3 Johani 1:1-14
1 Inini musharuka,* ndiri kukutarira Gayo shamwari yangu inodiwa, yandinoda maningi.
2 Shamwari yangu inodiwa, ndiri kuita mukumbiro kuti zvese zvikufambire ushoni; ivai no upenyu hwakanaka, inga hwaunaho* wari.
3 Ndakadakara maningi hama pajakaviya jeciita ucapupu hwo kuti uri kubatisisa cokwadi, wecifamba mu cokwadi.
4 Andina mudakaro* unopinda uwu: kuziva kuti vana vangu vari kufamba mu cokwadi.
5 Shamwari yangu, uri kugondeka mu zvaunoitira hama, kunyange ucikajizivi.
6 Ijona jakaita ucapupu ngo pamusoro po rudo hwaunaho pamberi po ungano. Ndapota, jidongesei* ngo njira inodakajisa Mwari.
7 Ngokuti, ngo zina ra Mwari, ijona jakadonga* hwendo, jicikaashiri ciri cese co vandhu vo majinja.
8 Ngo kudaro tino muthwaro wo kuashira hama jakadari inga iji, kuti tishande pamwepo na ijona pa kubesera cokwadi.
9 Ndakatarira masoko ku ungano, asi Dhiyotrefe, anodaya ndau jo kutanga pakati pavo, aashiri ngo nderemejo ciri cese cinovha kwatiri.
10 Ngo kudaro, kudari ndikagumeyo ndinozomuvhunja pambhene ngo basa raanoitaro ro kundhandhanisa masoko akashata ngo pamusoro pedu. Acikakwani ndizvona, iyena anoramba kuashira hama ngo nderemejo, ecirambisavo vamweni kuti vatame kujiashira no kugogomera mu ungano vaya vanoda kujiashira.
11 Shamwari inodiwa, ucatevejera zvakashata, asi tevejerai zvakanaka. Anoita zvakanaka anovha kuna Mwari. Anoita zvakashata aazivi kuvona Mwari.
12 Vese vanoitira ucapupu hwakanaka kuna Dhimetriyo, iyena anoitihwavo ucapupu ngo cokwadi. Itusu tinotomuitiravo ucapupu, iwewe unoziva kuti ucapupu hwatinoita ngo hwokadi.
13 Ndino zviro zvizinji zvokukuvhunja, asi andidi kuzvitara pa karata.
14 Waro, ndinoimira kuti tinozovonana mazuva anozari, tozobhuya kamare tiri pamwepo.
Runyararo ngahuve na iwewe.
Uri kutambiswa ngo shamwari jako. Tambisai shamwari jese, imwe nga imwe ngo zina rayo.
Masoko o Pasi
^ Kana: “mukuru wo ungano.”
^ Kana: “mwiha waunawo.”
^ Kangaije: “unondiitisa kuti ndibonge.”
^ Kana: “jirongesei.”
^ Kana: “jakaronga.”
