MUSOLO WO KUJIJA 4
NGOMA 18 Kubonga ngo Muripo
Muripo Unotijijisenyi?
“Ngo gwanja iri, Mwari wakakhombija rudo lake.”—1 Joh. 4:9.
ZVATISAJIJA
Mu cijijo cino, tinozowona kuti ngazvipi zvatinojija ngo rufu la Jesu uye ngo pamusolo po undhu wakanaka wakakhombijwa ndi Jehovha na Jesu.
1. Tinobeseswa kudini ngo kuva pa Cilangarijo co kufa ka Jesu gore ngo gore?
COKWADI kuti munotendera kuti muripo cipo cinokosha maningi. (2 VaK. 9:15) Zvesiwoneka kuti Jesu wakapira upenyu wake ku vandhu, imwimwi mungakwanisa kuva no ushamwari wo phedo na Jehovha. Imwimwi mungavawo no soterero yo upenyu usingaperi. Tino zvikonzero zvakawanda zvo kubonga Jehovha ngo kutipa kake muripo ngo kuti unotida maningi. (VaR. 5:8) Kuitira kutibesa kuti tienderere mberi tesibonga no kutama kukanganwa zvatakaizirwa ndi Jehovha na Jesu, Jesu wakativhunja kuti tizongepoo pa Cilangarijo co kufa kake gore ngo gore.—Ruka 22:19, 20.
2. Ngazvipi zvatinozowona mu cijijo cino?
2 Gore rino, Cilangarijo cinozoizwa ngo mu gubera 12 ya Abril yo 2025. Pasina kukaya-kaya, tese tiri kuita nasiriro kuti tizovepo. Tinozobeswa maningi kudai tikawana nguva yo kuverenga no kulangarijisisa a zvatakaitirwa ndi Jehovha no Mwana wake Jesu mu mazuva o cilangarijo ookhwedera. Mu cijijo ici, tinozowona kuti muripo unotijijisenyi ngo pamusolo pa Jehovha no Mwana wake. Mu cijijo cinotevera, tinozobeswa kuzwisisa kuti tingaitisa kudini kuti tibesereke ngo muripo uwu no maitire atingakhombijawo kubonga ku muripo wonawo.
MURIPO UNOTIJIJISENYI NGO PAMUSOLO PA JEHOVHA
3. Rufu wo mundhu umwe ungasunungurisa kudini vandhu vakawanda? (Wonanyi foto.)
3 Muripo unotijijisa ngo pamusolo po ururami wa Jehovha. (Dhe. 32:4) Kuitisa kudini? Ambolangariranyi izvi: Ngo kurega kuzwa ka Adhamu, isusu takagara utaka wo cishaishi cinotiita kuti tigume pakufa. (VaR. 5:12) Kuitira kutisujunura ku cishaishi no rufu, Jehovha wakatipa muripo esishandisa Mwana wake Jesu. Asi zvaizoitisa kudini kuti muripo wo mundhu umwe wakakwana usunungure vandhu vakawanda? Mupostori Pauro wakati: “Ngo kurega kuzwa ko mundhu umwe basi Adhamu, vandhu vese vakazwi vashaishi, ngo maitiro akafanana, ngo kuzwa ko mundhu umwe basi Jesu, vandhu vese vanozozwi vakarurama.” (VaR. 5:19; 1 Tim. 2:6) Ngo kudalo, mupostori Pauro wainga esibhuya kuti vandhu vese vakava vashaishi, cimwenizve vanofa ngokuti mundhu wainga akakwana aato kuzwira Jehovha. Ngo kudalo, paidikana mwanarume wakakwana anozwira kuti atisunungure.
