•  Masoko Okutanga 2

•  Upfumi Hunovha mu Soko ra Mwari 3-5

  •  Hurukuro 3

  •  Upfumi hwo Kumujimu 4

  •  Kuverengwa ko Bhaibheri 5

•  Zvishandisenyi mu Basa ro mu Munda 6-11

  •  Mavhidhiyo o Kubhuisana ko Kuezanisira 7

  •  Pakutanga Kusongana no Mundhu 8

  •  Hwiririro 9

  •  Jijo yo Bhaibheri 10

  •  Hurukuro 11

•  Maponero Ocikristu 12-13

  •  Jijo yo Bhaibheri yo Ungano 13

•  Masoko Okupejisira 14

•  Itisanyi Nane pa Kuverenga no Kujijisa 15

•  Kusimba no Kupangira 16

•  Nguva 17

•  Kufambihwa ngo Muvonereri wo Ndharaundha 18

•  Sumana yo Gungano ro Ndharaundha kana ro Mutundhu 19

•  Sumana yo Cirangarijo 20

•  Muvonereri wo Musongano wo Upenyu no Mushando 21

•  Mutungamiriri wo Musongano wo Upenyu no Mushando 22

•  Mupi wo Mazano 23

•  Zvikwata Zvimweni 24

•  Mavhidhiyo 25

1. Musongano wo Upenyu hwedu hwo Cikristu no Mushando unozoizwa mukuzwirana no nda-nda-nda inowanika pa Upenyu Hwedu hwo Cikristu no Mushando—Co Kutarira zvo Musongano zve mukuzwirana no ndhungamiriro jinotevera. Vacumaeri vese vanodikana kukokwa kuti vajipire kuti vatendere kugajwa kuita mativi o vajiji. Vamweni vanoviya ku musongano jo ungano nguva jese vangaitavo mativi, kudari vanotenderana no jijiso jo Bhaibheri zve kudari maponero avo anozwirana no ndhungamiriro jo Cikristu.—be pheji 282.

  2. Museswa umwe. Sumana ngo sumana, pasure po ndumbo no mukumbiro wo kutanga, mutungamiriri anozomusa cidaka-daka ngo pamusoro po zvinozojijwa pa musonganowo. Mutungamiriri anodikana kugogomejera masoko anozobesera maningi ungano.

  3. Hurukuro: Museswa 10. Musoro no masoko o mafundo maviri kana matatu zvinowanika pa Upenyu no Mushando Co Kutarira zvo Musongano. Hurukuro iyi inodikana kuitwa ngo mukuru kana mubeseri wo ungano anokwanirisa. Kudari kuri kutangiswa ko bhuku ibza ro mu Bhaibheri pa urongwa hwo kuverengwa ko Bhaibheri ko sumana ngo sumana, kunodikana kuvoneswa vhidhiyo yo hurukuro iyi. Muiti wayo, anodikana kuvonesa kuzwirana kuripo ko vhidhiyo no hurukuroyo. Asi, aadikani kukanganwa  kukwekweteja mafundo akandandaniswa pa divi ro hurukuro iyi anowanika pa co kutarira zvo musongano. Cimwenizve, kudari nguva iciripo anodikanavo kushandisa mapikica no masoko akavhiswa mu Bhaibheri no cinangwa co kuengejera shwiro iri kubhuiwaro. Iyena angabatanijavo mareferensiya amweni ano masoko anozwirana, asi anoita izvi kudari zvecibesera mafundo ari mu hurukuro.

 4. Upfumi hwo Kumujimu: Museswa 10. Divi iri ngo ro muvhunjo no mupinguro ricina nee matangiro nee mbhejiso. Rinodikana kuitwa ngo mukuru kana mubeseri wo ungano anokwanirisa. Muitisi anodikana kuitira ungano muvhunjo muviri. Iyena angasungazve kuti zvinodikana kuverenga mavhesi ese anongaro aripo kana kuti haiwa. Vanopa mupinguro, vanodikana kupeja 30 o masegundo kana pasi.

