1 VaKorinte 5:1-13
5 Zviri kunangwa kuti pakati penyu pano uhure,* uhure* uhu ahuwaniki ku vandhu vo majinja, ngokuti aripo mwanarume umweni anohura no mukaji wa babake.
2 Waro ngenyi imwimwi muri kutodada ndizvona? Amucaifanira kuva makacamwa kuti mwanarume wakaitari zviro zvakadari avhiswe pakati penyu?
3 Pikija inini ndiciripi pakati penyu ngo kunyama, murangariro wangu* una imwimwi. Ndatopera kutonga mwanarume wakaitari zviro izvi inga ndiri pamwepo na imwimwi.
4 Pamunonga makaungana ngo zina ra Mambo Jesu, meciziva kuti murangariro wangu* una imwimwi ngo simba ra Mambo Jesu,
5 munodikana kupa Sathana mwanarume uwu kuti nyama yake iparajwe, kuti mugariro wakanaka wo ungano utame kuparajwa mbhera pa njiku ya Mambo.
6 Kujikuja kwenyu akuzivi kunaka. Amuzvizivi kuti zvimbijo zvidoko zvinokukumusa upfu hwese here?
7 Vhisanyi mbijo yokare kuti muve no upfu hupsa hucina mbijo inga zvamuri wari. Ngokuti Kristu ndiyena vhuta ro phasika rakapihwa kare.
8 Ticaceukija mutambo uwu tecishandisa mbijo yo kare kana mbijo yo ushati no youshaishi, asi ngaticeukije mutambo uwu ngo pau icina mbijo yo ugondeki no cokwadi.
9 Mu karata yangu, ndakamutarira kuti mutame kuita ushamwari no vandhu vanoita uhure.*
10 Andicainangirepi vandhu vanoita uhure* vo nyika ino, vandhu vanokara, mbavha kana vanonamata zvithombi. Ngokuti nozvainanga kudaro, maizofanira kubuda mu nyika.
11 Asi wari ndiri kumutarira kuti mutame kuita ushamwari no ariwese anozwi kuti ihama, asi ecihura,* kukara, kunamata cithombi, kutuka, kudhakwa kana mbavha. Imwimwi amudikani kuha no mundhu wakadaro.
12 Inini ndinenyi no vandhu vo kunja kuti ndivatonge? Imwimwi munotonga vandhu vo mukati,
13 Mwari ecitongavo vandhu vo kunja. Ngo kudaro, “vhisanyi mundhu uwu wakashatari pakati penyu.”
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “mujimu wangu.”
^ Gama ngo Gama: “mujimu wangu.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama pa gama rokuti “Uhure.”