Mundhu umwe wakaita kuti tive varanda vo cishaishi uye rufu. Mukutojanawo mundhu umwe wakatiponesa (Wonanyi ndima 3)
4. Ngenyi Jehovha aato kutendera kuti vana va Adhamu vaizokhombija kuzwira vararame no kusingaperi?
4 Kubhuya kuti Jesu waidikana kufa kuti atiponese here? Ngenyi Jehovha aato kutendera kuti vana va Adhamu vaizozwira vararame nokusingaperi? Isusu tingalangarira kuti iri raizova gwanja lakanaka lo kutonga cineso, asi azviwonesi kururama kakakwana ka Jehovha. Zvesiwoneka kuti Jehovha wakarurama, iyena aasaizoita ciri cese caizowonesa kuti Adhamu aato kushaisha.
5. Ngenyi tingava no cokwadi cokuti Jehovha nguva yese unoita zvakarurama?
5 Asi ngazvipi zvaizoitika nokainga kuti Jehovha aato kutipa muripo, osiya kururama kake ngo kutendera kuti vana va Adhamu vano cishaishi vararame nokusingaperi? Nguva imweni vandhu vaizolangarira kuti Mwari waizosiya kururama kake pa shwiro jimweni. Inga muezaniso, kubhuya kuti Jehovha angasiya kukwanirisa zvigondiso zvake zvimweni? Atidikani kuneseka ngo pamusolo pazvo. Jehovha ngokuita kake zviro zvakarurama, kunyange zvakamubarira basa guru ro kutora Mwana wake umwe ega kuti atifire, zvinotivangisa kuti nguva yese iyena anozoita zviro zvakarurama.
6. Kuitisa kudini muripo unokhombija rudo la Jehovha? (1 Johani 4:9, 10)
6 Kunyange kuti muripo unotibesa kuzwisisa kuti Jehovha wakarurama, iwona unotibesawo kuzwisisa kuti rudo lake lakakurawo maningi. (Johani 3:16; verenganyi 1 Johani 4:9, 10.) Zviro zvatinojija ngo pamusolo po muripo zvinowonesa kuti Jehovha aadi basi kuti isusu tive no upenyu usingaperi, asi unodawo kuti tiite divi lo mbhuri yake. Ambolangariranyi izvi: Adhamu paakashaisha, Jehovha wakamugogomera pakati po mbhuri yo vanamati vake. Inga muviyo, isusu tese takabarwa kunja ko mbhuri ya Jehovha. Ngo ndava yo muripo, Jehovha anoregerera zvishaishi zvedu, pakupejisira unoviisa vese kumbhuri yake vanokhombija rutendo no kumuzwira. Kunyange zvakadalo, tingava no ushamwari wophedo na Jehovha no hama no hanzvaji jatinonamata najo. Ngo kudalo, Jehovha unotida maningi!—VaR. 5:10, 11.
7. Kutambujika ka Jesu kunotibesesa kudini kuzwisisa kuti Jehovha unotida maningi?
7 Tingazwisisa zvakanaka kuti Jehovha unotida maningi, kudai tikalangarira kuwajiwa kwaanova nako ngo kuwona mwana wake esifa. Sathana wakabhuya kuti akuna munamati wa Mwari unozoenderera mberi akagondeka paanonga esisangana no zvineso, kuitira kuwonesa kuti zvakabhuiwari ndi sathana manyepo, Jehovha wakatendera kuti Jesu atambujike asati afa. (Job. 2:1-5; 1 Ped. 2:21) Jehovha wainga esiwona Mwana wake Jesu paainga esishorwa ngo vavengi vake avo vainga vatungamiriri vo maceci, paiitakwa ngo masoca no paakakohomerwa pamutanda. Apeja, Jehovha wakazowonazve Mwana wake unodiwa esitambujika no kufa ngo maitire anowaja. (Mateu 27:28-31, 39) Jehovha wainga no simba lo kuita kuti izvi zvisaitika. Inga muezaniso, vavengi vake povakabhuyaya kuti “Mwari wakewo ngaamuponese kudai esimuda,” Jehovha waizoita zvonazvo kamare. (Mateu 27:42, 43) Mukusiyana, kudai Jehovha wakaemesa kuti izvi zvisaitika, apana muripo waizobhadharwa, cimwenizve, atisaizoda kuva no soterero. Asi Jehovha wakatendera kuti Mwana wake acungirire matambujiko aya mbhera koofa.
