2 VaKorinte 2:1-17
2 Inini ndasunga kuti kuviyeyo kwangu kuzomuvonazve, kutame kuzomunyangajisa.
2 Kudari ndikamunyangajisa, ndiyani anozondidakajisa kuciripi vandhu vandanyangajisaya?
3 Ndakamutarira zvandakaita, kuti pandinozoviya kondhoyo nditame kunyangajiswa nga vayani vanofanira kundidakajisa, ngokuti ndinothemba kuti cinondiita kuti ndidakare ndicona cinomuita kuti mudakarevo.
4 Ndakamutarira ndecitambujika maningi no kuhwajihwa mwoyo, ndino musoji jakawanda maningi. Inini andicaida kumunyangajisa asi ndaida kuti muzive madiro andinomuita.
5 Kudari aripo waita zvinonyangajisa, aazivi kunyangajisa inini, asi wanyangajisa imwimwi mwese. Inini andidi kumuvhunja zviro izvi ngo hasha.
6 Kupangihwa ngo vazinji uku, kunokwana ku mundhuwo;
7 wari imwimwi munodikana kumuregerera ngo mwoyo wese no kumutondhoja, kuti atame kunyiswa ngo kunyangajwa kwakakura.
8 Asi inini ndinomuvhunja kuti muvangise rudo hwenyu kwaari.
9 Ndizvona zvakandiitisa kuti ndimutarire: Kuti ndivone dangani munovonesa kuzwira pa zviro zvese.
10 Kudari mukaregerera ari wese pa ciri cese, inini ndinomuregereravo. Zvokadi, ciri cese candaregerera (kudari ndaregerera ciri cese), ndazviitira kuti mugare ushoni pa mavonero a Kristu,
11 kuti titame kunyiswa* ndi Sathana, ngokuti tinomaziva mazano ake.
12 Pandakaguma mu Trowadhe kuti ndizivise masoko akanaka ngo pamusoro pa Kristu, ndofunungurihwa mukana mu basa ra Mambo,
13 ndaithimwa-thimwa ngokuti andizivi kuwana Tito hama yangu. Ngo kudaro, ndakavaeneka, ndoenda Masedhoniya.
14 Asi tinobonga Mwari, wiya anotitungamirira inga masoca ari kuvha konyisa kuhondo pamwepo na Kristu. Cimwenizve, iyena wakaita kuti zivo yake izivike ku ndau jese ngo ndava yedu, zvoita inga mafuta anonuhira.
15 Ngokuti kuna Mwari, itusu tiri mupiro unonuhira no unodakajisa wa Kristu pakati pa vaya vari kuponeswa no pakati pa vaya vari kuparajwa;
16 ku vokupejisira ava, tiri kunuhira rufu hunoendesa ku rufu, ku vokutanga, tiri kunuhira upenyu hunoendesa ku upenyu. Waro ndiyani anokwanisa kuita zviro izvi?
17 Itusu tinokwanisa, ngokuti atiripi vatengesi vo soko ra Mwari inga zvinoitwa ngo vazinji, asi tinobhuya ngo mwoyo wese inga vatumwi va Mwari. Tinozviita pamberi pa Mwari, pamwepo na Kristu.
Masoko o Pasi
^ Kana: “kucengejwa.”
