Mabasa o Vapostori 9:1-43
9 Asi Sauro ecihasaira ngo kuda kuthyisijira no kuuraya vajiji va Mambo, iyena wakaenda ku mupiri mukuru
2 womukumbira karata jo kwenda najo ku masinagoga o Dhamasko, kuti aviye ku Jerusarema akasunga vandhu vese vaanowana vecitevera Gwanja ro Cokwadi, kuvhira ku vanarume mbhera vanakaji.
3 Paainga ecifamba ecikwedera ku Dhamasko, ngo civhumbu, iyena wakatendenejwa ngo ruvheneko hwaivha kudenga,
4 iyena wakawa pasi wozwa izwi recimuvhunja kuti: “Sauro, Sauro, uri kunditeverera ngo ndava yenyi?”
5 Iyena wakavhunjisa kuti: “Ndimwi ani?” Iyena wakati: “Ndini Jesu, wauri kutevereraro.
6 Asi mukai uende mudhorobha ro Dhamasko, unozovhunjwa zvaunodikana kuita.”
7 Vandhu vaaifamba navo vakaima cinyararire, vecizwa izwi recivereketa asi vacikavoni mundhu waivereketaro.
8 Sauro wakamuka, pikija meso ake aipenya, asi apana caaikwanisa kuvona. Ngo kudaro, ivona vakamubata mukono vonghwina naye mu Dhamasko.
9 Iyena wakapeja njiku ndhatu acikakwanisi kuvona, kuha no kumwa.
10 Mu Dhamasko mainga no mujiji anodanijwa kuti Ananiya, Mambo wakamuvhunja ngo civoniso kuti: “Ananiya!” Iyena wakadavira kuti: “Ndiri pano, Mambo.”
11 Mambo wakamuvhunja kuti: “Mukai uende ku gwanja rinodanijwa kuti gwanja Rakarungama pa nyumba ya Judha, upsake mundhu anodanijwa Sauro wo Tarso. Iyena wari ari kuita mukumbiro.
12 Iyena ngo civoniso wakavona mundhu anodanijwa Ananiya ecinghwina, womucanjikira nyara kuti akwanise kuvona.”
13 Ananiya wakadavira kuti: “Mambo, ndakazwa zvizinji ngo pamusoro po mundhu uwu, no zviro zvakashata zvese zvaakaitira vandhu va Mwari mu Jerusarema.
14 Wari, iyena wakatendehwa ngo vapiri vakuru kuti asunge vandhu vese vanodanija zina renyu.”
15 Mambo wakamudavira kuti: “Endai! ngokuti mundhu uwu ndiyena mujiyo wakasanwa ndini kuti atore zina rangu kuti aenda naro ku majinja, majimambo no ku vana vo Vaiziraeri.
16 Inini ndinozokutatija matambujiko akawanda aanozosongana nao ngo ndava yo zina rangu.”
17 Ananiya wakaenda, wonghwina mu nyumba, womucanjikira nyara, eciti: “Sauro, hama yangu, Mambo Jesu wakambokugumiraya mu gwanja pawainga weciviya kuno, wandituma kuti ndiviye kwauri kuti iwewe ukwanise kuvona pomwe no kuzara ngo mujimu mucena.”
18 Pa mukuvo wondhowo, mu majiso ake makabuda zviro zvakaezana no magwamba, iyena wakatanga kuvona. Iyena wakamuka, woenda koobhabhatijwa,
19 perapo wakaha, wowana simba.
Iyena wakagara njiku nganani no vajiji mu Dhamasko,
20 iyena wakatanga kucumaera mu sinagogemo ngo pamusoro pa Jesu ngo kukasika, kuti ndiyena Mwana wa Mwari.
21 Vandhu vaimuzwa, vaikahamara veciti: “Uwu, andiyepi mundhu wiya waitevereraya ngo ushungu vateveri va Jesu mu Jerusarema? Aazivi kuviya kuno no cidisiso co kuvasunga kuti avaendese ku vapiri vakuru?”
22 Asi Sauro waibudirira maningi mu basa ro kucumaira. Vajudha vaigaraya mu Dhamasko vaikahamara, paainasa kusanangura ngo njira yakajeka kuti Jesu ndiyena Kristu.
