Marko 1:1-45
-
Johani Mubhabhatiji anocumaera (1-8)
-
Kubhabhatijwa kwa Jesu (9-11)
-
Jesu anoejwa ndi Sathana (12, 13)
-
Jesu anotanga kucumaera mu Garireya (14, 15)
-
Kudanijwa ko vajiji vo kutanga (16-20)
-
Mujimu wakashata unogogomehwa (21-28)
-
Jesu anorapa vandhu vakawanda mu Kafarnaume (29-34)
-
Jesu anoita mukumbiro ari ega (35-39)
-
Nyamapere anoraphwa (40-45)
1 Kutanga ko masoko akanaka ngo pamusoro pa Jesu Kristu, Mwana wa Mwari:
2 Zvakatahwa mu uporofeti hwa Isaya kuti: “(Vonanyi! Ndiri kumutumira ndhumwa inozonasirira gwanja renyu pambeji penyu.)
3 Kuno izwi riri kuzika muzvipare, reciti: ‘Nasiriranyi gwanja ra Jehovha!* Rungamisanyi makwanja ake.’”
4 Inga zvakatahwa, Johani Mubhabhatiji wainga muzvipare, ecicumaera rubhabhatijo inga citatijo co kukhauya kuti zvishaishi zviregerehwe.
5 Ndharaundha yese yo Judheya no vagari vese vo Jerusarema vaienda kwaari, ivona vaibhabhatijwa* ndiyena mu Murambo wo Jordhani, vecidekeca pambhene zvishaishi zvavo.
6 Johani waisimira nguvo ino ukuse hwo kamera, cihunu cake caisungwa ngo bhande ro dovo. Iyena waiha ndere no uci.
7 Iyena waicumaera eciti: “Mundhu ano simba kupinda inini ari kutevera sure kwangu, inini andifaneri kukotama kuti ndisujunure magwada ake.
8 Inini ndaimubhabhatija ngo kumwa. Asi iyena anozomubhabhatija ngo mujimu mucena.”
9 Mu njiku jondhojo, Jesu wakavha ku Nazareta yo Garireya, woenda kobhabhatijwa ndi Johani mu Jordhani.
10 Pa nguva yaakandobuda mu kumwa, iyena wakavona gore recifununguka no mujimu wainga wakatojana no njiva, weciviya panyezuru pake.
11 Kwakazika izwi raivha kumatenga reciti: “Iwewe uri Mwana wangu anodiwa, anondidakajisa.”
12 Perapo, mujimu wakamuendesa mu zvipare ngo kukasika.
13 Ngo kudaro, iyena wakagara mu zvipare makumarongomuna o njiku, eciejwa ndi Sathana. Iyena waigara no zvinyama zvo musora, asi ngirozi jaimushandira.
14 Johani paakapera kusungwa, Jesu wakanghwina mu Garireya ecicumaera masoko akanaka a Mwari
15 eciti: “Yazoguma nguva yakagajwa. Umambo hwa Mwari hwaaphedo. Khauyanyi, tendanyi masoko akanaka.”
16 Paaifamba ngo mumbhiripiri mo Jombe ro Garireya, wakavona Simoni no munukuna wake Andereya vecikhandira majuya avo mujombe, ngokuti vainga vatandi.
17 Ngo kudaro, Jesu wakati kwavari: “Nditeverenyi, ndinozomuita vatandi vo vandhu.”
18 Pondhopo vakasiya majuya avo vomutevera.
19 Paakaenda kumbeji padoko, wakavona Jakobo mwana wa Zebhedhi na Johani munukuna wa Jakobo, vari mu ngarava vecisona majuya avo,
20 iyena wakavadanija ngo kukasika. Ngo kudaro, vakasiya baba wavo Zebhedhi vari mu ngarava no varekhi, ivona vomutevera.
21 Ivona vakaenda ku Kafarnaume.
Payakaguma njiku yo Sabudu, Jesu wakanghwina mu sinagoga, wotanga kujijisa.
22 Ivona vakakahamara ngo majijisiro ake, ngokuti iyena waivajijisa zvaivha kuna Mwari, kuciripi inga zvaiithwa ngo vatari.
