1 VaKorinte 1:1-31
1 Inini Pauro, ndakadanijwa kuti ndive mupostori wa Kristu Jesu mukuzwirana no kuda ka Mwari, pamwepo na Sostene hama yedu.
2 Ndiri kutarira ungano ya Mwari iri mu Korinte, kwamuri imwimwi makaceneswa mukuzwirana na Kristu Jesu, modanijwa kuva vasanwi pamwepo no vese vanodanija zina ra Mambo wedu Jesu Kristu. Mambo wavo no wedu:
3 Unyasha hucikaezaniswi no runyararo hunovha ka Mwari, Baba wedu na Mambo Jesu Kristu ngahuve na imwimwi.
4 Ndinobonga Mwari wangu mukuvo wese ngo pamusoro po unyasha hucikaezaniswi hwa Mwari mukuzwirana na Kristu Jesu;
5 ngokuti iyena, wakamupfumisa ngo zviro zvese, pakukwanisa kwenyu kutokotesa masoko no uzivi.
6 Imwimwi makava no ucapupu ngo pamusoro pa Kristu,
7 kuti mutame kuruza cipo ciri cese haco pamunonga mecivetera kuvoneswa ka Mambo wedu Jesu Kristu.
8 Iyena anozomuvangisa mbhera kumagumo, kuti mutame kuva no ndava iri yese pa njiku ya Mambo wedu Jesu Kristu.
9 Mwari wakagondeka. Iyena ndiyena wakamudanija kuti muve makabatana no Mwana wake, Jesu Kristu Mambo wedu.
10 Hama, ndinomungwaja mu zina ra Mambo wedu Jesu Kristu, kuti muve makabatana pa zviro zvamunobhuya kuti patame kuwanika kuparajana pakati penyu. Asi munodikana kubatana ushoni pa murangariro yenyu no mavonero amunoita zviro.
11 Hama jangu, vandhu vamweni vo pamuzi pa Krowe vakandivhunja ngo pamusoro penyu, veciti imwimwi makaparajana ngo cenyu.
12 Zvandinoda kunanga ngozvokuti, umwe na umwe wenyu anonanga kuti: “Inini ndiri wa Pauro,” “inini ndiri wa Aporo,” “inini ndiri wa Khefasi,”* “inini ndiri wa Kristu.”
13 Kureva kuti Kristu wakaparajana here? Pauro aazivi kuuraiwa pa mutanda ngo ndava yenyu, andizvopi? Kana kuti imwimwi makabhabhatijwa ngo zina ra Pauro kani?
14 Ndinobonga Mwari ngokuti andizivi kubhabhatija na umwe wenyu, asi ndakabhabhatija Krispo na Gayo,
15 kuti patame kuwanika ariwese anonanga kuti: “Inini ndakabhabhatijwa ngo zina ra Pauro.”
16 Zvokadi, ndakabhabhatijavo vo pamuzi pa Estefana. Asi ku vamweni vese, andicazvirangariri kuti ndakabhabhatija umwe wavo.
17 Kristu aazivi kundituma kuti ndiviye kuzobhabhatija, asi wakandituma kuti nditokotese masoko akanaka; ndicikashandisi uzivi hwo vandhu, kuti mutanda wokutambujikira* wa Kristu utame kuvoneka inga ucikashandi ciro.
18 Masoko ngo pamusoro po mutanda wokutambujikira,* anoita inga o upenji kuna vaya vari kwenda koparajwa. Asi kwatiri itusu tiri kuponeswari, ndiwona simba ra Mwari.
19 Ngokuti zvakatahwa kudari: “Ndinozopeja uzivi hwo vandhu vakangwara, ndozoramba ungwaru hwo vandhu vano hwiru.”
20 Ari kwapi mundhu wakangwara? Mutari ari kwapi? Ari kwapi mundhu ano hasha wo pa nyika* ino? Asipi Mwari wakaita kuti uzivi hwo nyika huve upenji here?
21 Ngokuti nyika yakakonehwa kuziva Mwari, pikija no uzivi hwayo hwese. Asi Mwari ngo uzivi hwake, wakazvivona zvakanaka kuponesa vatendi ecishandisa upenji hunocumaihwa.
22 Vajudha vanokumbira zvitatijo, Vagiriki vanopsaka uzivi.
23 Asi itusu tinocumaera kuti Kristu wakafa pa mutanda. Masoko aya anokhugunya Vajudha, oita inga upenji ku vandhu vo majinja.
24 Asi kuna vaya vakadanijwa, Vajudha no Vagiriki, Kristu ndiyena simba ra Mwari no uzivi hwa Mwari.
25 Ngokuti ciro ca Mwari cinovoniwa inga coupenji, cakangwara kupinda ciro cinovoniwa ngo vandhu kuti cakangwara. Ciro ca Mwari cinovoniwa inga cakaremba, cakavanga kupinda ciro cinovoniwa ngo vandhu inga cakavanga.
26 Hama, vonanyi kudanijwa kwamakaitwa: Akuna vazivi vazinji pa mavonero o vandhu, akuna vazinji vano simba, akuna vazinji vakakhupuka,*
27 Mwari wakasana zviro zvoupenji zvo nyika kuti apseruje vazivi; Mwari wakasana zviro zvakaremba zvo nyika kuti apseruje zviro zvakavanga;
28 Mwari wakasana zviro zvicikasisiri maningi zvo nyika no zvicikareremejwi. Wosana zviro zviciko kuti apeje zviro zviriyo,
29 kuti patame kuwanika anojikuja pamberi pa Mwari.
30 Ndiyena wakaitisa kuti muve makabatana pamwepo na Kristu Jesu, wakavaya uzivi hunovha ka Mwari kwatiri pamwepo no ururami, kuceneswa no kuponeswa ecishandisa muripo,
31 kuti zviitike ngo manera o zvakatahwa kuti: “Wiya anojikuja, ngaajikuje ndi Jehovha.”*
Masoko o Pasi
^ Anodanijwazve kuti Pedhru.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “vakavha pa mbhuri inosisira.”
^ Vonanyi Kudurujihwa ko Magama.
