MUSOLO WO KUJIJA 5
NGOMA 108 Rudo hwa Mwari Hwakagondeka
Tinobeseswa Kudini Ngo Rudo la Jehovha?
“Jesu Kristu wakaviya pasi pano kuzoponesa vashaishi.” —1 Tim. 1:15.
ZVATISAJIJA
Mu cijijo cino, tinozowona kuti kuitisa kudini isusu tinobesereka ngo muripo uye nokuwona kuti tingakhombijisa kudini kubonga Jehovha.
1. Ngazvipi zvatingaita kuti tidakajise Jehovha?
AMBOLANGARIRANYI kupa cipo cinokosha, cakaseja uye cakanaka ku mundhu wamunoda. Imwimwi maizokhugunyika kudai mundhuwo akatora cipoco ociviga otamazve kulangarira ngo pamusolo paco. Ngo divi rimweni, imwimwi maizodakala maningi kudai mundhuwo akashandisa zvakanaka cipo ici, no kukhombija kubonga. Cipo ici cinobatana papi no cipo co muripo wa Jehovha? Jehovha wakapa mwana wake kuitira isusu. Jehovha unodakala maningi patinokhombija kubonga cipo ici cinokosha no rudo lake lakamuita kuti atipe muripo uwu!—Johani 3:16; VaR. 5:7, 8.
2. Ngazvipi zvatinozowona mu cijijo cino?
2 Pakuhamba ko nguva, tingatamazve kubonga ngo cipo ici, zvaizodai inga kuviga cipo ca Jehovha. Isusu tinonga takadakala ngo cipo ici, asi tinonga takaciviga inga tisikaciwoni. Kuti titame kuita izvi, tinodikana kugara tesibonga ngo zvatakaizirwa ndi Jehovha na Jesu. Cijijo ici cinozotibesa kuita izvi. Cimwenizve, tinozowona kuti tingabeseswa kudini ngo muripo uwu, nokutizve tinozobeseswa kudini ndiwona mberiyo. Tinozowonazve kuti tingaitisa kudini kuti tikhombije kubonga rudo la Jehovha maningi-ningi pa nguva yo cilangarijo.
TIRI KUBESESWA KUDINI MAZUVA ANO
3. I gwanja ripi ratingabesereka ndirona ngo muripo mazuva ano?
3 Zvino tiri kubeswa ngo muripo wa Kristu. Inga muezaniso, ngo ndava yo muripo, Jehovha unoregerera zvishaishi zvedu. Iyena aavangirijwi kuti atiregerere asi iyena unoda. Munyori wo Pisarema wakabonga esiti: “Ngokuti imwimwi Jehovha makanaka, nguva yese makanasirira kuti muregerere.”—Ps. 86:5; 103:3, 10-13.
4. Jehovha wakapa ani muripo? (Ruka 5:32; 1 Timoti 1:15)
4 Vamweni vedu vangazvizwa inga kuti avafanei kuregererwa ndi Jehovha. Kunasa kubhuya, tese tinozvizwawo kudalo. Mupostori Pauro wakazwisisa kuti iyena asaifaneya kudanijwa mupostori, ngo kudalo iyena wakabhuya kuti: “Ndiri zvandiri zvino ngo pamusolo po unyasha usikaezaniswi wa Mwari.” (1 VaK. 15:9, 10) Patinokhauya pa zvishaishi zvedu, Jehovha unotiregerera. Ngenyi? Asipi ngo ndava yo kuti tinofaneya, asi ngokuti iyena unotida. Pamunozvizwa musikafanei, langariranyi kuti Jehovha wakapa muripo haiwa ku vashaishi basi asi kuvashaishi vanokhauya.—Verenganyi Ruka 5:32; 1 Timoti 1:15.
5. Kubhuya kuti Jehovha unodikana kutiregerera? Sananguranyi.
5 Apana na umwe wedu anodikana kulangarira kuti unozoashira nyasha ja Jehovha, ngokuti uno makore akawanda esimunamata. I cokwadi kuti Jehovha unolangarira zvese zvatakamuitira. (VaH. 6:10) Iyena wakatipa muripo wake mahala haiwa kutibhadhala ngo ndava yo basa latinomuitira. Kudai tikawona kuti isusu tinodikana kuashira nyasha kana kuzviwona inga tinokosha maningi, kunasa kubhuya tinonga tesizviwonesa kuti kufa ka Jesu akuna zvakunoshanda.—Ezanisanyi na VaGaratiya 2:21.