 5. Kuverengwa ko Bhaibheri: Museswa 4. Divi iri rinodikana kugajwa hama. Mujiji anodikana kuverenga paakagajwaro acikadikani kupa masoko o kutanga no okupejisira. Mutungamiriri wo musongano anozodikana kupsaka kubesera mujiji kuti averenge ngo maitiro akarungama, anozwisisika, anozika ushoni, ecigogomejera munodikana, kucinja izwi panodikanaya kucinja, kumbokama panodiwa kudaro no kuverenga mu cibarihwe. Zvecivoneka kuti mavhesi amweni angaita mashoma, amweni ova akawanda, muvonereri wo Musongano wo Upenyu no Mushando anodikana kuvonavo kukwanisa kuverenga kunoita umwe na umwe paanoga ecivagaja.

 6. Museswa 15. Divi iri ro musongano rakanasirihwa kuti vajiji vajijiswe kuitisa nane kuziva kwavo basa ro kucumaera no kujijisa. Vacumaeri vanodikana kushandisa mazano anowanika pa divi rinoti “Kubhuisana ko Kuezanisira” ko Co Kutarira zvo Musongano Upenyu no Mushando. Ngo kudaro, pacina ndhungamiriro imweni, vangasana kuita muvhunjo umweni, vhesi imweni, muvhunjo umweni wo kuita hwiriro no marongero amweni anonasa kuzwirana no zvinoitika mundharaundhemo. Kudari diviro ricina ndhungamiriro iri yese, vacumaeri vangasana kupa bhuku kana kukhombija vhidhiyo iri mu Bhokiso redu Rokujijisa. Kuitira kubesehwa ushoni mu basa ro kucumaera, divi rinoti “Kubhuisana ko Kuezanisira” ringava no divi rinoti “Wananyi Vhesi Iyi mu bhuku riri mu Bhokiso redu Rokujijisa.” Vajiji vangasana kushandisa thurusi iri pamativi avo. Co Kutarira zvo Musongano, cinokhombija nguva yo divi ro mujiji umwe nga umwe, pomwe no ndhungamiriro. Vajiji avadikani kushandisa masoko o kuengejera kuti vapejise nguva inonga yasara pa divi ravo. Kukhombijira kwakanasa kunasirihwa, kungatopeja museswa umwe kana kupindirija. Kudari zvecidiwa, vakuru vangagajwa inga mujiji. Nguva jimweni pangavoniwa vhidhiyo yo “Kubhuisana ko Kuezanisira.” Divi iri, ringagajwa mukuru wo ungano kana mubeseri wo ungano anokwanisa.

 7. Mavhidhiyo o Kubhuisana ko Kuezanisira: Mavhidhiyo o kucumaera ko kuezanisira anozovoneswa no kubhuisana ngo pamusoro pawo mukuvo no mukuvo. Mavhidhiyo aya anovonesa maitiro o pakutanga kusongana no mundhu no hwiririro. Divi iri ricazoitwa ngo mutungamiriri wo musongano wo Upenyu no Mushando

 8. Pakutanga Kusongana no Mundhu: Divi iri ringagajwa hama kana hambzaji. Mubeseri wo mujiji anodikana kuva mwanarume doni kana mwanakaji doni kana anodikana kuva wo pa mbhuri imweyo. Mujiji no mubeseri vangaima kana kugara pasi. Mujiji anodikana kushandisa macungamijire anozwirana no mundharaundhemo. Kuezanisira kunodikana kucijikira pa shwiro inowanika pa divi rinoti “Kubhuisana ko Kuezanisira” ro Co Kutarira zvo Musongano.

 9. Pahwiririro: Divi iri rinozoitwa ngo mujiji, ringagajwa hama kana hambzaji. Mubeseri wo mujiji anodikana kuva mwanakaji doni kana mwanarume doni. (km 5/97 pheji 2) Mujiji no mubeseri vangaima kana kugara pasi. Mujiji anodikana kukhombija zvokunanga paanohwiririra mundhu wakakhombija kudakarira pakutanga kusongana no mundhu. Kuezanisira kunodikana kucijikira pa shwiro inowanika pa divi rinoti “Kubhuisana ko Kuezanisira” ro Co Kutarira zvo Musongano.

