Judha 1:1-25
1 Inini Judha, muranda wa Jesu Kristu, munukuna wa Jakobo. Ndiri kutarira vakadanijwa, vakadiwa no vakasanwa ndi Mwari Baba kuti vazobatane na Jesu Kristu:
2 Unyasha no runyararo no rudo ngazviengejeke komuri.
3 Hama jinodiwa, pikija kuti ndaivangisira maningi kuti ndimutarire ngo pamusoro po ruponeso hwatinahwo tese, ndakavona kuti zvinosisira kumutarira ndecimuvangisa kuti muhwire rutendo ngo kuvangisira, hwakapuwa vakasanwa ndi Mwari* kamwe mbhera narini.
4 Thangwe rangu ngo rokuti pano vandhu vamweni vakanghwinira pakati penyu. Ivona vanofanera kutongwa kwakanangwa kare ngo Matahwa; i vandhu vakashata. Ivona vanophinduja unyasha hucikaezaniswi hwa Mwari wedu, vohuita inga thangwe ro kuita mufambiro unopseruja. Ivona vanovonesa kuti avazivi kugondeka kuna wiya wakatitenga na Mambo wedu Jesu Kristu.
5 Pikija mecinasa kuziva zvese kamare, ndinoda kumuceujira kuti Jehovha,* wakaponesa vandhu ku Ejipita, perapo woparaja vainga vacina rutendo.
6 Ngirozi jicizivi kugara jiri mu ndau yajo yokutanga, jakasiya ndau yajo yaisisira. Iyena wakajisunga ngo magaragajero mbhera narini mu cidima cikuru, jeciimira njiku huru yo kutongwa.
7 Ngo njira yakafanana, Sodhoma no Gomora pomwe no madhorobha aimatendeneja akanghwiniravo mu uhure* hunopseruja. Iwona, akapsaka zvido zvo kunyama zviciripi zvocibarihwe. Iwona ari pambeji pedu inga muezaniso wo ngwajo ngo kupanicwa* kwaakaitwa ngo muriro ucikaperi.
8 Kusiyapo izvi, vandhu ava vanonghwiniravo mu hope jo kunyepa,* vecisvipisa muviri, vacikareremeji utongi* no kutuka vaya vanokujwa.
9 Asi Arkanjo Migeri paainesana na Dhiyabhu ngo pamusoro po muviri wa Mosi, aazivi kurangarira kuti anofanera kumuviisira rutongeso, nee aacaimutukepi, asi wakati: “Jehovha* ngaakutonge.”
10 Asi vandhu ava vanobhuya zvinotuka ngo pamusoro po zviro zvese zvavacikanasi kuzwisisa. Mu zvese zvovanozwisisa ngo kutama kurangarira inga zvinyama, ivona vanoenderera mberi vecijivoja.
11 Nyathwa kwavari, ngokuti vakatevera gwanja ra Khaini, vowira mu zviito zvakashata zva Bharamu kuti vawane mupfupo. Ivona vakafa ngo pamusoro po mabhuyo akashata a Kora!
12 Vandhu ava, mapuwe akafindara pasi po kumwa mu mabuso enyu o ushamwari, pavanonga vecibusa na imwimwi. Ivona, vahavisi vanoha vacingathyi; makore acina nvura anopepeswa ngo mbhepo; muti jo cirimo jicina mucero, jakapera kufa kamare* perepo jovhithwa;*
13 mavimbi o mujombe ano ushungu, anobudisa mafuro ngo kupseruka; ndhondho jicina gwanja rakarongeka, jakanasiririhwa cidima cicina magumo.
14 Enoki, mundhu wocinomwe wo mubarihwana wa Adhamu, wakaporofetavo ngo pamusoro pavo paakananga kuti: “Vonanyi! Jehovha* wakaviya no mazana akawandisisa o ngirozi jino simba
15 kuti atonge vese no kupanica vese vakashata ngo zviito zvavo zvakashata zvavakaita ngo maitiro akashata no kutonga vashaishi ngo mazwi ese akashata o vakamutuka ndiwona.”
16 Vandhu ava vanon’gun’guta, avakwanihwi ngo zvavanazvo mu upenyu hwavo, vanoita zvido zvavo, vanovereketa masoko o kujikuja, pavanosimba ngo njira yo kushora vamweni kuti ivona vabesereke pacavo.
17 Kuna imwimwi hama jinodiwa, mucakanganwa masoko akanangwa kare ngo vapostori va Mambo wedu Jesu Kristu,
18 vaimuvhunja kuti: “Mu mukuvo wo kupejisira, kunozowanika vashori, vanozoita mu kuzwirana no zvido zvavo zvakashata.”
19 Ava ndivona vanobara kuparajana, vakaita inga zvinyama, vacina mujimu wa Mwari.
20 Asi imwimwi hama jinodiwa, vangisanyi rutendo hwenyu hwakacenesesa. Itanyi mukumbiro mecibesehwa ngo mujimu mucena,
21 kuti mugare muri mu rudo hwa Mwari, pamunonga meciimira unyasha hwa Mambo wedu Jesu Kristu kuti muwane upenyu hucikaperi.
22 Endereranyi mberi mecitatijira unyasha ku vamweni vanokana-kana;
23 vaponesenyi ngo kuvavhisa pa muriro. Asi endereranyi mberi mecikhombijira unyasha ku vamweni, mecizviita ngo kuthya, mecinyenya no nguvo yakasvipiswa ngo mabasa akashata.
24 Ngaakujwe wiya anokwanisa kumungwarira kuti mutame kukhugunyika. Iyena anomuita kuti muve makaima, mucina uposi, pamberi po kukujwa kwake no mudakaro mukuru.
25 Ndi Mwari umwe basi, muponesi wedu ngo ndava ya Jesu Kristu Mambo wedu. Kukujwa, ukuru, simba no utongi ngazvive zvake kuvhira kare no kare, wari, mbhera narini. Ameni.
Masoko o Pasi
^ Kana: “hwakapuwa varungami mu mavonero a Mwari.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “kutambujwa kukuru.”
^ Kana: “mu mazvii-zvii.”
^ Kana: “utongi hwa Mwari no vaakapa simba.”
^ Vonanyi Kudurujihwa ko Magama.
^ Gama ngo Gama: “jakafa kaviri.”
^ Kana: “kubzuhwa.”
^ Vonanyi Kudurujihwa ko Magama.
