1 VaKorinte 15:1-58
15 Wari hama, ndinoda kumuceuja ngo pamusoro po masoko akanaka ondakamutokotesera, imwimwi momatenda omuitisa kuti muve makaima.
2 Masoko akanaka andakatokotesa kwamuri, ari kumuponesa ngokuti makaramba makaabatisisa, kunja kokuti makava vatendi vabiresi.
3 Ngokuti zviro zvokutanga zvandakaashira ndomuvhunja ngo zvokuti: Kristu wakafa ngo ndava yo zvishaishi zvedu mukuzwirana no Matahwa;
4 kuti iyena wakavigwa perepo womuswa mu njiku yo citatu mukuzwirana no Matahwa.
5 Iyena wakabudira Khefasi* tevere wobudiravo Gumi na Vaviri ro vapostori.
6 Pa sure pazvo, wakabudira hama jinopindirija mazana mashanu* pa nguva yondhoyo, vazinji vavo vaciri penye na nyamasi, vamweni vafa.
7 Iyena wakazobudirazve Jakobo no vapostori vese.
8 Pakupejisira, wakabudira inini, mundhu wakabahwa nguva icito yakwana.
9 Inini ndiri mudoko ku vapostori. Cimwenizve, andifaniri kudanijwa mupostori ngokuti ndakateverera ungano ya Mwari.
10 Ndiri zvandiri wari ngo pamusoro po unyasha hucikaezaniswi hwa Mwari. Unyasha hwandakaitihwari, ahuzivi kuva hwo mahara. Asi ndakashanda maningi kupinda vapostori vese; asipi ngo simba rangu, asi ngo unyasha hucikaezaniswi hwa Mwari huna inini.
11 Ngo kudaro, kungava kuti ndini kana kuti ndivona, aya ndiwona macumaerere atinoita, maitiro akadaro zvakamuita kuti muve vatendi.
12 Kudari tecicumaera kuti Kristu wakamuswa kuvha mu rufu, ngenyi vamweni venyu vanonanga kuti akuna kumuka ko vakafa?
13 Kudari kucinadi kumuswa ko vakafa, Kristu aazivi kumuswa ko vakafa.
14 Kudari Kristu aazivi kumuswa ko vakafa, kucumaira kwedu akushandi, rutendo hwedu ahushandivo.
15 Kusiyapo izvo, kudari vakafa vacikazomuswi kamare, Mwari aazivi kumusavo Kristu. Zvikadaro, itusu tinonga tecinyepa patinonanga kuti Mwari wakamumusa.
16 Ngokuti kudari vakafa vacikazomuswi, Kristu aazivi kumuswavo.
17 Ngo kudaro, kudari Kristu acizivi kumuswa, rutendo hwenyu ahushandi; munogara mu zvishaishi zvenyu.
18 Vaya vakafa vari pamwepo na Kristu, vakapera.
19 Kudari vetero yedu kuna Kristu iri yawari uno basi, tiri pa mugariro wakashata maningi kupinda vandhu vese.
20 Asi Kristu wakamuswa ko vakafa, ndiyena mucero wo kutanga wo vakafa.
21 Zvecivoneka kuti kufa kwakaviya ngo mundhu umwe, kumuswa ko vakafa kwakaviyavo ngo mundhu umwe.
22 Vandhu vese vari kufa ngo ndava ya Adhamu, vandhu vese vanozomuswavo ngo ndava ya Kristu.
23 Asi umwe na umwe anozomuswa pa nguva yake: Mucero wo kutanga ndi Kristu, vaya vari va Kristu vanozomuswavo pa kuvepo kwake.
24 Perapo, pa kupejisira, anozopekeja Umambo kuna Mwari na Baba wake, paanonga aparaja umambo hwese, utongi hwese no masimba ese.
25 Iyena anodikana kutonga inga mambo mbhera Mwari anyise vavengi vake vese.
26 Rufu, muvengi wo kupejisira, hunozoparajwa.
27 Ngokuti Mwari “wakadira zvese pasi po soka jake.” Asi iyena* paanonanga kuti ‘wakadira zviro zvese,’ zvinovoneka kuti azvinangiri Wiya wakazvidiraro pasi pake.
28 Asi zviro zvese pazvinozodihwa pasi pake, Mwana pacake anozojidiravo pasi kuna Wiya wakazvidiraro pasi pake, kuti Mwari ave musoro wo zviro zvese.
29 Vanozoitenyi vaya vari kubhabhatijwa kuti vazofe? Kudari vacikazomuswi, waro ngenyi vari kubhabhatija kuti vazofe?
30 Waro ngenyi itusu tiri pa ngozi nguva jese?
31 Njiku jese ndinohwisana no kufa. Ngo ndava yazvo, ndinodakara maningi ndimwi, hama jangu, jandinajo muna Kristu Jesu Mambo wedu.
