Marko 10:1-52
10 Kuvhira pondhopo, iyena wakamuka woenda ku mugano wo Judheya, mwombera ko Jordhani, mbungano yakamutendenejazve. Iyena wakatangazve kuvajijisa inga zvaaindoita.
2 Vafarisi vamweni vakamukhwederera, vecida kumueja. Ivona vakamuvhunjisa dangani zvinotendehwa kuti mwanarume arambe mukaji.
3 Iyena wakavadavira kuti: “Mosi wakamuvhunjenyi?”
4 Ivona vakati: “Mosi wakatendera kuti mwanarume atare tsamba yo kurambana. Akapeja woipekeja mwanakaji, perepo womupindisa.”
5 Asi Jesu wakavadavira kuti: “Mosi wakamutarira mupango uwo ngo ndava yo kucunga ko mwoyo jenyu.
6 Asi, kuvhira pa kutanga, paakasika zviro, ‘Iyena wakaita mwanarume no mwanakaji.
7 Ngo ndava yazvo, mwanarume anozosiya baba na mai wake,
8 vovaviri vanozoita nyama imwe,’ ngo kudaro, avaciripizve vaviri, asi vaanyama imwe.
9 Mundhu acadoparajanisa zvakabatanijwa ndi Mwari.”
10 Povakahwirira kanyi, vajiji vakatanga kumuvhunjisazve ngo pamusoro pazvo.
11 Iyena wakavadavira kuti: “Ariwese anoramba mukaji wake wocadhazve no umweni, anoita upombo, wotama kugondeka kwaari,
12 kudari mukaji akaramba mwamuna wake wocadha no umweni, anoita upombo.”
13 Vandhu vakatanga kumuviisira vana vadoko kuti avapsase, asi vajiji vakavakamisa.
14 Asi Jesu paakazvivona, wakanyangajwa wovavhunja kuti: “Regeranyi vana vadoko vaze kondiri, mucavakamisa, ngokuti Umambo hwa Mwari ngo hwo vandhu vakadari inga ndivona.
15 Zvokadi ndinomuvhunja kuti, wiya acikaashiri Umambo hwa Mwari inga maashirire anoita mwana mudoko, aazonghwinimo.”
16 Iyena wakatora vana vadoko, wovakumbatira ecivakomborera ngo kuvacanjikira nyara.
17 Paainga ecibuda, mwanarume umweni wakaguma ecigogoma, wogwadama pamberi pake ecimuvhunjisa kuti: “Mujijisi Wakanaka, ngo zvapi zvandinodikana kuita kuti ndigare utaka hwo upenyu hucikaperi?”
18 Jesu wakamudavira kuti: “Uri kundidanijirenyi kuti Mujijisi Wakanaka? Akuna mundhu wakanaka. Wakanaka ndi Mwari basi.
19 Unoiziva mupango yokuti: ‘Ucauraya, ucaita upombo, ucaba, ucaita ucapupu hwo kunyepa, ucatora zviro zvo umweni ngo kumucengejera, no wokuti, kujai baba na mai wako.’”
20 Mwanarume wiya wakamuvhunja kuti: “Zviro zvese izvi ndiri kuzviita, kuvhira pa udoko hwangu.”
21 Jesu wakamusota, womuda, perapo womuvhunja kuti: “Pano ciro ciri kusara kwauri: Endai, tengesai zvaunazvo, utore mareyo uipe varombo, ukadaro, unozova no upfumi kudenga. Ukapeja, viyai uite muteveri wangu.”
22 Asi iyena wakapinda akacamwa ngo zvakadavira Jesu, ngokuti wainga no zviro zvakawanda maningi.
23 Jesu naaringa-ringa, wakavhunja vajiji vake kuti: “Zvinonesa maningi kuti vandhu vakakhupuka vanghwine mu Umambo hwa Mwari.”
24 Asi vajiji vakakahamara ngo masoko ake. Jesu wakavavhunja kuti: “Vana vangu, zvinonesa maningi kunghwina mu Umambo hwa Mwari.
25 Zvakareruka kuti kamera inghwine ngo pacibovo co njingano, kuciripi mukhupuki kunghwina mu Umambo hwa Mwari.”
26 Ivona vaindokahamara maningi, vomuvhunjisa kuti:* “Waro ndiyani angazoponeswa?”
27 Jesu wakavasotesesa, wovavhunja kuti: “Izvi azvikwanisiki ku vandhu, asi kuna Mwari, zviro zvese zvinokwanisika.”
28 Pedhru wakatanga kumuvhunja kuti: “Vonanyi! Itusu takasiya zviro zvese tomutevera.”
29 Jesu wakati: “Ndinomuvhunja zvokadi kuti, wese wiya wakasiya nyumba, hama no hambzaji kana mai na baba, vana kana maminda ngo ndava yo zina rangu no masoko akanaka,
30 anozowana mu mukuvo uno, nyumba, hama, hambzaji, mai, vana no maminda zvinodarika zana* kupinda zvaainga nazvo, pamwepo no kuteverehwa. Wozowana upenyu hucikaperi pa nguva inozari.