23 Pa mukuvo wondhowo, musinagoga mavo mainga no mundhu ano mujimu wakashata. Iyena waikhuwa eciti:
24 “Tinenyi itusu na imwimwi, Jesu wo Nazareta? Maviya kuzotiparaja here? Ndinonasa kumuziva kuti ndimwi ani, imwimwi muri Wakacena wa Mwari!”
25 Asi Jesu wakauvhunja kuti: “Nyararai. Budai mu mundhu uwu!”
26 Pasure po kuitisa kuti mundhu uwu abudihwe* no kukhuwa ngo izwi guru, mujimu wakashata wakabuda mwaari.
27 Ngo kudaro, vese vakakahamara maningi, votanga kubhuisana ngo pamusoro pazvo veciti: “Zvicinyi izvi? Asipi jijiso imbza iyi? Iyena atori no simba ro kugogomera mujimu yakashata, iyona yecimuzwira.”
28 Ngo kudaro, masoko aya akatokota ngo kukasika mu mativi ese o ndharaundha yo Garireya.
29 Pavakabuda mu sinagoga, vakaenda kumuzi ka Simoni na Andereya. Jakobo na Johani vakaendavo.
30 Vambiya va Simoni vainga vakavata ngokuti vaihwaja,* vajiji vakabhuya na Jesu ngo pamusoro pavo.
31 Iyena wakaenda kwavari, wovabata ngo nyara yavo, perapo wovamusa. Kupisa muviri kwiya kwakapera, ivona votanga kuvashandira.
32 Comadeko zuva noravira, vandhu vakatanga kuviisa vese vaihwaja no vainga no madhimoni;
33 vandhu vese vo mudhorobha vakaungana pa musuvo.
34 Ngo kudaro, wakarapa vandhu vakawanda vaihwaja ndhendha jakasiyana-siyana. Iyena wakagogomera madhimoni akawanda asi aacaitenderepi kuti madhimoni averekete ngo pamusoro pake, ngokuti iwona aimuziva kuti iyena ndi Kristu.*
35 Comangwanani, kucakasvipa, iyena wakafumirisa ecienda ku ndau icina vandhu, wotanga kuita mukumbiro kondhoyo.
36 Asi Simoni no vaainga navo, vakaenda komupsaka.
37 Pavakamuwana, vakamuvhunja kuti: “Vandhu vese vari kumupsaka.”
38 Asi iyena wakati kwavari: “Ngatende ku ndau imweni, mu madhorobha ari muphedo muno kuti ndiende kocumaeravo kondhoyo, ngokuti ndizvona zvandakaviira.”
39 Perepo wakaenda kocumaera mu masinagoga avo ku Garireya no kugogomera madhimoni.
40 Mundhu umweni wainga no mapere wakamukhwederera, wogwadama ecideketera kwaari kuti: “Kudari mecida, mungandirapa.”
41 Pondhopo wakamuzwira pena, wotambanuja nyara yake, womupsasa, eciti: “Ndinoda! Mapere ako ngaapere.”
42 Pa mukuvo wondhowo, mapere ake akangara-ngara, iyena wovanga.
43 Iyena wakamueneka pasure po kumuvhunja kuti:
44 “Bhasopai, ucadovhunja ariwese, asi endai kojitatija ku mupiri no kuita cipo cakanangwa mu mutemo wa Mosi, kuti vavone kuti wavangadi.”
45 Paakandopinda, wakatanga kutokotesa masoko aya ku mativi ese. Izvo zvakaita kuti Jesu atame kunghwina mu dhorobha ecivoneka ngo vandhu. Iyena waigara ega. Asi vandhu vaindoviya kwaari vecivha ku mativi ese.
Masoko o Pasi
^ Vonanyi Kudurujihwa ko Magama.
^ Kana: “vaindondomejwa; vaibijwa mu kumwa.”
^ Kana: “avhunde.”
^ Gama ngo Gama: “ngokuti vaipisa muviri.”
^ Kangaije: “aimuziva kuti iyena ndiyani.”