 10. Jijo yo Bhaibheri: Divi iri rinozoitwa ngo mujiji, ringagajwa hama kana hambzaji. Mubeseri wo mujiji anodikana kuva mwanakaji doni kana mwanarume doni. (km 5/97 pheji 2) Mujiji no mubeseri vangaima kana kugara pasi. Divi iri rinodikana kukhombijihwa inga jijo yo Bhaibheri yatanga kare. Apana  dikano yo kunanga masoko o kutanga kana okupejisira, kuciripi paya po kuti mujiji anonga ecishandira fundo rinokumbira kuti aite zvondhozvo. Apanazve dikano yo kuverenga ngo izwi guru masoko ese o divi rinongaro rakagajwa mujiji kuti ashandise pakuitisa jijo, pikija hazvo zvingaizwa. Kudari divi rikabatanija vhidhiyo, inodikana kukhombijwa ngo kuezanisira, asi aidikani kurijwa. Zvinodiwa ngo zvo kugogomejera mazano akanaka o kujijisa.

 11. Hurukuro: Divi iri rinozoithwa ngo hama, iyona inozoriita inga hurukuro yo ungano.

 12. Pakupera ko ndumbo, museswa 15 jinotevera jo divi iri, jinozogogomejera divi rimwe kana maviri akanasirihwa kuti abesere vapurutani kuti vashandise Soko ra Mwari. Kudari pacina zvimweni zvingavepo, divi iri ringagajwa vakuru vo ungano kana vabeseri vo ungano vanokwanirisa. Divi ro zvinodiwa zvo ungano rinoitwa ngo mukuru basi. Kudari pakava no divi ro kubhuisana kwakacijikira pa musoro unonga uri pa Co Kutarira zvo Musongano Upenyu no Mushando, hama yakagajwa divi iri, ingaita muvhunjo jokuengejera kuti igogomejere mafundo makuru anodiwa anowanika pa musorowo.

  13. Jijo yo Bhaibheri yo Ungano: Museswa 30. Divi iri rinoitwa ngo mukuru anokwanirisa. (Kudari kuno vakuru vashoma, vabeseri vo ungano vanokwanirisa vangagajwa, zvecidiwa.) Dare ro vakuru rinozoita cisungo co kuti ndiyani anokwanirisa kuti aitise jijo yo Bhaibheri yo Ungano. Vanotendehwaya kuti vaitise jijo yo Bhaibheri yo ungano vanodikana kuitisa jijo iyi ngo maitiro anobaya mwoyo, vecinasa kushandisa nguva, vecigogomejera mavhesi ano mafundo makuru no kubesera vapurutani kuvona muviyo wakanaka wo kushandisa mafundo aripo. Vanodikana kushandisa ndhungamiriro jinoshandiswa ngo vanoitisaya Jijo yo Murindiri. Shwiro inongano yecijijwa ikanaswa kudavihwa ushoni, apana dikano yo kuenderera mberi no jijo yo bhaibheri yo ungano. Zvecikwanisika, vanoitisaro no vanoverenga pa jijo iyi vanodikana kucinjwa sumana ngo sumana. Kudari Mutungamiriri wo Musongano Upenyu Hwedu no Mushando akakumbira kuti muitisi wo jijo iyi apungure nguva yake, muitisi anodikana kuvona maitiro aangazviita ndiwona kuti apungure. Kangaije angasunga kutama kuverengwa ko ndima jimweni.

  14. Museswa 3. Mutungamiriri wo Musongano wo Upenyu no Mushando anozohwirijira mafundo ayani anobesera musongano. Iyena anodikana kunanga zvinozojijwa pa sumana inotevera. Kudari nguva iciripo, iyena angananga mazina o vajiji vanozova no mativi pa sumana inoza. Kudari pacina zviri zvese, pakadiwa kuverengera ungano zviziviso kana karata, mutungamiriri anodikana kuzviita pa mukuvo mu masoko okupejisira. Shwiro jo cirovejeso jakadari inga basa ro mu munda, urongwa hwo kucenesa nyumba yo umambo, ajidikani kuziviswa ngo patiribhuna, asi jinodikana kunamwa panodihwa zviziviso. Kudari zviziviso kana karata aidokwanisiki kuverengwa pa mukuvo wo masoko okupejisira, mutungamiriri anodikana kukumbira hama jino mativi pa divi rinoti “Maponero O Cikristu” kuti vapungure nguva javo jo mativi. (Vonanyi  ndima 13 no  17.) Musongano unodikana kufungiswa ngo ndumbo no mukumbiro.