32 Kudari ndakahwisana no zvikara mu Efeso inga zvakaita vandhu vamweni, zvinondibesenyi? Kudari vakafa vacikazomuswi, “ngatihe no kumwa, ngokuti mangwana tinozofa.”
33 Mucacengejwa. Ushamwari hwakashata hunovoja zviito zvakanaka.
34 Ivanyizve no hwiru kwaho mu njira yakarurama, motama kuita zvakashata, ngokuti vamweni avamuzivi Mwari. Ndiri kunanga zviro izvi kuti mupseruke.
35 Asi mundhu angavhunjisa kuti: “Vakafa vanozomukisa kudini? Vanozoviya no muviri wapi?”
36 Iwe benji! Caunosima acimeri cicito cafa.
37 Caunosima, ausimi muviri unokura, asi unosima mucece,* wakadari inga wo tirigu no mukhaindi umweni wo mbeu;
38 asi Mwari anoipa muviri mukuzwirana no zvaanoda, anopazve mbeu imwe na imwe muviri wayo.
39 Nyama jese ajizivi kuezana, kuno nyama jo vandhu, kuno nyama jo n’gombe, kuno nyama jo shiri no jo hove.
40 Kuno muviri jo kudenga no jopasi; muviri jo kudenga jino rukujo hwo mushovo umweni. Muviri jo pasi jino rukujo hwo mushovo umwenivo.
41 Zuva rino rukujo hwo mushovo waro. Mweji uno rukujo hwo mushovo wawo. Ndhondho jino rukujo hwajo. Asi rukujo hwo ndhondho imwe na imwe hwakasiyana.
42 Ndizvonavo zvondhozvo no kumuswa ko vakafa. Muviri unovora unovigwa, asi muviri ucikavori unomuswa.
43 Unosimwa ucikareremejwi, womuswa wecikujwa. Unosimwa wakaremba womuswa wakavanga.
44 Unosimwa uri muviri wo kunyama, womuswa uri muviri wo kumujimu. Kudari kuno muviri wo kunyama, uriyovo muviri wo kumujimu.
45 Zvakatahwa kuti: “Mundhu wo kutanga Adhamu wakava mundhu ano upenyu.” Adhamu wo kupejisira wakava mujimu unopa upenyu.
46 Ngo kudaro muviri wo kutanga auzivi kuva wo kumujimu. Muviri wo kutanga wakava wo kunyama, tevere, wozoviya wo kumujimu.
47 Mundhu wo kutanga, wakavha pasi pano. Iyena wakaithwa ngo mavhu. Mundhu wocipiri wakavha kudenga.
48 Vandhu vo pasi pano, vakatojana no mundhu wakaithwaya ndi Mwari ngo mavhu. Vandhu vo kudenga vakatojana no mundhu wakavhaya kudenga.
49 Ngo kudaro, zvecivoneka kuti takaezana na wiya wakaithwa ngo mavhu, tinozoezanavo na wiya wakavha kudenga.
50 Hama, ndinomuvhunja izvi kuti nyama no ngazi azvingagari utaka mu Umambo hwa Mwari. Uvori ahugarivo utaka kutama kuvora.
51 Izwanyi, ndinomuvhunja cakafisika ca Mwari cokuti: Atizofi tese, asi itusu tese tinozocinjwa,
52 pa nguva doko, mu kukopira ko jiso, pa kurira ko mbhayapaya yo kupejisira. Ngokuti mbhayapaya inozorira, vakafa vanozomuswa vacikavori, itusu tinozocinjwa.
53 Ngokuti cinovora cinodikana kusimira cicikavori, cinofa cinodikana kusimira cicikafi.
54 Asi cinovora pacinozosimira cicikavori, cinofa cozosimiravo cicikafi. Masoko akatahwari anozokwanirisika, okuti: “Rufu hwaparajwa* mbhera narini.”
55 “Rufu, kunyisa kwako kuri kwapi? Rufu, cisomu* cako ciri kwapi?”
56 Cisomu* cinobara rufu, ndicona cishaishi. Mutemo ndiwona simba ro cishaishi.
57 Ngaabongwe Mwari, ngokuti ndiyena wakatipa unyisi ecishandisa Mambo wedu Jesu Kristu!
58 Ngo kudaro hama jangu jinodiwa, vanganyi mucikacukunuki. Ivanyi makabatikana mukuvo wese mu basa ra Mambo, meciziva kuti kuvangisira kwamunoita mecishandira Mambo asipi ko mahara.
Masoko o Pasi
^ Anodanijwazve kuti Pedhru.
^ 500.
^ Uwu angava Dhavhidhi.
^ mbhumbha.
^ Gama ngo Gama: “hwamijwa.”
^ Ciromo.
^ Ciromo.