6. Ngenyi Pauro wakashanda ngo simba mu basa la Jehovha?
6 Mupostori Pauro waiziva kuti aasaizowana nyasha ja Jehovha. Hino ngenyi iyena waishanda ngo simba mu basa la Jehovha? Haiwa kuti awonese kuti waifaneya, asi kuti akhombije kubonga ngo nyasha jisikaezaniswi ja Mwari. (VaE. 3:7) Inga ndi Pauro, isusu tinoenderera mberi tesishanda ngo simba, haiwa kuti tifaneye kuashira nyasha ja Jehovha, asi kuitira kukhombija kubonga kaari.
7. I gwanja ripi ratingabeswa ndirona ngo muripo mazuva ano? (VaRoma 5:1; Jakobe 2:23)
7 Njira imweni yatingabeswa ndiyona ngo muripo, ngo yo kuva no ushamwari wo phedo pacedu na Jehovha. a Inga zvatakawona mu cijijo cakapera, patakabarwa tainga tisina ushamwari na Jehovha. Asi ngo ndava yo muripo, isusu tingava no “runyararo na Mwari” ngo kukwanisa kuvangisa ushamwari naye.—Verenganyi VaRoma 5:1; Jakobe 2:23.
8. Ngenyi tinodikana kubonga Jehovha ngo cidakajiso co mukumbiro?
8 Kuita mukumbiro kuna Jehovha ciro cinokosha maningi catingaita kuti tive no ushamwari wo phedo naye. Jehovha aazwi basi mukumbiro jatinoita pakazara vandhu no pa musangano, asi unozwawo mukumbiro wa umwe nga umwe wedu. Patinoita mukumbiro, tinopungura kuneseka kedu, asi izvi andizvopi zvatinowana basi ngo ndava yokuita mukumbiro. Iwona ungatovangisawo ushamwari wedu na Jehovha. (Ps. 65:2; Jak. 4:8; 1 Johani 5:14) Jesu paainga pasi pano, wakaita mukumbiro kuna Jehovha kakawanda, ngokuti waizviziva kuti Jehovha waizwa mukumbiro jake. Cimwenizve, mukumbiro waimubesa kuti aenderere mberi ano ushamwari wakavanga na Baba wake. (Ruka 5:16) Isusu tinobonga maningi muripo wa Jesu ngo kuti tinokwanisa kuva shamwari ja Jehovha no kubhuya naye ngo kuita mukumbiro!
TINOZOBESESWA KUDINI MBERIYO?
9. Muripo unozobesesa kudini vanamati vakagondeka mberiyo?
9 Vanamati vakagondeka va Jehovha vanozobeseswa kudini ngo muripo mberiyo? Ivona vanozoashira upenyu usingaperi. Vandhu vakawanda vanolangarira kuti izvi azvizokwanisiki ngokuti vandhu vari kufa ko makore akawanda. Asi, cidisiso ca Jehovha cainga cokuti vandhu vararame no kusingaperi. Nokainga kuti Adhamu aato kushaisha, apana na umwe waizolangarira kuti azvingakwanisiki kurarama no kusingaperi. Kunyange tikawona zvesinesa kurarama no kusingaperi zvino, tingathemba kuti izvi zvinozoitika ngokuti tinoziva kuti Jehovha wakabhadhara mutengo mukuru wo upenyu wo Mwana wake kuti izvi zvikwanisike.—VaR. 8:32.
