1 VaKorinte 2:1-16
2 Hama, inini pandakaviya kondhoyo, andizivi kuviya koomukahamarisa ngo masoko kana ngo uzivi hwo vandhu pandaimutokotesera cakafisika ca Mwari.
2 Ndakasunga kutama kuziva ciri cese pakati penyu kuciripi Jesu Kristu, wakakohomehwaya pa mutanda.
3 Ndakazeyo ndakaremba, ndecithya no kutetemera maningi.
4 Zvandaibhuya no zvandaicumaera, azvicaingepi masoko o kukhohwesa o uzivi hwo vandhu, asi cainga citatijo co mujimu mucena no simba.
5 Kutenda kwenyu kucaita ko uzivi hwo vandhu, asi ngakuite ko simba ra Mwari.
6 Pakati po vandhu vakaivha, tinobhuya ngo pamusoro po uzivi, kuciripi uzivi hwo nyika* ino pamwepo no uzivi hwo vatongi vo nyika ino vanodari kuzoparajwa.
7 Asi tiri kubhuya ngo pamusoro po uzivi hwa Mwari huri mu cakafisika cake, uzivi hwakavigika, hwakanangwa kare ndi Mwari nyika ino icito yavepo kuti tizokujwe.
8 Uzivi uhu ahuzivi kuzivika ngo vatongi vo nyika,* ngokuti no vainga vakahuziva, vaizoregera kuuraya* Mambo anokujwa.
9 Asi inga zvakatahwa kuti: “Jiso arizivi kuvona, njeve aizivi kuzwa, mwoyo wo mundhu auzivi kuzwisisa zviro zvakanasirihwa ndi Mwari kuti ape vandhu vanomuda.”
10 Ngokuti ndisu takazvitatijwa ndi Mwari ecishandisa mujimu wake, ngokuti mujimu unopopora zviro zvese, kubatanija no zviro zvakajika zva Mwari.
11 Ndiyani anoziva zviro zvo mundhu kuciripi mujimu uri mukati make? Ngo kudaro, akuna mundhu anoziva zviro zva Mwari, kuciripi mujimu wa Mwari.
12 Itusu atizivi kuashira mujimu wo nyika asi takaashira mujimu wa Mwari, kuti tizive zviro zvatakapuwa ndi Mwari ngo rudo hwake.
13 Atibhuyi zviro izvi ngo masoko otakajijiswa ngo uzivi hwo vandhu, asi tinobhuya ngo masoko atakajijiswa ngo mujimu patinojijisa zviro zva Mwari ngo masoko a Mwari.
14 Ngokuti mundhu wokunyama aatendi zviro zvo mujimu wa Mwari, ngokuti ngo zvoupenji kwaari. Iyena aakwanisi kuzviziva ngokuti zvinopopohwa ngo mundhu wa Mwari.
15 Ngo kudaro, mundhu wa Mwari anopopora zviro zvese, asi akuna mundhu anokwanisa kumupopora.
16 Zvokadi “ndiyani wakaguma pakuziva murangariro wa Jehovha* kuti amujijise?” Asi itusu tinorangarira inga ndi Kristu.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “kumukohomera pa mutanda.”
^ Vonanyi Kudurujihwa ko Magama.