8. Kubhuya kuti Jehovha wakawajiwa ngo kuwona Mwana wake esitambujika here? Sananguranyi. (Wonanyi foto.)
8 Atidikani kulangarira kuti Mwari wo Masimba Ese aana mazwiro. Jehovha wakasika vandhu ovaita kuti vave no mazwiro. Ngo iyo ndava, Bhaibheri rinobhuya kuti iyena wakasika vandhu ngo muezaniso wake, izvi zvinobhuya kuti Jehovha unomazwiro. Bhaibheri rinobhuya kuti iyena “wakawajiwa” no “kunyangajwa.” (Ps. 78:40, 41) Wonanyi muezaniso wa Abhirahama na Izaki. Langariranyi kuti Jehovha wakavhunja Abhirahama kuti apire mwana wake umwe ega inga mupiro. (Gen. 22:9-12; VaH. 11:17-19) Mungakwanisa kulangarira mazwiro akava na Abhirahama paainga esinasirira kuti auraye mwana wake Izaki ngo cipanga. Jehovha wakawajiwa maningi no kunyangajwa paakawona vandhu vesitambuja Mwana wake no kumuuraya.—Wonanyi vhidhiyo inoti: Tevejeranyi Kutenda Kavo—Abhirahama, divi 2 mu saiti jw.org.
Jehovha wakawajiwa ngo kuwona mwana wake esitambujika (Wonanyi ndima 8)
9. Ngazvipi zvamunojija pana VaRoma 8:32, 38, 39, ngo pamusolo po rudo la Jehovha?
9 Muripo unotijijisa kuti akuna mundhu anotida maningi kudarika Jehovha, kuyange ukama wedu kana shamwari yedu. (Verenganyi VaRoma 8:32, 38, 39.) Pasina kukaya-kaya, Jehovha unotida maningi kupinda kutida katinozviita pacedu. Imwimwi munoda kurarama nokusingaperi here? Isusu tinoda kurarama nokusingaperi asi Jehovha ndiyena anoda maningi kuti isusu tirarame nokusingaperi. Imwimwi munoda kuti zvishaishi zvenyu zviregererwe here? Isusu tinoda kuregererwa zvishaishi zvedu asi Jehovha ndiyena anozvida maningi kupinda isusu. Iyena anokumbira kuti isusu titendere cipo ici ngokuva no rutendo wakavanga kaari no kumuzwira. Muripo unokhombija rudo wakakura wa Jehovha. Mu nyika ipsa tinozojija zvakawanda ngo pamusolo po rudo la Jehovha.—Mup. 3:11
MURIPO UNOTIJIJISENYI NGO PAMUSOLO PA JESU
10.(a) Ngenyi Jesu wakawajiwa ngo kuziva mafire aaizoita? (b) Jesu wakakhombijisa kudini kuti Jehovha ndi Mwari wakarurama? (Wonanyi bhokiso rinoti: “ Kugondeka ka Jesu Kakakhombijisa Kudini Kuti Jehovha ndi Mwari Wakarurama?”)
10 Jesu anoneseka maningi ngo zvinolangarirwa ngo vandhu ngo pamusolo pa Baba vake. (Johani 14:31) Jesu wakawajiwa maningi ngo zvakashata zvaizolangarirwa ngo vandhu ngo pamusolo pa Baba wake, pakuti iyena waizoulawa inga mundhu wainga asikareremeji Mwari kana kuti mushaishi. Ngo iyo ndava, iyena wakaita mukumbiro esiti: “Baba wangu, kudai zvesiita, kopo iyi ngaifunduruke kandiri.” (Mateu 26:39) Ngo kwenderera kake mberi akagondeka kuna Jehovha mbhera kufa, Jesu wakacenesa zina la Baba wake.