23 Pasure po njiku zinji, Vajudha vakaungana kuti varure mazano o kumuuraya.
24 Zano ravakaitira Sauro, Sauro wakariziva. Ivona vainasa kungwarira musuvo, usiku no masikati kuti vamuuraye.
25 Vajiji vake vakamutora no usiku vomubzusa ngo pajhanera yo mupfimbiji ari mu citengu.
26 Paakaguma ku Jerusarema, wakavangisira kuti abatane no vajiji vamweni, asi vajiji vese vaimuthya ngokuti vainga vacikatendi kuti iyena waa mujiji.
27 Bharnabha wakaenda komubesera, womutora kumuendesa ku vapostori, wovavhunja ngo pamusoro pokuti Sauro wakavonesa kudini Mambo paainga ari mu gwanja no mabhuire aakaita navo. Wakavavhunjazve kuti ku Dhamasko Sauro wakaitisa kudini kuti abhuye ngo cicunge ngo pamusoro po zina ra Jesu.
28 Sauro wakagara na ivona ecienda kuri kwese kwaaida mu Jerusarema, ecibhuya akacunga ngo pamusoro po zina ra Mambo.
29 Iyena waibhuya no kukanijana no Vajudha vaibhuya Cigiriki, asi ivona vaipsaka kumuuraya.
30 Hama pajakazviziva, jakamutora kwenda naye Sezareya, jomutuma kuti aende Tarso.
31 Ungano jese jo Judheya, Garireya no Samariya jakava no mukuvo wo runyararo, jecivangiswa. Pajainga jecivonesa kuthya Jehovha* jecirarama* mukuzwirana no nyarajo yo mujimu mucena, jaienderera mberi jeciwanda.
32 Pedhru paaifamba mu ndharaundheyo yese, iyena wakaenda kovona vandhu va Mwari, vaigara mu Ridha.
33 Mondhomo wakawana mwanarume umweni waidanwa Eneya, wainga aano makore masere akavata pa mubhedhu,* ngokuti wainga akaoma muviri.
34 Pedhru wakamuvhunja kuti: “Eneya, Jesu Kristu ngaakurape. Mukai, nasirirai mubhedhu wako.” Iyena wakamuka ngo kukasika.
35 Vese vaigara mu Ridha no Mubani ro Saroni pavakamuvona, vakatendeuka kuna Mambo.
36 Mu Jope mainga no mujiji anodanijwa Tabhita, zvinoreva kuti “Dhorka.”* Iyena waiita mabasa mazinji akanaka. Tabhita waibesa varombo ngo zvipo zvaainasirira.
37 Asi ngo njiku jondhojo, iyena wakahwaja perapo wofa. Vakamutora voenda komudira mu nyumba yo mudenga.
38 Ngokuti dhorobha ro Jope raigara phedo no dhorobha ro Ridha. Vajiji pavakazvizwa kuti Pedhru ari mudhorobha rino, vakatuma vanarume vaviri kuti vaende komukumbira kudari: “Tapota, gumanyi kuno ngo kukasika.”
39 Pedhru wakamuka, wopinda navo. Paakaguma, vakamutora kuenda naye ku nyumba yo mudenga. Noni jese jakamutendeneja jecicema no kutatija nguvo jese jakasonwa ndi Dhorka paainga ari penye.
40 Pedhru wakavhunja vandhu vese kuti vabude kunja, perapo wogwadama woita mukumbiro. Perapo, wakasika wosota kwainga no mutembo, wonanga kuti: “Tabhita mukai!” Iyana wakafunungura majiso ake, paakavona Pedhru, wakagara pasi.
41 Wakamubata ngo mukono, womuimisa, sure kwazvo, wakadanija vajiji no noni jiya, womuviisa pamberi pavo ari penye.
42 Zvondhozvo, zvakazivika mu Jope mwese, vazinji vakatenda Mambo.
43 Iyena wakagara mazuva akawanda mu Jope, pamwepo no musukuti* wo matovo, anodanijwa Simoni.
Masoko o Pasi
^ Vonanyi Kudurujihwa ko Magama.
^ Kana: “jicipona.”
^ Kana: “kama.”
^ Zina ro Cigiriki rokuti Dhorka, mu Ciaramaiko kuti Tabhita, ese anoreva kuti “Shoma.”
^ Mundhu anoshanda no matovo.
