamwepo.” Izvi zvinokhombija kuti rudo riri pakati pavo, rinodikana kuva rakavanga kuita inga vakanamana. Kubatana uku akudikani kuparajaniswa ngo ciri cese. Mwamuna anokubatana kakadai no mukaji wake, unozoramba mukhaindi wese wokuwona zvo umitu-mitu. Iyena “unozovhisa meso ake ngokukasika pazviro zvinopseruja.” (Ps. 119:37) Mukufanana na Jobe, wakaita sungano no majiso ake yokutama kusotesesa mwanakaji asiripi mukaji wake.—Job. 31:1.
Mwamuna wakagondeka kumukaji wake unolamba kuwona zvo umitu-mitu (Wonanyi ndima 13) g
14. Mwamuna unobata mukaji wake zvisito kunaka, unodikana kuitenyi kuti avangise ushamwari wake na Jehovha uye no mukaji wake?
14 Mwamuna unogara esituka mukaji wake, unodikana kuita zviro zvimweni kuti anasirire kukhuvaza kaanonga aita ukama wake na Jehovha uye no mukaji wake. Icinyi caanodikana kuita? Cokutanga, iyena unodikana kuzwisisa kuti ici cineso cakakura kamare. Apana caanobhuya uye caanoita cakafishika mu majiso a Jehovha. (Ps. 44:21; Mup. 12:14; VaH. 4:13) Cocipiri, iyena unodikana kucinja maitiro ake oregera kutuka mukaji wake. (Zvi. 28:13) Cocitatu, iyena unodikana kukumbira ruregerero kumukaji wake no kuna Jehovha uye oita zviri zvese kuti aregererwe ndivona. (Mabasa 3:19) Iyena unodikanazve kukumbira Jehovha simba no cido kuti azvibate pamulangariro wake, magama uye zviito. (Ps. 51:10-12; 2 VaK. 10:5; VaF. 2:13) Cocilongomuna, iyena unodikana kuita zviro maererano no mukumbiro yake, uye kujija kunyenya mukhaindi wese wo hasha no kubhuya zvinonyangajisa. (Ps. 97:10) Cocishanu, iyena unodikana kukasika kupsaka besero ro vakuru vo ungano. (Jak. 5:14-16) Cocitandhatu, unodikana kulonga kuti unozoitenyi muno lamangwana kuti asazotukazve mukaji wake. Kudai mwamuna esiwona zvo umitu-mitu unodikana kutevejera mazano matandhatu aya. Kudai akadalo Jehovha unozokomborera zvaanoeja kuita uye unozomubesa kuti acinje maitire ake. (Ps. 37:5) Asi azvikwani basi kuti mwamuna arege kuita zviro zvinokhuvaza mukaji wake. Iyena unodikanawo kujija kumureremeja. Ungazviitisa kudini izvi?
MUNGAKUJISA KUDINI MUKAJI WENYU
15. Mwamuna ungakhombijisa kudini kuti unoda mukaji wake?
15 Itanyi zviro zvinokhombija kuti munoda mukaji wenyu. Majimwamuna amweni, akadakala mu mucadho wavo ngo kuita zviri zvese mazuva ese, zvinokhombija kuti vanoda vakaji vavo. (1 Joh. 3:18) Mwamuna ungakhombija kuti unoda mukaji wake ngo zviro zvidoko, zvakadai inga kubata muhoko wake no kumumbundira. Nguva jimweni mungatumira mukaji wenyu mesajhi wokuti “ndaano cisuwo mudiwa” kana kumuvhunjisa kuti “zuva rako riri kuhamba kudini?” Nguva ngo nguva, ungakheta kunyora khadhi rino masoko akanaka anokhombija kuti unomuda zvakadini. Mwamuna unoita izvi, unonga esireremeja mukaji wake uye kuvangisa mucato wake.