10. Ngazvipi zviri kusotererwa ngo vokuzojwa no vo magundata amweni?
10 Kunyange kuti upenyu usingaperi makomborero atinozoashira mberiyo, Jehovha unoda kuti tisoterere. Vokuzojwa vari kusoterera kuzova no upenyu kudenga pavanonga vesitonga nyika na Jesu. (Zvak. 20:6) Vo magundata amweni vari kusoterera kuzorarama mu paradhiso vasingawajiwi no kusuruvara. (Zvak. 21:3, 4) Imwimwi muri umwe wo magundata amweni ano soterero yo kuzorarama pasi pano here? Uwu asipi mupfupo mudoko tikaezanisa no upenyu wo kudenga. Vandhu vese vakasikirwa zvonazvo. Upenyu mu paradhiso unozotidakajisa maningi.
11-12. Ngaapi makomborero amweni o mu Paradhiso atingasoterera? (Wonanyi foto.)
11 Langariranyi kuti upenyu unozova wakadini kamuri mu nyika ipsa. Imwimwi amuzonesekizve ngo kuwaja no kufa. (Isa. 25:8; 33:24) Jehovha unozomupa zviro zvese zvakanaka zvamunonga mesida. Ngazvipi zvamunozoda kujija? Maidakarira kuzojija ngo pamusolo po zvinyama? Maizodakarira kujijira kurija? Imwimwi munozodakarira kujijira kudhezenyari? Mu paradhiso tinozoda vandhu vanoziva kunasira no kuvaka nyumba. Vandhu vanozodikanazve kuti varime, kunasirira zvokurhya, kunasirira zviro zvinoda kuzoshandiswa, kusima maruva no kumabata zvakanaka. (Isa. 35:1; 65:21) Pamunozorarama no kusingaperi, munozova no nguva yo kuita zvese izvi no zvimweni zvakawanda.
12 Tinozova no mudakalo mukuru wo kuzoashira vaya vanozomuswa kuti vararamezve. (Mabasa 24:15) Langariranyi ngo mudakalo wamunozova nawo ngokujijira zvizinji ngo pamusolo pa Jehovha, no kusotesesa mabasa ake o zviro zvakawanda zvaakasika. (Ps. 104:24; Isaya 11:9) Ciro cinokosha maningi kupinda izvi ngo cokuti imwimwi amuzoshaishi. Ngo kudalo, munozokwanisa kushandira Jehovha musikadikani kukumbira kuregererwa. Imwimwi maizocinja makomborero ese aya o mberi ngo “kubusa mabuso o nguva shoma o cishaishi” here? (VaH. 11:25) Zvakajeka kuti haiwa. Makomborero aya anokosha maningi kupinda zvese zvatingadikana kuita mazuva ano. Langariranyi kuti pamunonga muri mu nyika ipsa amuzolangaririzve ngo soterero yo mberi. Pa nguva yonayo, nyika ipsa inozonga iri ndau yedu yo kugara mazuva ese. Izvi azvisaizokwanisika kudai Jehovha wainga asito kukhombija kuti unotida ngo kutipa Mwana wake!
Makomborero api amunosoterera kuwana mu paradhiso kuitira vandhu vese? (Wonanyi ndima 11-12)
TENDERANYI RUDO LA JEHOVHA
13. Tingaitenyi kuti tikhombije kubonga rudo wa Jehovha? (2 VaKorinde 6:1)
13 Tingaitisa kudini kuti tikhombije kubonga Jehovha ngo kutipa kake muripo? Ngo kukanda basa lake pakutanga mu upenyu wedu. (Mateu 6:33) Kunasa kubhuya, Jesu wakafa kuti “vandhu vanorarama, varege kuzviraramira vega, asi vararamire wiya wakavafira no kumuka.” (2 VaK. 5:15) Jehovha ngo kuita kake izvi, wakakhombija kunaka mweyo no kutiregerera. Patinoita zvese zvatinokona kuti timushandire tinokhombija kuti tiri kuzwisisa zvese zvaakatiitira, cimwenizve tinonga tesibonga.—Verenganyi 2 VaKorinde 6:1.
