1 VaKorinte 10:1-33
10 Hama, ndinoda kuti muzive kuti majicekuru edu ese ainga pasi po gwiti, perapo voambuka jombe.
2 Vese vakabhabhatijwa mu kuzwirana na Mosi ngo gwiti no jombe.
3 Vese vakaha zvondhozvo zvavakapuwa ndi Mwari.
4 Vese vakamwa zvondhozvo zvavakapuwa ndi Mwari. Ivona vakamwa kumwa ya Mwari yo pabuwe raivatevera. Buwe rondhoro raiimirira* Kristu.
5 Pikija zvakadaro, vazinji vavo avazivi kudakajisa Mwari, ngo kudaro, vakauraiwa mubani.*
6 Zviro izvi zvakava muezaniso kwatiri kuti titame kuda zviro zvakashata inga zvavakaita.
7 Mucanamata zvithombi, inga zvavakaita vamweni vavo; mukuzwirana no zvakatahwa kuti: “Vandhu vakagara pasi votanga kuha no kumwa. Tevere vakamuka votanga kutamba.”
8 Ticaita uhure* inga kuhura kwakaithwa ngo vamweni vavo, vofa makumaviri o zviuru no zviuru zvitatu* zvo vandhu pa njiku imwe.
9 Atidikani kueja Jehovha* inga zvakaithwa ngo vamweni vavo. Ivona vakazofa ngo kurumwa ngo nyoka.
10 Mucan’gun’guta inga zvakaita vamweni vavo. Ivona vakazourawa ngo muparaji.
11 Zviro izvi zvakaitika kwavari kuti zviite muezaniso kwatiri, zvotahwa kuti zvitingwaje itusu tinoraramari kumagumo ko nyika ino.
12 Mundhu anorangarira kuti wakaima ngaangwarire kuti atame kuwa.
13 Imwimwi muri kusongana no muejo jakatojana no muejo jo vandhu vese. Asi Mwari wakagondeka, iyena aazotenderi kuti muejwe mbhera pamucikakwanisi kucungirira. Iyena anozomubesera kuti mukwanise kucungirira muejo iji.
14 Ngo kudaro, hama jangu, tizanyi kunamata zvithombi.
15 Ndiri kubhuya no vandhu vano hwiru; rangariranyivo zvandinonangari.
16 Kopo yatinoitira mukumbiro kuti tikomborehwe, airevi kuti tiri kubesehwa ngo ngazi ya Kristu here? Pau yatinogura, airevi kuti tiri kubesehwa ngo muviri wa Kristu here?
17 Zvecivoneka kuti kuno pau imwe, pikija takawanda, itusu tiri muviri umwe. Ngo kuti itusu tese tiri kuha pau imwe iyani.
18 Rangariranyi ngo Vaiziraeri basi: Pavanonga veciha zviro zvakapihwa mu themberi, avaripi kuita citenderano no artari here?
19 Mazvibata zvandiri kuda kunanga? Ndiri kuda kunanga kuti, kuita mupiro ku cithombi akusisiri. Nee cithombico acisisiri.
20 Asi vandhu vo majinja vanoitira mupiro javo ku madhimoni. Avaitiri Mwari. Inini andidi kuti imwimwi mubatane no madhimoni.
21 Imwimwi amutendehwi kumwira mu kopo ya Jehovha no kumwira mu kopo yo madhimoni. Imwimwi amutendehwi kugara “pa meza ya Jehovha”* pamwepo no yo madhimoni.
22 Kureva kuti ‘itusu tiri kuda kuti Jehovha* ave no ushanje here? Itusu atizivi kuvanga maningi kupinda iyena, andizvopi?
23 Zviro zvese zvinotendehwa, asi asipi zviro zvese zvinobesera. Zviro zvese zvinotendehwa, asi asipi zviro zvese zvinovaka.
24 Umwe nga umwe anodikana kuenderera mberi ecipsaka zvinobesera vamweni. Aadikani kupsaka zvinomubesera basi.
25 Ihanyi zviro zvese zvinotengeswa mu bazari, mucikavhunjisi ngo ndava yo hana yenyu,
26 ngokuti “Jehovha* ndiyena mune wo pasi pano no zviro zvese zviripo.”
27 Mukambhera ngo kukokwa ngo mundhu aciripi mutendi, kudari imwimwi mecida kwendeyo, ihanyi zvese zvaanomupa mucikavhunjisi ngo ndava yo hana yenyu.
28 Asi kudari ariwese akamuvhunja kuti: “Nyama iyi yakapihwa ku zvithombi,” mucaiha ngo ndava yo mundhu wamuvhunjaro no yo hana.
29 Andiripi kunangira hana yenyu, asi ndiri kunangira hana yo vamweni. Waro ngenyi ndingazotongwa ngo ndava yo hana yo umweni?
30 Kudari ndeciita mukumbiro pandinonga ndeciha, ngenyi ndinofanira kushohwa ngo ndava yo zviro zvandinoitira mukumbiro?
31 Ngo kudaro, meciha nokuti kumwa, dangani meciita zviri zvese hazvo, zviitenyi mecikuja Mwari.
32 Mucava cikhugu ku Vajudha, Vagiriki pamwepo no ku ungano ya Mwari.
33 Inini andiripivo kupsaka zviro zvinondidakajisa. Asi ndiri kupsaka zviro zvinondakajisa vamweni. Ndiri kuita zviro zvese zvandinokwanisa kuti ivona vapone.
Masoko o Pasi
^ Kana: “rainga.”
^ Kana: “muzvipare.”
^ Vonanyi Kudurujihwa ko Magama.
^ 23.000.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