31 Vazinji vari pakutanga, vanozoita vokupejisira, vokupejisira vanozoita vokutanga.”
32 Jesu no vajiji vake vainga mu gwanja ro kuenda Jerusarema, Jesu ndiyena wainga kumbeji, vajiji vaikahamara, asi vandhu vaivatevera vakatanga kuthya. Jesu wakadanijazve Gumi na vaviri pamutivi, wotanga kuvavhunja zviro zvaida kuzomuitikira, eciti:
33 “Vonanyi! Tiri kuenda Jerusarema, Mwana wo mundhu anozopuwa mu nyara jo vapiri vakuru no vatari. Ivona vanozomutongera rufu, vanozomupa mu nyara jo vomajinja,
34 ivona vanozomushora, kumupfirira mata, kumutaka no kumuuraya. Perapo anozomuswa pa njiku yocitatu.”
35 Jakobo na Johani, vana va Zebhedhi, vakamukhwederera vomuvhunja kuti: “Mujijisi, tinoda kuti mutiitire ciricese catinomukumbira.”
36 Iyena wakavavhunjisa kuti: “Munoda kuti ndimuitirenyi?”
37 Ivona vakadavira kuti: “Titenderenyi kuti tigare umwe ku mukono muho wenyu, umweni ku mukono boshwe wenyu mu Umambo hwenyu.”
38 Asi Jesu wakavavhunja kuti: “Amuzvizivi zvamuri kukumbiraro. Munokwanisa kumwa zvandiri kumwari nokuti kubhabhatijwa ngo rubhabhatijo hwandiri kuithwari?”
39 Ivona vakati: “Tinokwanisa.” Jesu wakavavhunja kudari: “Imwimwi munozomwadi zvandiri wari kumwa no kubhabhatijwa ngo rubhabhatijo hwandiri kuithwari.
40 Asi, kuti mugare mukono muho kana mukono boshwe asipi inini ndinopa ndau iji, ngo ja vaya vakajinasiririhwa.”
41 Gumi ro vajiji vamweni povakazvizwa, vakanyangajwira Jakobo na Johani.
42 Jesu wakavadanija, wovavhunja kuti: “Imwimwi munozviziva kuti vaya vanozivika inga vatongi vo majinja vanobzinyirira vandhu vavo, vakuru vavo vanovatonga.
43 Izvi azvivhiri kuitika pakati penyu; asi wiya anoda kuita mukuru pakati penyu, anodikana kuva mushandiri wenyu.
44 Wiya anoda kuva wokutanga pakati penyu, ngaave muranda wo vese.
45 Ngokuti pikija Mwana wo mundhu, aazivi kuviya koshandihwa, asi wakaviya koshandira no kupira upenyu hwake kuti aponese vandhu vazinji.”
46 Perapo vakaguma ku Jeriko. Asi Jesu no vajiji vake no vandhu vakawanda pavaibuda mu Jeriko, Bhatimeu (mwana wa Timeu), mupembhi* wainga bofu, waigara mu mbhiripiri mo citaka.
47 Paakazwa kuti ndi Jesu wo Nazareta, wakatanga kukhuwa eciti: “Mwana wa Dhavhidhi, Jesu, ndiitirevo usizi!”
48 Paaikhuwa, vandhu vazinji vakatanga kumukamisa, vecimuvhunja kuti anyarare, asi iyena waiengejera kukhuwa, eciti: “Mwana wa Dhavhidhi, ndiitirevo usizi!”
49 Ngo kudaro, Jesu wakaima, wonanga kuti: “Mudanijenyi.” Ivona vakamudanija vomuvhunja kuti: “Cungai! Mukai; uri kudanijwa ndiyena.”
50 Iyena wakakhandira nguvo yake, wogogoma kuenda kwainga na Jesu.
51 Jesu wakamuvhunjisa kuti: “Unoda kuti ndikuitirenyi?” Bofu riya rakamuvhunja kuti: “Rabhoni,* ndirapenyi meso angu.”
52 Jesu wakamuvhunja kuti: “Endai. Rutendo hwako hwakuponesa.” Kuvhira pondhopo, iyena wakatanga kuvona, womutevera mu citaka.
Masoko o Pasi
^ Kangaije: “vovhunjisana ngocavo kuti.”
^ 100.
^ Kana: “mundhu anokumbira zimora.”
^ Zvinoreva kuti: “Mujijisi.”