 15. Mujiji umwe na umwe anodikana kuviisa ku Musongano wo Upenyu no Mushando bhurushura Kuverenga no Kujijisa, angariviisa riri mufoni kana riri ngo munyara. Mutungamiriri wo Musongano wo Upenyu no Mushando, anodikana kushandisa bhurushura iri kuti apangire no kusimba vajiji. Mujiji umwe nga umwe anodikana kuvangisira kujija cijijo cakafungihwa pambhiri po divi raakagajwa ro Upenyu no Mushando Co Kutarira zvo Musongano. Pa divi rinoti: “Tariranyi Kubudirira Kwenyu” pa bhurushura iri rakanasirihwa kuti rishandiswe ngo mujiji, mutungamiriri aadikani kutara ciri cese pondhopo.

  16. Pa cijijo cimwe nga cimwe, mutungamiriri wo Musongano wo Upenyu no Mushando ano museswa unokhwedera kuita umwe kuti ape mazano akacijikira mu bhurushura Kuverenga no Kujijisa. Mutungamiriri paanonga ecidanijira mujiji aviye koita divi rake, aadikani kunanga cijijo caari kushandira. Asi, mujiji akapeja kuita divi rake, mutungamiriri anopekeja masoko o kusimba anofanera, onanga cijijo  caishandira mujiji, wonanga mafundo anovonesa kuti mujiji waita ushoni pa fundo raakagajwa kushandira kana ngo kunaka mwoyo kwese angasanangura kuti ngenyi zvaizova zvakanaka kuti mujiji ahwirijirezve pa fundo iri ro mazano. Mutungamiriri angananga masoko amweni ngo pamusoro po divi rondhoro, kudari akavona kuti zvinosisira kuno mujiji kana kuvapurutani. Mutungamiriri angapa mazano amweni anowanika mu bhurushura Kuverenga no Kujijisa kana bhuku Chikoro Choushumiri. Iyena angapa mazano aya pakupera ko musongano kana nguva imweni, akacijikira pacijijo caaishandira kana pacijijo cimweni. Kuti muwane masoko akawanda ngo pamusoro po basa ro Mutungamiriri wo Musongano wo Upenyu no Mushando no ro mupi wo mazano, vonanyi  ndima 17,  22 no  23.

     17. Apana anodikana kupindirija nguva yaakagajwa, nee masoko o mutungamiriri wo Musongano wo Upenyu no Mushando. Pikija masoko okuti “kana pasi” aacaviyi pa museswa wo gajo, apana dikano yokupeja museswa yakawanda, kudari diviro ranaswa kuithwa ngo museswa mushoma. Kudari mujiji akatanga kupindirija nguva yake, ngo kungwarira kwese anodikana kukamiswa. Kudari vaiti vo mativi amweni vakapindirija nguva, mupi wo mazano anodikana kuvapangira ngo pamutivi. (Vonanyi  ndima 23.) Musongano wese, kubatanija ndumbo no mukumbiro, unodikana kuitwa mukati mo nguva imwe no 45 o museswa.

