Mabasa o Vapostori 5:1-42
5 Asi mwanarume umweni waidanijwa kuti Ananiya no mukaji wake anozwi Safira, vakatengesa munda wavo.
2 Asi iyena wakaviga mare imweni mukaji wake ecizviziva. Ananiya wakaviisa padoko kuti aipekeje vapostori.
3 Asi Pedhru wakati: “Ananiya, ngenyi Sathana wakucengeja kuti unyepere mujimu mucena, kuti uvige mare imweni yowakatengesa ndiyona munda?
4 Mundewo aucaingepi wako ucito wautengesa? Powakapera kuutengesa, mareyo aicaingepi munyara jako? Ngenyi warangarira kuita zviro izvi mu mwoyo mako? Iwewe wanyepera Mwari kuciripi vandhu.”
5 Ananiya paakazwa masoko aya, wakawa pasi wofa. Vandhu vese vakazvizwa, vakathya maningi.
6 Perapo majaha akamuka omupombera ngo nguvo, omuthwara kumuendesa kunja, voenda koomuviga.
7 Pasure po nguva ndhatu, mukaji wake wakanghwina acikazivi zvainga zvaitika.
8 Pedhru wakamuvhunjisa kuti: “Ndivhunjei, imwimwi movaviri, makatengesadi munda ngo mutengo uwu here?” Iyena wakamudavira kuti: “Hina, takatengesa ngo mutengo wondhowo.”
9 Ngo kudaro, Pedhru wakamuvhunjisa kuti: “Ngenyi imwimwi movaviri muri kueja mujimu wa Jehovha?* Izwai! Soka jo vandhu jakaenda koviga mwamuna wako jiri pa musuvo. Ijona jinoda kukutora kuti jibude newe kunja.”
10 Pondhopo kamare, iyena wakawira pamberi pa Pedhru, wofa. Majaha ayani paakanghwina akamukhanda* akafa, ivona vakamutora vobuda naye kunja voenda komuviga pamutivi po mwamuna wake.
11 Ngo kudaro, vandhu vese vo mu ungano no vese vakazvizwa, vakathya maningi.
12 Kusiyapo izvi, kwaindoitika zvitatijo no mushamaiso muzinji pakati po vandhu ngo nyara jo vapostori; vandhu vese vaiungana mu Berere* ra Soromona.
13 Kunasa kunanga, apana mundhu wainga akacunga kuti abatane navo; asi vandhu vaivasimba maningi.
14 Kuciripi izvi basi, vandhu vaitenda Mambo vaindoengejeka, vanarume no vanakaji vakawanda.
15 Ivona vaitobudisa kunja vandhu vaihwaja mu zvitaka zvikuru, vecivarajika mu zvimubhedhu no zvimaponde, kuitira kuti Pedhru paanozopinda ngo phedo navo, vhute* rake ripsase vamweni vavo.
16 Cimwenizve, vandhu vo mu madhorobha ainga phedo no Jerusarema, vaiviisa vandhu vavo vaihwaja no vaitambujwa ngo mujimu yakashata. Vese vairapiwa.
17 Mupiri mukuru no vese vaainga navo, vainga vocikwata co Vasadhusi, vakamuka vakazara ngo ushanje.*
18 Ivona vakasunga vapostori, vovadira mukadheya.
19 Asi cousiku, ngirozi ya Jehovha* yakafunungura musuvo jo kadheya, yovabudisa kunja yeciti:
20 “Endanyi kooima mu themberi. Endereranyi mberi mecijijisa vandhu ngo pamusoro po masoko ese o upenyu.”
21 Pavakapera kuzwa masoko aya, ivona vakaenda mu themberi comangwanani votanga kujijisa.
Mupiri mukuru paakaguma no vaainga navo, vakadanija Sinedhriyo no cikwata cese co vakuru co vana vo Vaiziraeri. Ivona vakatuma vandhu kuti vaende kotora vapostori mukadheya.
22 Asi vangwariri pavakaguma mukadheya avazivi kuvakhandemo.* Ngo kudaro, ivona vakahwirira, vovasumurira,
23 veciti: “Itusu takhanda kadheya yakanasa kufungwa, varindiri vainga vakaima pa musuvo, asi patafunungura, atizivi kukhandemo* mundhu.”
