1 VaKorinte 9:1-27
9 Inini andiripi musujunuki here? Andiripi mupostori? Andizivi kumuvona Jesu Mambo wedu kani? Imwimwi amuripi muviyo wo basa rangu mukuzwirana na Mambo here?
2 Pikija ndiciripi mupostori wo vamweni, ndino cokwadi kuti ndiri mupostori kwamuri. Imwimwi muri cidhindho cinovonesa basa rangu ro upostori mukuzwirana na Mambo.
3 Masoko angu o kujijivirira kuna vaya vanondipopora nga aya:
4 Itusu tinotendehwa kuha no kumwa, andizvopi?
5 Atitendehwivo kuperekejwa ngo hambzaji inga mukaji wedu, inga zvinoitwa ngo vapostori vese no vanukuna va Mambo pomwe na Khefasi?*
6 Kana kuti, inini na Bharnabha, atitendehwi kutama kubata basa kuti tijisapote here?
7 Ndiyani musoca anoshanda acingapagahwi? Ndiyani angasima muuvha perepo kakuregera kuha mucero wawo? Kana kuti, ndiyani angahavisa mushambi, perepo kakuregera kumwa mukaka* wawo?
8 Kureva kuti zvandiri kuvereketari ngo zvomavonero o mundhu here? Mutemo aunangivo zviro izvi here?
9 Ngokuti zvakatahwa mu Mutemo wa Mosi kuti: “Ucadofunga muromo wo n’gombe painonga yecipura mbeu.” Mwari anokaya-kaya ngo n’gombe here?
10 Kana kuti masoko aya aaripi kuvhunjwa itusu kani? Zvokadi, izvi zvakatahwa ngo ndava yedu, kuti mundhu anorima no mundhu anopura, vanodikana kuva no vetero yokuti vanozoashira rutivi hwavo.
11 Kudari takasima zviro zva Mwari pakati penyu, zvakashata here tikakotora zviro zvenyu zvokunyama zvomunopona ndizvona?
12 Kudari vandhu vamweni veciitihwa zviro izvi ndimwi, zvakadini kwatirivo? Ngo kudaro, itusu atiiti zvakadaro, asi tiri kuita zvese zvatinokwanisa kuti titame kudira ciphingo masoko akanaka ngo pamusoro pa Kristu.
13 Amuzvizivi kani kuti vandhu vanoita mabasa akacena vanoha zviro zvo mu themberi? Amuzvizivi kani kuti vandhu vanoita mabasa pamberi po artari njiku jese vanoashira zviro zvo artari?
14 Mukufananavo, Mambo wakativhunja kuti vaya vanozivisa masoko akanaka, ngavararame* ngo masoko akanaka.
15 Asi inini andiripi kushandisa zviro zvese izvi. Ngo kudaro, andiripi kutara ngo pamusoro po zviro izvi kuti zviitihwe inini, ngokuti zvainga zviri nane kufa. Apana mundhu angandivhisira zvinondiitisa kuti ndijikuje!
16 Kana ndecitokotesa masoko akanaka, andizvopi zvinodiitisa kuti ndijikuje, ngokuti ndizvona zvandinodikana kuita. Inyatwa kwandiri kudari ndikaregera kutokotesa masoko akanaka!
17 Ndikaita izvi ngo mwoyo wese, ndinozowana mupfupo, pikija ndikazviita ndicikadi, ndiciri nawo mutoro wondakapuwa.
18 Waro ngowapi mupfupo wangu? Pandinotokotesa masoko akanaka, ndinozivisa masoko akanaka mahara kuti nditame kushandisa simba rangu ngo maitiro aciripi iwona ngo pamusoro po masoko akanaka.
19 Pikija ndakasujunuka ku vandhu vese, ndakajiita muranda wo vese kuti ndiwane vandhu vazinji mbhera pazvinokwanisika.
20 Ku Vajudha ndakajiita Mujudha kuti ndiwane Vajudha; ku vaya vari pasi po mutemo ndakajidiravo pasi po mutemo, pikija ndiciripi pasi po mutemo, kuti ndiwane vari pasi po mutemo.
21 Kuna vaya vacina mutemo, ndakajiita acina mutemo, pikija andiripi mundhu acina mutemo kuna Mwari asi ndiri pasi po mutemo kuna Kristu, kuti ndiwane vaya vacina mutemo.
22 Kuna vaya vakaremba, ndakajiita ndakaremba kuti ndiwane vakaremba. Ndakaita zviro zvese ku vandhu vo mushovo wese, kuti ngo maitiro ariese ndiponese vamweni.
23 Asi ndinoita zviro izvi ngo ndava yo masoko akanaka, kuti ndimazivise vamweni.
24 Amuzvizivi kani kuti vagogomi vo muphikizano, vanogogoma vese, asi umwe ndiyena anoashira mupfupo? Gogomanyi ngo njira inoita kuti muuwane.
25 Vese vanonghwina mu muphikizano, vanojibata pa zviro zvese. Ivona vanoita izvo kuti vawane junguja rinopera, asi itusu tinozowana junguja ricikaperi.
26 Ngo ndava yazvo, ndinogogoma ndeciziva kwandiri kwenda; makhandiriro andiri kuita zvibhakera, ngookuti nditame kutaka mbhepo,
27 asi ndinotambuja muviri wangu, ndiciuita muranda, kuti pasure po kucumaera vamweni, inini nditame kurambwa ndi Mwari.