11. Jesu wakakhombijisa kudini rudo wakakura ku vandhu? (Johani 13:1)
11 Muripo unotijijisa kuti Jesu unoneseka maningi ngo vandhu, maningi-ningi vajiji vake. (Zvi. 8:31; verenganyi Johani 13:1.) Inga muezaniso, Jesu waizviziva kuti basa raiitari pa nyika lo kuparijira masoko akanaka, laizomuviisira zvineso zvakawanda, pejisire waizofa ngo maitire anowaja maningi. Jesu wakaita zviro zvese izvi zvainesari haiwa ngokuti wainga akagajwa ndi Baba wake kuti azviite, asi wakazviita ngokuti waida maningi vandhu. Kunja ka izvi, Jesu wakabatikana pa basa lo kuparijira, kujijisa no kubesa vamweni. Kunyange pazuva raakafa, Jesu wakawana nguva yo kusuka soka jo vajiji vake kuitira kuvajijisa, kuvavangisa no kuvatondhoja. (Johani 13:12-15) Pasure pazvo, kunyange waizwa kuwaja maningi esifa pa danda, Jesu wakapa soterero mushaishi waingaya pa divi lake ngo kumuvhunja kuti unozova naye muparadhiso, cimwenizve wakakhombijawo kuneseka kuna mai wake ngokukumbira Johani kuti azovangwarira. (Ruka 23:42, 43; Johani 19:26, 27) Jesu aato basi kukhombija rudo wake ku vandhu ngo kuvafira, iyena wakavabata ngo rudo no kunaka mweyo.
12. Jesu ari kutibesesa kudini ma zuva ano?
12 Kunyange Kristu wakafa kuti “atame kuzofazve,” iyena asiri kutiitira zviro zvakawanda. (VaR. 6:10) Kuitisa kudini? Iyena asiri kuenderera mberi esishanda kuitira kutipa zviro zvakawanda zvakanaka zvatinowana ngo ndava yo muripo. Ambowonanyi zvaari kuita zvino. Iyena ari kushanda inga Mambo wedu, Mupiri Mukuru no musolo wo ungano. (1 VaK. 15:25; VaE. 5:23; VaH. 2:17) Iyena ari kutungamirira basa lo kuunganija vo kuzojwa no vo magundata amweni, basa lokuti rinozopera dambujiko guru risati ratanga. b (Mateu 25:32; Mako 13:27) Iyena ari kutungamirirazve pakupa zvo kurhya zvo kunamata ku vashandiri vake vakathembeka mukati mo mazuva ano okupejisira. (Mateu 24:45) Mukati mo Kutonga kake ko Ciuru co makore, iyena unozoenderera mberi esitipa zviro zvatinoda. Jehovha wakatipa kamare Mwanake!
MUSAEMA KUJIJA
13. Kulangarijisisa kunozomubesesa kudini kuti muenderere mberi mesijija ngo pamusolo po rudo una Jehovha na Jesu kamuri?
13 Munozoenderera mberi mesijija ngo pamusolo po rudo una Jehovha na Jesu katiri, kudai mukaenderera mberi mesilangarijisisa ngo pamusolo pavo. Nguva imweni, mukati mo Cilangarijo co gore rino, imwimwi munganasa kuverenga Vhangeri rimwe kana kuti maviri. Musaverenga zvitsauko zvakawanda pa nguva imweyo. Cimwenizve, psakanyi zvikonzero zvinowonesa kuti ngenyi tinodikana kuda Jehovha na Jesu. Ngo gwanja riri rese, vhunjanyi vamweni zviro zvamunonga mesijija.
14. Kuenderana na Pisarema 119:97, kupsakisisa kungamubesesa kudini kuti muenderere mberi mesijija ngo pamusolo po muripo no zviro zvimweni? (Wonanyi foto.)