14. Tingakhombijisa kudini kuti tinothemba ndhungamiriro ja Jehovha?
14 Tingakhombijazve kubonga rudo la Jehovha ngo kumuthemba no kuzwa ndhungamiriro jake. Kuitisa kudini? Paya patinoita zvikhethwa zvakadai inga cikora cipi catinodikana kujija kana basa ripi ratinodikana kuita, tinodikanawo kuziva kuti ngazvipi zvinoda Jehovha kuti isusu tiite. (1 VaK. 10:31; 2 VaK. 5:7) Patinokhombija rutendo wedu ngo zviito, ciro cinoshamaisa cinoitika ngo cokuti, rutendo wedu no ushamwari wedu na Jehovha zvinovanga maningi. Cimwenizve, soterero yedu inovangawo maningi.—VaR. 5:3-5; Jak. 2:21, 22.
15. Tingakhombijisa kudini kubonga pa nguva yo Cilangarijo?
15 Kuno gwanja rimweni ratingaita kui tikhombije kubonga rudo wa Jehovha. Gwanja iri ngolo kushandisa nguva yo Cilangarijo kuitira kukhombija Jehovha kuti tiri kumubonga maningi ngo ndava yo muripo. Kunja kokulonga kuti tive pa Cilangarijo, tinodikanawo kukoka vamweni kuti vaviyewo ku Cilangarijo. (1 Tim. 2:4) Vhunjanyi vamunokoka kuti zvicinyi zvinozoitika pa Cilangarijo. Imwimwi mungazotovakhombija vhidhiyo jinowanika mu jw.org jino musolo inoti: Ngenyi Jesu Wakafa? no Kulanagariija Kufa ka Jesu.. Vakuru vanodikanawo kukoka vaya vasikasaviyi kumusangano. Langariranyi kuti kudenga no pasi pano kunozova no mudakalo mukuru maningi kudai magundata akalasika a Jehovha akakweverwa kuti aviyezve mu danga. (Ruka 15:4-7) Pa Cilangarijo, aticungamijani basi no hama no hanzvaji, asi tinocungamijawo vapsa na vaya vainga vasikasaviyi kumusangano ko nguva yakareba. Tinoda kuti ivona vazvizwe kuti vaashirwa zvakanaka!—VaR. 12:13.
16. Ngenyi tinodikana kuengejera basa redu pa nguva yo Cilangarijo?
16 Imwimwi mungaita zvawanda mu basa la Jehovha pa mavhiki manganani Cilangarijo cisati catanga no pacinopera? Kuita kudalo, igwanja lakanaka lokukhombija kubonga ngo zvatakaizirwa ndi Jehovha na Jesu. Patinobatikana mu basa la Jehovha, tinozowona kuti iyena ari kutibesa maningi, inga muviyo rutendo wedu unozovangawo maningi. (1 VaK. 3:9) Kunja kwazvo, nasanyi kuteverera ulongwa wo kuverenga Bhaibheri kuitira Cilangarijo unowanika pa cibhuku Ongororanyi Rugwaro lo zuva ngo zuva no pa bhokiso rinowanika pa Co Kunyorera zvo Musangano. Imwimwi mungakheta kushandisa mavhesi aya o mu Bhaibheri inga ulongwa wenyu wo kujija.
17. Ngazvapi zvinodakajisa Jehovha? (Wonanyi bhokiso rinoti: “ Ngazvipi Zvatingaita Kuti Tikhombije Kubonga Rudo wa Jehovha?.”)
17 Icokwadi kuti mugariro wenyu ungatama kumutendera kuti muite zvese zvabhuiwa mu cijijo cino. Langariranyi kuti Jehovha aezanisi zvamunoita no zvinoitwa ngo vamweni, asi anowona zviri mu mweyo menyu. Iyena anodakala maningi pamunomubonga ngo mweyo wese ngo cipo cake co muripo.—1 Sam. 16:7; Mako 12:41-44.
18. Ngenyi tinobonga Jehovha na Jesu Kristu?
18 Kunasa kubhuya, muripo wakatiita kuti tiregererwe zvishaishi zvedu, kuva no ushamwari na Jehovha no kuva no soterero no kurarama no kusingaperi. Tinozoenderera mberi tesibonga rudo wa Jehovha uwo wakamuita kuti iyena atipe makomborero onawo. (1 Joh. 4:19) Tinokhombijawo kubonga Jesu uwo wakatida maningi ngo kutipa upenyu wake!—Johani 15:13.
NGOMA 154 Rudo Hucingaperi
