1 VaKorinte 16:1-24
16 Waro ngo pamusoro po muhengo-muhengo unozoitihwa vakasanwa, imwimwi tevejanyi ndhungamiro jandakapa ku ungano jiri mu Garatiya.
2 Pa njiku yo kutanga yo sumana jese umwe nga umwe ngaavige ciri cese mukuzwirana no zvaanazvo, kuti muhengo-muhengo iji jitame kutanga kuithwa inini pandinonga ndaguma kondhoyo.
3 Pandinozoguma kondhoyo, ndinozotuma vandhu vamakatenderaya mu karata jenyu kuti vatore cipo cenyu kuti vaende naco ku Jerusarema.
4 Kudari zvikatendehwa kuti inini ndiyendevo, ivona vanozoenda na inini.
5 Ndinozoviyeyo kuzomuvona ndecivha ngo ku Masedhoniya ngokuti ndinozopinda ngo ku Masedhoniya;
6 kangaije ndingatononokeyo kana kutopeja nguva yo kutondhora ndina imwimwi, kuti muwane kuzondiperekeja kwandinozoenda.
7 Ngokuti andidi kumuvona ngo kugwanja, zvecivoneka kuti ndinovetera kuzopeja mukuvo wakatikuti ndina imwimwi, kudari Jehovha* akatendera.
8 Asi ndiri ku Efeso mbhera pa Mutambo wo Pentekoste.
9 Ngokuti ndakafunungurihwa musuvo wakakura, asi vavengi vakawanda maningi.
10 Kudari Timoti akagumeyo, mucaita kuti athye ciri cese paanonga ana imwimwi, ngokuti iyena ari kushandira Jehovha* inga zvandiri kuitarivo.
11 Mucatendera kuti adheerehwe ngo mundhu ari wese. Asi mudongesenyi* kuti abate gwanja rake aviye kuno murunyararo, ngokuti inini ndiri kumuvetera pomwe no hama jimweni.
12 Ngo pamusoro po hama yedu Aporo, inini ndakamuvangisa kuti aviye kondhoyo no hama jimweni. Iyena aana urongwa hwo kuzeyo wari uno asi anozozeyo kudari akava no mukana.
13 Garanyi makamuka, imanyi makavanga mu rutendo, ivanyi makacunga, ivanyi no simba.
14 Zviro zvese zvamunoita zviitenyi ngo rudo.
15 Wari, hama, ndinomuvhunja kuti: Munozviziva kuti vo pamuzi pa Estefana ndivona vakatanga kutenda* mu Akaya, vojipira kuti vashandire vandhu va Mwari.
16 Endereranyi mberi mecijidira pasi po vandhu vakadaro no vandhu vese vanozwirana, vecishanda ngo simba.
17 Ndinodakara maningi ngo kuvepo ka Estefana, Fortunato na Akaiko, ngokuti ivona vakandibesera maningi pamainga mucipo.
18 Ivona vakatondhoja mwoyo wangu no wenyu. Waro reremejanyi vandhu vakadaro.
19 Ungano yo Aziya iri kumutambisa. Akira na Priska pamwepo no ungano iri pamuzi pavo iri kumutambisa ngo mwoyo wese mukuzwirana na Mambo.
20 Hama jese jiri kumutambisa. Cungamijananyi ngocenyu ngo mwoyo wese.*
21 Mucungamijo wangu wandiri kutara ngo nyara jangu inini, Pauro, nga uwu:
22 Kudari kuno mundhu acikadisisi Mambo, ngaatukwe. Viyanyi Mambo wedu!
23 Unyasha hucikaezaniswi hwa Mambo Jesu ngahuve na imwimwi.
24 Rudo hwangu ngahuve na imwimwi mwese mukuzwirana na Kristu Jesu.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “murongesenyi.”
^ Gama ngo Gama: “ndivona vakava mucero jo kutanga.”
^ Gama ngo Gama: “ngo bhejhu rakacena.” Bhejhu iri raiithwa ngo Makristu paaisongana.