14 Kudai imwimwi muno makore akawanda muri mu cokwadi, nguva imweni mungazvivhunjisa kuti, zvinokwanisika kuwana zviro zvipsa ngo pamusolo po shwiro jinozivika maningi jakadai inga kururama ka Mwari, rudo lake pamwepo no muripo. Cokwadi, nguva yese tinozova no zviro zvokujija ngo pamusolo po shwiro iji. Hino ngazvipi zvamunodikana kuita? Verenganyi no kujija zviro zvinoshamaisa mu mabhuku edu akacijikira mu Bhaibheri. Pamunoverenga zviro zvokuti amunasi kuzvizwisisa, psakisisanyi. Ngo kudalo, pa zuva langarijisisanyi ngo zvamunonga maverenga no zvazvinobhuya ngo pamusolo pa Jehovha na Jesu no rudo wavo kamuri.—Verenganyi Pisarema 119:97 uye masoko opasi.
Kunyange tino makore akawanda tiri mu cokwadi, tingaengejera kubonga kedu ngo ndava yo muripo (Wonanyi ndima 14)
15. Ngenyi zvinokosha kuenderera mberi tesijija zviro zvipsa zvinowanika mu Bhaibheri?
15 Musaruza mudakalo paya pamunotama zviro zvinoshamaisa pamunonga mesiverenga kana kupsakisisa. Zviwonenyi inga mundhu ari kupsaka goridhe. Ngo kusengerera, vandhu vanopsaka goridhe, vanopeja nguva no mazuva akawanda vasati vawana nee zvigoridhe zvidoko. Ngo kudalo, vanoenderera mberi vesipsaka ngokuti nee cidimbu cidoko co goridhe cinokosha maningi kavari. Asi, zviro zvinokosha maningi ciro cimwe nga cimwe cipsa catinojija mu Bhaibheri. (Ps. 119:127; Zvi. 8:10) Ngo kudalo, ivanyi anosengerera, kwanirisanyi ulongwa wenyu wokuverenga Bhaibheri.—Ps. 1:2.
16. Tingatevejeresa kudini Jehovha na Jesu?
16 Pamunonga mesijija, ejanyi kushandisa zvamunongalo mesijija. Inga muezaniso, tevejeranyi kururama ka Jehovha ngo kubata vamweni musikakheti. Tevejeranyi rudo la Jesu laainga nalo kuna Baba wake no vandhu, ngo kuva makanasirira kuti muite zvinodiwa ndi Jehovha no kubesa vamweni kunyange zvikaita kuti upenyu wenyu unese nguva imwemi. Cimwenizve, tevejeranyi Jesu ngo kuparijira vamweni kuti vawanewo mukana wokutenda cipo cinokosha ca Jehovha.
17. Ngazvipi zvatinozowona mu cijijo cinotevera?
17 Patinozonasa kuzwisisa no kureremeja muripo, tinozodawo maningi Jehovha no Mwana wake. Ngokuti isusu tinovada, ivona vanozotidawo maningi. (Johani 14:21; Jak. 4:8) Ngo kudalo, ngatishandise besero ratinopuwa ndi Jehovha ngo kukuenderera mberi tesijija ngo pamusolo po muripo. Mu cijijo cinotevera, tinozojija ngo pamusolo po makomborero atinawo ngokuti Jesu wakatifira no kuwona kuti tingakhombijisa kudini kubonga pacedu.
NGOMA 107 Muezaniso wo Umwari wo Rudo
a KUSANANGURWA KO MAGAMA: Kulangarijisisa zvinobhuya kubatikana pa shwiro iri yese no kuipsakisisa.
b Kuunganija zviro zvese zviri kudenga” zvakabhuiwa ndi Pauro inga zvakanyorwa pana VaEfeso 1:10, zvakasiyana no ‘kuunganija vakakhetwa’ zvakabhuiwa ndi Jesu inga zvakanyorwa pana Mateu 24:31 na Mako 13:27. Pauro wainga esibhuira nguva yokuti Jehovha unozokheta Makristu anozotonga na Jesu awo akazojwa ngo mweya mupsene. Asi Jesu wainga esibhuya nguva yokuti vokuzojwa vanonga vasara pa nyika pano, vanozotorwa vounganijwa kuti vaende kudenga mukati mo dambujiko guru.