 18. Kudari ungano ikava yecifambihwa ngo muvonereri wo ndharaundha, urongwa unodikana kufamba mukuzwirana no ndhungamiriro inowanika pa Co Kutarira zvo Musongano Upenyu Hwedu hwo Cikristu no Mushando, asi zvinocinja nga izvi: Pa divi ro Jijo yo Bhaibheri yo Ungano rinowanika pa Maponero o Cikristu rinozofakehwa ngo hurukuro yo basa yo 30 o museswa inozoitwa ngo muvonereri wo ndharaundha. Icito yaizwa, mutungamiriri wo Musongano wo Upenyu no Mushando anozohwirijira zvapera kujijwa, wonanga zviri pa urongwa hwo sumana inotevera, woita ciziviso ciri cese cinonga cecidikana kuitwa no kuverenga karata kudari zvecidiwa, perapo wodanijira muvonereri wo ndharaundha. Hurukuro yo basa ikapera, muvonereri wo ndharaundha anozofungisa ngo ndumbo inokhetwa ndiyena. Iyena angasana kukoka hama imweni kuti iviye kuzoita mukumbiro wokupejisira. Pa sumana iyi, akuna zvikwata zvimweni zvinozoita mativi mu sara imweni. Magurupu angaenderera no musongano javo pikija muvonereri wo ndharaundha ari kufambira ungano yavo. Asi zvinodikana kuva pamwepo no ungano kuti vese vazwe kuzwa hurukuro yo basa yo muvonereri wo ndharaundha.

 19. Pa sumana iyi, akuzoitwi musongano jo ungano. Zvakarongwa kuti zvijijwe pa sumana iyi zvinodikana kujijwa ngo mundhu pacake kana inga mbhuri.

 20. Kudari Cirangarijo cikaithwa pakati po sumana, Musongano wo Upenyu no Mushando auzoitwi. Zvokadi, pa njiku yo Cirangarijo panodikana kuithwa urongwa wo musongano wo basa ro mu munda.

 21. Mukuru wakakhetwa ngo dare ro vakuru anoshanda inga muvonereri wo Musongano wo Upenyu no Mushando. Iyena ano mutoro wo kuvonerera kuti musongano uwu unase kurongwa no kuithwa mukuzwirana no ndhungamiriro iji. Iyena anodikana kuva akasujunuka pa kudavijana no mupi wo mazano. Co Kutarira zvo Musongano Upenyu Hwedu hwo Cikristu no Mushando cikandoguma, muvonereri wo Musongano wo Upenyu no Mushando anozogaja mativi ese o musongano wo pakati po sumana, mativi o mweji muviri. (Vonanyi  ndima 2-14.) Izvi zvinobatanija kugaja mativi o vajiji kuri kushandisa rista yo jihama jakatendehwa ngo dare ro vakuru. Anogajavo mativi anoita ngo hama jese kubatanija no mutungamiriri wo musongano wo pakati po sumana. Hama inodikana kuashira gajo mukati mo sumana ndhatu njiku yake icito yaguma. Ngo pamusoro po kugaja vajiji, zvinodikana kushandisa phepha rinoti Upenyu Hwedu hwo Cikristu no Mushando Kugajwa Divi pa Musongano (S-89). Muvonereri wo Musongano Upenyu no Mushando anodikana kuva no cokwadi cokuti urongwa hwese o vandhu vakagajwa udihwe pa kwadhru yo zviziviso. Dare ro vakuru ringagaja mukuru umweni kana mubeseri wo ungano kuti amubesere. Ngo kudaro, mativi acikaithwi ngo vajiji anodikana kugajwa ngo vakuru basi.