24 Mukuru-mukuru wo themberi no vapiri vakuru, pavakazwa masoko aya vakaneseka ngo kuda kuziva zvaizoitika.
25 Asi mundhu umweni wakaviya wovavhunja kuti: “Izwanyi! Vandhu vamakadiraya mukadheya, vari mu themberi, vecijijisa vandhu.”
26 Mukuru-mukuru wo themberi wakaenda koovatora no varindiri vake, asi avazivi kuvaita zvakashata ngokuti vaithya kufuhwa ngo vandhu.
27 Ngo kudaro, ivona vakavaviisa vovaimisa pamberi po Sinedhriyo. Mupiri mukuru wakavavhunja
28 kuti: “Itusu takamukohomeja kuti mutame kuenderera mberi mecijijisa ngo pamusoro po zina iri. Asi wari vonanyi! mapera kuzaja Jerusarema rese ngo majijisiro enyu, imwimwi makacunga kutiviisira ngazi yo mundhu uwu.”
29 Pedhru no vapostori vamweni vakadavira kuti: “Mwari ndiyena mutongi wedu, itusu tinodikana kuzwira iyena, kuciripi kuzwira vandhu.
30 Mwari wo majicekuru edu, wakamusa Jesu ko vakafa, wamakakohomeraya pa mutanda.*
31 Mwari wakamukuja pa mukono muho wake, wova Muimiriri Mukuru no Muponesi, kuti Iziraeri atendeuke no kuregerehwa zvishaishi.
32 Itusu tiri zvapupu zvo zviro izvi pamwepo no mujimu mucena. Mwari wakapa mujimu uwu ku vandhu vanomuzwira ngo kuva mutongi wavo.”
33 Pavakazwa zviro izvi, vakanyangajwa maningi voda kuvauraya.
34 Mufarisi umweni anodanijwa Gamariyeri, wakamuka pakati po Sinedhriyo; iyena wainga mujijisi wo Mutemo anoreremejwa ngo vandhu. Ngo kudaro, iyena wakakumbira kuti vapostori vabudiswe kunja pa mukuvo mudoko.
35 Iyena wakavavhunja kuti: “Vanarume vo Iziraeri, bhasopanyi zvamuri kuda kuitira vandhu ava.
36 Inga muezaniso, mu njiku jakapinda kwakabuda mwanarume waidanijwa Teudha, waijivonesa inga mundhu wakanaka pamwepo no mazana marongomuna* o vanarume vaainga navo pa cikwata cake. Paakafa, vese vainga naye vakaparajika, vongara-ngara.
37 Sure kwake, pa njiku yo ndhariro kwakabuda Judha Mugarireya, wakava no vateveri vake. Mwanarume uwu wakafavo, vese vaimutevera vakaparajika.
38 Asi pa shwiro iyi, inini ndinomuvhunja kuti: Mucanghwinira mu shwiro jo vandhu ava. Varegerenyi vapinde. Ngokuti kudari zano iri kana basa iri riri ro vandhu, arizobudiriri.
39 Asi kudari recivha kuna Mwari, imwimwi amuzokwanisi kurikamisa. Ngokuti mukadaro, zvinozoita inga muri kuhwisana na Mwari.”
40 Ngo kudaro, vakatendera zano rake, vodanija vapostori, pasure pokuvataka, vakavavhunja kuti vatame kuvereketazve ngo zina ra Jesu, kuperapo, vakavasujunura.
41 Ivona vakabuda mu Sinedhriyo vakadakara ngokuti vakatambujwa ngo ndava yo zina ra Jesu.
42 Njiku jese mu themberi no nyumba ngo nyumba, vaienderera mberi vecijijisa no kutokotesa masoko akanaka ngo pamusoro pa Kristu, Jesu.
Masoko o Pasi
^ Vonanyi Kudurujihwa ko Magama.
^ Kana: “akamuwana.”
^ Kana: “vharanda.”
^ Munvuriri wo mundhu.
^ Kana: “usanje.”
^ Vonanyi Kudurujihwa ko Magama.
^ Kana: “kuvawanemo.”
^ Kana: “kuwanemo.”
^ Kana: “muti.”
^ 400.