16. Ngenyi mwamuna unodikana kukuja mukaji wake?
16 Vhunjanyi mukaji wenyu kuti munomuda zvakadini. Mwanarume unoreremeja mukaji wake, unobhuya zviro zvinoita kuti azwe zvakanaka. Inga muezaniso, iyena ungabonga mukaji wake nga zvese zvaanoita kuti amubesere. (VaK. 3:15) Mwanarume unobonga mukaji wake ngo kumuvhunja kuti ngenyi esimuda, mukaji unozwa akangwaririka esidiwa uye esireremejwa.—Zvi. 31:28.
17. Mwamuna ungakhombijisa kudini kuti unoreremeja mukaji wake?
17 Batanyi mukaji wenyu ngo nyasha uye ngo nderemejo. Mwamuna unoda mukaji wake unomuwona inga cipo cinoshamaisa cinovha kuna Jehovha. (Zvi. 18:22; 31:10) Ngo kudalo, nguva yese uno unyasha uye unomureremeja kubatanijawo pashwiro jo pabonde. Ngo kudalo, aazomuvangiriji kuita ciri cese cinomuita kuti asagajana kana kupseruka no kunesa hana yake. f Pakuengejera iyena unovangisira kuti hana yake ilambe yakacena pamberi pa Jehovha.—Mabasa 24:16.
18. Majimwamuna angakheta kuitenyi? (Wonanyi bhokiso rakazwi: “ Zviro zvilongomuna zvinokhombija kureremeja mukaji wenyu.”)
18 Jehovha unodakala maningi, paanowona mwamuna esiita zvaanokona kuti areremeje mukaji wake ngo zvaanoita uye zvaanobhuya. Cunganyi kureremeja mukaji wenyu, musaita zviro zvinowajisa mazwiro ake. Pakuengejera ivanyi no nyasha, nderemejo uye mubatenyi ngo rudo. Kudai mukadalo unozowona kuti munomuda uye munomungwarira zvakadini. Kudai mukareremeja mukaji wenyu, munozova no ukama unokosha maningi no ushamwari wakavanga na Jehovha.—Ps. 25:14.
NGOMA 131 “Zvasungwa Pamwe ndi Mwari”
a Majimwamuna angabeswa ngo kuverenga shwiro inoti: “Iyemwi munobata vakaji inga zvinodiwa ndi Jehovha here?” Iri mu Mungwaji wa Janeiro wo 2024
b Vandhu vanobathwa zvisito kunaka mumamuzi vangadakarira kuverenga shwiro inoti: “Kubesa vandhu vanobathwa zvisito kunaka mumamuzi” munda-nda-nda unoti: “Shwiro jimweni” mu saiti jw.org uye JW Library®.
c NASANYI KUZWISISA MASOKO OKUTI: “Masoko anonyangajisa” anobatanija kubhuya zviro zvinonyangaja no cinangwa cinomunyangajisa kana kuita kuti ave no mazwiro akashata. Zvinobatanijazve kugara mesibhuya zviro zvinomunyangaja kana kubhuya zviro zvamusingadi ngo pamusoro pake. Ngo kudalo, ciri cese cinobhuiwa ngo utsinye kana cinopseruja zvingalangarirwa inga zvinotuka.
d Wonanyi shwiro inoti: “Kuwona zvo umitu-mitu zvinopalaja mucato wenyu” mu saiti jw.org uye mu JW Library.
e Mwanakaji uno mwamuna unowona zvo umitu-mitu, ungabeswa ngo cijijo cinoti: “Zvicinyi zvamungaita kudai mwamunenyu esiwona zvo umitu-mitu” mu Mungwaji wa Agosto wo 2023.
f Bhaibheri arinasi kujekesa kuti mwamuna no mukaji povanonga vessita zvo bonde, maitire api angazwi akanaka kana akashata pamberi pa Jehovha. Pashwiro yakadai Vakristu vanodikana kukheta kuita zviro zvinokuja Jehovha, zvinodakaja umwe nga umwe wavo uye valambe vano hana yakacena. Ngo kudalo vakacadha avazobhui zviro zvinoitika mukati momucadho wavo kuno vandhu vamweni.
g KUSANANGURWA KO FOTO: Vadoni vo kubasa vohama imweni vasiripi zvapupu, vanoieja kuti iwone revhista yo zvo umitu-mitu.