  22. Sumana ngo sumana, mukuru umwe anogajwa kuti ashande inga mutungamiriri pa Musongano wo Upenyu no Mushando. (Pa ungano ino vakuru vashoma, vabeseri vo ungano vanokwanirisa vangagajwa kuti vashande inga mutungamiriri, kudari zvecidiwa.) Iyena ano mutoro wo kunasirira masoko okutanga no okupejisira no kubhuisana ngo vhidhiyo yokucumaera ko kuezanisira. Iyena ngaanodanijira mativi ese o pa musongano wondhowo zve mukuzwirana no mutengo wo vakuru vo pa unganopo, iyena angaitavo mativi amweni pa musongano, maningi-ningi payani pangakhombijwa vhidhiyo icikadikani kubhuisana no ungano. Masoko aanopa pasure po kuitwa ko divi rimwe nga rimwe anodikana kuva mashoma maningi. Dare ro vakuru rinozogaja vakuru vanokwanirisa kuti vashande inga vatungamiriri. Vakuru vanogajwa mukuvo no mukuvo kuti vatungamirire musongano. Mukuzwirana no mugariro wo paunganopo, muvonereri wo Musongano wo Upenyu no Mushando, ndiyena anoshandiswa maningi inga mutungamiriri kupinda vakuru vamweni vanokwanirisa. Kudari mukuru wo ungano anokwanirisa kuti atungamirire Jijo yo Bhaibheri yo Ungano, zvakajeka kuti iyena anokwanisavo kushanda inga mutungamiriri wo musongano. Tapota mucadokanganwa kuti mukuru anogajwa kushanda inga mutungamiriri, no rudo hwese zve ngo maitiro anobesera anozodikanavo kusimba no kupa mazano kuno vajiji vakagajwa. Mutungamiriri ano mutoro wo kungwarira kuti musongano upere ngo nguva kwayo. (Vonanyi  ndima 14 no  17.) Kudari mutungamiriri ecida , patribhuna pangadihwa mukorofoni umwe waangashandisa kuti adanije mundhu ano divi rinotevera ari ngo pamutivi, kudari pano ndau inokwana. Hama inoda kuita divi rinotevera inonga yaa pa mukorofoni wo pa mutivi, kuti itange. Mukufananavo, mutungamiriri akada, angagara pa meza inogajikwa patribhuna panonga peciverengwa Bhaibheri nomativi o Zvishandisenyi mu Basa ro Munda. Kuita kudari, zvingabesera kutama kupeja nguva.

   23. Zvecikwanisika, kunodikana kukhetwa mukuru waano ruzivo pa kuita hurukuro, kuti ashande inga mupi wo mazano. Mutoro wo mupi wo mazano ngo wokupa mazano ngo pamutivi, kudari zvecidiwa, kuno mukuru kana mubeseri wo ungano ngo pamusoro po divi riri rese raanoita, kubatanija mativi o Musongano wo Upenyu no Mushando, hurukuro ya vese, Jijo yo Murindiri kana Jijo yo Bhaibheri yo Ungano. (Vonanyi  ndima 17.) Kudari pa ungano pano mutengo wakati kuti wo vakuru vanonasa kuita hurukuro no kujijisa, mupi wo mazano angacinjwa wodihwa umweni pa kupera ko gore. Apana dikano yo kuti mupi wo mazano ape mbhangiro nguva jese mukuru kana mubeseri wo ungano paanoita divi rake.

 24. Zvecifira ku mutengo wo vajiji, ungano ingaronga kuva no zvikwata zvimweni zvo vajiji vakagajwa. Cikwata cimwe nga cimwe cinodikana kuva no mupi wo mazano anokwanirisa, zvinofanera kuti ave mukuru. Pazvinodikana, mubeseri wo ungano anokwanirisa angagajwa. Dare ro vakuru, rinodikana kuita cisungo cokuti ndiyani anodikana kushanda pa divi iri, no dikano ingavepo yokuzoita cinjo gore ngo gore. Mupi wo mazano anodikana kuteverera ndhungamiriro jinowanika pa  ndima 16. Kudari kukaumbhwa zvikwata zvimweni, vajiji vanodikana kukumbihwa kuti vaende mu sara jimweni, rikandopera divi ro kuti Upfumi hwo Kumujimu pasi po musoro mukuru unoti Upfumi Hunovha mu Soko ra Mwari. Vanodikana kuviya ku sara huru kuno vamweni pasure po divi ro kuti Zvishandisenyi mu Basa ro mu Munda. Kudari pakavoniwa vhidhiyo vari mu sara imweni, vanodikana kuivona kana kupurutana no kubhuisana vari mukatimo, zvecikwanisikaya. Zvikatama kukwanirisika mupi wo mazano anodikana kukhombija vhidhiyo no kubhuisana ecishandisa foni.

 25. Vhidhiyo jakakhetwa ndijona jinozoshandiswa pa musongano wondowo. Vhidhiyo jo musongano wo pakati po sumana jinozowanika mu aprikativo JW Library, ijona jingabhashahwi ngo foni iri yese inokwanisa kubhashari. Nguva jimweni, mavhidhiyo o kubhuisana ko kuezanisira angavoneswavo pa musongano wo basa ro mu munda.