Marko 11:1-33
11 Pavaikhwedera Jerusarema, Jesu wakaguma pa Dundhu ro Maorivhe raiwanika Bhetifajhe no Bhetaniya. Iyena wakatuma vajiji vake vaviri,
2 wovavhunja kuti: “Endanyi mu mutundhu wamuri kuvonaro, mukandonghwinemo, munozowana cimwana co mbongoyo cakasungihwa, cicizivi kumbopakihwa ngo mundhu mbhera wari. Cisujunurenyi, muciviise kuno.
3 Kudari ari wese akamuvhunjisa kuti ‘muri kuzviitirenyi?’ Muvhunjenyi kuti: ‘Mambo ari kucida, iyena anociviisa ngo kukasika.’”
4 Ngo kudaro, ivona vakaenda, vowana cimwana co mbongoyo cakasungihwa pa musuvo ngo kunja, pa citaka. Ivona vakacisunungura.
5 Vandhu vamweni vaingepo vakavavhunja kuti: “Muri kusunungurirenyi cimbongoyoco?”
6 Ivona vakavadavira zvavakavhunjwa ndi Jesu. Vandhu vaya vakavaregera.
7 Ivona vakaviisa cimwana co mbongoyo kuna Jesu, vodira nguvo javo pa nyezuru paco, wocipakira.
8 Vandhu vazinji vaiwaja nguvo javo mugwanja, vamweni vaigura matavi o mucindu.
9 Vainga pambeji, no vainga sure, vaindokhuwa veciti: “Mwari, tinodeketera kwamuri, ponesanyi! Komboreranyi wiya anoviya ngo zina ra Jehovha!*
10 Mwari komboreranyi Umambo huri kuviyari hwa baba wedu Dhavhidhi! Tinomukumbira, imwimwi muri kumusoro-soro kuti, ponesanyi!”
11 Wakanghwina mu Jerusarema, woenda mu themberi. Iyena wakasota-sota zviro zvese, asi zvecivoneka kuti zuva rainga ravira, wakaenda Bhetaniya no Gumi na vaviri.
12 Mangwana fumi, paakavha Bhetaniya, Jesu wakazwa njara.
13 Naavona ngo ndhambo mukuyu wakazara ngo masakani, wakaukhwederera ecida kupsaka ciricese. Asi paakaguma phedo, aazivi kuwana ciro. Wakakhanda masakani basi, ngokuti aucaingepi mukuvo wo makuyu.
14 Iyena wakauvhunja kuti: “Akunazve anozoha mucero yako.” Vajiji vake vainga vecizvizwa.
15 Ivona vakaguma Jerusarema. Iyena wakanghwina mu themberi, wotanga kugogomera vaitengesa no kutenga mu themberi, wovinduja meza jo vacinjanisi vo mare no kadera jo vandhu vaitengesa njiva,
16 aacaitenderepi kuti ariwese athware ciricese ecigurisira ngo mu themberi.
17 Iyena waivajijisa ecivavhunja kuti: “Azvizivi kutahwa kuti: ‘Nyumba yangu inozodanijwa kuti nyumba yo mukumbiro yo majinja ese’? Asi imwimwi maiita nyumba yo mbavha.”
18 Vapiri vakuru no vatari pavakazvizwa, vakapsanga mauraire avangamuita; ivona vaimuthya ngokuti mbungano yese yaikahamara maningi ngo majijisiro ake.
19 Zuva noravira, ivona vakabuda mu dhorobhemo.
20 Pavaipinda co mangwana fumi, vakavona mukuyu wiya waoma mbhera ku muji jawo.
21 Pedhru wakazviceuja womuvhunja kuti: “Rabhi, vonanyi! mukuyu wamakatukaya, waoma.”
22 Jesu wakadavira kuti: “Tendanyi Mwari.
23 Ndinomuvhunja zvokadi kuti, wiya anovhunja dundhu iri kuti: ‘Ivhai pano, ujikhandire mujombe,’ acikakani-kani mu mwoyo mwake, asi ecitenda kuti zvaanonangaro zvinoitika, zvinozoitika kwaari.
24 Ngo kudaro, ndinomuvhunja kuti, zviro zvese zvamunokumbira, tendanyi kuti munozozviashira no kuzozviwana.
25 Meciita mukumbiro, kudari muno ndava no mundhu ariwese, muregererenyi, kuti Baba wenyu vari kumatenga varegererevo kuposa kwenyu.”
26 *——
27 Vakahwirirazve Jerusarema. Pavainga vecifamba mu themberi, vapiri vakuru, vatari no madhodha* vakamukhwederera,
28 vomuvhunjisa kuti: “Simba raunoita ndirona zviro izvi rakavha kwapi? Wakaripuwa ndiyani simba raunoitaro ndirona zviro izvi?”
29 Jesu wakavadavira kuti: “Ndiri kudavo kumuvhunjisa ciro cimwe. Mukandidavira, ndinozomuvhunjavo kuti simba randinoita ndirona zviro izvi rakavha kwapi.
30 Rubhabhatijo hwa Johani hwakavha kudenga kana ku vandhu? Ndidavirenyi.”
31 Asi ivona vakatanga kurangarira ngocavo veciti: “Kudari tikananga kuti: ‘Hwakavha kudenga,’ iyena anozotivhunjisa kuti: ‘Waro, ngenyi amuzivi kumutenda?’
32 Asi kudari tikananga kuti: ‘Hwakavha ku vandhu,’ zvicinyi zvinotiitikira?” Ivona vaithya vandhu ngokuti vese vaivona kuti Johani wainga muporofeti.
33 Ngo kudaro, vakadavira Jesu kuti: “Atizvizivi.” Jesu wakavapingura kudari: “Andimuvhunjivo kunovha simba randinoita ndirona zviro izvi.”
Masoko o Pasi
^ Vonanyi Kudurujihwa ko Magama.
^ Vonanyi masoko o pasi ari pana Mateu 17:21.
^ Kana: “no vakuru.”
